Pedped ko an Jerbal in Karejar, Juun 2018

Men ko Ļalem Riron̄jake ko Rem̧m̧an rej Kōm̧m̧ane

M̧ool in ron̄jake enaaj jipan̄ eok jeļā ekōjkan jipan̄ n̄an tōpar aikuj ko ilo mour in jetōb im kanniōk an ro me Rilo̧mo̧o̧r eo enaaj kar kōm̧m̧ane n̄an er.

Elder Jeffrey R. Holland jān Doulul eo an Jon̄oulruo Rijilōk ro eaar ba: “Bōlen emaron̄ ļapļo̧k an aorōkļo̧k ron̄jake jān kōnono. … Eļan̄n̄e jej ron̄jake kōn iakwe, jeban aikuj ļōmņake ta eo jenej ba. Enaaj letok n̄an kōj—jān Jetōb eo.”¹

Ron̄jake ej juon kapeel jemaron̄ ekkatak. Ron̄jake ej kwaļo̧k ad iakwe n̄an ro jet, ejipan̄ kalōk jem̧jerā ko rekajoor, im karuwaineneiktok Jetōb eo n̄an kōjeram̧m̧an kōj kōn menin letok eo an jeļā im kūle n̄an jipan̄ kōj meļeļe aikuj ko an ro jet.² En̄in ej jekjek ko ļalem jemaron̄ kōkōm̧anm̧anļo̧k ekōjkan ad ron̄jake.

1.Leļo̧k Aer Iien

Elōn̄ armej ro rej aikuj iien n̄an aiin ļōmņak ko aer m̧okta jān kōnono. Leļo̧k aer iien n̄an ļōmņak jim̧or m̧okta im ālkin aer ba juon men (lale Jemes 1:19). Kōnke eaar dedeļo̧k aer ekōnono ejjab meļeļe in em̧ōj aer ba aolep men ko rej aikuj in ba. Jab mijak in ikōn̄ (lale Job 2:11–3:1 im Alma 18:14–16).

2.Lukkuun Ron̄jake

Em̧ōkaj ad ļōmņak jān an ro jet kōnono. Jum̧ae kapo n̄an kwaļo̧k jem̧ļo̧k ko ak n̄an ļōmņak m̧okta kōn ta eo kwonaaj ba n̄e ededeļo̧k er (lale Jabōn Kōnnaan ko 18:13). Ijjello̧kin, ron̄jake kōn kōttōbar eo n̄an meļeļe. Uwaak eo am̧ enaaj em̧m̧anļo̧k kōnke enaaj bōk eļapļo̧k meļeļe.

3.Kalikkar

Jab mijak n̄an kajjitōk kajjitōk ko me rej kalikkar juon men kwojjab meļeļe kake (lale Mark 9:32). Kalikkar ej kadikļo̧k likjab in meļeļe im ej kwaļo̧k itok limo eo am̧ ilo ta eo kar ba.

4.Kōļmāņļo̧kjeņ

Ba ilo tukadu in ta eo kwar ron̄ im ekōjkan am̧ meļeļe en̄jake an ro jet. Menin ejipan̄ er jeļā eļan̄n̄e kar meļeļe er im leļo̧k n̄an er juon iien em̧m̧an n̄an kalikkar.

5.Pukōt Bōro Kuk

Komaron̄ jab errā kōn aolep men kar ba, bōtaab errā kōn ta eo komaron̄ ilo ejjeļo̧k kwaļo̧k en̄jake ko am̧ make. Erom errā emaron̄ jipan̄ ņa mejļan inepata im kakkōt kōn ijo an juon make (lale Matu 5:25).

Būreeejtōn Russell M. Nelson eaar katakin bwe jej aikuj “katak n̄an ron̄jake, im ron̄jake n̄an katak jān doon.”³ Ilo am̧ ron̄jake kōn kōttōbar n̄an katak kōn ro jet, kwonaaj pād ilo juon jekjek eo n̄an meļeļe aikuj ko aer im ron̄ im̧we ko kōn wāween am̧ maron̄ kea kōn ro ipeļaakūm̧ āinwōt an Rilo̧mo̧o̧r eo naaj kar kōm̧m̧ane.

Ron̄jake Ej Iakwe

Juon bwebwenato jān kōmeļeļe ko an Elder Holland kōn kajoor eo an ron̄jake:

“Eo m̧ōtta Troy Russell eaar jidik kake kadiwōj tūrak eo waan jān kūraaj eo an. … Eaar en̄jake an neen itulik tallōn̄ ioon juon kūrūbbo̧k. … Eaar to jān wa eo im maron̄ lo ļaddik eo nejin aorōk ratimjuon-iiō dettan, Austen, eaar pedo ioon pij eo. … Austen eaar mej.

“Jab maron̄ kiki, jab maron̄ lo aenōm̧m̧an, Troy eaar rup būruwōn. … Bōtaab ilo iien eo būrom̧ōj in ekar itok … John Manning. …

“Ij lukkuun m̧ool, ijjab jeļā kōn ta jikejuuļ eo John im eo m̧ōttan edik rekar loļo̧k im̧we im̧ōn Russell. … Ta eo ijeļā me ej bwe jibūriin̄ eo ļo̧k Brother Manning eaar m̧al laļļo̧k im kotak lōn̄tak Troy Russell jān jorrāān kabūrom̧ōjm̧ōj eo an jikin ettōr eo ejja āinwōt eļan̄n̄e eaar kotak lōn̄tak Austen eo edik emake. Āinwōt … brother ilo gospel in eaar aikuj in āinwōt, John eaar bōk eddo in kea an priesthood eo im dāpij wōt Troy Russell. Eaar jino ilo an ba, “Troy, Austen ekōņaan bwe kwon wōnm̧aanļo̧k wōt —ekoba pād ilo jikin ikkure basketball eo—kōn menin inaaj pād ijin aolep jibbon̄ ilo 5:15 a.m. Kwon pojak. …’

“‘Ijjab kōņaan etal in ikkure baskeball,’ Troy eaar jiron̄ eō tokālik, ‘kōnke ikōn iien otemjej kar bōk Austen ippa. … Bōtaab John ekar ba, kōn menin iaar etal. Jān kar raan eo m̧oktata liktak, kōm kar kōnono—ak ijjelo̧kin ikar kōnono im John ekar ron̄jake. … Ilo jino in eaar pen, bōtaab ium̧win iien ko iaar kile iaar lo kōkajoor eo aō ilo jekjek eo an [John Manning], eo eaar iakwe eō im ron̄jake eō m̧ae iien eo eaar āliktata maron̄ in lo lan̄lōn̄ ilo an mour.’”⁴

© 2018 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an Ministering Principles, June 2018. Marshallese. 15055 874

Kakeememej ko

1. Jeffrey R. Holland, “Witnesses unto Me,” Liahona, Juļae 2001, 16.

2. Lale David A. Bednar, in “Panel Discussion” (worldwide leadership training meeting, Nob. 2010), broadcasts.lds.org.

3. Russell M. Nelson, “Listen to Learn,” Ensign, Māe 1991, 23.

4. Jeffrey R. Holland, “Emissaries to the Church,” Liahona, Nov. 2016, 62, 67.

Jerbal in Karejar āinwōt Rilo̧mo̧o̧r eo Eaar

Ke Jisōs eaar ilo̧k jān Jericho, ruo em̧m̧aan ripilo raar lam̧ōj n̄an E, ba, “Tūriam̧okake kōmro, O Irooj. …

“Im Jisōs e bōjrak, im kūrtok er im ba, ta eo kom̧ro kōņaan bwe In kōm̧m̧an n̄an kom̧?

“Re ba n̄an e, Irooj, bwe mejem ren peļļo̧k.

“Im Jisōs ej tūriam̧okake er, im un̄n̄ūr mejeir, im e m̧ōkaj an mejeir loļo̧kjeņ, im rej ļoor e” (Matu 20:30, 32–34).

Ta eo jemaron̄ katak jān ekōjkan an Rilo̧mo̧or eo kar ron̄jake?

Kūr eo n̄an Jerbal

Ļōmņak kōn ekōjkan am̧ naaj kōjerbal pedped kein kōn ekōjkan am̧ karejar. Kajjitōk ippān ro me kwoj kwaļo̧k ta eo rej aikuji. Ron̄jake n̄an uwaak eo aer im im̧we ko jān Jetōb Kwojarjar. Jerbale ta eo kwoj ron̄.

Pedped ko an Jerbal in Karejar raar kōm̧m̧an n̄an jipan̄ kōj katak n̄an kea kōn doon—ejjab aikuj in kwaļo̧ke āinwōt juon ennaan. Ilo ad itok n̄an jeļā kajien ro jej jerbal n̄an er, Jetōb Kwojarjar eo enaaj im̧we kōj n̄an jeļā ta ennaan eo remaron̄ aikuji āinwōt dam̧oļo̧k n̄an kea eo ad im jouj eo.