Pedped in Katak ko an Jerbal in Karejar
Ekōjkan Ad Maron̄ Ejake in Ippān Doon ilo Kabun̄ in?
Liaona, Juļae 2019
Pija ko jān Getty Images ko
N̄e jej reitok reitak ilo wad im branch ko ad, jej lo armej ro me em̧m̧an aer ikitōltōk ippān ro jet. Ta eo jejjab kile ej bwe jekdo̧o̧n ibwilijin ro me em̧m̧an aer ikitōltōk ippān ro jet, elōn̄ ro me rej en̄jake aer jab. Juon ekkatak, n̄an waanjon̄ak, ejjab to kar lo bwe enan̄in jimettan in rūtto ro ilo United States kar kwaļo̧k en̄jake in ajimakeke, jab kobaļo̧k, ak ettoļo̧k jān ro jet.1
Ej aorōk n̄an en̄jake kobaikļo̧k. Ej aikuj eo an armej im̧aan tata, im n̄e jej en̄jake jab kobaikļo̧k, emetak. Kōmakikļo̧k emaron̄ kwaļo̧k en̄jake ko an būrom̧ōj ak illu.2 N̄e jejjab en̄jake āinwōt jej uwaan, jej kajjion̄ kappukōt juon jikin ijo eļapļo̧k ad ineem̧m̧an ie. Jej aikuj in jipan̄ aolep en̄jake bwe rej uwaan ilo m̧ōn jar eo.
Ekoba āinwōt Rilo̧mo̧o̧r eo
Rilo̧mo̧o̧r eo eaar waanjon̄ak eo eweppān an kaorōk im kobaik ro jet. Ke Eaar kāālet Rijilōk ro An, Eaar jab kalimjōk wōt jekjek, m̧weie, ak jerbal ko kautieji. Eaar kaorōk kōrā in Samria eo ilo aibōj laļ eo, kam̧ool n̄an liin kōn ekwojarjar eo An kejekdo̧o̧n ekōjkan an Riju ro jab kautiej Risamaria ro (lale Jon 4). Ej kalimjōk bōro ko im ej bōro eo im jab kalijōkļo̧k (lale 1 Samuel 16:7; Katak im Bujen ko 38:16, 26).
Rilo̧mo̧o̧r eaar ba:
“Kien ekāāl Ij lewōj n̄an kom̧, kom̧win yokwe doon; āinwōt Iar yokwe kom̧, kom̧win barāinwōt yokwe doon.
“Ilo men in armej otemjej renaaj jeļā bwe kom̧ij rikaļoora, eļan̄n̄e kom̧ij yokwe doon” (Jon 13:34–35).
Ta eo Jemaron̄ Kōm̧m̧ane?
Jet iien epen n̄an jiron̄ eļan̄n̄e juon ej en̄jake āinwōt rejjab m̧ōttan. Elōn̄ wōt armej ro ejjab ba—ekkā aer jab ba rejjab m̧ōttan. Bōtaab kōn būruwōn iakwe, tōl eo an Jetōb Kwojarjar, im juon kijejeto n̄an jeļā kake, jemaron̄ kile n̄aat eo juon ejjab en̄jake an koba ilo kweilo̧k ko an Kabun̄ im m̧akūtkūt ko.
Kakkōļļe ko rej Kwaļo̧k Juon ej En̄jake Makeļo̧k:
-
Kajin ānbwin (body language), ko āinwōt edim aer pokpā ak aolep rej kalimjōk laļ.
-
Jijet ilo tulik in ruum̧ eo ak jijet make.
-
Jab ilo̧k n̄an jar ak jakutkut in kobaļo̧k.
-
Em̧m̧ōkaj ilo̧k jān kweilo̧k ko ak m̧akūtkūt ko.
-
Jab bōk kuņaan ilo bwebwenato ko ak katak ko.
Men kein remaron̄ kakōļļe ko an bar jet en̄jake ko barāinwōt, ko āinwōt ejookok, inepata, ak jab em̧m̧an pād. Membōr ro emaron̄ “oktak” aer en̄jake n̄e rej membōr kāāl an Kabun̄ in, rej jān bar juon laļ ak m̧anit, ak kar en̄jake juon oktak in mour ekōmettak ejjab etto, ko āinwōt jepel, mej an juon uwaan baam̧le eo, ak m̧ōkaj in ro̧o̧l jān juon mijen.
Jekdo̧o̧n ta un eo, jejjab aikuj āliklik n̄an jipan̄ er kōnke kōn en̄jake in iakwe. Ta eo jej ba im ta eo jemaron̄ kōm̧m̧ane emaron̄ ejake juon en̄jake bwe aolep rej ruwainene im aolep rej aikuji er.
Jet Wāween ko n̄an Kobatok im Ruwainene
-
Jab aolep iien jijet iturin ejja armej eo wōt ilo m̧ōn jar eo.
-
Jab likjab kōn paotok ko itulik in armej eo n̄an lo m̧ool in armej eo. (Kōn elōn̄ļo̧k ikkijien unin kōnono in, lale “Ministering Is Seeing Others as the Savior Does,” Liahona, Juun 2019, 8–11.)
-
Kobaik ro jet ilo bwebwenato ko.
-
Kūr ro jet n̄an erom m̧ōttan mour eo am̧. Komaron̄ kobaik er ilo m̧akūtkūt ko em̧ōj de am kar karōki.
-
Pukōt im ekkal ioon itok limo ko reier wōt juon.
-
Jab dāpij jemjerā bwe kōnke juon ejjab tōpar kōtmene ko am̧.
-
N̄e kwoj lo juon men ejej uwaan kōn juon armej, kaitok limoūm̧ ie ijello̧kin reilo̧k jāne ak kōjekdo̧o̧ne.
-
Kwaļo̧k iakwe im leļo̧k naan in nebar ko rem̧ool.
-
Bōk iien n̄an ļōmņak kōn ta lukkuun meļeļe in n̄e jej ba Kabun̄ in ej n̄an aolep, jekdo̧o̧n ta oktak ko aer. Ekōjkan ad maron̄ kōm̧m̧ane menin juon m̧ool in?
Ejjab aolep iien epidodo n̄an en̄jake aenōm̧m̧an iepļaakin armej ro roktak jān kōj. Bōtaab kōn kaminene, jemaron̄ em̧m̧anļo̧k ilo pukōt aorōk eo ilo oktak ko im kam̧m̧oolol kōn jipan̄ ko ejej uwaer kajjojo armej rej būktok. Āinwōt an Elder Dieter F. Uchtdorf jān Doulul eo an Jon̄oulruo Rijilōk ro kar katakin, oktak ko ad emaron̄ jipan̄ kōm̧m̧an bwe jān juon armej em̧m̧anļo̧k, em̧ōņōņōļo̧k: “Itok, jipan̄ kōm kalōk im kōkajoorļo̧k juon mejatoto in kemour, jouj, im meanwōd n̄an aolep ajri ro nejin Anij.”3
Kar Kōjeraam̧m̧an jān Kobaiktok
Christl Fechter ekar em̧m̧akūt n̄an bar juon laļ ālkin an pata eo kakkure kapijuknen eo an. Liin eaar jab kanooj em̧m̧an an kōnono kajin eo im kar jab jeļā jabdewōt ilo jikin eo an ekāāl, kōn menin ilo jinoin liin eaar en̄jake ettoļo̧k im makeļo̧k.
Āinwōt juon uwaan Kabun̄ in, liin eaar kōn peran im kar jino etal n̄an ward eo an ekāāl. Liin eaar inepata bwe an ekōnono enaaj kar dāpij an armej ro kōņaan kōnono n̄an e ak bwe naaj kar watōke jān an juon kōrā ejjeļo̧k rūturin.
Bōtaab eaar ioon ro jet me raar jab kalimjōk oktak ko an im karuwaineneiki n̄an jukjukinpād in m̧ōttā eo aer. Raar pukōtļo̧k ilo iakwe, im liin ejjab to kar lo e make poub in jipan̄ katakin juon kūlaaj in Būraimere. Ajri ro raar waanjon̄ak ko rem̧m̧an an bōke, im en̄jake eo kōn kar iakwe im aikuj in kōkajoorļo̧k tōmak eo an im jipan̄ bar kōkāāl ajeļo̧k to̧o̧n wōt an mour eo An n̄an Irooj.