Te fa’anahora’a misiōnare ’e te mau ’ohipa ri’i nā te misiōnare

2.0

’Ōmuara’a

’Ua parau mai te Fatu ē : « ’Ia fa’anahonaho ’outou ia ’outou iho ’e ’ia fa’ata’a i tā te ta’ata tāta’itahi ato’a ti’a’aura’a » (Te Ha’api’ira’a Tumu ’e te mau Fafaura’a 104:11). Tē fa’ata’a nei teie tuha’a o te buka arata’i i te fa’anahora’a o te misiōni ma te vauvau nāhea i te ’ohipa maita’i a’e ’e nāhea i te ora ’e te hoa misiōnare, nāhea i te ’āmui i roto i te mau ’ohipa ri’i a te misiōni, nāhea i te fa’anaho i te tārena tāmahana ’e nāhea i te tāvini i te ta’ata ma te here mau o te Mesia (hi’o Moroni 7:44–47).

’Ei ha’amāramaramara’a, tē fa’a’ohipa nei teie mau ture i te parau taure’are’a misiōnare fa’atere nō te mau misiōnare e ti’ara’a fa’atere tō rātou, mai te ti’ara’a hoa mātuatua, fa’atere ha’api’ipi’i tuahine ’aore rā misiōnare fa’atere ārea. Nō te parau feiā fa’atere misiōni, ’o tō ’oe peresideni misiōni ïa, tei mau i te mau tāviri o te autahu’ara’a, nā reira ato’a tāna vahine.

E fa’a’ohipa ato’a teie mau ture i te mau parau ’episekōpo, peresideni titi, pāroita ’e titi. E fa’a’ohipa tano i te reira mau arata’ira’a i te mau peresideni ’āma’a, te mau peresideni mata’eina’a, te mau ’āma’a ’e te mau melo o te mata’eina’a.

2.1

Te fa’aterera’a misiōni

Tā ’oe hōpoi’a faufa’a roa a’e, ta’a ’ē noa atu te ti’ara’a fa’atere, ’o te rirora’a ïa ’ei misiōnare ha’apa’o maita’i ’e te pūpū iāna. E tano ato’a teie a’ora’a nō ’ō mai i te Fatu i roto i Te Ha’api’ira’a Tumu ’e te mau Fafaura’a ia ’oe : « Te mea faufa’a rahi roa a’e ia ’oe na, ’o te paraura’a ïa i te parau tātarahapa i teie nei [u’i], ’ia fa’afāriu mai ’oe i te mau vārua iā’u nei » (Te Ha’api’ira’a Tumu ’e te mau Fafaura’a 15:6).

2.1.1

Te feiā fa’atere misiōni : Tō ’oe peresideni misiōni ’e tāna vahine

Nō tō ’oe peresideni misiōni ’e tāna vahine e tāvini ’āmui nei ’ei feiā fa’atere misiōni, ’ua pi’ihia rāua i te Atua ’e ’ua fa’ata’ahia nō te fa’atere i te misiōni. E here ’āmui rāua ia ’oe ma te tāvini ia ’oe, e tauturu rāua ia ’oe ’ia fa’atupu i tā ’oe fā ’ei misiōnare, ma te tauturu i te pāruru ia ’oe, ’ia vai ’oa’oa ’oe.

E rave rahi hōpoi’a tā tō ’oe feiā fa’atere misiōni, e au i te misiōni. E ’ohipa ’āmui rāua nō te turu ’e nō te fa’aitoito ia ’oe, nō te fa’aro’o i tō ’oe mau māna’ona’ora’a, nō te pāhono i te mau uira’a, nō te hi’opo’a i te haerera’a i mua ’e nō te hōro’a i te parau a’o. Nō te mea tē mau nei tō ’oe peresideni misiōni i te tahi mau tāviri o te autahu’ara’a, tē ti’a nei ’oia ’ei ha’avā i roto i te misiōni. E fā’ihia te ’ōfatira’a pae ’āpeni ’e te tahi atu mau hara teimaha i tō ’oe peresideni misiōni (hi’o Mosia 26:29–30). ’Eiaha e ha’avare iāna. E tauturu ’oia ia ’oe ’ia tātarahapa (hi’o Nō te pūai ’o te feiā ’āpī [2022], « E tauturu Iesu Mesia ia ’oe », 6–9).

E nehenehe ’oe e tītau manihini i te vahine a te peresideni misiōni, te tahi misiōnare pa’ari ’aore rā tō ’oe hoa misiōnare ’ia haere mai i roto i te uiuira’a ’e te peresideni misiōni. ’Aita tā ’oe fa’aotira’a ’ia tītau manihini i te hō’ē ta’ata ’ia ’āmui mai e fa’aiti i te here o tō ’oe feiā fa’atere misiōni, tō rāua māna’ona’ora’a ’e te fa’ahiahia ia ’oe.

2.1.2

Te peresidenira’a misiōni

Tē peresideni nei tō ’oe peresideni misiōni i te misiōni ma te mau tāviri o te autahu’ara’a. E melo ’oia nō te hō’ē peresidenira’a misiōni, ’āpitihia ’e nā tauturu e piti.

E tauturu nā tauturu i roto i te peresidenira’a misiōni, mai te mau tauturu i roto i te hō’ē peresidenira’a titi ’aore rā te hō’ē ’episekōpora’a, ’ia fa’anaho ’e ’ia tauturu i te ’ohipa. ’Aita te mau tauturu i roto i te peresidenira’a misiōni e ha’apa’o i te ti’amāra’a o te mau misiōnare.

2.1.3

Fa’anahora’a nō te fa’aterera’a misiōni

E fa’a’ohipa tō ’oe peresideni misiōni i te heheura’a ’e te mau tāviri o te autahu’ara’a nō te fa’anaho i te ’ohipa. E fa’aue ’oia i te mau taure’are’a misiōnare ’ei ta’ata ha’api’ipi’i, ’ei hoa mātuatua, ’ei misiōnare fa’atere mata’eina’a, ’ei fa’atere ha’api’ipi’i tuahine, ’ei misiōnare fa’atere ārea ’e ’ei tauturu fa’atere misiōnare. ’Aita te mau tauturu fa’atere misiōnare, te mau misiōnare i te piha tōro’a ’e te tahi atu mau misiōnare e fa’aoti i te mau fa’auera’a fa’aterera’a ’aore rā te mau vāhi e tāvini ’oe. Terā rā, e nehenehe te peresideni misiōni e ’āpo’o ’e tāna vahine ’aore rā ’e te mau tauturu fa’atere misiōnare nō ni’a i te mau fa’auera’a misiōnare.

Tei roto tō ’oe feiā fa’atere misiōni ’e te mau tauturu fa’atere misiōnare, te mau misiōnare fa’atere ārea ’e te mau fa’atere ha’api’ipi’i tuahine, i te ’āpo’ora’a fa’atere o te misiōni. E ’āpo’o teie nau feiā fa’atere nō ni’a i te mau hina’aro o te mau misiōnare, ma te fa’anaho i te mau ’ohipa nō te tauturu i te misiōni ’ia haere i mua ’e ’ia fa’ahaere i te ’ohipa i mua.

2.1.4

Te mau hōpoi’a a te taure’are’a misiōnare fa’atere

Mai te tā’āto’ara’a o te mau misiōnare, e pe’e te mau taure’are’a misiōnare fa’atere i te parau a’o a Iesu Mesia ’ia « tāvini i te [Atua] ma [tō rātou] ’ā’au ato’a, [tō rātou] pūai, [tō rātou] mana’o ’e ma [tō rātou] itoito ho’i » ’e ’ia « ha’amana’o noa i te fa’aro’o, te vi’ivi’i ’ore, te ’ite, te hitahita ’ore, te fa’a’oroma’i, te aroha taea’e, te huru paieti, te aroha mau, te ’ā’au ha’eha’a, ’e te itoito » (Te Ha’api’ira’a Tumu ’e te mau Fafaura’a 4:2, 6). E ’ere te mau fa’auera’a fa’aterera’a ’ei tāpa’o fa’a’itera’a nō te hō’ē ’ohipa ta’a ’ē, ’aore rā nō te tahi fa’anu’ura’a ta’a ’ē, ’aore rā e ’ere i te fa’a’itera’a nō te ti’amā o te hō’ē misiōnare.

E hōpoi’a nā te mau taure’are’a misiōnare fa’atere ’ia :

’Imi, ha’api’i, bāpetizo ’e fa’ahoa i te mau ta’ata.
Fa’a’ite i te hi’ora’a nō te mau ture misiōnare, ’ia au i te huru ravera’a (hi’o 3.0).
Ha’api’ipi’i i te tahi atu mau misiōnare ’e fa’atere i te mau tāuiuira’a hoa (hi’o 2.3.1).
Hōro’a i te mau ha’amāramaramara’a ’e te mau arata’ira’a nō roto mai i te ’āpo’ora’a fa’atere o te misiōni, i te mau misiōnare o tā rātou e fa’atere ra.
Here ’e fa’ahoa i te tahi atu mau misiōnare. Tauturu ia rātou ’ia ’ite i te faufa’a o tā rātou mau ’ohipa.
Fa’aro’o i te māna’ona’ora’a o te tahi atu mau misiōnare. Tauturu atu ’e hōro’a i te parau a’o.
Fa’atītī’aifaro i te tahi atu mau misiōnare ma te marū ’e te ’ōmo’e, mai te mea e hina’arohia, ’ei reira fa’a’ite ai « i te here rahi » (hi’o Te Ha’api’ira’a Tumu ’e te mau Fafaura’a 121:41–43).
’Ohipa piri ’e te feiā fa’atere ’e te mau melo o terā vāhi.

Mai te tā’āto’ara’a o te mau misiōnare, te mau taea’e ’e te mau tuahine misiōnare e fa’auera’a fa’aterera’a tā rātou, e fa’atere rātou mai te Mesia te huru. Paraparau i te hō’ē misiōnare mai te mea ’aita tāna ravera’a, noa atu ā e taure’are’a misiōnare fa’atere, e tū’ati ra i te mau fa’auera’a ’e te mau ture misiōnare. Mai te mea ’aita teie fifi e ’āfaro, ’a fa’a’ite i te reira i tō ’oe taure’are’a misiōnare fa’atere ’aore rā i te peresideni misiōni, ’eiaha rā i te tahi atu mau misiōnare, te mau melo ’aore rā te mau hoa.

Nō te tahi atu mau ha’amāramaramara’a nō ni’a i te mau fa’auera’a ta’a ’ē ’e te mau hōpoi’a a te mau taure’are’a misiōnare fa’atere (te mau ta’ata ha’api’ipi’i, te mau hoa mātuatua, te mau misiōnare fa’atere mata’eina’a, te mau fa’atere ha’api’ipi’i tuahine, te mau misiōnare fa’atere ārea ’e te mau tauturu fa’atere misiōnare o te peresideni misiōni), hi’o te tuha’a 7.1, « Te hōpoi’a a te mau taure’are’a misiōnare fa’atere ».

2.1.5

Te mau hōpoi’a a te ta’ata hō’ē

« Fa’a’ohipa māite [’oe i tō ’oe] tōro’a i te Fatu » (Iakoba 1:19), riro ’ei ta’ata fa’arava’i iāna iho i te pae vārua, ’e « ’ia rave mai te au i [tō rātou] iho hina’aro » (2 Nephi 2:16) maoti te ti’aturira’a i te Fatu ’e te pe’era’a i te Vārua. Mai te mea e uira’a tā ’outou ’aore rā e māna’ona’ora’a :

Fa’a’ohipa i te ha’api’ira’a e « ’imi māite ’oe i te reira i roto i tō ’oe ferurira’a ’e […] i reira ’oe e ani mai ai iā’u nei ē ’ua ti’a ānei » (Te Ha’api’ira’a Tumu ’e te mau Fafaura’a 9:8).
’Imi i te arata’ira’a nā roto i te fāri’ira’a i tāna iho heheura’a ; nā roto i te pure ’e te ’imira’a i te mau pāpa’ira’a mo’a (te Buka a Moromona iho ā rā), te ’Ia poro haere i ta’u nei ’Evanelia, te mau ha’api’ira’a a te mau peropheta ora ’e teie mau fa’aturera’a.

Mai te mea e tītauhia te tahi atu ā tauturu i muri mai i te fa’a’ohipara’a i teie mau parau tumu, ’a ani i tō ’oe hoa misiōnare ’aore rā te mau taure’are’a misiōnare fa’atere. E mea pinepine, e nehenehe rātou e pāhono mai i tā ’oe mau uira’a ’e e fa’a’ore i tā ’oe mau māna’ona’ora’a. Mai te mea ra ’aita, e ani atu i tō ’oe feiā fa’atere misiōni, tō ’oe nā metua ’aore rā tō ’oe feiā fa’atere autahu’ara’a i tō ’oe fare. ’Eiaha e tāniuniu atu i te pū fa’atere o te ’Ēkālesia. ’Ia nā reira ’oe, e fa’aho’ihia ’oe i tō ’oe peresideni misiōni.

Paraparau i tō ’oe peresideni misiōni nō ni’a i te mau fifi ti’amāra’a. Paraparau i te hō’ē o tō ’oe feiā fa’atere misiōni nō ni’a i te mau fifi pārurura’a rū, mai te apura’a ’aore rā te hāmani-’ino-ra’a, ’aore rā te tahi atu fifi e’ita e nehenehe e fa’a’āfaro ’e te tahi atu mau misiōnare.

E taime paha i roto i tā ’oe misiōni e ’ite mai ’oe e mea fifi ’ia fa’atumu i ni’a i tā ’oe ’ohipa, nō te mau fifi e ’itehia ra, tōna iho mau fifi ’aore rā tō te ’utuāfare, ’aore rā nō te tahi ’ohipa i tupu na. Mai te reira iho ā. ’Eiaha e taiā e fa’a’ite i tō ’oe mau māna’ona’ora’a i tō ’oe hoa misiōnare, taure’are’a misiōnare fa’atere ’aore rā te hō’ē o te feiā fa’atere misiōni ’e ’ia tītau i te tauturu.

’A ha’amana’o i te tītaura’a manihini a te Fa’aora : « ’A hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u. ’A hi’o mai na i te mau puta i ha’aputahia i tō’u nei ’ao’ao ’e i te mau tāpa’o nō te mau naero i ni’a i tō’u nā rima ’e nā ’āvae ho’i ; ’a fa’aitoito noa, ’a ha’apa’o i tā’u mau fa’auera’a, ’e e noa’a ia ’ōrua te bāsileia o te ao ra. ’Āmene » (Te Ha’api’ira’a Tumu ’e te mau Fafaura’a 6:36–37).

2.2

Te mau hoa misiōnare

Tē pi’i nei te Fatu i te mau misiōnare nō te poro i tāna ’evanelia ’ei hoa misiōnare. « ’Ia haere tāta’ipitipiti atu rātou, ’e ’ia nā reira rātou i te poro haere nā te pae ’ē’a i roto i te mau ’āmuira’a ta’ata ato’a, ma te bāpetizo i te pape, ’e te tu’ura’a i te rima » (Te Ha’api’ira’a Tumu ’e te mau Fafaura’a 52:10). E rave rahi hoa misiōnare tā ’oe e ’ohipa ’āpīpiti atu i roto i tā ’oe misiōni. Te mau hoa misiōnare :

Rave tāhō’ē i te ’ohipa ’e parau pāpū ’āmui nō Iesu Mesia.
Turu i tō te tahi ’e tō te tahi maita’i pae vārua, i te pae manava ’e i te pae tino.
Tāmata i te pāruru i te tahi ’e te tahi.
E tī’a’aura’a tō te hō’ē i mua i te tahi ’ia ha’apa’o i te mau ture misiōnare.

2.2.1

Turu i te tahi ’e te tahi

E mea ti’a i te mau hoa misiōnare ’ia tauturu i te tahi ’e te tahi ’ia ha’api’i, ’ia tupu i te rahi ’e ’ia fa’atupu i te hīro’a o te Mesia (hi’o Te Ha’api’ira’a Tumu ’e te mau Fafaura’a 4 ’e « Nāhea vau i te fa’atupu i te mau taipe mai tō te Mesia ra te huru ? » i roto ’Ia poro haere i tā’u nei ’Evanelia, pene 6). E riro te ha’api’ira’a i te fa’a’oroma’i ’e te here, te fa’a’orera’a i te hara a te ta’ata ’e te fāri’ira’a i te mau huru ta’a ’ē ’ei ha’amaita’ira’a nō ’oe i te roara’a o tō ’oe orara’a.

’Ei hoa misiōnare :

E here, e fa’atura ’e e ha’apūai i te tahi ’e te tahi.
Ha’api’i ’āmui i te mau mahana ato’a ’e pure ’āmui ’e pure pinepine i te roara’a o te mahana.
Vai ha’eha’a ’e fāri’i i tō te tahi ’e tō te tahi mau pūai.
Rave i te tahi ’e te tahi mai tā ’oe e hina’aro ’ia ravehia ’oe.
Ha’apae i te fa’ahapara’a ’e te mārōra’a.
Ha’apae i te parau ’ino nō te tahi ’e te tahi i mua i te tahi atu mau misiōnare, te mau melo o te ’Ēkālesia ’aore rā te ’utuāfare ’e te mau hoa i’ō ’oe na.

Mai te mea e ’ite ’oe i te hō’ē noa atu ’ohipa ’aore rā ravera’a ti’a ’ore, ’a paraparau i te reira i tō ’oe hoa misiōnare. Mai te mea ’aita terā ’ohipa e ’āfaro ’aore rā tē fa’arahi noa atu ra tō ’oe hoa, ’ia vai te itoito ’e te here nō tō ’oe hoa misiōnare, nō te ani i tō ’oe peresideni misiōni i te tauturu (hi’o 3.9.2).

2.2.2

Vai ’āpīpiti noa

E riro te vai-noa-ra’a ’e tō ’oe hoa misiōnare ’ei pārurura’a i te mau ata’atara’a pae vārua, i te mau fa’ahapara’a hape ’e i te vai-otahi-noa-ra’a. Ha’apa’o i teie mau ture misiōnare i te mau taime ato’a, i te mau vāhi ato’a. ’Eiaha roa atu e vai ’ōtahi noa.

’Ia ti’a ia ’oe ’ia ’ite mata ’e ’ia fa’aro’o i tō ’oe hoa i te mau taime ato’a maori rā i te vāhi hapura’a pape, i roto i te uiuira’a ’e te hō’ē fa’atere misiōni ’aore rā i roto i te hō’ē uiuira’a bāpetizora’a (hi’o 2.3.6).
E ta’oto ’ōrua i roto i te hō’ē ā piha ’eiaha rā te hō’ē ā ro’i.
’Ia rave ana’e i tā ’oe mau ’ohipa i te fare, ’a fa’a’ohipa i te ferurira’a au nō te pāruru ia ’oe iho ’e nō te pe’e i te mau ture misiōnare nō ni’a i te mau ravera’a (hi’o 3.0).
’Eiaha e fa’ata’a i te taime nō te vai ’ōtahi noa. ’Ei hi’ora’a, ’eiaha e fa’aea i te maorora’a pō ’aore rā e ara i te po’ipo’i roa ’a ta’oto ai tō ’oe hoa misiōnare.
Mai te mea ’ua fa’ata’ahia ’oe ’e tō ’oe hoa misiōnare, ’a tāniuniu i tō ’oe peresideni misiōni i reira ra.

2.2.3

Te ’ohipara’a i tō ’oe vāhi

« Haere […] e ’ohipa […] ma tō [’oe] pūai » (Iakoba 5:72), ’e ’a fa’atumu i tā ’oe mau tauto’ora’a i ni’a i te vāhi tei fa’auehia ’oe ’ia ha’api’i. Fa’atumu i tā ’oe ’ohipa i ni’a i te mau vāhi e pāpū a’e ’oe i te tauturu i te mau ta’ata ’ia rave ’e ’ia ha’apa’o i te mau fafaura’a. ’Ei hi’ora’a, e fa’atumu i ni’a i te mau aroā fātata i te fare purera’a ’aore rā i ni’a i te aroā tei reira te mau melo itoito mau. ’A ha’amana’o i te parau fafau a te Fatu : « ’O ’oia ’o tē fāri’i mai ia ’outou na, ’ei reira ato’a ïa vau » (Te Ha’api’ira’a Tumu ’e te mau Fafaura’a 84:88).

E nehenehe e fa’aru’e i te vāhi tei fa’auehia ’oe nō te mau tāuiuira’a hoa (hi’o 2.3.1) ’aore rā nō te mau tauira’a vāhi (hi’o 2.3.2). Mai te mea e tītauhia ’ia haere ’oe i rāpae i tā ’oe vāhi i fa’auehia nō te tahi atu tumu, ’a tītau i te parau fa’ati’a a te misiōnare fa’atere mata’eina’a nō te haere i rāpae i tā ’oe vāhi i fa’auehia, i roto noa rā i tō ’oe mata’eina’a, ’aita rā te parau fa’ati’a a te misiōnare fa’atere ārea nō te tere i rāpae atu i tō ’oe mata’eina’a. Tītauhia te parau fa’ati’a a te peresideni misiōni, ’aore rā te ta’ata tāna e fa’aue, nō te haere i rāpae i tā ’oe ārea.

Mai te mea e tītauhia ’ia fa’aru’e i te vāhi tei fa’auehia ’oe nō te hō’ē ’ohipa rū, mai te ’ati nātura ’aore rā te tahi apura’a, ’aore rā nō te tītau i te rāpa’aura’a rū, ’a ’imi nā mua i te pāruru ’aore rā te rapa’aura’a ’ei reira e tāniuniu ai i tō ’oe peresideni misiōni ’aore rā te mau taure’are’a misiōnare fa’atere i te taime ihoa rā e nehenehe ’oe.

2.2.4

Te ’ohipara’a ’e te ta’ata i rāpae i tō ’oe vāhi

I roto i tā ’oe misiōni, e farerei ’oe i te mau ta’ata e ora ra i rāpae i te vāhi i fa’auehia ’oe. Mai te mea ’ua ’ana’anatae rātou i te fa’aro’o nō ni’a i te ’evanelia a Iesu Mesia, e nehenehe ’oe e :

Fa’a’ite i te tahi poro’i ia rātou ra.
Paraparau ia rātou nā ni’a i te mau rāve’a tūreiara’a sōtiare tei ha’amanahia (hi’o 7.5.6).
Fa’a’ite ia rātou i te mau misiōnare i reira rātou e ora nei ’e hōro’a i te ha’amāramaramara’a i terā mau misiōnare nō ni’a ia rātou (hi’o 2.3.4).
Ma te parau fa’ati’a a te peresideni misiōni, ’a fa’a’ohipa i te rāve’a ’āpī (hi’o 7.5.4) nō te ’ohipa ’e te mau misiōnare i reira terā mau ta’ata e ora ai, nō te tauturu i te ha’api’ira’a ’e te turura’a ia rātou. E nehenehe ato’a ’oe e ani i tō ’oe iho ’utuāfare ’e mau hoa ’ia tauturu i te ha’api’i ia rātou, mai te mea e parau fa’ati’a (hi’o 3.9.5).

I te taime e ’ohipa ’oe ’e te tahi atu mau misiōnare ’aore rā ’e te mau melo i roto ’aore rā i rāpae i tō ’oe vāhi ’aore rā misiōni :

’Āpo’o ’āmui nō te ’ite nāhea i te tauturu maita’i a’e i terā mau ta’ata ’ia ha’afātata atu ā i te Metua i te Ao ra ’e ia Iesu Mesia.
Fa’atura i te tārena o te mau melo ’e o te tahi atu mau misiōnare.
Vaiiho i te mau misiōnare tei fa’auehia i terā vāhi i reira terā mau ta’ata e ora ai, ’ia rave i te mau fa’aotira’a nō te ha’api’ira’a ia rātou, i te taime ihoa rā e nehenehe e nā reira ;

2.3

Te mau ’ohipa ri’i i roto i te ’ohipa misiōnare

’Ua rau te mau ’ohipa ri’i nā te misiōnare nō te fa’atupu i te fa’auera’a a te Fatu e « fa’aineine i te mau mea ato’a e maita’i ai ’outou » (Te Ha’api’ira’a Tumu ’e te mau Fafaura’a 88:119) nō te rave fa’aoti i tāna ’ohipa. Taua mau ’ohipa ri’i ra, ’o te tauturura’a ïa i roto i te mau tāuiuira’a hoa ’e te mau tauira’a vāhi, te ’ohipara’a ’e te mau melo, te pāhonora’a i te mau i’oa tei fa’ataehia mai, te ha’api’ira’a i te ta’ata, te haerera’a i te mau ’āpo’ora’a ’e te mau rurura’a, ’e te tāvinira’a. E nehenehe ato’a te mau taea’e misiōnare e rave i te mau uiuira’a bāpetizora’a ’ei tuha’a o tā rātou mau ’ohipa ri’i.

2.3.1

Te mau tāuiuira’a hoa

I roto i te hō’ē tāuiuira’a hoa, e ’ohipa te hō’ē taure’are’a misiōnare fa’atere, mai te hō’ē fa’atere ha’api’ipi’i tuahine ’aore rā te tauturu fa’atere misiōnare, nā muri i te tahi atu misiōnare. I roto i taua ’aitauira’a ra, e ha’api’i te fa’atere i te misiōnare, e ha’api’ipi’i iāna ’e e ’apo ato’a mai mai roto iāna. E pe’e te fa’atere i te parau a’o a te Fatu i roto i Te Ha’api’ira’a Tumu ’e te mau Fafaura’a nō te ha’apūai i te tahi atu misiōnare « i roto i tā [rāua] mau paraparaura’a ato’a, i roto i tā [rāua] mau pure ato’a, i roto i tā [rāua] mau a’ora’a ato’a, ’e i roto i te mau mea ato’a tā [rāua] e rave » (Te Ha’api’ira’a Tumu ’e te mau Fafaura’a 108:7).

Tei te taure’are’a misiōnare fa’atere te hōpoi’a nō te fa’anaho i te mau ’aitauira’a misiōnare ’e te mau misiōnare i raro a’e ia rātou. E fa’atere te mau tuahine i te mau ’aitauira’a ’e te tahi atu mau tuahine, ’e te mau taea’e, te mau ’aitauira’a ’e te tahi atu mau taea’e.

I roto i te rahira’a o te mau misiōni, ’ua mātauhia e rave te mau taure’are’a misiōnare fa’atere i te mau tāuiuira’a hoa i te mau tauira’a vāhi ato’a.

E rave te mau misiōnare fa’atere mata’eina’a i te mau ’aitauira’a ’e te taea’e misiōnare tāta’itahi i roto i tā rātou mata’eina’a.
E rave te mau misiōnare fa’atere ārea i te mau ’aitauira’a ’e te taea’e misiōnare tāta’itahi i roto i tā rātou ārea.
E rave te mau fa’atere ha’api’ipi’i tuahine i te mau ’aitauira’a ’e te tuahine misiōnare tāta’itahi i roto i tā rātou ārea ’aore rā mau ārea.
E rave te mau tauturu fa’atere misiōnare o te peresideni i te mau ’aitauira’a ’e te mau misiōnare fa’atere ārea ’aore rā ’e te tahi atu mau taea’e misiōnare mai tei arata’ihia e te peresideni misiōni.
Te tanora’a, e 24 hora te maoro te hō’ē tāuiuira’a hoa. I roto i te tāuiuira’a hoa tāta’itahi, tītauhia i te taure’are’a misiōnare fa’atere ’ia :
- Rave i te mau tāuiuira’a hoa i roto i tōna vāhi i fa’auehia. I te tahi taime, e nehenehe te mau ’aitauira’a ’ia ravehia i te vāhi i fa’auehia i terā misiōnare, mai te peu e mea tano te reira.
- Fa’anaho ātea i te tāuiuira’a hoa.
- ’Ohipa ’āmui nō te ha’amau i te mau fā ’e terā misiōnare nō ni’a i te mea e rave i roto i te ’aitauira’a. Rave i te ’ohipa i roto i te mau tuha’a ato’a o te ’ohipa misiōnare, mai te ’imira’a, te ha’api’ira’a, te ha’api’ira’a ’e te hoa misiōnare, te ha’api’ira’a reo (mai te mea tē vai ra), te fa’anahora’a i te tārena ’e te fa’ahoara’a.
- Ha’api’ipi’i maoti te mau pāpa’ira’a mo’a ’e te mau parau tumu i roto i te ’Ia poro haere i tā’u nei ’Evanelia.
- Hi’o ’e ’āparau nō ni’a i te mau ta’ata tā te mau misiōnare e ’āpe’e ra ’aore rā ’o tā rātou e ha’api’i ra.
- Fa’a’ite i terā misiōnare i te tahi mana’o ta’a ’ē ’e te tauturu, mai te mau mea tā te misiōnare e rave maita’i ra ’e te mau rāve’a nōna nō te ha’amaita’i atu ā.
- Vai matara i te mau mana’o a terā misiōnare nō ni’a i te mau vāhi e ha’amaita’i atu ā.
- Hi’o ’e ’āparau i te mea tā te misiōnare tāta’itahi i ’apo mai i roto i te tāuiuira’a hoa.
- Hōro’a i tāna parau fa’a’ite nō ni’a i te tāuiuira’a hoa i roto i te rata hepetoma i te peresidenira’a misiōni.

2.3.2

Te mau tauira’a vāhi

Nā te piha tōro’a a te misiōni e fa’anaho i te mau tere i te taime nō te tauira’a vāhi, ’eiaha ’oe ’ia vai ’ōtahi noa. Tē vai ra te tahi mau taime, nō te ātea ’e te tahi atu mau tumu, e rave te peresideni misiōni i te tahi fa’aotira’a ta’a ’ē. I terā taime, ’a ha’apa’o maita’i, ’a fa’a’ohipa i te ferurira’a au, ’e ’a pe’e i te Vārua.

Mai te mea e tauihia tō ’oe vāhi :

’A haere ’āfaro i tō ’oe vāhi ’āpī nō te fārerei i tō ’oe hoa ’āpī.
I ni’a i te tere, ’eiaha e ’amu ’aore rā e inu i te hō’ē mea tā ’oe i vaiiho ’e ’aita e ta’ata i ha’apa’o.
I ni’a i te tere, ’a hi’o maita’i ē ’ua nava’i te uira i roto i te niuniu nō te tere. Mai te mea e rātere ’ōtahi ’oe hau atu i te toru hora, ’a tāniuniu pinepine i te piha tōro’a o te misiōni.

Mai te mea ’o tō ’oe hoa misiōnare tei tauihia te vāhi, ’a ’ohipa ’e te tahi atu mau misiōnare, mai tei fa’auehia e tō ’oe taure’are’a misiōnare fa’atere, ē tae noa atu e tae mai tō ’oe hoa ’āpī.

2.3.3

Te mau taime e fāna’o ’oe i te ha’api’i nā muri i te mau melo

’A tītau manihini i te mau melo, ma te au ’e te ’ōhie, ’ia ’āmui mai ia ’outou nō te ’imi, nō te ha’api’i, nō te bāpetizo ’e nō te fa’ahoa i te ta’ata. ’A fa’aitoito ’e ’a tauturu i te mau melo ’ia fa’ahoa i te ta’ata tā ’outou e ha’api’i nei ’e ’ia tītau manihini ia rātou ’ia haere mai i te mau ’ohipa ri’i a te pāroita ’e a te ’utuāfare. ’A ani i te mau melo ’ia fa’ati’a i te mau ’ohipa i tupu nō rātou, ’o tē tū’ati i te ha’api’ira’a, nā reira ato’a tō rātou ’itera’a pāpū.

Tītauhia i te mau misiōnare ’ia vai noa te mau hoa misiōnare. Nō reira, ’aita e misiōnare e rave i te ’aitauira’a ’e te mau melo. Terā rā, e nehenehe te mau tuahine o te ’Ēkālesia (16 a’e matahiti ’e ni’a atu mai te au i te mau ture o te fenua) e ’āpe’e ’e e ha’api’i nā muri e piti tuahine misiōnare, ’aore rā hau atu. E nehenehe te mau taea’e o te ’Ēkālesia (16 a’e matahiti ’e ni’a atu mai te au i te mau ture o te fenua) e ’āpe’e ’e e ha’api’i nā muri e piti taea’e misiōnare, ’aore rā hau atu. E nehenehe nā ta’ata fa’aipoipo e ha’api’i nā muri i te mau tuahine ’e te mau taea’e.

2.3.4

Te mau i’oa tei fa’ataehia mai

Te hō’ē i’oa tei fa’ataehia mai, e tupu ïa i te taime e tītau te hō’ē ta’ata i te mau misiōnare ’ia fārerei iāna.

’Ia ’ohipa ’oe ’e te mau ta’ata tō rātou i’oa tei fa’ataehia mai, ’a :

Tāniuniu i te mau misiōnare, te mau melo ’aore rā te ta’ata i fa’atae mai i terā i’oa, mai te mea e nehenehe. Paraparau ia rātou e nāhea i te tauturu i terā ta’ata.
Tāmata i te paraparau ’oi’oi i te ta’ata tōna i’oa tei fa’ataehia mai, tōna tanora’a i roto i te 24 hora.
Fa’aro’o ’e ha’api’i nāhea i te tauturu i te ta’ata te i’oa tei fa’ataehia mai te i’oa.
Fa’atae atu i te mau mātēria e tītauhia.
Ha’api’i mai te au i te mau hina’aro ’e te mea tā te ta’ata e ’ana’anatae ra.
Tāmau noa i te ’ohipa ’e te mau misiōnare, te mau melo ’aore rā te ta’ata i fa’atae mai i terā i’oa (hi’o 2.2.4).

Nō te tahi atu ā ha’amāramaramara’a nō ni’a i te mau i’oa tei fa’ataehia mai, hi’o « Te mau i’oa tei fa’ataehia mai nō ’ō mai i te mau melo, te mau misiōnare ’e te pū fa’atere o te ’Ēkālesia » i roto « Nāhea vau i ’ia ’imi i te ta’ata nō te ha’api’i ? » i roto ’Ia poro haere i tā’u nei ’Evanelia te pene 9.

2.3.5

Te mau rurura’a ’e te mau ’āpo’ora’a

E ’āpo’o ’āmui te mau misiōnare nō te hōro’a ’e nō te fāri’i i te ha’api’ipi’ira’a, ’e nō te fa’anaho ’e nō te fa’aau i te ’ohipa misiōnare. E mea maita’i ’ia tītau manihini te mau rurura’a ’e te mau ’āpo’ora’a i te Vārua o te Fatu, ’e ’ia riro ’ei taime fa’aurura’a (hi’o Te Ha’api’ira’a Tumu ’e te mau Fafaura’a 6:32). Hau atu, maoti te putuputura’a ’e te mau misiōnare e noa’a ai te taime nō te fa’atupu i te maita’i i roto i te tahi ’e te tahi, ’e nō te ’oa’oara’a i te ’ohipa-āmui-ra’a (hi’o Te Ha’api’ira’a Tumu ’e te mau Fafaura’a 43:8 ; 50:22).

Teie te mau rurura’a e fa’anahohia e nā hoa misiōnare, te mau taure’are’a misiōnare fa’atere ’e te mau ti’a fa’atere misiōni :

Te mau tārenara’a tāmahana ’e tāhepetoma
Te mau rurura’a ’āpo’ora’a mata’eina’a
Te mau ’āmuira’a ārea misiōnare
Te mau rurura’a ’āpo’ora’a fa’atere o te misiōni

Te mau rurura’a fa’anahohia e te feiā fa’atere i reira, mai teie i muri nei :

Te mau rurura’a fa’aaura’a misiōnare
Te mau rurura’a ’āpo’ora’a pāroita

2.3.6

Te mau uiuira’a bāpetizora’a

’Ia rave ana’e i te hō’ē uiuira’a bāpetizora’a, e rave te mau taea’e misiōnare mai teie i muri nei :

Tai’o e aha tā te Fatu i parau i roto i Te Ha’api’ira’a Tumu ’e te mau Fafaura’a 20:37.
Pe’e i te arata’ira’a a te Vārua Maita’i.
Ui i te mau uira’a nō te uiuira’a bāpetizora’a tei ’itehia i roto i te tuha’a « Te mau uira’a nō te uiuira’a bāpetizora’a » o te pene 12 i roto i te ’Ia poro haere i tā’u nei ’Evanelia.
Fa’atano i te mau uira’a i te matahiti ’e te pa’ari o te ta’ata.
Ha’apāpū ē, ’ua fa’aara-a’ena-hia te peresideni pupu peresibutero ’aore rā te ta’ata fa’atere ’ohipa mīsionare nō te pāroita nō ni’a i te uiuira’a bāpetizora’a.

Mai te mea ’ua hina’aro te ta’ata e bāpetizohia, e nehenehe tāna e tītau manihini i te hō’ē metua, te hoa fa’aipoipo ’aore rā te tahi atu ta’ata pa’ari ’ia haere mai i roto i te uiuira’a bāpetizora’a. ’A vai ara i te mana’o o te ta’ata nō ni’a i te uiuira’a o tōna hoa fa’aipoipo ’aore rā te uiuira’a o tāna tamari’i matahiti tae’a ’ore. ’A pe’e i te mau parau arata’i i roto i te ’Ia poro haere i tā’u nei ’Evanelia nō te uiui ’e nō te tītau i te parau fa’ati’a nō te bāpetizo i te hoa fa’aipoipo ’aore rā te tamari’i matahiti tae’a ’ore (hi’o « Nāhea i te fa’atere i te uiuira’a » i roto « Nāhea vau ’ia fa’aineine i te mau ta’ata nō te bāpetizora’a ’e nō te ha’amaura’a ? i roto ’Ia poro haere i tā’u nei ’Evanelia, pene 12).

Nā te mau misiōnare fa’atere mata’eina’a e uiui i te mau ta’ata tītau bāpetizora’a tei ha’api’ihia e te mau misiōnare i roto i tō rātou mata’eina’a, ’o rātou ato’a tei ha’api’ihia e te mau tauturu fa’atere misiōnare o te peresideni, te mau misiōnare fa’atere ārea ’e te mau fa’atere ha’api’ipi’i tuahine, nō tō rātou mata’eina’a.

E uiui te mau misiōnare fa’atere ārea i te mau ta’ata tītau bāpetizora’a tei ha’api’ihia e te mau misiōnare fa’atere mata’eina’a i roto i tā rātou ārea.

Mai te mea e, ’aita te mau misiōnare fa’atere mata’eina’a ’e te mau misiōnare fa’atere ārea e vata, e nehenehe te peresideni misiōni e fa’aue i te tahi atu taea’e misiōnare nō te rave i te uiuira’a.

2.3.7

Te mau bāpetizora’a

’Ohipa ’e te peresideni pupu peresibutero ’aore rā te ta’ata fa’atere ’ohipa misiōnare nō te pāroita nō te fa’anaho i te purera’a bāpetizora’a (hi’o « Te ’ōro’a bāpetizora’a » i roto « Nāhea vau ’ia fa’aineine i te mau ta’ata nō te bāpetizora’a ’e nō te ha’amaura’a ? » i roto ’Ia poro haere i tā’u nei ’Evanelia, pene 12). Ha’amata i te mau fa’aineinera’a nō te purera’a bāpetizora’a i te taime ihoa rā e nehenehe.

2.4

Te tārenara’a ’e te mau ’ohipa ri’i tāmahana

’A fa’anaho i tā ’oe tārena nō te fa’atupu i tā ’oe fā misiōnare ’e nō te rōtahi i ni’a i te mau hina’aro o te ta’ata. ’A ha’amana’o i te mea tā te Fatu i parau ia rātou tei pi’ihia nō te poro i te ’evanelia : « ’E mai te mea e hope tō ’ōrua pu’e mahana i te porora’a i te parau tātarahapa i teie nei mau ta’ata, ’e ’ia arata’i mai ’ōrua, i te hō’ē noa a’e vairua iā’u nei, ’auē ho’i tō ’ōrua ’oa’oa rahi i pīha’i iho iāna i roto i te bāsileia o tō’u Metua ! » Te Ha’api’ira’a Tumu ’e te mau Fafaura’a 18:15

2.4.1

Te mau ’ohipa ri’i tāmahana tei mātauhia

’A fa’aō i te mau ’ohipa ri’i i muri nei i roto i tā ’oe tārena tāmahana :

Ha’amau ’e hi’o i tā ’oe iho mau fā, tā ’ōrua te hō’ē hoa misiōnare ’e tā te misiōni.
Fa’anaho i te ’ohipa nō terā mahana.
Fa’aineine i te mau ha’api’ira’a.
’Imi i te mau pāpa’ira’a mo’a, te ’Ia poro haere i tā’u nei ’Evanelia, te mau ha’api’ira’a a te mau peropheta ora ’e te mau ’āpōsetolo, ’e te tahi ato’a mau mātēria mana (hi’o 2.4.4).
Hi’o i te hō’ē tumu parau nō ni’a i te ea ’aore rā te pārurura’a, ’aore rā hō’ē tumu parau nō ni’a i te mau ture pāruru ia ’oe i te mau rāve’a ’āpī (hi’o 4.0–4.7).
’Imi i te ta’ata nō te ha’api’i atu.
’Ohipa ’e te feiā fa’atere i reira ’e te mau melo.
Tāvini i te ta’ata nā roto i te mau ’ohipa ri’i, tei tārenahia ’e tei ’ore i tārenahia.
Ha’apa’o i te mau mea tei tītauhia i roto i te orara’a, mai te tāmā’a ’e te fa’aineinera’a nō te mahana.

2.4.2

Hi’ora’a tārena tāmahana

E hōho’a ri’i te tārena tāmahana nō te misiōni mai te tārena i raro nei. E nehenehe te peresideni misiōni e fa’atano i te mau tārena tāmahana nō ni’a i te mau mahana fa’afa’aeara’a, te mau ’ōro’a ta’a ’ē i roto i tā ’oe misiōni, ’e tē vai atu ra.

6:30	Ha’amata i te mahana.
6:30–10:00	Pure. Fa’ahā’uti’uti i te tino (30 minuti). Hapu i te pape, tāmā’a ’e fa’aineine nō te mahana Rave i te ha’api’ira’a ta’ata hō’ē (60 minuti). Fa’anaho i te tārena (30 minuti).
10:00–21:00	’Imi, ha’api’i ’e tāvini i te ta’ata.* Fa’atano i te mau parau rorouira ’aore rā pāpie i te roara’a o te mahana. Hi’o poto i te hō’ē tumu parau nō ni’a i te ea ’aore rā nō ni’a i te pārurura’a, ’aore rā hō’ē tumu parau nō ni’a i te mau ture pāruru ia ’oe i te mau rāve’a ’āpī. Fa’atupu i te ha’api’ira’a ’e te hoa misiōnare ’e fa’aineine i te mau ha’api’ira’a (30 minuti). Ha’api’i i te tahi atu ā mātēria nō te mau misiōnare ’āpī ’e te mau ta’ata ha’api’ipi’i, i roto i te 12 hepetoma mātāmua i roto i te ’āua misiōni (30–60 minuti, mai te mea e tano) Mai te mea tē ha’api’i ra ’oe i te hō’ē reo ’āpī, ’a ha’api’i i te reira reo (30–60 minuti). Tē fa’aitoitohia nei ’oe ’ia ha’api’i i te reo peretāne mai te peu ’aita ’oe i ’ite i te reo peretāne. ’Amu i te mā’a o te avatea ’e i te ahiahi (’eiaha ’ia hau atu i te piti hora nō te tā’āto’ara’a).
21:00	Ho’i i te fare, mai te mea rā e ha’api’ira’a tā ’ōrua ; ho’i i te fare i te hora 21:30
21:00–21:30	Pāpa’i i roto i tā ’oe buka tāmahana, fa’aineine nō te haere e ta’oto, ’e pure.
21:30–22:30	Haere e ta’oto.

*E rōtahi i tā ’oe mau ’ohipa ri’i tāmahana i ni’a i te paraparaura’a i te ta’ata. ’Ōperepere i tā ’oe tārena ’e te mau ’ohipa ha’api’ira’a i te roara’a o te mahana ’eiaha ’ōrua e fa’afa’aea maoro i tō ’ōrua fare. Mai te mea e tano te ātea ’e te taime, e nehenehe e haere i rāpae i te fare ’e e ho’i mai i te roara’a o te mahana nō te rave i te mau mea hina’arohia.

I roto i te tārena tei ha’amanahia nō tā ’oe misiōni, tē vai ra te taime nō te ’ohipa, nō te fa’afa’aea ’e nō te rōtahi fa’ahou ā i ni’a i te ’ohipa. E mea faufa’a rahi ’ia fāna’o i te taime tano ’e te mā’a tano nō te maita’i pae vārua, pae manava ’e pae tino.

2.4.3

Te ha’amaura’a fā ’e te mau taime tārenara’a

Fa’atupu i te mau taime tārenara’a ’e tō ’oe hoa misiōnare i te mau mahana ato’a ’e te mau hepetoma ato’a. ’A feruri i te hina’aro o te feiā tā ’oe e ha’api’i ra ’e nāhea i te ’ohipa ’e te mau melo ’a hi’o ai i te nu’ura’a i mua, ’a ha’amau ai i te mau fā ’e ’a fa’anaho ai i te mau tārena nō te mahana ’e te hepetoma (hi’o « Nāhea i te ha’amau i te mau fā », « Te ’āpo’ora’a fa’anahonahora’a hepetoma » ’e « Te ’āpo’ora’a fa’aineinera’a i te mahana tāta’itahi » i roto « Nāhea vau i te fa’a’ohipa māite i te taime » i roto ’Ia poro haere i tā’u nei ’Evanelia, pene 8).

2.4.4

Te mau taime ha’api’ira’a

’A fa’a’ohipa i tā ’oe iho taime ha’api’ira’a ta’ata hō’ē ’e ha’api’ira’a ’e te hoa misiōnare nō te fa’atumu i ni’a i te mau pāpa’ira’a mo’a (te Buka a Moromona iho ā rā), te ’Ia poro haere i tā’u nei ’Evanelia, te mau ha’api’ira’a a te mau peropheta ora ’e teie mau fa’aturera’a (e ’itehia i roto i te Vaira’a buka ’evanelia). E nehenehe teie mau mātēria ha’amanahia e ha’apūai i tō ’oe ’ite ’e tō ’oe ’itera’a pāpū nō te ’evanelia a Iesu Mesia i fa’aho’ihia mai, e nehenehe ato’a e fa’aineine ia ’oe ’ia pāhono i te mau hina’aro o te feiā tā ’oe e ha’api’i ra.

Mai te mea ’ua fa’auehia ’oe ’ia ha’api’i nā roto i te hō’ē reo ’āpī, ’a ha’api’i ’e ’a paraparau i te reira i te mau mahana ato’a.

Mai te mea e misiōnare ’āpī ’oe, ’a ha’api’i ’e tō ’oe ta’ata ha’api’ipi’i 30 atu ā minuti, ’aore rā 60, i te mahana tāta’itahi, nā hepetoma mātāmua e 12 i roto i te ’āua misiōni (hi’o « Nō te mau misiōnare ’āpī : Te tahi atu ā ha’api’ira’a ’e te hoa misiōnare » i roto « ’Ōmuara’a : Nāhea vau i te fa’a’ohipa maita’i a’e i te « ’Ia poro haere i tā’u nei ’Evanelia ? » i roto i te ’Ia poro haere i tā’u nei ’Evanelia).

2.4.5

Te tāmā’ara’a ’e te tahi atu mau ta’ata

Mai te mea e hina’arohia, nā tō ’oe peresideni misiōni ’e te peresideni titi i reira e hōro’a atu i te mau parau arata’i nō te tārena i te mau fa’atāmā’ara’a ’e te ta’ata i roto i tō ’oe misiōni. Mai te mea nā te mau melo ’aore rā te tahi ta’ata e hōro’a mai i te mā’a :

Fa’atura i tō rātou vaira’a ’e te hora.
Ha’amāuruuru nō te mā’a tā rātou e hōro’a mai.
Ani i te ha’api’i i te hō’ē ha’api’ira’a 15 ’aore rā 20 minuti nā mua a’e i te tāmā’ara’a ’aore rā i muri iho, nō te ha’apūai i te feiā tā ’ōrua e hāhaere nei ’e nō te noa’a mai te taime nō te ha’amaita’i i tō ’oe ’aravihi nō te ha’api’i ma te Vārua.

Mai te mea e tāmā’a ’ōrua tō ’oe hoa misiōnare ’e te hō’ē ta’ata nō te tahi atu ’āpeni, e mea ti’a ’ia ’āmui ato’a mai te tahi atu ta’ata pa’ari nō tō ’oe ’āpeni.

2.5

Te mahana fa’aineinera’a

E fa’ata’a tō ’oe peresideni misiōni i te hō’ē mahana i roto i te hepetoma ’ei mahana fa’aineinera’a. Maoti te mahana fa’aineinera’a e noa’a ai te taime nō te fa’a’ana’anaea i te pae tino, i te pae vārua ’e i te pae manava, ’a ti’a ai ’oe « ’ei ’ite nō te Atua i te mau taime ato’a ’e nō te mau mea ato’a, ’e i roto i te mau vāhi ato’a » (Mosia 18:9). E fāna’o ato’a ’ōrua tō ’oe hoa misiōnare i te taime nō te ’āmui i te tahi atu mau misiōnare o tō ’oe mata’eina’a, nō te tahi mau ’ohipa ri’i fa’a’oa’oara’a au maita’i (hi’o 3.6).

’A ha’amana’o i te mau fa’aarara’a ti’a a te Fatu : « ’Eiaha e horo vitiviti atu ā ’oia ho’i ’eiaha e rave rahi atu ā i te ’ohipa i te pūai ’e te mau rāve’a ho’i i hōro’ahia ia ’oe » (Te Ha’api’ira’a Tumu ’e te mau Fafaura’a 10:4), ’e « haere vave atu i ni’a i tō ’outou ro’i, ’ia ’ore ’outou ’ia rohirohi ; ’a ti’a vave mai i ni’a i te po’ipo’i, ’ia fa’aitoitohia tō ’outou mau tino ’e tō ’outou mau ferurira’a » (Te Ha’api’ira’a Tumu ’e te mau Fafaura’a 88:124).

2.5.1

Te mau ’ohipa i te mahana fa’aineinera’a

Teie te tahi mau ’ohipa e rave i te mahana fa’aineinera’a (’o te tahi noa e ’ere te tā’āto’ara’a) :

Fa’atae i te parau ’āpī i tō ’oe ’utuāfare, te peresideni misiōni ’e i te mau hoa (hi’o 3.9)
Horoi i te ’ahu
Pā’oti i te rouru
Tāmā
Haere i te fare toa
Fa’afa’aea
Haere i te tahi mau ’ohipa fa’a’oa’oara’a ha’amanahia (hi’o 3.6)

2.5.2

Hi’ora’a tārena mahana fa’aineinera’a

Mai teie ri’i te tārena nō te mahana fa’aineinera’a :

6:30	Ha’amata i te mahana.
6:30–8:00	Pure. Hapu i te pape, tāmā’a ’e fa’aineine nō te mahana Fa’anaho i te tārena (30 minuti). Rave i te ha’api’ira’a ta’ata hō’ē (30 minuti).
8:00–18:00	Rave i te mau ’ohipa i te mahana fa’aineinera’a (hi’o 2.5.1). Fa’ata’ara’a : E fa’aoti i te mau mahana fa’ainenera’a ato’a nā mua a’e i te hora 18:00.
18:00–21:00	’Imi, ha’api’i ’e tāvini i te ta’ata.
21:00	Ho’i i te fare. Mai te mea e ha’api’ira’a tā ’ōrua ; ho’i i te fare nā mua a’e i te hora 21:30
21:00–21:30	Pāpa’i i roto i tā ’oe buka tāmahana, fa’aineine nō te haere e ta’oto, ’e pure.
21:30–22:30	Haere e ta’oto.

2.6

Te mau ’ohipa ri’i nō te mahana sābati

Fa’anaho i te mau ’ohipa ri’i i te mahana sābati ’o tē tauturu i te fa’atupu i te fā misiōnare e ’imi, e ha’api’i, e bāpetizo ’e e tauturu i te ta’ata ’ia ha’api’i rahi atu ā ō ni’a i te Metua i te Ao ra ’e ia Iesu Mesia ’e ’ia riro rahi atu ā mai ia rāua. ’A ha’amana’o i te mau ha’api’ira’a a te Fatu nō ni’a i te mahana sābati i roto i Te Ha’api’ira’a Tumu ’e te mau Fafaura’a 59:13–19, ’e ’a pāpa’i i te mau ta’o ’e te mau parau e fa’a’ite nei ē, te Sābati mau ’o te ’oa’oa ato’a ïa, te pōpou, te ’ā’au ’ana’anatae ’e te mata ’oa’oa.

Te tahi ato’a mau ’ohipa ri’i nō te mahana sābati, ’o te haerera’a ïa i te purera’a, i te ’āmuira’a rahi, i te mau tuha’a purera’a rahi o te sābati o te ’āmuira’a titi ’e i te tahi atu mau rurura’a mai te ’āpo’ora’a pāroita, ’ia tītauhia mai. Tē vai ato’a ra te ha’apa’ora’a i te ha’apaera’a mā’a o te ’āva’e.

I roto i tā ’oe mau tauto’ora’a misiōnare, ’aita te Fatu i ani mai ’ia haere ma te mā’a ’ore maori rā i te mahana ha’apaera’a mā’a o te ’āva’e, ’aore rā ’aita ’oia i ani ’eiaha e ta’oto nō te riro mai ’ei misiōnare pūpū rahi atu ā iāna. E nehenehe ’oe e ha’apae i te mā’a i terā taime ’e terā taime nō te hō’ē fā ta’a ’ē, ’eiaha rā e ha’apae hau atu i te 24 hora.

2.7

Te tāvinira’a i rotopū i te huira’atira

E nehenehe ’oe e ha’api’i ’ia riro ’ei pipi nā Iesu Mesia nā roto i te tāvinira’a mai iāna te huru. ’A ’imi i te mau rāve’a nō te tāvini i tō ’oe hoa misiōnare, te ta’ata tā ’ōrua e ha’api’i ra, te mau melo ’e te tahi atu mau ta’ata i roto i te huira’atira, « ’ia ’ite ho’i ’outou ē, ’a tāvini ai ’outou i tō ’outou mau ta’ata tupu, tē tāvini ra ïa ’outou i tō ’outou Atua » (Mosia 2:17).

E mea ti’a ia ’oe ’ia tāvini ma te ’ā’au ateate nō te tauturu i te ta’ata ma te tītau ’ore i te tahi noa atu fa’ahope’ara’a ta’a ’ē. ’A pe’e i te mau ture ato’a nō te mau ’ōpuara’a tāvinira’a (hi’o 7.2), te ture iho ā rā e parau nei ē, ’eiaha e poro atu ’a tāvini ai ia rātou ’e ’eiaha e tāvini i te mau vāhi ’o ’oe ana’e ’e te mau tamari’i. Mai te mea e ta’ata tē ’ana’anatae i tā ’oe poro’i, ’a pāhono poto noa atu ’e ’a fa’anaho i te tahi atu taime nō te fārereira’a, ’e te tahi atu vāhi, nō te hōro’a i te tahi ha’api’ira’a.

Nō te tahi atu ā ha’amāramaramara’a, hi’o i te tuha’a 7.2, « Te mau arata’ira’a nō te tāvinira’a ».