1 Korinito 11

O Matafaioi Tulagaese ma Paia a Tane ma Fafine

I le faaauauina ai o ana faatonuga ma uunaiga i le Au Paia i Korinito, sa aoao atu e Paulo e faapea e ao i tane ma fafine ona galulue faatasi ma lagolagoina e le tasi le isi ao latou mulimuli i le Alii. O le faamoemoega o lenei lesona o le fesoasoani lea ia te oe e malamalama atili pe aisea e manaomia ai e alii ma tamaitai le tasi ma le isi ina ia maua faamanuiaga silisili i le fuafuaga a le Tama Faalelagi.

O matafaioi o tamaitai ma alii

Mafaufau i fesili nei a o e tagai i lenei ata o se paga tietie uila .

• O a ni tomai faapitoa po o ni gafatia e fesoasoani i lenei au ina ia faamanuiaina le taumafaiga?

• E faapefea e eseesega i le va o tagata taitoatasi ona faamalosia le la paga ma fesoasoani atili ai e galulue faatasi?

Ao e suesueina le 1 Korinito 11, mafaufau pe faapefea e alii ma tamaitai ona galulue faatasi i le amiotonu o se paaga tutusa ina ia faataunuu ai a laua matafaioi tofia faalelagi ma agavaa ai mo le ola e faavavau.

I le 1 Korinito 11:1-16, sa tautalagia e Paulo aganuu a tagata Korinito i lona taimi sa le o gatasi ma le silasila a le Alii i matafaioi paia o alii ma tamaitai. E taua le aua nei fenumiai nei aganuu ma mea moni sa aoaoina atu e Paulo.

E ala i le aposetolo o Paulo, sa faaali mai e le Alii mea moni e faavavau e uiga i matafaioi paia o alii ma tamaitai i le 1 Korinito 11:11-12.

Faitau le 1 Korinito 11:11-12, ma vaavaai i mea moni ua e aoaoina e uiga i le Atua, alii, ma tamaitai.

O tamaitai ma alii e faipaaga atoatoa ma le Alii

I le 1 Korinito 11:11 ua tatou aoaoina ai i le fuafuaga a le Tama Faalelagi, e taua uma ai alii ma tamaitai.

O le1 Korinito 11:11 o se fuaitau o le atamai i aoaoga faavae. Mafaufau e faailoga fuaitau o mau o le atamai i aoaoga faavae i se auala iloga ina ia mafai ai ona e maua gofie. O le a e faataitai e faaaoga lenei fuaitau o le atamai i aoaoga faavae i le lesona e sosoo ai.

Faitau i faamatalaga nei mai le folafolaga e uiga i le aiga mai sui o le Korama a Aposetolo e Toasefululua, ma vaai po o a auala e taua ai alii ma tamaitai i le fuafuaga a le Tama Faalelagi.

Mai le folafolaga e uiga i le aiga tatou te faitau ai faapea:

E mafai ona ausia le fiafia i le olaga faaleaiga pe a faavae i luga o aoaoga a le Alii o Iesu Keriso. O faaipoipoga ma aiga manuia, e faavaeina ma faatumauina i luga o mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tausaafia. I le fuafuaga paia, e ao ona pulefaamalumalu tamā i o latou aiga i le alofa ma le amiotonu ma o i latou e saunia mea e manaomia o le olaga ma le puipuiga mo o latou aiga. O tina e gafa autu ma le faafaileleina lea o a latou fanau. I nei matafaioi paia, e ao i tamā ma tina ona fesoasoani le tasi i le isi o se paaga tutusa.

(“O Le Aiga: O Se Folafolaga i le Lalolagi,” ChurchofJesusChrist.org)

Na aoao mai Peresitene M. Russell Ballard o le Korama a Aposetolo e Toasefululua:

I le fuafuaga sili a lo tatou Tama Faalelagi e maua ai le mana o le perisitua, ua i ai i alii le tiutetauave tupito e taitai ai le perisitua, ae e le o i latou o le perisitua. E eseese matafaioi ae tutusa lava le taua ua i ai i alii ma tamaitai. E pei lava ona le mafai e se tamaitai ona fanauina se tamaitiiti e aunoa ma se alii, e faapena foi, e le mafai e se alii ona faaaogaina atoa le mana o le perisitua e faavae ai se aiga e faavavau e aunoa ma se tamaitai. … I se vaaiga e faavavau, o le mana foafoa atoa ai ma le mana o le perisitua e faaaogaina uma e se tane ma se ava.

(M. Russell Ballard, “O La’u Galuega ma Lo’u Mamalu Lenei,” Liahona, Me 2013, 19)

Na aoao mai Elder David A. Bednar o le Korama o Aposetolo e Toasefululua:

O le tuufaatasiga maoae o mana faaleagaga, faaletino, faalemafaufau, ma faalelagona o tane ma tamaitai, sa manaomia e faatino ai le fuafuaga o le fiafia. “E leai se tane pe a le o i ai le fafine, e leai foi se fafine pe a le o i ai le tane, i le Alii” (1 Korinito 11:11). Ua faamoemoe le tane ma le fafine e aoao mai ai, faamalosia, faamanuia, ma faaatoatoaina e le tasi le isi.

(David A. Bednar, “Matou Te Talitonu i le Nofomama,” Liahona, Me 2013, 41–42)

1. Tali fesili nei i totonu o lau api talaaga mo suesuega:

• Aisea e te manatu ai o le fuafuaga a le Tama Faalelagi, e ausia faatasi uma ai e Ona atalii ma Ona afafine le ola e faavavau?

• E faapefea ona faaalia e lenei mea le alofa ma le faaaloalo o le Tama Faalelagi mo tamaitai ma alii?

• E mafai faapefea e le malamalama ai i nei mea moni ona fesoasoani ia te oe pe a e feagai ma manatu faatauagai e uiga i matafaioi ma tiutetauave o alii ma tamaitai?

• E faapefea ona e faaaogaina nei mea moni e uiga i tamaitai ma alii i lou olaga (mo se faataitaiga, i le aiga, i le lotu faatasi ma isi alii talavou po o tamaitai talavou, ma a o e tapena mo lou olaga faaleaiga i le lumanai)?

Tuu i le faitalia: O e Manao e Aoao Atili?

E faapefea pe a faapea o tagata ou te alofa i ai e le faaipoipo pe maua ni fanau?

Atonu e i ai nisi e popole pe taumate pe faapefea ona faataunuu le fuafuaga a le Tama Faalelagi mo tamaitai ma alii mo i latou e le faaipoipo pe maua ni fanau. I le agaalofa tele, sa saunoa mai Peresitene Boyd K. Packer (1924-2015) o le Korama a Aposetolo e Toasefululua:

O Le Molimau

Ua molimau mai Boyd K. Packer i le Atua le Tama, o Iesu Keriso, ma le Agaga Paia.

E le o taofia mai ia i latou o e le faaipoipo po o i latou e le mafai ona maua ni fanau, ia faamanuiaga e faavavau o loo latou sailia ae, mo le taimi nei, e le o mafai ona latou aapa atu i ai. …

O ou faanaunauga faalilolilo ma olega loimatā o le a pai atu i finagalo uma o le Tama ma le Alo. O le a e mauaina se faamautinoaga patino mai ia i Laua e faapea o le a faatumuina lou olaga ma e leai se faamanuiaga e tatau o le a taofia mai ia te oe.

I le avea ai ma se auauna a le Alii, ma galue ai i le tofi lea ua faauuina ai au, ou te tuuina atu ai ia i latou o i ai i ia tulaga se folafolaga o le a leai se mea e taua i lou faaolataga ma le faaeaga o le a le mafai ona tuuina atu ia te oe i le taimi e tatau ai.

(Boyd K. Packer, “O le Molimau,” Liahona, Me 2014, 95)

Aisea e manao ai Satani tatou te fevaevaeai o ni alii ma ni tamaitai?

Na aoao mai Peresitene Jean B. Bingham, o le sa avea ma Peresitene Aoao o le Aualofa:

Tutufaatasi i le Faataunuuina o le Galuega a le Atua

Ua aoao mai Sister Bingham i le auala, ua mafai ai i le mulimuli i faataitaiga a Atamu ma Eva ona galulue faatasi alii ma tamaitai i le faatauaina o eseesega ma matafaioi paia a le tasi ma le isi.

Sa faamanuiaina le fili i lana sini e tavavae alii ma tamaitai i ana taumafaiga e faatoilalo o tatou agaga. Ua iloa e Lusifelo afai na te faataumaoia le lotogatasi e lagona e alii ma tamaitai, afai e mafai ona ia faalemautonuina i tatou e uiga i lo tatou taua paia ma tiutetauave o le feagaiga, o le a ia malo i le faatamaiaina o aiga, o iunite taua ia o le faavavau.

E faaosooso e Satani le taufaatusatusa e faatupu ai ni lagona o le faasausili po o le vaai maulalo taualoa, a o natiaina le upumoni faavavau faapea o eseesega faalenatura o alii ma tamaitai, ua mai le Atua ma e tutusa lava le taua. Na ia taumafai e faalumaina sao o tamaitai i le aiga ma i faapotopotoga lautele, ma faaitiitia ai lo latou tosinaga faagaeetia mo le lelei. O lana sini o le uunaia lea o se tauiviga mo le paoa nai lo le patipatia o sao tulagaese o alii ma tamaitai e fefaamaloa’i ai le tasi i le isi ma saofagā ai i le lotogatasi.

(Jean B. Bingham, “Tutufaatasi i le Faataunuuina o le Galuega a le Atua,” Liahona, Me 2020, 60-61)