1 Korinito 10

Solaese Mai Faaosoosoga

E te moomoo ea e mafai ona e solaese mai faaosoosoga o feagai ma oe? O le Aposetolo o Paulo sa aoaoina mai se mataupu faavae taua e mafai ona fesoasoani ia i tatou pe a feagai ma faaosoosoga. O lenei lesona e faamoemoe e fesoasoani e te faalagolago ai ia Iesu Keriso e faatoilalo faaosoosoga.

Faaosoosoga

Afai e mafai, sue se maneta ma se meafaitino uamea ma mafaufau pe faapefea ona faaaoga e faamatala ai le tetee i faaosoosoga.

Faitau i le saunoaga lenei a Elder Ulisses Soares o le Korama a Aposetolo e Toasefululua pe matamata i le vitio “Saili Atu ia Keriso i Mafaufauga Uma” mai le faailotaimi 2:44 i le 3:23, e maua i le ChurchofJesusChrist.org.

Saili Atu ia Keriso i Mafaufauga Uma

Ua aoao mai Elder Soares e faapea, o le tausisia o o tatou mafaufauga ma naunauga ia mama e fesoasoani lea ia i tatou e tetee atu ai i faaosoosoga.

I le vaogagana faavaliata, o le gauai atu i faaosoosoga e pei o le lalata atu i se maneta ma se metale. O le malosiaga le vaaia o le maneta na te faatosina maia le meafaitino uamea ma uumauina. E leai se malosiaga o le maneta i le metale pe a tuu faamamao mai ai le metale. O le mea lea, e faapei ona le mafai e le maneta ona faaaoga lona malosiaga i se metale e mamao mai ai, a tatou teena foi faaosoosoga, e mou atu ma leai so latou malosiaga i o tatou mafaufau ma loto, ma faapena foi i a tatou faatinoga.

(Ulisses Soares, “Saili Atu ia Keriso i Mafaufauga Uma,” Liahona, Nov. 2020, 83)

Ao e suesue le 1 Korinito 10, faalogo mo musumusuga mai le Agaga Paia o le a fesoasoani ia te oe e iloa ai le mea e fai e tetee atu ai i faaosoosoga o feagai ma oe.

O se tasi o faamoemoega o tusitusiga paia o le fesoasoani lea tatou te aoao ai mai soifuaga ma tauiviga o i latou sa muamua atu (tagai i le 1 Korinito 10:6, 11; Mamona 9:31). E pei ona faamauina i le 1 Korinito 10, sa faaaoga e Paulo le faataitaiga o le sopoia e Isaraelu o le Sami Ulaula ma la latou malaga i le vao ao ia faamanatu i tagata o Korinito auala eseese sa faatasi ai le Alii ma tagata Isaraelu i le latou malaga (tagai i le 1 Korinito 10:1-4).

Maitau mea na fai e le Alii mo tagata Isaraelu ma le igoa sa faaigoaina ai o Ia i le fuaiupu 4.

• O le a se mea ua e aoaoina e uiga i le Faaola e ala i le suafa sa faaaoga e Paulo i le fuaiupu 4?

E ui i auala faavavega na lagolagoina ai e le Alii tagata Isaraelu, sa i ai taimi na o latou gauai atu ai i faaosoosoga. Faitau le 1 Korinito 10:5-11, ma maitau faaosoosoga sa gauai tagata Isaraelu e liliu ese ai mai i lo latou “Papa faaleagaga,” o Iesu Keriso.

• O a auala e te manatu e tutusa ai tulaga o tatou olaga ma tulaga sa i ai tagata Isaraelu?

• O a faaosoosoga masani e feagai ma tupulaga talavou e ono liliuese ai mai le Faaola?

Mafaufau i faaosoosoga o loo feagai nei ma oe ma e i ai le gafatia e mafai ona latou faaliliueseina oe mai le “Papa,” o Iesu Keriso. Toe mafaufau pe faapefea ona aafia lou olaga pe a mafai ona e faatoilaloina nei faaosoosoga.

E fesoasoani mai le Faaola ia i tatou e faatoilaloina faaosoosoga

Manatua, o le faaosoosoina o oe e le o se agasala ao le gauai i le faaosoosoga o le agasala lea. Faitau i le 1 Korinito 10:12-14, ma maitau mataupu faavae e mafai ona fesoasoani atu ia te oe e manumalo ai mai faaosoosoga.

1. Tali fesili nei i totonu o lau api talaaga mo suesuega:

• O a mea e folafola mai e le Atua o le a Ia faia e fesoasoani ai ia oe e faatoilalo ai faaosoosoga?

• O a upu ma fasifuaitau i nei fuaiupu e faamatala mai ai mea ua faamoemoe le Atua tatou te faia pe a feagai ma faaosoosoga?

• O a mataupu faavae na e maua?

Atonu na e maitauina se mataupu faavae e pei o le E tuuina mai e le Atua le auala tatou te sosolaese ai mai faaosoosoga, ae peitai e tatau ona tatou filifili e tuuese i tatou mai faaosoosoga.

I tusitusiga paia ma ala mai i Ana perofeta o aso nei, sa aoao mai e le Faaola le ala tatou te manumalo ai mai faaosoosoga. Faitau i mau ma faamatalaga faaperofeta nei, ma vaai po o a mea e mafai ona e fai e tapa atu ai i le Faaola ma solaese mai faaosoosoga. Atonu e te manao e faafesootai atu i latou i le 1 Korinito 10:12-14.

• Alema 13:28–29

• 3 Nifae 18:15, 18-20

• Eperu 4:15-16 (Manatua: o le faitaulaga sili o lo o faasino i ai nei fuaiupu o Iesu Keriso)

• Peresitene Henry B. Eyring o le Au Peresitene Sili:

  

  O lo tatou faatuatua ia Iesu Keriso e aumaia i tatou i le salamo ma le tausiga o Ana poloaiga. Tatou te usiusitai ma tetee atu i faaosoosoga e ala i le mulimuli i uunaiga a le Agaga Paia. E oo mai le taimi e suia ai o tatou uiga. O le a avea i tatou e faapei o se tamaitiiti, e usitai i le Atua ma atili ai ona alofa. O lena suiga, afai tatou te faia mea uma e tatau ona tatou faia ina ia tausisia ai, o le a faaagavaaina i tatou ia sapi ai i meaalofa ia e auala mai i le Agaga Paia. Ona tatou saogalemu ai lea i luga o le papa mautinoa e tasi.

  (Henry B. Eyring, “E Faapei o se Tamaitiiti,” Liahona, Me 2006, 16)

• O a mea na e aoaoina mai nei mau ma le faamatalaga lenei e faaosofia ai oe e liliu atu i le Faaola ina ia solaese ai mai faaosoosoga?

• O a nisi o auala e tuuina mai ai e le Atua le ala e solaese ai mai faaosoosoga?

• O a mea e tatou te faia ina ia maitauina ma faaaogaina ai auala o solaaga ua tuuina mai e le Atua?

Tali se lua pe sili atu o fesili o loo mulimuli mai:

• Toe tusi le 1 Korinito 10:14, ma tusi lou igoa pe a uma le “au pele e,” ma sui le “ifo i tupua” i se faaosoosoga ua e aafia ai i le taimi nei.

• Tusi se aafiaga na fesoasoani le Faaola ia te oe e solaese mai se faaosoosoga. E faapefea ona fesoasoani lenei aafiaga ia te oe e solaese ai mai faaosoosoga o loo tutupu i le taimi nei?

• Tusi laasaga patino o le a e faia ina ia faalagolago ai ia Iesu Keriso ma tetee atu i se faaosoosoga ua oo atu ia te oe.

Tali fesili nei. E le manaomia lou faasoa mai faaosoosoga patino o loo tupu ia te oe lava ia.

2. Tali fesili nei i totonu o lau api faamaumau mo suesuega. E le manaomia lou faasoa mai faaosoosoga patino o loo tupu ia te oe lava ia.

• O a ni mea na e aoaoina po o ni ou lagona e uiga i le Faaola ao e suesue i le 1 Korinito 10?

• E mafai faapefea e lenei tala ona fesoasoani ia te oe e solaese ai mai faaosoosoga e te oo i ai?

Tuu i le Faitalia: O e Manao e Aoao Atili?

E mafai faapefea ona fesoasoani mai Iesu Keriso ma le Agaga Paia ia te au e faatoilaloina faaosoosoga?

Na aoao mai Elder Ulisses Soares o le Korama a Aposetolo e Toasefululua:

O le tetee faasaga atu i faaosoosoga e manaomia ai se olaga o le maelega ma le faamaoni. Ae faamolemole ia silafia ua saunia le Alii e fesoasoani mai ia i tatou i a tatou taumafaiga patino ma ua folafola mai faamanuiaga ofoofogia pe afai tatou tumau e oo i le iuga. …

O’u uso e ma tuafafine pele, ou te molimau atu a tatou faalagolago i le papa o le faaolataga, o le Faaola lea o o tatou agaga, … o le a matuai faateleina lo tatou gafatia e pulea ai o tatou mafaufauga. E mafai ona ou faamautinoa atu ia te outou o le a tuputupu ae lo tatou matutua faaleagaga i se saoasaoa faateleina, e suia ai o tatou loto, ma avea atili ai i tatou e faapei o Iesu Keriso. E le gata i lea, o le a faamalosia atili ai aafiaga o le Agaga Paia ma faaauau ai pea i o tatou olaga. Ona taitasitasi ai lea ona leai o se mana o faaosoosoga a le fili ia i tatou, ma taunuu ai i se olaga e sili ona fiafia, mama ma le faapaiaina.

Mo i latou o e, po o le a lava le mafuaaga, ua pauu atu i faaosoosoga ma ua ola ai i faatinoga amioletonu, ou te faamautinoa atu ia te outou e i ai se auala e toe foi ai, o loo i ai le faamoemoe ia Keriso.

(Ulisses Soares, “Saili Atu ia Keriso i Mafaufauga Uma,” Liahona, Nov. 2020, 83-84)

Na aoao mai Elder Quentin L. Cook o le Korama a Aposetolo e Toasefululua:

O se mataupu faavae o le alualu i luma e faavavau, o le faaaogaina lea o le amio pulea ma le ola amiotonu e faamalolosia ai lo tatou tomai e teteena ia faaosoosoga. E moni lenei mea i mea faaleagaga ma mataupu faaletino. …

E avea ai o se vaega o le fuafuaga paia a le Atua, ua faamanuiaina i tatou i le meaalofa o le Agaga Paia. … O Ia foi o se siufofoga o le lapataiga mai mea leaga ma o se siufofoga o le puipuiga mai mea matautia. A o tatou tauasaina vasa o le olaga, e taua le mulimuli i uunaiga a le Agaga Paia. O le a fesoasoani le Agaga Paia ia i tatou etaumamao ai mai mea matautia, ma taitai lelei atu ai i tatou e ui atu i luitau.

(Quentin L. Cook, “To’a le Tai ma Sitaili Faa-Bristol: Ia Agavaa mo le Malumalu—i Taimi Lelei ma Taimi Leaga,” Liahona, Nov. 2015, 41-42)

E faapefea ona ou sauni mamao e solaese mai faaosoosoga?

Na aoao mai Peresitene Spencer W. Kimball (1895–1985):

O faaiuga tonu e matua faigofie ona faia, pe a tatou faia ae le’i taitai ona o’o mai, i le i ai o faamoemoega i le mafaufau; o lenei mea e faasaoina ai le tele o le atuatuvale [i le taimi e filifili ai], i le taimi ua tatou vaivai ai, ma matua faaosoosoina. …

Atiina ae le pulea o lou lava tagata ina ia, atili ai ona e le tau filifili ma toe filifili i le mea o le a e faia pe a e fetaiai ma le faaosoosoga lava lea e tasi i lea taimi ma lea taimi. E na ona manaomia ona e filifili nisi o mea tau lava o le faa-tasi ! …

O le taimi e faamuta ai ala leaga o le taimi a o lei amataina. O le mealilo o le olaga manuia o le puipui ma le tetee. O i latou o e faamatuu atu i le leaga e masani lava o i latou ia e tuuina i latou lava i se tulaga faataumaoi.

(Aoaoga a Peresitene o le Ekalesia: Spencer W. Kimball [2006], 108-9)