O se vaega o alii talavou ma tamaitai talavou e fiafia e mafuta le tasi ma le isi a o latou talatalanoa faatasi i Pale Farani.
Sa tusi Paulo i le Au Paia i Korinito e fesoasoani ia latou iloa e tatau ona latou tasi ia Keriso. Sa ia aoao atu foi pe a faapea e mafai e tagata uma ona iloa ma faaaoga meaalofa faaleagaga sa maua mai i le Alii, e mafai ona avea i latou e pei o vaega eseese o le tino e galulue faatasi i le loto gatasi. O lenei lesona e faamoemoe e fesoasoani atu e te iloaina ai meaalofa faaleagaga ua tuuina atu e le Alii ia te oe ina ia faamanuia ai isi ma faamalosia Lana Ekalesia.
Mauaina o meaalofa
O le a se meaalofa taua sa e mauaina?
O le a se aafiaga o lenei meaalofa i lou olaga? O le a se mea na mafai ona e faia ona o lenei meaalofa?
O le a ni ou lagona mo le tagata sa foaiina atu lenei meaalofa?
Ao e suesue i le 1 Korinito 12, o le a e aoao ai e uiga i meaalofa faaleagaga e foaiina mai e le Tama Faalelagi mo Lana fanau. Vaai pe aisea ua Ia foaiina mai ai nei meaalofa, ma saili ni musumusuga mai le Agaga Paia e fesoasoani ia te oe ia iloa se meaalofa ua tuuina atu ia te oe.
E foaiina mai e le Alii meaalofa faaleagaga ia i tatou
“O meaalofa faaleagaga o ni faamanuiaga po o tomai e tuuina mai e le Atua i Ana fanau e ala mai le mana o le Agaga Paia” (Autu o le Talalelei, “Meaalofa Faaleagaga,” topics.ChurchofJesusChrist.org).
Aoao e uiga i meaalofa faaleagaga e ala i le faitauina o le 1 Korinito 12:3-11. (Matau o le upu “taitasi” i le fuaiupu 11 o lona uiga o le “taitoatasi.”)
O a nisi o meaalofa faaleagaga o lisiina i nei fuaiupu?
E tele ituaiga eseese o meaalofa faaleagaga. Ia aoao e uiga i isi meaalofa, faitau le Moronae 10:8-18; Mataupu Faavae ma Feagaiga 46:11-26; ma le saunoaga lenei a Elder Marvin J. Ashton (1915-94) o le Korama a Aposetolo e Toasefululua:
Ata
Atatosi o Marvin J. Ashton.
O le a ou tauina atu nisi o meaalofa e tau leiloa pe matua iloga ae peitai e matua taua tele … : o le meaalofa o le ole atu; o le meaalofa o le faalogo; o le meaalofa o le lagonaina ma le faaaogaina o le leo filemu, ma itiiti; o le meaalofa e mafai ai ona fetagisi; o le meaalofa e mafai ona alo ese ai mai i finauga; … o le meaalofa o le saili i le amiotonu; o le meaalofa o le le faamasino tagata; o le meaalofa o le vaai i le Atua mo taitaiga; … o le meaalofa o le tausiga o isi; o le meaalofa o le mafai ona mafaufau loloto; o le meaalofa o le tuuina atu o tatalo; o le meaalofa o le mauaina o se molimau mamana.
(Marvin J. Ashton, “There Are Many Gifts,” Ensign, Nov. 1987, 20)
O ai e faamanuia e le Alii i nei meaalofa faaleagaga?
O le a se mea e fesoasoani ai lenei mea ia te oe e malamalama ai e uiga i le Alii?
O se tasi o mea moni atonu ua e iloa e faapea e foaiina e le Alii i tagata taitasi o Lana Ekalesia e le itiiti ifo i le tasi o nei meaalofa faaleagaga e faamanuia atu ai i isi.
Toe manatu i meaalofa faaleagaga ua e lagona sa faamanuiaina ai oe e le Atua. Afai e faafaigata ona e iloaina au meaalofa faaleagaga, mafaufau e fesili i se matua po o se taitai. E mafai e lou faamanuiaga faapeteriaka ona faaalia nisi o au meaalofa faaleagaga.
1. Tali fesili nei i totonu o lau api talaaga mo suesuega:
O a ni ou lagona e uiga i le Tama Faalelagi ma Iesu Keriso, ina ua e iloa ua Laua faamanuiaina oe i se meaalofa faaleagaga?
E mafai faapefea e le iloa ua tuuina mai ia te oe se meaalofa faaleagaga ona aafia ai lau vaai i lou faasinomaga paia?
Aisea e te manatu ua tuuina mai ai e le Atua meaalofa faaleagaga i tagata taitasi o le Ekalesia ae le na o ni isi o tagata?
E finagalo le Alii ia tatou faamanuia atu le tasi i le isi
Faitau le 1 Korinito 12:14-20 e sue ai le faatusatusaga sa faaaoga e Paulo e fesoasoani tatou te iloa ai le taua o o tatou sao taitoatasi.
O le a le mea e faaaoga e Paulo e faatusatusa i ai le Ekalesia i lenei fuaitau? O le a se mea ua aoao atu e lenei faatusatusaga ia te oe e uiga i meaalofa faaleagaga?
Na faapefea ona faamanuiaina oe e ala i meaalofa faaleagaga a isi?
Ina ia vaai i se faataitaiga o se tagata sa faasoaina atu a latou meaalofa faaleagaga i isi, e mafai ona e matamamata i le vitio “With All Your Heart” (3:26), e maua i le ChurchofJesusChrist.org, o loo faamatala atu ai e uiga i se alii talavou sa valaauina e faaaoga se meaalofa mai le Alii sa ia faatoa mauaina talu ai nei. A o e matamata, maitau lelei musumusuga a le Agaga Paia e uiga i le auala e te faaaogaina ai au meaalofa e faamanuia ai isi.
Mafaufau loloto pe faapefea ona faaaoga meaalofa faaleagaga ua faamanuiaina ai oe e faamanuia ai lou aiga, uarota po o paranesi, ma isi. E te ono manao e tusi i totonu o lau api faamaumau mo suesuega ni musumusuga a le Agaga Paia sa e mauaina e uiga i au meaalofa.
2. Tali se lua pe sili atu o fesili nei i totonu o lau api faamaumau mo suesuega:
O le a se mea e te manatu e finagalo le Alii ia e malamalama i ai e faatatau ia oe lava ia ma au meaalofa faaleagaga?
O le a se faamalosiau e te tuuina atu i se isi ua lagona ua leai ni a latou meaalofa faaleagaga?
O le a se meaalofa faaleagaga ua e naunau i ai? O a ni mea e mafai ona e faia e sailia ai lenei meaalofa? (Ua valaaulia i tatou e le Alii e tatou te sailia meaalofa faaleagaga; tagai i le 1 Korinito 12:31; 14:1; Mataupu Faavae ma Feagaiga 46:7–9.)
O a nisi o auala e mafai ona e fa’aaogaina ai au meaalofa faaleagaga e faamanuia ai i isi? E faapefea e lenei mea ona fesoasoani ia i tatou ia avea atili ai e faapei o le Faaola?
Tuu i le faitalia: O e Manao e Aoao Atili?
E mafai faapefea ona ou faaaogaina au meaalofa faaleagaga e auauna atu ai i isi?
Sa faasoa mai e Peresitene Dieter F. Uchtdorf, a o i ai i le Au Peresitene Sili, le ala e mafai ona tatou mulimuli ai i le faataitaiga a Iesu Keriso:
Ata
O le ata aloaia o Elder Dieter F. Uchtdorf o le Korama o Aposetolo e Toasefululua, 2006. Na valaauina e avea ma Fesoasoani Lua i le Au Peresitene Sili, 3 Fepuari 2008. Na faia se ata aloaia i le 2008 e sui ai le ata na pueina i le 2004.
Pe a ou mafaufau i le Faaola, e tele lava ina ou mafaufauina o Ia ma Ona aao mafola; o aapa mai e faamafanafana, faamalolo, faamanuia, ma le alofa. Ma e talanoa o Ia i taimi uma e faatasi, aunoa ma le vaai maualalo i, tagata. E alofa o Ia i e lotomaualalo ma e agamalu ma savavali faatasi ma i latou, ma aoao tu ia i latou ma ofoina atu le faamoemoe ma le faaolataga.
O le mea lena na Ia faatinoa i le taimi o Lona soifuaga faaletino; o se mea foi semanu Na te faatinoina pe ana fai o loo Ia soifua faatasi ma i tatou i le aso; ma e ao foi ona tatou faatinoina i le avea ai ma Ona soo ma ni tagata o Le Ekalesia a Iesu Keriso o le Au Paia o Aso e Gata Ai. …
Ao tatou mulimulitai i Ana faataitaiga atoatoa, o le a mafai ai la ona avea o tatou lima ma Ona aao; o tatou mata, ma Ona fofoga; o tatou loto, ma Lona finagalo.
(Dieter F. Uchtdorf, “O Outou o O’u Lima,” Liahona, Me 2010, 68)
Na aoao mai Elder David A. Bednar o le Korama o Aposetolo e Toasefululua:
Ata
Elder David A. Bednar, atatosi aloaia o le Korama a Aposetolo e Toasefululua. 2020.
Tatou te mauaina meaalofa faaleagaga ina ia faamanuia atu i isi tagata. Afai o le tatou naunautaiga o le mauaina o se meaalofa ona o le manao, e masalo ailoga e tatou te mauaina lena. A o tatou saili e auauna atu i isi e tusa ai ma aoaoga a Iesu Keriso, e faamanuiaina i tatou i meaalofa faaleagaga ma gafatia faateleina e faataunuu ai na auaunaga.
O le a se mea e mafai ona ou faia pe afai ou te le o lagonaina e i ai sau meaalofa faaleagaga taua?
O se fautuaga mai ia Elder Jeffrey R. Holland o le Korama a Aposetolo e Toasefululua o loo maua i le vitio “Songs Sung and Unsung” (mai le faailotaimi 0:57 i le 2:57). O loo maua lenei vitiō i le ChurchofJesusChrist.org.
Sa faasoa mai e Elder John C. Pingree Jr. o le Fitugafulu se faataitaiga o se tuafafine sa iloaina sa ia te ia se meaalofa faaleagaga ae sa ia lei amanaiaina:
Ata
Ata Aloaia o Elder John C. Pingree, Jr. Na pueina ia Mati i le 2017.
I se tasi aso, sa aioi atu ai se tamaitai talavou lotovaivai, “Le Alii e, o le a la’u galuega patino?” Sa Ia tali mai, “Ia matau isi tagata.” O se meaalofa faaleagaga! Talu mai lena taimi, sa ia maua le olioli i le matauina o i latou e galo i le tele o taimi, ma sa galue le Atua e ala ia te ia e faamanuia ai le toatele. O nisi o a tatou meaalofa faaleagaga atonu e le faalauiloa ai i tatou e tulaga masani o le lalolagi, ae e taua i le Atua ma Lana galuega.
(John C. Pingree, Jr., “Ua ia te A’u Se Galuega mo Oe,” Liahona, Nov. 2017, 33-34)
O le a le mea ou te faia pe afai ua ou lagonaina lou le agavaa mo galuega atofaina a le Ekalesia?
Sa aoao mai Peresitene Dieter F. Uchtdorf, o le sa i ai i le Au Peresitene Sili:
Ata
O le ata aloaia o Elder Dieter F. Uchtdorf o le Korama o Aposetolo e Toasefululua, 2006. Na valaauina e avea ma Fesoasoani Lua i le Au Peresitene Sili, 3 Fepuari 2008. Na faia se ata aloaia i le 2008 e sui ai le ata na pueina i le 2004.
Atonu tou te manatu faapea o loo i ai isi e sili atu ona gafatia ma sili atu le poto masani, e mafai ona faataunuuina o outou valaauga ma tofiga i se tulaga e sili atu nai lo oe, ae ua tuuina atu e le Alii ou tiutetauave mo se mafuaaga. Atonu e i ai ni tagata ma ni loto e na o oe lava e mafai ona maua ai ni aafiaga mo le lelei. Atonu e leai lava se tasi e mafai ona faia i le ala lava lea e tasi.
(Dieter F. Uchtdorf, “Faamaualuga Le Mea E Te Tu Ai,” Liahona, Nov. 2008, 56)