Iloilo Lou Aoaoina 8

Roma 1–16; 1 Korinito 1–7

O lenei lesona ua faamoemoe e fesoasoani ia te oe e iloilo ai sini na e faatutuina ma lou tuputupu a’e patino na e mauaina i le gasologa o lou suesueina o le Feagaiga Fou.

O le avea ai ma se soo o Iesu Keriso

• Ana mafai ona e malaga i soo se nofoaga fou, o fea e te manao e te alu i ai?

• A o e faimalaga, aisea e taua ai ona e iloilo po o e tumau i luga o le faasinoala? O le a le mea atonu e tupu pe ana e le faia?

E taua ona iloilo foi le tatou faigamalaga faaleagaga. Sa aoao mai e Peresitene M. Russell Ballard o le Korama a Aposetolo e Toasefululua le taua o le galue e faataunuu sini faaleagaga ona ia faaopoopo mai lea:

Ua ou iloaina ina ia tumau le taulaiga … ou te manaomia i taimi uma ona fesili ifo ia te au lava, “O faapefea le tulaga o au faatinoga?”

E tai pei o le faia o se faatalanoaga patino ma oe lava ia. …

I le gasologa o vaiaso a sau, ia saili se taimi e iloilo ai sini o lou olaga ma au fuafuaga ma faamautinoa ua ogatusa ma le fuafuaga sili a lo tatou Tama Faalelagi mo lo tatou fiafia. Afai e te manaomia ona salamo ma sui, ia mafaufau e fai nei loa. …

Ou te molimau atu e leai lava se isi sini e sili atu i le olaga faaletino nai lo le ola e faavavau faatasi ai ma o tatou Matua Faalelagi faapea ma lo tatou Faaola pele, le Alii o Iesu Keriso. Ae e sili atu nai lo na o la tatou sini—o la Latou sini foi lea. E i ai so Latou alofa atoatoa mo i tatou, e sili atu ona mamana nai lo mea e mafai ona tatou amata malamalama i ai. E matuai atoatoa, maeaea ma faavavau ona ogatasi ma i tatou. O i tatou o la Latou galuega. O lo tatou mamalu o lo Latou mamalu foi lea. E sili atu nai lo se isi lava mea, Latou te finagalo ia tatou o atu i le aiga.

(M. Russell Ballard, “Toe Fo’i Atu ma Mauaina,” Liahona, Me 2017, 64–65)

Faaalu ni nai minute e te fesili ai ia te oe lava i fesili nei, e pei lava o e faia se faatalanoaga patino, maoti ma oe lava ia. Mafaufau e tusi au tali i lau api faamaumau mo suesuega.

• O a ni mea na ou faia lata mai nei ia maua ai se molimau o ni upumoni patino e ala mai i le Agaga Paia? O le a se mea o ou aoaoina e uiga i le mauaina o faaaliga e ala mai le Agaga Paia? (Atonu sa e faaaoga sina taimi e mafaufau ai i nei mea a o e suesue i le 1 Korinito 2.)

• O a ni sini sa ou faatuina ina ia ou latalata atili atu ai i le Faaola ma avea ai ma Ona soo? O a manuia ua oo mai ia te au? O a ni faafitauli o feagai ma au? O a mea e manaomia ona ou faia e saili ai le fesoasoani a le Alii ma faaauau ai pea le alualu i luma o lau faigamalaga faaleagaga?

Faamatalaina o le alofa tunoa o Iesu Keriso

Ina ia fesoasoani e iloilo lou malamalama i se tasi o upumoni taua o le talalelei sa e suesueina lata mai nei, fai le gaoioiga lenei:

Vaai faalemafaufau e faapea ua faafesootai ane oe e faifeautalai. O loo latou aoao atu i se tasi tou te tupulaga o loo faafaigata ona ia malamalama i le alofa tunoa o Iesu Keriso. Ua talosaga ane faifeautalai tou te o faatasi ma i laua i le latou aoaoga atofaina e sosoo ai ina ia mafai ona e faasoa atu mea ua e iloa e uiga i le alofa tunoa o le Faaola ma pe ua faapefea ona faamanuiaina ai lou olaga i le mulimuli ia Iesu Keriso.

Faaaoga se avanoa e te suesue ai i tusitusiga paia e maua ai fuaiupu ma upumoni e mafai ona fesoasoani atu. O le faitauina o nisi o fuaiupu nei atonu o le a fesoasoani ai:

• Roma 3:10-12, 20-28

• Roma 4:16 (e aofia ai le Faaliliuga a Iosefa Samita i le Roma 4:16, vaefaamatalaga a)

• Roma 5:1–2, 21

1. Faamaea le gaoioiga lenei i lau api faamaumau mo suesuega:

1. Tusi i lalo pe faapefea ona e faamatalaina le alofa tunoa o le Faaola i au lava upu.

2. I le faaaogaina o se mau mai le Roma, ia faasoa atu se upumoni se tasi e uiga i le alofa tunoa o le Faaola ma auala e mafai ona tatou maua ai i o tatou olaga. Mafaufau e faaaofia pe faapefea e le iloaina o nei upumoni ona aumaia oe e latalata atili atu i le Faaola.

Faateleina o lou manao ia tasi ia Keriso

O le lotogatasi o se tasi foi lea o manatu taua i tusi a Paulo i tagata o Roma ma Korinito.

2. Faamaea mea nei i totonu o lau api faamaumau mo suesuega:

1. Saili se fuaiupu sa e suesueina i le Roma po o le 1 Korinito na aoaoina oe i se upumoni anoa e faatatau i le lotogatasi ma isi ia Keriso. O nisi faataitaiga e maua i le Roma 12:10–21; 14:10–13, 19; 15:1–7 ma i le 1 Korinito 1:10–13; 3:3–9. O le a se upumoni o loo aoao mai e le fuaiupu na e filifilia?

2. Mafaufau i se taimi sa oo ai ia te oe ni mea o loo aoao mai e Paulo i le fuaiupu sa e filifilia. O le a se mea ua e manatu e sili ona saofaga i le tele o au taumafaiga ina ia lotogatasi ia Keriso?

3. Tali se lua o fesili nei:

   • O le a le eseesega o le galulue faatasi lelei ma le lotogatasi e ala ia Iesu Keriso ma Lana talalelei?

   • Aisea e anoa ai ia te oe le upumoni sa e filifilia i le aitema a?

   • I le masina ua tuanai, sa faapefea ona faatupulaia lou malamalama i le lotogatasi ma lou manao e autasi ma isi?

   • O le a sau mea na fai ia lotogatasi atili ai ma isi ia Keriso?

   • O a luitau o feagai ma oe a o e galue ia atili ona e lotogatasi ma isi?

Saili le taitaiga a le Agaga Paia e fesoasoani ia te oe e iloa ai auala e finagalo le Alii ina ia e lotogatasi ai ma isi ia Keriso. Saili foi faaaliga pe faapefea ona e manumalo i luitau e ono feagai ma oe.

Faaauau ona agai pea i luma i lau faigamalaga faaleagaga, e latalata atili atu ai i le Tama Faalelagi ma Iesu Keriso. Ia iloa e alolofa i Laua ia te oe ma o loo sauni e fesoasoani atu ia te oe i au taumafaiga.