1 Korinito 1–4

Iesu Keriso: O lo Tatou Faavae Mautinoa

Mafaufau i le aafiaga leaga o fefinauaiga, faamaualuga, aoaoga sese, ma amioga le mamā ua i ai i le lalolagi i nei aso. Sa tauivi tagata o le uluai Ekalesia na nonofo i Korinito ma nei foi luitau. A o talai i Efeso i lana malaga faafaifeautalai lona tolu, sa tusi atu le Aposetolo o Paulo i le Au Paia i Korinito e faamalosiau ia i latou ma faamanatu atu ia i latou e faalagolago ia Iesu Keriso. O le lesona lenei e mafai ona fesoasoani ia oe e te malamalama ai pe faapefea ona fesoasoani le fausia o o tatou olaga i le faavae o Iesu Keriso, tatou te faatoilalo ai luitau faalelalolagi.

Tumau le faamaoni i tulaga faigata

Vaai faalemafaufau e faapea ua lafo mai e sau uo lelei o loo nofo i se isi aai le savali lenei:

“E matua faigata lava le siomia ai i faatosinaga leaga i soo se mea. E toatele tagata iinei e le o tausia poloaiga, ma o nisi o i latou e faitio i le Ekalesia. Ou te iloa nisi ua fulitua i a latou molimau i ni tulaga lava faapea ma ou te le manao e tupu lena mea ia te a’u. E i ai se fautuaga?”

• O le a lau tala o le a fai atu i lau uo?

• O a ni faatosinaga leaga ma aafiaga toatuga ua e maitauina i le mea o loo e nofo ai?

• E faapefea ona fai nei faatosinaga ma luitau i nisi o taimi ina ia tumau ai ma le faamaoni i lou faatuatuaga?

A o e suesue i lenei lesona, mafaufau pe faape’i lou faamaoni pe a e feagai ma luitau faalelalolagi po o ni faatosinaga leaga. Saili le taitaiga e ala i le Agaga Paia e iloa ai pe faapefea ona faamalosia lou faavae ia Iesu Keriso, ma vaai mo upumoni e mafai ona fesoasoani ia te oe e faatoilalo ai ou luitau. I lana malaga faafaifeautalai lona lua, sa toeitiiti atoa le lua tausaga o talai e le Aposetolo o Paulo le talalelei i Korinito (tagai Galuega 18:1-18) ma faatulaga se paranesi a le Ekalesia iina. (Mo le sueina o le aai o Korinito, tagai i Faafanua o le Tusi Paia, nu. 13, “ O Malaga Faafaifeautalai a le Aposetolo o Paulo.”) O Korinito o se nofoaga autu mauoa o fefaatauaiga ma o le laumua o le itumalo o Roma o Akaia. E toatele tagatanuu a Korinito na ifo i tupua ma ola le mama. O isi foi sa fevaevaea’i ma femisaa’i. I lenei siosiomaga, sa oo ina faigata ai le tumau moni i le talalelei a le Faaola mo le toatele o tagata o le Ekalesia. Ina ua tusi atu Paulo i le Au Paia i Korinito e fesoasoani ia te i latou i o latou luitau, sa ia talanoa i le faavae sa ia faataatia mo i latou.

Faitau le 1 Korinito 2:1-5 ma le 1 Korinito 3:10-11, vaavaai mo fasifuaitau o faamatala mai ai lenei faavae.

• O le a lou manatu i le uiga o le fausia ai o lou faavae i luga o Iesu Keriso?

I le Tusi a Mamona, sa uunaia foi e Helamana ona atalii ia atiae i luga o le faavae o Iesu Keriso. Faitau le Helamana 5:12, ma vaavaai mo faamanuiaga sa folafola atu e Helamana.

• O a ni mea e mafai ona e faasoa atu} i lau uo mai nei fuaiupu e ono aoga?

O se tasi o upumoni e mafai ona tatou aoaoina mai nei mau o le a o tatou fausia le faavae o o tatou olaga i luga o Iesu Keriso, e mafai ona tatou manumalo i faatosinaga a Satani ma luitau faalelalolagi.

• O le a se mea e te iloa, lagona, pe talitonuina e uiga i le Faaola e fesoasoani ai ia te oe ia e manao ai e avea o Ia ma ou faavae?

1. Fai mea nei i totonu o lau api faamaumau mo suesuega:

• Tusi se ata faigofie o se fale e i ai se fola po o se faavae malosi. I le faataamilo o le fale, tusi ai nisi o luitau po o ni aafiaga le lelei o feagai ma oe.

• I totonu pe faataamilo i le faavae, tusi ai ni mea e mafai ona e faia e faavae ai lou olaga i luga o le Faaola.

• Tali le fesili lenei: Na faapefea ona fesoasoani nei faatinoga ia te oe pe o le a faapefea ona fesoasoani ia te oe pe a e feagai ma luitau po o faatosinaga le lelei?

I le tusi a Paulo i tagata Korinito, sa ia tautalagia ai ni mataupu eseese ma aoao atu pe faapefea ona i ai i le Faaola ma Lana talalelei le mana e fesoasoani ai i tagata Korinito ia manumalo i o latou luitau (tagai 1 Korinito 1:23-24). O gaoioiga nei e taulai atu i le lua o na faafitauli. Faitau filifiliga nei ma filifili se tasi e aupito sili ona anoa mo oe e suesue i ai.

2. Faamaea se tasi o gaoioiga nei i totonu o lau api faamaumau mo suesuega:

Filifiliga A: O fevaevaeaiga ma fefinauaiga

O se tasi o luitau sa tauivi ma le Au Paia i Korinito o fefinauaiga. O se vaega o le pogai o le tutupu o fevaevaeaiga ona sa latou talitonu o o latou tulaga i le Ekalesia e fuafua i le taua o le tagata sa papatisoina i latou (tagai 1 Korinito 1:12).

I tafatafa o lau ata o le fale, atonu e te manao e lisi ai soo se auala o e feagai ai ma fevaevaeaiga po o fefinauaiga i totonu o lau uarota, aiga, po o le nuu.

• O a nisi o taunuuga o fevaevaeaiga ma fefinauaiga?

Faitau le 1 Korinito 1:10-13 ma le 1 Korinito 3:3-9, vaavaai pe na faapefea ona taumafai Paulo e fesoasoani i tagata ia atiae i luga o le faavae o Iesu Keriso.

• O a ni mea na e vaaia i nei fuaiupu e mafai ona fesoasoani i tagata e faatoilalo ai fevaevaeaiga ma fefinauaiga?

• Aisea ua e manatu ai e fesoasoani le fausia o lou olaga i luga o Iesu Keriso ina ia lotogatasi ma faaitiitia ai fefinauaiga ma i latou o siomia oe?

Filifiliga E: O le poto o le lalolagi

O le toatele sa nonofo i Korinito sa faatauaina le poto faalelalolagi. O le savali o se Mesia faasatauroina sa lei fetaui ma manatu o le toatele o tagata Iutaia ma tagata Nuu ese. I le lalolagi faa-Roma, o le faasalaga o le faasatauroina o se faatusa o le faalumaina ma le toilalo. O le manatu e uiga i se tagata ua loto e puapuagatia mo isi o se “mea valea” lea i tagata Eleni ( 1 Korinito 1:23). Mo tagata Iutaia, o se Mesia na maliu i luga o se satauro o se “mea e tausuai ai” ( 1 Korinito 1:23) aua sa latou faamoemoe e faatoilalo e le Mesia o latou fili.

Faitau le 1 Korinito 1:17-25, ma vaavaai pe na faapefea ona tali atu Paulo i nei uiga.

I se mea o lau ata o le fale, lisi ai auala e ono mafai ai e le poto o le lalolagi ona aafia pe luitau ai lau molimau ia Iesu Keriso ma Lana talalelei.

• Aisea e ono le malamalama ai pe le talisapaia ai e nisi tagata Iesu Keriso ma Lana Togiola i nei ona po?

• O a suiga e ono faia pe a oo ina iloa pe lagona e se tagata e i ai i le Faaola le mana moni i o latou olaga? (tagai 1 Korinito 1:24).

• E faapefea ona fesoasoani ia oe le fausia o lou olaga ia Iesu Keriso ma Lana talalelei pe a e feagai ma ni manatu luitauina faalelalolagi?

O le fausia o o tatou olaga i luga o Iesu Keriso

Faaaoga ni nai minute e iloilo ai lou lava olaga. O a ni auala na e fausia ai lou faavae i luga o Iesu Keriso? O a ni auala e te ono manao e faaleleia atili ai ? E faapefea e le ono fausiaina atili o lou olaga i luga o le Faaola o Iesu Keriso ma Lana talalelei ona fesoasoani ia te oe i le feagai ai lea ma ou lava luitau ma faatosinaga leaga? Mafaufau e tusifaamaumau ou manatu ma au sini i lau api talaaga mo suesuega.

Tuu i le faitalia: O e Manao e Aoao Atili?

Aisea e tatau ai ona ou fausia lo’u faavae i luga o Iesu Keriso?

Na faailoa mai e Elder Chi Hong (Sam) Wong o le Fitugafulu:

Afai tatou te atiaʼe lo tatou faavae i luga o Iesu Keriso, e le mafai ona tatou pauu! A tatou tumau ma le faamaoni e oo i le iuga, o le a fesoasoani le Atua ia i tatou e faavae o tatou olaga i luga o Lona papa, “ma o le a le mafai e faitotoa o seoli ona manumalo e faasaga ia te i tatou” (Mataupu Faavae ma Feagaiga 10:69). Atonu e le mafai ona tatou suia mea uma e oo mai, ae e mafai ona tatou filifili i le ala pe faapefea ona tatou tapena mo mea o le a oo mai.

(Chi Hong [Sam] Wong, “E Le Mafai Ona Latou Manumalo; E Le Mafai Ona Tatou Pauu,” Liahona, Me 2021, 98)