1 Korinito 6

“O Lo Outou Tino O le Malumalu lea o le Agaga Paia”

Atonu o isi taimi ua faapei ai le salalau o amio le mama ma le agasala faalefeusuaiga o ni faafitauli tulagaese i o tatou aso. Ae peitai, i lana tusi na tusia i le toeitiiti 2,000 tausaga ua tuanai, na aoao ma lapatai mai ai Paulo e uiga i nei lava agasala. O aoaoga mamana a Paulo na faamalosia ma faasa’oina ai le Au Paia i Korinito, ma taitai ai i latou e toe foi i le ala o feagaiga. O lenei lesona ua faamoemoe e fesoasoani ia e malamalama atili ai i le taua o lou tino faaletino ma le taua o le tausisia o le mama i tulaga o feusuaiga.

Mama i tulaga tau feusuaiga

Faitau faamatalaga nei e uiga i le mama i tulaga tau feusuaiga. Fuafaatatau ia faamatalaga taitasi mai le 1 i le 5 (1=matuai le ioeina, 2=le ioeina, 3=leai se itu, 4=ioeina, 5=matuai ioeina).

• O loo tatou ola i se lalolagi o loo eseese ai manatu o tagata po o a uiga ma aga tau i feusuaiga e talia.

• Ou te malamalama i tulaga faatonuina a le Alii e faatatau i le mama i tulaga tau feusuaiga (ua taua foi o le tulafono o le legavia).

• O loo i ai lo’u naunautaiga e ola e tusa ma le tulaga faatonuina a le Alii e faatatau i le mama atoatoa i tulaga tau feusuaiga.

• Ou te iloa le ala e faamanuiaina ai lo’u olaga e le tulaga faatonuina a le Alii o le mama i tulaga tau feusuaiga.

• E i ai au fesili e uiga i le tulaga faatonuina a le Alii o le mama i tulaga tau feusuaiga.

Mafaufau e tusi i lau api faamaumau mo suesuega mea ua e iloa ma talitonu i ai e uiga i le tulaga faatonuina a le Alii e faatatau i le mama i tulaga tau feusuaiga, faapea foi ma ni au fesili e uiga i ai. A o e suesueina lenei lesona, saili ina ia taitaiina oe e le Tama Faalelagi e ala i le Agaga Paia. Taumafai ina ia e iloa ma aoaoina upumoni e mafai ona fesoasoani ia e malamalama atili ai ma naunau e ola i le tulaga faatonuina a le Alii o le mama i tulaga tau feusuaiga ma o le a fesoasoani lena e tali ai au fesili ma popolega.

Ua aoao atu e Paulo le tulafono a le Alii o le legavia

O Korinito sa o se nuu telē, tamaoaiga, ma [ni tagata] eseese lea sa taatele ai le agasala tau i feusuaiga. Na lisiina e Paulo le faitaaga (mafutaga feusuai ae e le’i faaipoipo), mulilua, ma le faatauatane/faatauafafine o nisi o agasala taatele i tagata Korinito (tagai i le 1 Korinito 6:9–10).

Faitau i aoaoga a Paulo i le 1 Korinito 6:18–20, ma mafaufau e faailoga upu po o fasifuaitau o aofia ai aoaoga a le Atua e uiga i le mama i tulaga tau feusuaiga ma le natura paia o le tino o le tagata soifua.

O le 1 Korinito 6:19–20 o se fuaitau o le atamai i aoaoga faavae. Mafaufau e faailoga fuaitau o mau o le atamai i aoaoga faavae i se auala iloga ina ia mafai ai ona e maua gofie. O le a e aoao atili e uiga i lenei fuaitau o le atamai i aoaoga faavae i le lesona e sosoo ai.

• O a upumoni ua e lagona o loo finagalo le Alii e te malamalama i ai mai nei fuaiupu? Aisea e te manatu ai e finagalo le Alii ia e malamalama i na upumoni?

• E mafai faapefea e nei upumoni ona tosina ai le ala e te vaai ai i le tulafono a le Alii o le legavia?

O se tasi upumoni tatou te aoaoina mai nei fuaiupu o le, o o tatou tino o malumalu o le Atua e mafai ona afio ai le Agaga Paia.

1. Faamaea le gaoioiga lenei i lau api faamaumau mo suesuega:

I le ogatotonu o se itulau i lau api faamaumau mo suesuega, tusi vave se ata faigofie o se tagata o loo tu i tafatafa o se malumalu. E faataamilo i lau ata, lisi ai ni mea e tutusa i le va o se tino faaletino ma se malumalu. Faailoa mai mafuaaga e mafai ona fesoasoani ai lenei faatusatusaga e te malamalama ai i le tulafono o le ola mama. O fesili nei e mafai ona fesoasoani ia te oe i le faia o lenei faatusatusaga:

• E mafai faapefea e le mafaufau o o tatou tino o ni malumalu ona faatosina ai le ala tatou te taulima ai o tatou tino?

• E mafai faapefea e lenei faatusatusaga o o tatou tino o ni malumalu ona faatosina ai o tatou mafaufauga ma aga e faatatau i le mama i tulaga tau feusuaiga?

• O a upumoni e uiga i le Agaga Paia e taua ona malamalama i ai i lenei fuaitau? Aisea?

• O a ni mafuaaga ua e manatu e aoga ai le taumafai ina ia mafuta le Agaga Paia ma oe?

E faapefea pe afai e le usitaia e se tagata le tulafono o le legavia? A o aoao atu i tagata Korinito, na maitauina e Paulo o nisi o tagata o le ekalesia i Korinito sa faia agasala tau i feusuaiga i ni taimi ua tuanai (tagai i le 1 Korinito 6:9–11). Ae ina ua latou salamo ma papatisoina, sa faamamaina i latou e ala i le Togiola a Iesu Keriso.

Faitau le 1 Korinito 6:11, ma mafaufau e faailoga upu po o fasifuaitau na faaaoga e Paulo e fesoasoani ai i tagata i Korinito ia malamalama i le mana faamama o le Togiola a Iesu Keriso, o loo ua avanoa mo tagata taitoatasi uma.

• Aisea e taua ai le iloa e mafai e Iesu Keriso ona faamama i tatou mai agasala tau i feusuaiga?

Manatua o “tagata e aafia fua i feusuaiga faatautala e le ta’usalaina i le agasala ma e le manaomia ona salamo. Afai na e aafia fua i se faiga faatautala, ia e iloa e ta’umamaina oe ma e alofa le Atua ia te oe. Talanoa i ou matua po o se isi tagata matua faatuatuaina ma saili vave se fautuaga mai lou epikopo. E mafai ona latou fesoasoani faaleagaga ia te oe ma fesoasoani ia e maua le puipuiga ma le fesoasoani e te manaomia” (“Mama Atoatoa i Tulaga Feusuai,” Mo Le Malosi o le Autalavou [tamaitusi, 2011], 36–37).

Toe faitau le 1 Korinito 6:19–20, ma vaavaai mo isi mea na aoao mai e Paulo e uiga ia Iesu Keriso ma Lana Togiola.

• O le a sou manatu i le uiga o faamatalaga a Paulo lea na ia faapea mai ai “e le aiā foi outou ia te outou” ma “ua faatauina outou i le tau”?

• E faapefea e le taulaga a le Faaola ona aafia ai le ala e te mafaufau ma tausia ai lou tino faaletino?

Na faamamafa mai e Elder Jeffrey R. Holland o le Korama a Aposetolo e Toasefululua le sootaga i le va o le ola mama ma le taulaga a Iesu Keriso.

O le tino o se vaega taua o le agaga. O lea aoaoga faavae taua ma tulaga ese a le Au Paia o Aso e Gata Ai e faamamafaina ai le mafuaaga e matuai ogaoga ai le agasala tau i feusuaiga. … I le tafilisaunoaina o le tino o le isi tagata—o lona uiga o le tafilisaunoaina foi lea o lona agaga— ua faaleagaina e ia le Togiola a Keriso, lea na laveaiina lena agaga ma maua ai le meaalofa o le ola e faavavau. …

Faamolemole, aua nei faapea ane: “O ai e afaina ai? Aisea ua le [faaaoga ai] sina saolotoga itiiti? E mafai ona ou solitulafono nei ae salamo mulimuli ai.” Faamolemole aua le faavalevalea, ma faalealofa. E le mafai e aunoa ma se faasalaga ona “toe faasatauroina Keriso” [tagai i le Eperu 6:6]. “Sosola ese ia outou i le faitaaga” [1 Korinito 6:18], o le augani mai lea a Paulo, ma sosola ese “mai soo se mea faapena” [Mataupu Faavae ma Feagaiga 59:6; ua faaopoopo le faamamafa], o le faaopoopo mai lea a le Mataupu Faavae ma Feagaiga. Aisea? Ia, o le tasi o mafuaaga ona o puapuaga e le mafuatia i le tino ma le agaga na onosaia e le Faaola o le lalolagi ina ia mafai ai ona tatou sosola ese [tagai faapitoa i le Mataupu Faavae ma Feagaiga 19:15–20]. Ua tatou nofo aitalafu ia te Ia mo lena mea. E moni lava, o loo tatou nofo aitalafu ia te Ia i mea uma mo lena mea.”

(Jeffrey R. Holland, “Mama Patino,” Ensign, Nov. 1998, 76)

2. Tali fesili nei i totonu o lau api faamaumau mo suesuega:

• E faapefea e le iloaina na puapuagatia le Faaola mo oe e ala i le maligi o Lona toto ona fesoasoani e te malamalama ai e uiga ia te Ia? E mafai faapefea e le iloaina o lenei mea ona faatupulaia lou naunau ma lou gafatia e usitai ai ia te Ia?

E pei ona aoao atu Paulo i le Au Paia i Korinito, ua tuuina mai foi e auauna a le Alii i o tatou aso fautuaga talafeagai e uiga i le tulaga faatonuina a le Alii e faatatau i le mama i tulaga tau feusuaiga ma le mana o i le Faaola e faamagalo ma faamama ai i tatou. Faitau i le “Mama Atoatoa i Tulaga Feusuai,” Mo Le Malosi o le Autalavou (tamaitusi, 2011), 35–37, o loo maua i le ChurchofJesusChrist.org po o le polokalama o le Potutusi o le Talalelei, ma vaavaai mo upumoni e mafai ona faamalosi ai oe ma tali i au fesili.

Mo nisi faamatalaga e uiga i le tulafono o le ola mama ma mo faataitaiga i ona po nei o talavou o loo ola ai, mafaufau e matamata le vitio “I Choose to Be Pure” (4:19) po o le “Chastity: What Are the Limits” (3:59) o loo maua i le ChurchofJesusChrist.org.

I Choose to be Pure

E toano ni tagata talavou o ekalesia soofaatasi na talanoa faalauaitele atu i le pogai ua latou filifili ai ia mama i feusuaiga.

Chastity: What Are the Limits?

Ua fautuaina le tupulaga o le Au Paia o Aso e Gata Ai ina ia tumau le mama mai feusuaiga, ae o a tonu lava tuaoi? O le faaaogaina o aoaoga a perofeta o ona po nei, o lenei aoaoga o loo faaali atu ai le ala e mafai ona tatou maua ai le fiafia ma le f

3. Tali fesili nei i lau api faamaumau mo suesuega:

• O a mataupu faavae na e aoaoina mai le 1 Korinito 6 ma upu a perofeta o ona po nei na fesoasoani e te malamalama atili ai i le tulaga faatonuina a le Alii e faatatau i le mama atoatoa i tulaga feusuai?

• Afai o i ai ni au fesili po o popolega e uiga i le mama atoatoa i tulaga feusuai e lei taliina i lenei lesona, o fea e mafai ona e liliu atu i ai?

Faaaoga sina taimi e manatunatu loloto ai i soo se uunaiga mai le Agaga Paia e uiga i le po o a ni faatinoga e ono finagalo le Alii e te faia ona o ou aafiaga i lenei aso.

Tuu i le Faitalia: O e Manao e Aoao Atili?

1 Korinito 6:19 Aisea e taua ai pe a ou vaai i lo’u tino o se “malumalu o le Agaga Paia”?

Na aoao mai Peresitene Russell M. Nelson i le aafiaga i o tatou olaga pe a tatou vaai i o tatou tino o se malumalu o le Atua.

O le avea ai o lou tino ma se vaega sili ona taua o le fuafuaga e faavavau a le Atua, e leitioa a faamatalaina e le Aposetolo o Paulo o se “malumalu o le Atua” [1 Korinito 3:16; tagai foi i le 6:19]. O taimi taitasi e te autilo ai i le faaata, vaai i lou tino o lou malumalu. O lena upumoni—e faafouina ma le agaga faafetai i aso taitasi—e mafai ona faatosina ai mo le lelei au filifiliga e uiga i le auala o le a e tausia ai lou tino ma le auala o le a e faaaogaina ai.

(Russell M. Nelson, “O Filifiliga mo le Faavavau,” Liahona, Nov. 2013, 107)

E faapefea ona faaosooso i tatou e Satani ina ia faaaoga sese o tatou tino?

Na aoao mai Elder David A. Bednar o le Korama a Aposetolo e Toasefululua e uiga i taufaasese a Satani ma le taua o le tino.

Matou te Talitonu i le Nofomama

O le usiusitai i le tulafono o le ola mama o le a faateleina ai lo tatou fiafia i le olaga nei, ma mafai ai ona tatou agai i luma i le faavavau.

Talu ai o se tino faaletino e matua totonugalemu i le fuafuaga o le fiafia a le Tama ma lo tatou atina’ega faaleagaga, ua saili ai Lusifelo e faalavelaveina lo tatou alualu i luma e ala lea i le faaosoosoina o i tatou e faaaoga ma le faaletatau o tatou tino. …

O le solia o le tulafono o le ola mama o se agasala inosia ma o se faaaogaina sese lea o o tatou malumalu faaletino. Ia i latou ua iloa ma malamalama i le ata o le faaolataga, o le faaleagaina o le tino o se aga o le fouvale (tagai i le Mosaea 2:36–37; [Mataupu Faavae ma Feagaiga] 64:34–35) ma se faafitia o lo tatou faasinomaga moni o ni atalii ma afafine o le Atua. A tatou vaavaai i talaatu o le olaga nei agai i le faavavau, e faigofie ona tatou iloatino ai o le mafutaga taufaasese o loo fautuaina mai e le fili, e le tumau ma gaogao ii.

(David A. Bednar, “Matou Te Talitonu i le Nofomama,” Liahona, Me 2013, 43)

Na saunoa mai Susan W. Tanner, sa avea ma Peresitene Aoao o Tamaitai Talavou, i nisi o auala e faaosooso ai i tatou e le fili ina ia faaaoga sese o tatou tino faaletino.

Ua faaosoosoina e [Satani] le toatele ina ia faaleaga i lenei meaalofa maoae o le tino, e ala i le ola le mama, amioga e le tausaafia, faaloloto, ma mea e faananau i ai. Na te faaosoosoina nisi ina ia inoino i o latou lava tino; o nisi ina ia ifo i o latou lava tino. I tulaga uma e lua, e na te faatosinaina le lalolagi ina ia manatu i le tino ua na o se meafaitino. I le feagai ai ma le tele o pepelo faasatani e uiga i le tino, ua ou manao e siia’e lo’u leo i le aso nei e lagolagosua i le paia o le tino. Ou te tautino atu o le tino o se meaalofa e ao ona taulimaina i le loto faafetai ma le faaaloalo.

(Susan W. Tanner, “O Le Paia o le Tino,” Liahona, Nov. 2005, 13)