Atamai i Aoaoga Faavae: 1 Korinito 6:19–20

“O Lo Outou Tino o le Malumalu lea o le Agaga Paia”

I lau suesuega o le 1 Korinito 6, sa e aoao ai i le tulaga faatonuina a le Alii i le mama tau feusuaiga ma le taua o lou tino faaletino. O lenei lesona o le a fesoasoani ia te oe e faateleina ai lou atamai i nei aoaoga i le tuuina atu lea o le avanoa e tauloto ai le mau faasino ma le fasifuaitau autu o le 1 Korinito 6:19–20, e faamatala ai le aoaoga faavae, ma faaaoga mataupu faavae o le mauaina o le malamalamaaga faaleagaga i se tulaga moni o le olaga.

Faamatala ma tauloto

Vaai faalemafaufau i le i ai i se talanoaga a se vasega po o se korama ae fesili se tagata aoga laitiiti ifo i le faiaoga, “O le a tonu lava le tulafono o le ola mama?” Ua fesili le faiaoga i isi tamaiti aoga, e aofia ma oe, e te tali atu i ai.

I le faaaogaina ai o upumoni sa aoao atu i le atamai i aoaoga faavae i le 1 Korinito 6:19-20, fuafua se mea e te ono faasoa atu i lau vasega e fesoasoani latou te malamalama ai i tulaga faatonuina a le Alii e tusa ma le mama tau feusuaiga, po o le ola mama, ma le mafuaaga e taua ai.

1. Tali le fesili lenei i totonu o lau api faamaumau mo suesuega:

• I le faaaoga ai o aoaoga sa faamaumau i le 1 Korinito 6:19-20, e faapefea ona e faamatala atu i se isi le tulafono a le Alii o le ola mama ma le mafuaaga e taua ai?

Ina ia fesoasoani ia te oe e tauloto le fuaitau o le atamai i aoaoga faavae 1 Korinito 6:19-20 ma le fasifuaitau autu o le mau, “O lou tino o le malumalu lea o le Agaga Paia,” mafaufau e fatu se ata, se mea faafoliga, po o se tuufaatasiga o ata e faatusaina i ai aoaoga o lea fuaitau ma le aoaoga faavae o loo aoaoina ai. O le ata na e fatuina e tatau ona faigofie ona manatua ae ia faamamalu ma faaaloalo foi i le mau ma le aoaoga faavae o loo aoao mai ai. E ono mafai ona e faaogaina le ata sa e tusia o le tagata o loo tu i tafatafa ane o le malumalu i le gaoioiga mo le lesona o le 1 Korinito 6. Ia mautinoa ua tusi le mau faasino 1 Korinito 6:19-20 ma le fasifuaitau autu o le mau ia latalata i lau ata.

A o e vaai atu i le ata sa e fatuina pe filifilia, tauloto le mau faasino ma le fasifuaitau autu o le mau i lou mafaufau seia e lagonaina ua tamau i lou mafaufau.

Faataitai le faaaogaina

I lau api faamaumau mo suesuega, faamaumau puupuu mea ua e iloa ma manatua e uiga i mataupu faavae o le mauaina o le malamalama faaleagaga e aunoa ma le faaaogaina o isi punaoa. A uma, ia faasino atu i le Pepa Autu o le Atamai i Aoaoga Faavae (2023) e siaki ai lou malamalama ma faaopoopo ai nisi faamatalaga taua atonu sa misi ia oe.

Mafaufau loloto i le tulaga lenei. Ona tali lea o fesili o loo mulimuli mai e faaaoga ai mataupu faavae o le mauaina o le malamalama faaleagaga ma le aoaoga faavae o loo aoao mai i le 1 Korinito 6:19-20 o loo faapea, o o tatou tino o malumalu ia o le Atua e mafai ona afio ai le Agaga. A le o lea, e mafai foi ona e fatua se isi ata faataitai e sili ona fetaui ia te oe ma le autalavou i lau eria.

Sa ola ae se talavou ma le iloaina o tulaga faatonuina a le Alii o le ola mama, ae ina ua umi ona i ai i se mafutaga faaleuo, ua ia manao e faaali atu ona lagona i lana uo tamaitai e ala lea i se sootaga faalefeusuaiga. E i ai tagata o lona aiga ma uo sa feusuai ma a latou paaga a o lei faaaipoipo, ma e foliga mai sa fiafia i latou uma.

Iloilo manatu ma fesili ma se vaaiga e faavavau

Sa faamamafa mai e Elder David A. Bednar o le Korama a Aposetolo e Toasefululua e faapea “o le taua e faavavau o le ola mama e na ona mafai ona faamalamalamaina i totonu o le faatatau atoa o le fuafuaga o le fiafia a le Tama Faalelagi mo Lana fanau” (“Matou Te Talitonu i le Nofomama,” Liahona, Me 2013, 41).

• O a ni vaega e patino tonu i le fuafuaga o le faaolataga a le Tama Faalelagi e te manao e malamalama ma mafaufau i ai tagata o loo i ai i lenei tulaga?

• E faapefea e upumoni i le 1 Korinito 6:19-20 ona aafia ai le ala e te vaai ai i le tulafono o le ola mama ma lau sootaga ma le aigaAtua?

Saili le malamalama atili e ala i punavai paia ua atofaina

Mafaufau e filiifli se tasi pe sili atu o punavai paia ua atofaina nei e saili ai upumoni o le a faaaoga ma fesoasoani i le ata faataita na e filifilia.

• 1 Korinito 6:19–20

• Esoto 20:14; Alema 38:12; Alema 39; 3 Nifae 12:27–30; Mataupu Faavae ma Feagaiga 42:22–23

• Taiala i Tusitusiga Paia, “Ola Mama,” scriptures.ChurchofJesusChrist.org

• David A. Bednar, “Matou te Talitonu i le Nofo Mama,” Liahona, Me 2013, 41–44

Tali le fesili lenei:

• O a ni mea sa e mauaina e mafai ona fesoasoani i lenei ata faataitai?

Faatino i le faatuatua

• O a ni auala eseese e mafai ona filifili e se tagata e faatino ai i le faatuatua i lenei tulaga?

• O a ni ou aafiaga na i ai ma le Tama Faalelagi ma Iesu Keriso o le a fesoasoani e te talitonuina ai i Laua ma mulimuli i a Laua aoaoga?

2. Fai mea nei i totonu o lau api faamaumau mo suesuega:

Otooto mai pe faapefea ona faaaoga mataupu faavae taitasi o le mauaina o le malamalama faaleagaga i le ata faataitai. Afai na e fatuina sau lava ata faataitai, ia mautinoa e aofia ai ma se aotelega puupuu o lena tulaga.