1 Korinito 2

Malamalama i Mea Faaleagaga

Ata o le BYU. Tamaitai e toalua o loo talanoa.

O a ni manatu faalelalolagi o siomia ai oe ma faafaigata ai i nisi taimi ona iloatino le mea moni? Sa le mautonu le Au Paia i Korinito ona o manatu faalelalolagi, ma sa taumafai le Aposetolo o Paulo ina ia fesoasoani ia i latou e vaai pe faapefea ona latou aoaoina upumoni faaleagaga e faavavau. E mafai e lenei lesona ona fesoasoani e te valaaulia ai le Agaga Paia e fesoasoani ia te oe e aoao mea faaleagaga.

“Tau mai ia te au pe faapefea ona e iloa”

Sa faasoa mai e Peresitene Boyd K. Packer (1924–2015) o le Korama a Aposetolo e Toasefululua le tala lenei:

Sa ou nofo i totonu o se vaalele i tafatafa o se tagata na fai mai e le talitonu i le Atua o le sa ia uunaia faanatinati mai lona le talitonu i le Atua ma o lea sa ou tuuina atu ai lau molimau ia te ia. “E sese oe,” sa ou fai atu ai, “o loo i ai se Atua. Ua ou iloa o loo soifua o Ia!”

Sa ia tetee mai, “E te le iloa. E leai se tasi na te iloa lena mea! E le mafai ona e iloa !” Ina ua ou le gauai atu ia te ia, na fesili mai le tagata le talitonu i le Atua, o ia o se loia, atonu o le fesili tupito lea i le mataupu o le molimau. “Ua lelei,” sa ia fai mai ai i se ala faaulaula, ma faaamuamu, “ua e fai mai ua e iloa. Tau mai ia te au pe faapefea ona e iloa.”

(Boyd K. Packer, “The Candle of the Lord,” Ensign, Ian. 1983, 51)

Ua faapefea ona e vaaia lenei ituaiga fesili i le lalolagi i aso nei?
Faamata e faapefea ona e tali atu i le fesili a le tagata lea?

A o e suesue, manatunatu pe o le a le lelei o lou malamalama i le ala e aoao ai i upumoni faaleagaga ma saili mo malamalamaga e mafai ona fesoasoani ia te oe e te iloa atili ai.

O le aoaoina o upumoni faaleagaga

Na fememeai le Au Paia i Korinito i manatu ma faatinoga faalelalolagi ma le ola ai i le talalelei. O se taunuuga, sa latou pauu atu ai i le tele o mea sese. Sa tusi atu Paulo ia i latou ina ia fesoasoani ia latou malamalama i auala e aoao ai mea faaleagaga.

Faitau le 1 Korinito 2:9–14, ma vaavaai mo malamalamaga e mafai ona fesoasoani ia i tatou e aoao ai upumoni faaleagaga.

Ia matau o le “tagata faaletino” i le fuaiupu 14 o “se tagata ua filifili e tosinaina o ia i losivalega, manaonaoga, tuʼinanauga, ma lagona uma faaletino nai lo musumusuga a le Agaga Paia” (Taiala i Tusitusiga Paia, “Tagata Natura,” scriptures.ChurchofJesusChrist.org).

O a ni fuaiupu po o ni fasifuaitau sa tumatila mai ia te oe? O a ni mea na e fiafia ai e uiga i ai?
O a ni mea na e aoaoina e uiga i le Tama Faalelagi ma Lona alofa mo oe i le fuaiupu 9?
O a ni upumoni na e mauaina e uiga i le ala e faaalia mai ai e le Tama Faalelagi le malamalama i Lana fanau?

O se tasi o upumoni o loo aoaoina i nei fuaiupu o le, e na o Lona Agaga lava e mafai ai ona tatou iloa ma malamalama i mea tau le Atua.

Ina ia avea ma faataitaiga talafeagai o le le malamalama i le ala e aoaoina ai upumoni faaleagaga, faitau pe o le a le mea na tupu a o taumafai Peresitene Packer e faamatala pe faapefea ona ia iloa e moni le Atua i le tagata le talitonu i luga o le vaalele:

Ina ua ou faaaogaina ia upu o le Agaga ma le molimau, sa tali mai le tagata le talitonu i le Atua, “Ou te le iloa le mea na e te talanoa mai ai.” O upu tatalo, iloatino, ma le faatuatua, sa faapena foi le leai o se uiga ia te ia.

(Boyd K. Packer, “The Candle of the Lord,” Ensign, Ian. 1983, 51)

Aoaoina e ala i le Agaga

Tusitusi i luga o se fasipepa i se peni po o se penitala.

Afai ua e fia aoao atili e uiga i le aoaoina o upumoni e ala i le Agaga Paia, mafaufau e suesue nisi o punaoa nei:

Kalatia 5:22–23; Mataupu Faavae ma Feagaiga 8:2–3; 9:7–8; 11:12–14, 21–22; ma le 138:1–4, 11
o tusiga e i ai ulutala e pei o le “ Agaga Paia ” i le Taiala i Tusitusiga Paia, o le Taiala o Autu, po o Autu o le Talalelei o loo maua itulau i le topics.ChurchofJesusChrist.org
o lauga ma tusiga e uiga i le aoaoina e ala i le Agaga, e pei o le [lauga a] David A. Bednar, “Aoaoina i le Ala a le Alii,” New Era, Oke. 2018, 50–53; po o Richard G. Scott, “E Faapefea ona Aoao e Ala i le Agaga,” New Era, Sete. 2014, 48
o le vitio “How Does the Holy Spirit Guide?” (3:25), o loo maua i le ChurchofJesusChrist.org.

3:25
How Does the Holy Spirit Guide?

Fesoasoani i isi e aoao e ala i le Agaga

Faitau le mea lenei e faamaea ai le tala a Peresitene Packer. Ina ua teena e le alii i luga o le vaalele faamatalaga a Peresitene Packer, na musuia Peresitene Packer e fesili i lea alii e faamatala le tofo o le masima:

Ina ua mavae ni nai taumafaiga, ioe, sa le mafai ona ia faia. Sa le mafai ona ia tauina mai, i na o upu, se mea faatauvaa e pei o le tofoina o le masima. Sa ou toe molimau atu ia te ia ma toe fai atu, “Ua ou iloa o loo i ai se Atua. Sa e tauemu i lena molimau ma fai mai afai ou te iloa, o le a mafai ona ou tau atu tonu ia te oe pe faapefea ona ou iloa. Lau uo e, i le faatatauga faaleagaga, ua ou tofo i le masima. Ua le sili atu le mafai ona ou tauina atu ia te oe i upu pe na faapefea ona oo mai lenei malamalama nai lo lou ta’u maia ia te au pe faape’i le tofo o le masima. Ae ou te toe fai atu ia te oe, o loo i ai se Atua! O loo soifua o Ia! Ma e le faapea la o lou le iloa, aua e te taumafai e tau mai ia te au ou te le iloa, aua ua ou iloa!” …

Talu mai lena aafiaga ma le faagasolo ai i luma, ou te le i toe matamuli e faapea e le mafai ona ou faamatalaina i upu lava ia mea uma ou te iloaina faaleagaga.

(Boyd K. Packer, “The Candle of the Lord,” Ensign, Ian. 1983, 52)

Faitalia pe Fai: O e Manao e Aoao Atili?

O le a se mea e mafai ona ou faia e aoao ai i mea faaleagaga?

Na saunoa Elder Paul V. Johnson o le Au-Fitugafulu:

E tuuina atu tali i fesili faaleagaga i tagata taitoatasi o e le faamaaaina o latou loto; o e ole atu i le faatuatua, ma talitonu o le a latou mauaina; ma e e tausia ma le filiga poloaiga.

(Paul V. Johnson, “O Se Mamanu mo le Aoaoina o Mea Faaleagaga” o se faasalalauga faasatelite a le Seminare ma le Inisitituti o Aoaoga Faalelotu, Aok. 7, 2012], broadcasts.ChurchofJesusChrist.org)

E mafai ona faaaoga na o mea e pei o metotia faasaienisi ma manatu fetalaai e malamalama ai i upumoni o le talalelei?

Na saunoa Peresitene Dallin H. Oaks o le Au Peresitene Sili:

A tatou saili i upumoni e uiga i tapuaiga, e tatau ona tatou faaaogaina metotia faaleagaga talafeagai mo lena sailiga: tatalo, o le molimau a le Agaga Paia, ma le suesueina o tusitusiga paia ma upu a perofeta o aso nei. Ou te faanoanoa lava i taimi uma pe a ou faalogo i se tasi ua lafoaia lona faatuatua faaletapuaiga ona o aoaoga faalelalolagi. O i latou o e na maua muamua se vaaiga faaleagaga e mafai ona mafatia mai le faaoo ia te ia lava o le tauaso faaleagaga. E pei ona ta’ua e Peresitene Henry B. Eyring, “O le latou faafitauli e le o taoto i mea ua latou manatu ua latou vaai i ai; ae o loo taoto i mea e le o mafai ona latou vaai i ai i le taimi nei” [Henry B. Eyring, To Draw Closer to God: A Collection of Discourses (1997), 143].

O metotia faasaienisi e taitai atu ai tatou i mea ua tatou ta’ua o upumoni faasaienisi. Ae o le “upumoni faasaienisi” e le o le olaga atoa lea. O i latou e le aoao “e ala i le suesue ma le faatuatua foi” (Mataupu Faavae ma Feagaiga 88:118) e tapulaa lo latou malamalamaga e uiga i upumoni i mea e mafai ona latou faamaonia i auala faasaienisi. E tuu e lena mea ni tapulaa sese i la latou sailiga o le upumoni.

(Dallin H. Oaks, “Upumoni ma le Fuafuaga,” Liahona, Nov. 2018, 25)

E mafai faapefea ona faailoa mai e le Agaga Paia le upumoni ia te au?

Na saunoa Elder Richard G. Scott (1928–2015) o le Korama a Aposetolo e Toasefululua:

E mafai ona e aoaoina mea ua matua taua loloto mai mea e te faalogo ma vaai i ai ma, e sili atu foi, o mea e te lagona, e pei ona musuia ai e le Agaga Paia. O le tele o tagata e tapulaa lo latou aoaoina i na o mea e latou te faalogo pe faitau i ai. Ia e atamai. Atiinae foi le tomai o le aoaoina mai mea e te vaai i ai aemaise lava i mea ua uunaia ai oe e le Agaga Paia e lagona. Saili malamalama ma faaauau pea ona aoao mai mea o e lagonaina. O lou gafatia e faia o lea o le a faatupulaia i faataitaiga faifaipea. E manaomia le faatuatua ma le taumafaiga sili e aoao ai mai mea ua e lagonaina mai le Agaga. Ole atu i le faatuatua mo se na fesoasoani. Ola ai ina ia e agavaa mo se na taitaiga.

(Richard G. Scott, “How to Learn by the Spirit,” New Era, Sete. 2014, 48)