Aoaoina i le Ala a le Alii
Saunia e Elder David A. Bednar
O Le Korama a Aposetolo e Toasefululua
Mai se saunoaga na tuuina atu i le semina mo peresitene fou o misiona i le aso 25 o Iuni, 2014.
O le valaaulia o le Agaga e avea ma faiaoga o se faamoemoega tutotonu lea i mamanu uma a le Alii mo le aoaoina.
O le faanatinatia e le Alii o Lana galuega e manaomia ai i tatou ia aoao pea lava, ia suia, ma fetuleni atu i luma ma le faatuatua i le Faaola.
O Se Mamanu i Mea Uma
I se faaaliga na tuuina mai i le Perofeta o Iosefa Samita ia Iuni o le 1831, sa tautino mai ai e le Alii: O le a Ou tuu atu ia te outou se ata i mea uma, ina ia lē faaseseina outou; ona ua i ai Satani i le salafa o le laueleele, ma ua fealuai o ia e faasese i atunuu” (MF&F 52:14).
O le mea mataina, na tuu mai e le Alii ia i tatou “se” ae le o “le” mamanu o mea uma. Ou te le talitonu ua faapea mai le Alii i le gagana “se ata i mea uma” faapea e na o le tasi Lana mamanu po o le ata e faaaoga i tulaga uma. Ae, o le ala a le Alii e aofia ai ni mamanu eseese e mafai ona faaaoga e faataunuu ai faamoemoega eseese faaleagaga.
O la tatou sini taualuga i soo se poto masani o le aoao mai ma le aoao atu e tatau ona fuafua ma faaaoga le mamanu po o mamanu e sili ona fetaui ma o tatou manaoga ma ausia ai taunuuga manaomia o le aoaoina.
O Le Agaga Paia o le Faiaoga.
O le Agaga Paia o le sui auai lona tolu o le Aiga Atua ma o se Talifaaaliga, o se Faiaoga, o se Faamafanafana, o se Faamama, ma Na te faamanatu maia mea uma (tagai Ioane 14:16–17, 26; 3 Nifae 27:20). Sa faamalamalama mai e Elder James E. Talmage (1862–1933) o le Korama a Aposetolo e Toasefululua, “O le Tofi o le Agaga Paia i Lana galuega i tagata o loo faamatala mai i tusitusiga paia. O Ia o se faiaoga na auina mai e le Tama; ma ia i latou o e ua i ai le aia i Ana aoaoga o le a Ia faaalia i ai mea uma e tatau ai mo le faalauteleina o le agaga.”1 O le valaaulia o le Agaga e avea o le faiaoga o se faamoemoega tutotonu lea i mamanu uma a le Alii mo le aoaoina mai ma le aoao atu.
O se tagata aoao e faaaogaina le faitalia ma galue e tusa ai ma mataupu faavae sao e tatalaina lona loto i le Agaga Paia—ma valaaulia Ana aoaoga, molimau mamana, ma le molimau faamautuina. O le aoaoina e ala i le faatuatua e manaomia ona tuu i ai le faaleagaga, o le mafaufau, ma le faaletino ae le tau lava ina talia. O le faamaoni a’ia’i ma le ogatasi o a tatou faatinoga musuia i le faatuatua, e faailoa atu ai i lo tatou Tama Faalelagi ma Lona Alo, o Iesu Keriso, lo tatou naunautai e aoao ma talia faatonuga po o aoaoga mai le Agaga Paia.
Mafaufau i le ala e fesoasoani ai faifeautalai i tagata sailiili e aoao ai e ala i le faatuatua. O le faia ma tausia o tautinoga faaleagaga, e pei o le suesue ma tatalo e uiga i le Tusi a Mamona, tausia o poloaiga, ma le auai atu i sauniga a le Ekalesia e manaomia ai e se tagata sailiili ona faaaoga le faatuatua e galue ai. E faaaoga foi lenei mataupu faavae i tagata uma o le au paia, e aofia ai matua, o faiaoga, ma taitai.
O le aoao atu, apoapoai atu, ma le faamalamalama atu—po o le a le taua—e le mafai lava ona avatu ai i se tagata sailiili, se tamaitiiti, se tagata aoao, po o se tagata o le au paia se molimau i le moni o le talalelei toefuataiina. Vagana ua amatalia ona galue le faatuatua ma tatala ai le ala i le loto ona mafai lea e le Agaga Paia ona tuuina atu molimau faamautu. O faifeautalai, matua, faiaoga, ma taitai e manino lava le tatau ona latou aoao e aoao atu i le mana o le Agaga. Peitai, e tutusa lava le taua, o lo latou tiutetauave o le fesoasoani lea i isi e aoaoina mo i latou lava e ala i le faatuatua.
O le aoaoina lea ou te faamatalaina atu e sili mamao atu i le na o le malamalama faaleatamai ma le taofia ma le manatua o faamatalaga. O le ituaiga aoaoina lea o le a ou tautala i ai e afua ai ona fagua i tatou i le Atua (tagai Alema 5:7), e tuu ese le tagata natura (tagai Mosaea 3:19), ia suia o tatou loto (tagai Mosaea 5:2), ma ia faaliliu atu i le Alii ma ia le toe pauu ese lava (tagai Alema 23:6). O le aoaoina e ala i le faatuatua e manaomia ai uma le loto ma se mafaufau malie (tagai MF&F 64:34) ma o le taunuuga lena ua aveina atu e le Agaga Paia le mana o le afioga a le Atua i le ma i totonu o le loto. O le aoaoina e ala i le faatuatua e le mafai ona sii mai i se faiaoga i se tamaitiiti aoga, mai se faifeautalai i se tagata sailiili, e ala i se tautalaga, se ata faataitai, po o se galuega faatino o aafiaga; nai lo lena e tatau i se tamaitiiti aoga ona faaaoga le faatuatua ma galue ai ina ia maua le malamalama mo ia lava.
O Se Mamanu mo le Aoaoina Mai ma le Aoao Atu
1. Saunia e aoao. Afai e te auai i lau vasega o le Aoga Sa ma faalogologo i lou faiaoga o tuuina atu se autu, ua lelei lena. Ae afai sa e galue ma sauniuni, afai o e mafaufau i mea sa valaaulia oe e lou faiaoga e faitau, mafaufau i ai, ma tatalo ai a o lei oo i le vasega, e mafai ona i ai se sasaa mai ma le mamana o le Agaga, ma avea ai le Agaga Paia a ou faiaoga. O sauniuniga e valaaulia ai faaaliga.
2. Fegalegaleai ina ia faagaeetia ai. Ou te fia manao e tata’i o outou manatu i le fuaiupu lea. “Tofi se faiaoga i totonu o outou lava, ma ia lē tuu atu i tagata uma e tāutala i le taimi e tasi; ae tuu atu i tagata e tautala taitoatasi mai ae tuu i isi tagata uma e faalogologo i ana upu, ina a uma ai ona tautala mai o tagata uma, o le a faapea ona mafai ona faagaeetia ai o tagata uma, ma ina ia mafai ona maua ai e tagata taitoatasi le avanoa tutusa” (MF&F 88:122).
O se tasi lea o mamanu mamana a le Alii mo le aoaoina mai ma le aoao atu. Se’i ou fautuaina atu se isi auala e tilotilo ai i le fuaiupu lea: “Tofi se faiaoga i totonu o outou lava.” O ai le faiaoga? O Le Agaga Paia. Pe le o le uiga ea afai e te manao i le Agaga Paia e avea ma faiaoga, ona “ia lē tuu atu i tagata uma e tāutala i le taimi e tasi; ae tuu atu i tagata e tautala taitoatasi mai ae tuu i isi tagata uma e faalogologo i ana upu, ina a uma ai ona tautala mai o tagata uma, o le a faapea ona mafai ona faagaeetia ai o tagata uma”? Na pau le tagata e mafai ona maua mai ai lena faagaeetiaga po o le malamalama o le Agaga Paia.
O le fegalegaleai ia faagaeetiaina e valaaulia ai faaaliga. O le taimi nei i le Ekalesia, o loo tatou aoaoina ma faʻaaogaina atili mamanu e sili atu ona maaleale faaleagaga, luitauina, ma faamalolosia o le aoaoina mai ma le aoao atu. Mata a tatou faia mea tatou te faia pea lava pea ma maua mai ai taunuuga lava e tasi tatou te maua i taimi uma, pe o le a tatou salamo ma aoao ma suia ma faateleina ona aoao atu i le ala a le Alii?
3. Valaaulia e faatino Na o le tasi lava le fesili faigofie e ausia ai lenei sini. O le a se mea o le a e faia i mea ua e aoaoina? O le faatinoina o faaaliga e valaaulia ai isi faaaliga.
Ou te tatalo o le a tatou o faatasi ma le faanatinati a le Alii, ina ia aua ai nei na ona tatou faia o mea sa tatou faia pea lava i le ala sa masani ona tatou faia ai.
Ou te tuuina atu la’u molimau i le soifua moni o le Alii o Iesu Keriso. Ou te molimau atu o loo soifua o Ia. Ua toetu o Ia. O loo tu o Ia i le ao o lenei Ekalesia o loo Ia taitaia ona mataupu. O loo Ia fautuaina i tatou ia ogatasi ma Lana faanatinati ma mulimuli i mamanu sa Ia faatuina mo lo tatou tuputupu ae ma le aoaoina.