O Se Faamanuiaga i le Tusilima a Lo’u Tina

Douglas Hedger

Nevada, ISA

I se tasi afiafi sa ou mafaufau ai lava po o le a se savali e tuuina atu i se konafesi a le uarota ua lata mai. Sa ou suesueina tusitusiga paia i le aluga o le vaiaso, ma e ui ina sa ou mauaina ni aoaoga sili ma ni malamalamaaga, ae ou te lei mauaina lava se taitaiga manino o le mea e finagalo le Alii ia te au, o se peresitene o le siteki, e faasoa atu i tagata o le uarota.

I se tatalo ma le loto, sa ou fesili atu ai mo se taitaiga mai le Agaga e taitai o’u mafaufauga. Ona ou tatalaina lea o tusitusiga paia ma amata ona toe faitau. Sa vave ona liliu atu lou mafaufau i sini a le uarota sa ma talanoaina talu ai ma le epikopo. O se tasi o na sini o le faaaoga le Tala’i La’u Talalelei i le faasoaina atu o le talalelei i uo ma tuaoi.

Sa uunaia au e faaaofia ai le Tala’i La’u Talalelei i a’u lava suesuega i lena afiafi. Sa ou aumaia se kopi ma soona tatala e aunoa ma se itulau faapitoa. I lena itulau, sa ou maua ai ni mau sa tusia faatusilima—1 Nifae 8:8–11 ma le 1 Nifae 11:21–22. A o ou autilo atili i ai, sa ou iloa ai o na mau sa tusia i le tusilima a lo’u tina. Sa maliu si ou tina pele i nai tausaga ua mavae, i le lua masina talu ona aulia lona 80 tausaga. O ia o se faataitaiga o le lototoa ma le le manatu faapito, e vaai o ia e le aunoa i le lelei o tagata. Ma sa fiafia o ia i tusitusiga paia.

Sa ou susueina tusitusiga paia i na fuaiupu ia iloa ai po o le a se mea na uunaia ai o ia e tusia. A o ou faitauina, sa vave ona matala lo’u mafaufau i le savali e tatau ona ou tuuina atu. O se savali faigofie e faapea o tagata o le Ekalesaia o e ua tofo i le suamalile o fua o le talalelei atonu o nisi taimi e galo ai o loo sailia foi e le toatele o isi lena lava fua. E manaomia ona tatou aapa atu ma ta’u atu ia i latou le mea e maua ai.

Sa ou mafaufau i si o’u tina pele a o ou autilotilo i le vaega na totoe o le Tala’i La’u Talalelei. Sa leai se igoa, leai ni tusigamanatu, po o se isi meae e ta’u mai ai faapea o sana tusi lea. Sa ou saofai ma le maofa a o ou toe manatunatu i le filifili o uunaiga faaleagaga na tau mai ai i lenei minute. Sa faamautu mai ia te au e le Agaga na taitaiina a’u i o’u mafaufauga, e pei lava ona sa ou tatalo ai. E lei iloa e lou tina, po o le a lava le tele o tausaga sa ia tusia ai na mau, ae o le a faaaogaina e le Alii e avea ma tali o le tatalo faamaualalo a lona atalii.