Manumalo se Tagata Aau Talavou I Pine Auro e Ono

Saunia e le Mormon Newsroom

Na auai se tagata 15 tausaga a Aukilani o Tama Satrioni Tapusoa Solouota i ni tauvaga aau faasiamupini e iva mo e e le atoatoa le malosi o le tino, lata mai nei a le Aon NZ Open 2018 ma na suipi i le ono pine auro, pine siliva ma le pine apamemea. Na faia lenei tauvaga e le Swimming New Zealand, ma o se faatumutumuga o tauvaga aau.

O ana faailoga ma pine auro na maua mai i tauvaga e ono mo alii e le atoatoa le malosi o le tino: 100 mita backstroke, 50 ma le 100 mita breaststroke, ma le 50, 100 ma le 200 mita freestyle. Na ia mauaina foi le pine siliva i le 50 mita backstroke ma le pine apamemea i le 50 mita butterfly. O le tuufaatasiga i le faaiuga o le aso 5 o le tauvaga, na folafola mai ai e le tusiga o le “Freestyler” a le Swimming New Zealand faapea: “na matuai maoae le tulaga o Tama Solouota o Howick, Pakuranga.”

I le 2017 ma le 2018, na maua e Tama se tulaga maualuga i le faatinoga, o le polokalama o le “Pathway to Podium” lea na aofia ai nao le 172 tagata taaalo i le lalolagi atoa ma le nao le 13 tagata taalo e le atoatoa le malosi o le tino. O lenei polokalama ua ia galue atu ai nei mo le Paralympics 2020 ma le 2024.

I le na o le valu ona tausaga, sa amata ona aau Tama e fesoasoani i lona ADHD. E lei mafai ona moe o ia ma o le aau sa avea o se vaega o lona togafitiga.

O Tama sa i ai se faaletonu i lona mafaufau, ma ia Ianuari 2015 sa ia mauaina ai lona faavasegaga faaleatunuu S14 mo le aau mo e e le atoatoa le malosi o le tino. O le mauaina o lena faavasegaga na ia setiina ai se sini e malo i le pine auro i le Paralympics ma vave ona aau i lana uluai NZ Open championships, lea na matauina ai o ia e le faiaoga o le polokalama o le NZ National Para-Athlete Development, o Gary Francis.

I se taimi mulimuli ane o lena tausaga na aau ai Tama i lana uluai tauvaga o le NZ Short Course championships, momotuina ni matati’a faalemalo e ono mo le faavasegaga S14. O loo i ai nei Tama i le tausaga 11 i le Kolisi o Rangitoto, lea e faataga ai o ia e koleni i taeao. E koleni o ia mo le iva taamilosaga i le vaiaso, a le mai le 7:30 i le 9:30 a.m. pe mai le 4:00 i le 6:00 p.m.

O Tama o se tagata e malosi le faatuatua. Talu ai e talitonu o ia i le tausia ia paia o le aso Sapati, e le koleni pe tauva o ia i Aso Sa. Ua malamalama lelei lava le Paralympics NZ ma le Swim NZ i talitonuga loloto o Tama ma e tuuina atu pea ia te ia se faatagaga e le auai ai i gaoioiga i Aso Sa.

Fai mai le Tina o Tama, o Miriama (Millie), e uiga i lana tama, “I le vaiaso o lana taaloga ou te faalogo ai ia Tama o tatalo mo le malosi ina ia faia mea uma na te mafaia i le vai, aemaise lava le ole atu i le Alii ina ia faamanuia lona tino faaletino ma fesoasoani ia te ia e faia mea na ia toleni ai. E le gata i lona tatalo mo ia lava ae na faalogo foi o ia tatalo mo isi foi tagata aau uma. Na faamanuiaina moni lava o ia e le Alii ma sa ia maua se vaiaso maoae.”