O Atatosi o le Faatuatua
Mekaeli Isaako
Bydgoszcs, Polani
“E tele mea lelei e mafai ona faia e le ma’i,” o le tala lea a Mekaeli, o loo mafatia i le le toe aoga o ona fatuga’o. Ona o lenei ma’i ua faateleina ai lona lotofaafetai mo le talalelei, na ia fai mai ai, “o se tofotofoga lelei.”
Leslie Nilsson, tagata pueata
Na ou fanau i Itiopia i le 1942, ma sa ou alu i Polani e aoga ai i le 1965. I le 1991, sa ou feiloai ai i faifeautalai ma auai ai i le Ekalesia. Sa ou auauna atu o se peresitene o le paranesi mo le tolu ma le afa tausaga. Sa avea au ma se fesoasoani i le au peresitene o le misiona mo le 12 tausaga. Sa toe avea au o se peresitene o le paranesi ona avea ai lea o se peresitene o le itu. Ona ou ma’i ai lea ua le aoga o’u fatuga’o.
I le taimi nei, ua na o ni nai mea o loo mafai ona ou fai i le Ekalesia. Ou te taumafai e auai i Aso Sa.
I le taimi muamua, sa ou ita.
“Aisea ua tupu ai ia te au?” Sa ou tatalo. “Sa ou auauna atu ia te oe, le Alii e.” Ina ua mavae sina taimi, sa ou malamalama. Fai mai le mau, “O lē faatuatua ia te au ina ia faamaloloina, ma e le’i filifilia ia oti, o le a faamaloloina” (MF&F 42:48).
Fai mai lenei fuaiupu o le a faamaloloina i tatou pe afai e lei tatau ona oti.
Sa tatalo pea tagata o le Ekalesia mo au, ae sa atili ai ona leaga lo’u ola maloloina. Sa latou manatu e le o faafofogaina a latou tatalo, ae sa faafofogaina i latou ona sa avea i latou o ni tagata ua sili atu ma ona ua lagonaina le alofa o loo latou faaali mai ia te au.
Tusa lava pe ou te malosi, o le a le tele o le taimi o totoe o lo’u matua na te tuuina mai? Ae, o loo tele pea avanoa mo au.
Ou te fiafia e alu i tusitusiga paia ma sue ai toa o e fesoasoani ia te au. A o ou malosi ma galue, sa ou fiafia e mulimuli ia Nifae, ae i le taimi nei e tele taimi ua ou mafaufau ai ia Iopu. O ia o se tagata lelei, ma sa ia puapuagatia foi. E i ai lava le faamoemoe i le talalelei.
I se aai e pei o Bydgoszcs, afai ou te fia asiasi i le pulenuu, o le a leai so’u avanoa ona o a’u o se tagata faatauvaa. Ae e ala i le talalelei, e tatala mai lava le faitotoa e le aunoa e valaau atu ai i le Atua. O le mafuaaga lena ou te fiafia ai i la’u ekalesia.
Ua ia te au le Ekalesia. Ua i ai sa’u auala e faafesootai ai le Atua e ala i le tatalo, e ala i le anapogi, e ala i mea uma tatou te fai. O a isi mea ou te manaomia?
O nisi taimi ou te faapea ifo ai ia te au lava, “Atonu o le mea lea ua ou ma’i ai—ina ia mafai ai ona ou malamalama ai i le maeu o le mea ua ou i ai, ma le maeu o lenei faamoemoe.”
Ou te vaai atu i lo’u toalua o Renata, ua faanoanoa aua ua ou ma’i. Ou te le manao ia tupu lena mea, ae o le faanoanoa o se fua o le alofa. A na fai e le alofa o ia, semanu e le faanoanoa. O le alofa e fesoasoani e te lagonaina ai e le o tuulafoaiina oe ma e i ai tagata e alolofa.
O le oti e le o se mea e popole ai. O le a oti tagata uma. E faalagolago ia te oe ma pe faapefea ona e vaai atu i le oti. Ou te iloa o loo soifua le Atua. E alofa o Ia ia i tatou uma----ma a’u foi. O le mea lena e mafai ona ou fai atu ai.
Na avea le ma’i o Mekaeli o se tofotofoga faigata mo lona toalua, o Renata. “Ou te vaai atu i lo’u toalua ua faanoanoa aua ua ou ma’i,” na ia fai mai ai. “Ae o le faanoanoa o se fua o le alofa. O le alofa e fesoasoani e te lagonaina ai e le o tuulafoaiina oe ma e i ai tagata e alolofa.”
E ui i tapulaa e afua ona o lona ma’i, e sue lava e Mekaeli auala e auauna atu ai ma siitia i latou e vagaia o ia.
E maua e Mekaeli le faamoemoe ma le taitaiga mai i tusitusiga paia. A o malosi o ia ma galue, sa ia faamemelo ia Nifae. “Ae o le taimi nei ua tele ina ou mafaufau ia Iopu,” na ia fai mai ai. “O ia o se tagata lelei, ma sa ia puapuagatia foi.”