O Ala e Saunia ai Oe mo Lou Lumanai
Pe o e alu i le kolisi, saili galuega, pe o aoao se matata, o loo e atina’eina se uiga faaalia e tatau ai mo le fausiaina o le malo o le Atua.
Ou te le manatu e moemiti se teineitiiti e 14 tausaga le matua ia i ai i se fale pefupefua o manu, amo se suo elea, ma faamama se fale manogi leaga o solofanua. Ae o iina sa ou i ai pe a tuua le aoga i aso uma seia oo ina ua lava lo’u matua e maua ai se isi galuega.
O le mea moni e le o so’u tulaga faamoemoeina lea e faigaluega ai i le taimi o o’u aoga maualuga, ae sa ou malamalama i lena taimi afai ou te manao i se galuega ou te fiafia moni i ai—se galuega sa lei aofia ai se faamamaina o manu—sa manaomia ona ou alu i le kolisi, ma o le alu i le kolisi, sa ou manaomiaina ai foi le tupe. Sa ou lagonaina o le mea lena mo a’u, o le a’oga o le laasaga tonu lea e agai atu ai (ma le faamoemoe) e faataunuuina se matata.
O le mea manaia o le ala sa ou filifilia o se tasi o le mau ala e mafai ona fesoasoani ia te oe e aoao ai e faigaluega ma saunia mo ou lava manaoga. Ua faaigoaina lea ala o le faalagolago ia te oe lava i le faaletino ma le faaleagaga. A o e mafaufau i mea e te filifili ai, taumafai e filifili le ala e te lagona o le a sili ona saunia ai oe.
O nei tala e mai tagata tou te tupulaga faatasi i ni nai tausaga talu ai. O le mulimuli i faataitaiga a nei talavou matutua, e mafai ai ona e maua lou lava ala agai atu i le faalagolago ia te oe lava ma le manuia.
Mafaufau i Manaoga o loo Siomia ai Oe
Saunia e Oudom Piseth, Kemupotia
Ina ia mafai ona ausia a’u sini, ou te ta’uina pea lava pea ia te au o le galue malosi e taua tele, ae o se tasi auala e faamanuiaina ai o le galue ma le poto. Ina ua maea la’u misiona i Egelani, sa ou toe foi i Kemupotia ma vaavaai mo galuega o faasalalau. Sa ou vaavaai i mea e pei o le umi o aoaoga e maua ai galuega taitasi ma le tau o aoaoga.
Sa ou iloa ai o le polokalama faaleaoaoga e avea o se gaosi lavalava e puupuu ae faigata, ma e le toatele ni tagata sa faia. Sa ou vaaia o se avanoa lelei ma tonu ai loa e fai. Ua uma nei la’u polokalama ma o loo ou faigaluega o se gaosi lavalava mo se kamupani lavalava.
O le mauaina o le matata sa’o e mafai ona faigata tele, ae o loo i ai le Faaola e fesoasoani ia e au ma siitia au.
Faaaoga Aoaoga e Tatala ai Faitotoa
Saunia e Iolanda Teixeira, Cape Verde, Aferika
E fautuaina lava au e le aunoa e lo’u tina i se fasifuaitau faapea, “O aoaoga o le ki lea o manuia.” Sa ou manao i se lumanai sili atu mo au lava aemaise ai lo’u aiga, ma ina ia faia lenei mea, e manaomia lo’u faaauauina o a’u aoga. Ona o le leai o se tupe e alu ai i le kolisi i lena taimi, sa ou faaaoga ai se sikolasipi e alu i se aoga faalematata e suesue ai polokalama faakomepiuta ma le tausiga.
I a’u suesuega atoa sa ou feagai ai ma luitau eseese, ae e lei taofia ai au mai le agai pea i luma ma le tepa taulai atu mo aso e sili atu. Sa tele ina fesoasoani le tatalo ia te au; ou te sailia lava e le aunoa fautuaga mai le Alii. Sa ou tuuto atu e le aunoa i a’u suesuega, ma o le aso o loo tumau pea lo’u tuuto i la’u galuega, ma tuuina atu le mea sili o se enisinia faakomepiuta ma se fesoasoani i le maketiina.
Galue Nei Agai Atu i le Lumanai E Te Manao Ai
Saunia e Ann-Sophie and Lawrence Cavin, Scotland, UK
Ann-Sophie Sa ou manao pea lava e a’oga i se iunivesite, ae sa tele ina suia i tausaga o lo’u talavou. Ina ua uma la’u aoga maualuga, sa ou galue faavolenitia i se falemai mo le ono masina. Talu mai lena taimi sa ou fiafia i le manatu e avea o se teine tausi soifua, ae sa ou manatu ailoga e mafai ona ou faia.
I le vasega o le ola tutoatasi i la’u uarota, sa faatonuina ai i matou e filifili se galuega matou te mananao ai e ui atonu matou te le agavaa. Sa ou tatalo e uiga i le mea e fai, ma sa oo mai pea i lo’u mafaufau faafomai tausi soifua. Sa tonu ia te au e mulimuli i uunaiga a le Alii.
Sa lei faigofie le tulimataiga o lea ala. Ina ia amata, sa ou sailiili i le polokalama faafomai tausi soifua ma mea e tatau ona ou suesueina. Sa ou talanoa i tagata sa ui ai foi i se faagasologa faapea. O le taimi muamua sa ou talosaga ai i le polokalama faafomai tausi soifua, sa tuu au i le lisi faatalitali. Ae ou te lei fiu ai sa ou toe talosaga foi ma sa iu ina talia au. O nisi taimi e tatau ona e onosai ma faalagolago i le Alii aua e i ai Lana lava fuafuaga mo oe.
Lawrence: A o ou laitiiti lava, sa ou faatuina se sini ou te faia le mea silisili po o le a lava le mataupu sa ou suesueina po o le a foi le galuega ou te faigaluega ai. Sa ou taumafai pea lava e aoao ma faaleleia ina ia ou maua avanoa aupito sili mo le manuia.
Sa ou faigaluega talu ai nei o se pule i se kamupani gaosi lavalava, ae sa ou manao e avea o se leoleo. I Sikotilani e tatau ona e nofo i le atunuu mo le tolu tausaga sosoo ao lei talosaga e avea ma se leoleo. Talu ai ona sa ou tuua le atunuu mo le lua tausaga e faamisiona, sa tatau ona ou faatalitali mo nisi masina a o lei auai ai.
E ui ina sa avea lea ma se poloka tele, ou tei lei fiu lava. E i ai sa’u galuega lelei mo lo’u aiga, ma sa ou galue malosi foi ia mautinoa e lelei ni o’u lipoti mo ni galuega i le lumanai.
E faapei o nei talavou matutua, o le a e maua e i ai ala eseese e mafai ona saunia ai oe e tausia oe lava ma lou aiga i le lumanai. Faatasi ai ma lena sini i le mafaufau, e mafai ona e fuafua mo le faamanuiaina. Sa aoao mai Elder Dieter F. Uchtdorf o le Korama a Aposetolo e Toasefululua, “Ia tatou faia le mea sili tatou te mafaia ma atina’e se uiga taulelei mo le tulaga silisili i mea uma tatou te faia. Ia tatou seti o tatou mafaufau ma tino i le avanoa mamalu mo le galuega e aumaia e aso fou taitasi” (“Two Principles for Any Economy,” Oct. 2009 general conference). A o e taulai atu nei i le aoaoina ma faigaluega, o le a atina’eina ni mausa o le a fesoasoani e te lagona atili ai le talitonuga mautinoa e uiga i le lumanai.