Aoao Mai e le Agaga Paia

O talavou nei na saunia ina ia aoao mai e le Agaga Paia ao lei oo i le konafesi aoao. O mea sa latou aoaoina mai se konafesi aoao talu ai, ma mea ua ese lo latou faia ona o lena.

Faatonuga Musuia

Atapue mai le Getty Images

Sa musuia au e le konafesi aoao. A o faalogologo ai i faatonuga mai o tatou taitai e auauna atu i isi, faalagolago ia Keriso, ma uumau i le ai u’amea, sa ou lagonaina o molimau mai le Agaga Paia e moni lenei talalelei ma e mafai ona tatou maua le ola e faavavau e ala i le tausia o poloaiga ma mulimuli i le afioga a le Atua. Sa ou faatutuina ni sini ia ou auauna atu atili i lo’u nuu ma ia faamalosia la’u molimau e ala i tatalo i aso taitasi ma le suesue i tusitusiga paia. Ou te iloa o au o se afafine o le Tama Faalelagi. O loo soifua o Ia ma e alofa ia te au e faavavau ma e le aunoa.

Madelyn B., age 16, Delaware, USA

E uiga i ai: Ulumatua o le fanau e toatolu; e tamoe felavasai i le atunuu; e fiafia e faitautusi ma usu pese; e fiafia i le gagana Sipaniolo ma o loo faamoemoe e faiaoga i le Igilisi o se gagana lona lua

Tali i Fesili

A o lei oo mai le konafesi aoao e lua a’u fesili: (1) E mafai faapefea ona ou tausia se uiga faaalia lelei ma fesoasoani i a’u uo pe a latou faia ni faaiuga leaga? ma (2) E mafai faapefea ona ou molimau atu i le Ekalesia e aunoa ma lo latou ulagia o au? I le taimi o le konafesi, sa molimau mai le Agaga ia te au e le o tuulafoaia au. O lea la ua ou iloaina o le suesueina o tusitusiga paia ma lo’u loto atoa, o le a ou maua ai tali i a’u fesili e uiga i a’u uo. Ou te iloa e faafofoga mai le Tama Faalelagi i au talosaga ma o le a ou taumafai ia faaleleia atili i aso taitasi.

Isaak R., age 13, Pichincha, Ekuatoa

E uiga i ai: Na o ia le tamaitiiti; e fiafia e tata piano, faase’e, taalo lakapi, fai judo, aau, pese, ma fai lole; e fia avea ma fomai; o lana lanu e fiafia i ai o le lanu meamata.

Sauni e Aoao

Ou te lagonaina le malosi o le Agaga i le konafesi aoao. Talu ona ou saunia fesili ma saunia au lava ia faaleagaga mo le konafesi, ua matuai ese lava se uiga i lo’u olaga, ma ua mafai ona ou aoaoina ni mea se tele mai lauga taitasi. Ou te matua faafetai lava mo le perofeta ma aposetolo, ma ou te iloa na auina mai i latou mai le Tama Faalelagi e taitai i tatou ma taiala i tatou i o tatou olaga!

Ben H., 17 tausaga, Kentucky, ISA

E uiga i ai: E fiafia i taaloga; taalo pasiketipolo ma tenisi i le aoga; e fiafia e faase’e, aloalo i le kiona, faimalaga, ma savali alasopo.

Valaaulia e Tuputupua’e

O le konafesi aoao e faamalosia ai au ma se naunauga e mulimuli i le ala o le talalelei a Iesu Keriso. Sa fesoasoani ai ia te au ia iloa ma malamalama o le Ekalesia moni lenei, lea e aumaia ia i tatou le malamalama ma le fiafia. Sa ou lagonaina le Agaga o valaaulia au ia ou tuputupu ae i aso taitasi ma ia faitau le Tusi a Mamona ia maua ai se molimau malosi o le talalelei. Ou te taitonu sa finagalo lo’u Tama Faalelagi e faalogo i nei savali musuia.

Vicente A., age 16, Metropolitan Region, Chile

E uiga i ai: Ulumatua o se fanau e toafa; e fiafia e taalo i taaloga vitio, faalogologo musika, ma taalo lakapi; e auai i talafaatino; e manao e faamisiona

Saili Atu i le Malamalama

O le tausaga na muamua atu i le tausaga na te’a nei o se tausaga faigata mo au. Sa tauivi lo’u tama ma le kanesa, ma sa i ai osofaiga a le au faatupu faalavelave i lo’u aai. Sa ou tauivi ma le atuatuvale, ma tomanatu pe mafai faapefea ona ou lagonaina le toafilemu pe a ou popole mo lo’u saogalemu faaleagaga ma le faaletino. Mai le konafesi aoao sa ou aoaoina ai e mafai ona tatou maua le filemu pe a tatou ola mama, ma faatutumuina o tatou loto i le faatuatua, ma tausisia se vaaiga i le faavavau. Sa musuia au e liliu atu ia Keriso i taimi o faigata nai lo le faalagolago i lo’u lava atamai. Ou te iloa e mafai ona ou faatoilaloina tosinaga o le pogisa e ala i le sailia o le susulu o le malamalama o Keriso.

Olivia H., 17 tausaga, Peleseuma

E uiga i ai: O se tagata aau; fiafia e auauna atu, e aofia ai le volenitia i se fale e tufa fua ai meaai mo e leai ni aiga, o se fale mo tamaiti matuaoti, ma le polokalama a lana aoga mo e e i ai manaoga faapitoa.