Elder Ulisses Soares: O Se Tagata e aunoa ma le Faaoleole
I le amataga o Lana auaunaga, e pei ona filifiliina e Iesu Ana Aposetolo, Na silasila atu o Ia ia Natanielu o loo agai mai ia te Ia. Na vave lava ona Ia silafiaina le tulaga lelei o Natanielu, ma tautino atu, “Faauta o le Isaraelu moni, e leai sona pepelo!”1
Na silafia e Iesu o Natanielu o se tamalii e mama le loto, faamaoni i ona faamoemoega, ma e aunoa ma le pepelo po o le faaoleole. E fiafia le Alii i lenei uiga o le amiosao faamaoni, ma sa Ia valaauina Natanielu e avea ma se Aposetolo.2
O Ulisses Soares e pei lava o Natanielu anamua, ma ua valaauina foi o ia e le Faaola.
“O Le Malamalama a O’u Matua”
O Ulisses, o le uii o uso tama e toafa, sa soifua mai i São Paulo, Pasila, i le aso 2 Oketopa, 1958. E sau o ia mai se olaga faatauvaa, ae o ona matua, o Apparecido ma Mercedes Carecho Soares, o ni tagata faamaoni ma galulue malosi ia na faalogo moni lava i faifeautalai. Sa la auai i le Ekalesia i le 1965 ina ua ono tausaga le matua o Ulisses.
“Ou te lei vaai lava ua misi e Brother Apparecido se sauniga,” o le tala lea a Osiris Cabral, lea na auauna atu o se peresitene o le siteki ao avea Ulisses ma se alii talavou. “Sa matuai faamaoni lava foi Mercedes. E soo le tuuto o Ulisses i ona matua.”
O Ulisses Soares “na ola ae i le Ekalesia i le mulimuli ai i le malamalama” a ona matua, o Apparecido ma Mercedes Soares (agavale). Ao faalagolago atu Ulisses i le Alii e ui i faigata, sa ia aoaoina o se tamaitiiti ina ia pipiimau atu i le Faaola ma Lana talalelei.
Na fua mai le lelei o le loto o Ulisses ao ia aoaoina auala a le Alii. “Sa ou ola ae i le Ekalesia i le mulimuli ai i le malamalama a o’u matua,” na saunoa ai Elder Soares. Ao ia mulimuli ai i lena malamalama, na tuputupu ae malosi lana molimau e ui i faigata.
“Sa na o a’u le tagata o le Ekalesia i la’u aoga, ma sa taumafai e le aunoa isi alii e toso atu a’u i lalo ma uunaia a’u e faia ni mea sese,” na ia saunoa ai. “Sa ou aoao e puipui lo’u lava tagata i nei luitau, ae ou te faalagolago pea e le aunoa i le Alii ma lo’u loto atoa e fesoasoani mai ia te a’u ina ia faamanuiaina. Sa ou aoaoina o se alii talavou afai e te faia lau vaega, o le a faia e le Alii Lana vaega. Ae e tatau ona e uumauina Lona aao ma Lana talalelei.”
Ina ua 15 Ulisses, na fai i ai lana epikopo e faiaoga i le vasega a le autalavou o le Aoga Sa. O se tasi o lesona sa ia aoao atu na taulai atu i le mauaina o se molimau e uiga i le talalelei. Na suesue e Ulisses le Tusi a Mamona, ma na lagonaina e le aunoa e moni le Ekalesia, ma sa talitonu i le Faaola o Iesu Keriso.
Ao ia saunia lana lesona, sa ia manao e molimau malosi atu i lana vasega e uiga i le moni o le talalelei. “Sa ou suesue ma tatalo faatauanau,” na toe taua ai e Elder Soares. “Ina ua uma ona ou tootuli i lalo, na oo mai i lo’u loto se lagona fiafia tele, o se leo itiiti lea na faamaonia mai ia te a’u o loo ou i ai i le ala sa’o. Sa matuai malosi tele ma sa le mafai ona ou faapea atu sa ou le i iloaina.”
Ina ua matua Ulisses, sa ia aoaoina faapea afai o le a ia faia nisi mea e sili atu nai lo mea o loo faamoemoe mai po o talosagaina mai, o le a faamanuiaina tele o ia. O se tasi o ia lesona na oo mai ao ia saunia mo se misiona. I le taimi o faatalanoaga ma Ulisses, sa faamamafa atu e lana epikopo le taua o le usiusitai i poloaiga ma le ola agavaa. Sa ia faamamafa atu foi ia sauniuniga o mea tau tupe.
I lenei vaitaimi ua saofaga atu uma faifeautalai mai Pasila i le tau o a latou misiona, ma o le toatele o aiga o loo foai atu i le tau atoa [o misiona]. Ao agai atu Ulisses i tausaga faamisiona, sa ia naunau lava ina ia ona faigaluega e maua uma ai le tupe e manaomia mo lana misiona. O le faaaogaina o le tulaga o le galue malosi lea na ia aoaoina i le faigaluega ai i le tamai pisinisi a lona tama ma le faaauupegaina i le tomai o le vave ona talolomi, na maua ai e Ulisses se galuega e faigaluega i le ao e fesoasoani ai i le sauniaina o totogi a le kamupani.
Ina ua uma ona pasi se suega ulufale faigata, sa amata ona ia suesue i le tausitusi i se aoga maualuga faatekinolosi i le afiafi. O masina taitasi, pe a uma ona totogi le sefuluai, na te sefeina le tupe mo lana misiona. Ina ua mavae le tausaga, sa siitia atu o ia i le vaega tautusi a lana kamupani.
“O le auala lena na ou sefeina ai le tupe e totogi ai la’u misiona,” na saunoa ai Elder Soares. “Ma o masina taitasi i le gasologa o le tolu tausaga ae ou te lei aluese, ou te faatauina se mea ou te manaomiaina—o se ofutino, ofuvae, pea totini, fusiua, se atopa’u.” Sa ia manaomiaina foi, ma mauaina, le alofa ma le lagolago malosi mai ona matua ma taitai faalelotoifale.
Sa valaauina Ulisses i le Misiona a Pasila Rio de Janeiro. Sa auauna atu i le vaega mauamua o lana misiona i lalo o Peresitene Helio da Rocha Camargo, lea na mulmuli ane avea ma uluai Pulega Aoao ua valaauina mai Pasila. Na amata e Ulisses lana misiona i le amataga o le 1978. O le uluai malumalu i Latina Amerika na faapaiaina mulimuli ane i lena tausaga i São Paulo e Peresitene Spencer W. Kimball (1895–1985).
Ia Ianuari 1980, na pue ai e Ulisses ma lana soa, lea e lei mauaina foi ana faaeega paia, se pasi i Rio de Janeiro mo se tietiega e valu itula i le Malumalu o São Paulo Pasila. Sa feiloai matua ma tei o Ulisses ia te ia iina, ma faamauina ai le aiga o Soares mo le taimi nei ma le faavavau atoa. E lei galo lava ia Ulisses le faatasi ai i le Malumalu o São Paulo i na itula e lima. Mulimuli ane i lena lava aso, sa la toe foi ai ma lana soa i le misiona.
Faamuamuaina o le Atua
Na fiafia Ulisses i se misiona na faamanuiaina, lea na faamalosia atili ai lana molimau. Ina ua ia toe foi i le fale, sa ia mauaina se galuega ma amata ona aoga faatausitusi ma faafuainumera i se iunivesite i le lotoifale.
Pe a ma le fitu masina talu ona i ai i le fale ae feiloai ai ma “Sister Morgado” i se siva mo siteki e tele. Sa auauna atu Ulisses e avea ma ona taitai sone mo se taimi, ma sa faaaluina e le toalua le afiafi e toe talanoa ai i le misiona. O le tolu vaiaso mulimuli ane, ua amata ona la tafafao faamasani.
E valu tausaga o Rosana Fernandes Morgado ae amata ona ave o ia e lona uso matua, o Margareth, i le lotu. Na iu lava, ina mauaina e tagata sailiili faamaoni talavou e toalua le faatagana mai le la tama ina ia papatiso, ae na tatau ona faatali i la’ua uma sei atoa le 17 tausaga. Na auai Rosana i le lotu mo le iva tausaga ae lei mauaina le faatagana e papatiso ai.
Sa nofo Ulisses i São Paulo i matu, ae nofo Rosana ma ona matua i le vaega i saute o le aai. O le femalagaai ai i le va o aai e alu ai le lua i le tolu itula i le pasi ma le nofoaafi. O le mea e lelei ai, na nonofo Margareth ma lona toalua, o Claudio e latalata i le fale a ona matua.
“A alu la Ulisses i faaiuga o vaiaso e tafafao ma Rosana, sa faigata mo ia e toe foi i le fale i le leva o le po,” na manatuaina e Elder Claudio R. M. Costa, o le Fitugafulu o le Pulega Aoao, e uiga i lona uso faaletulafono o le lumanai. O lea, na la valaaulia ai ma Margareth Ulisses e moe i le la fale i le po pe a uma ana evaga. “Sa ma vaetamaina o ia mo sina taimi,” na faaopoopo mai ai Elder Costa.
“E moe o ia i le nofoaumi i la matou poto malolo,” o le tala lea a Sister Costa. “E lei leva ona ma faaipoipo, o le mea lena, na leai ai nisi a ma palanikeke. Ae sa ia ufiufiina o ia i se ie faamalama tuai sa ia i ma’ua. Sa fiafia o ia aua sa mafai ona ia toe vaai ia Rosana i le aso na sosoo ai. Sa lelei o ia i lo’u uso, ma sa fiafia tele o’u matua ia te ia.”
Sa faaipoipo Ulisses ma Rosana i le Malumalu o São Paulo Pasila i le aso 30 o Oketopa, 1982.
Afai e te faaaluina ni nai minute ma Elder ma Sister Soares, e vave lava ona e iloaina le la alolofa, faamemelo ma le faaaloalo o le tasi i le isi. Mo Elder Soares, “sa avea lava [Rosana] o se faataitaiga o le agalelei, alofa, ma le tuuto atoatoa i le Alii mo a’u ma lo’u aiga.”3 Mo Sister Soares, o Ulisses “o se meaalofa mai le lagi.”
Na toe faaopoopo mai Sister Soares: “E matuai magafagafa lelei o ia ma amiotonu, ma e tausia lelei e le aunoa lo matou aiga, ma e matuai lelei lava le taulimaina o a’u. I ana valaauga uma o le Ekalesia, na te faia le mea sili na te mafaia. Na te alu ma faia. Na te faamuamuaina i taimi uma o lona olaga mea a le Atua. Ou te faamemelo pea lava pea ia te ia ona ou te iloa afai na te faamuamuaina mea a le Atua, o le a ia faamuamuaina foi a’u.”
E uiga i lona faletua, na saunoa ai Elder Soares: “O ia o le toa manumanu moni ma le faamalosiau i lo matou aiga. E alofa, agalelei, ma onosai i tagata uma. Na te faalotogatasia lo matou aiga, ma e na te vaai i le lelei i tagata uma. E tele lana sao i le mea ua tupu i lo’u olaga. E uiga i lo’u valaauga i le Korama a Aposetolo e Toasefululua, sa ou fai atu ma le malie ia te ia, “Ou te tuuaia oe mo lenei mea ona ua e matuai faalauaiteleina le mana o le talalelei i lo’u olaga.”
O Se Loto Tele
O Gustavo, o le ulumatua a le au Soareses, e manatuaina le po ao, tamaitiiti, sa ia le usitai ai i ona matua ma alu atu ai e siaki se faafiafiaga e faia faaletausaga i le latou nuu o São Paulo e ta’ua o le Festa Junina.
“Sa ou i le ogatotonu o se vaega toatele ma fiafia ae ou faalogoina loa le valaauina atu o ia i luma e se tagata faasalalau,” sa ia fai mai ai. “O le taimi lena na ou vaai atu ai i lo’u tama.”
Na matuai popole lava ona matua, ae nai lo le otegia o Gustavo, na fusimau o ia e Ulisses.
“Sa faia se matou talanoaga e uiga i lo’u leiloa, ae na taulimaina a’u e o’u matua ma le faaaloalo,” o le toe manatuaina lea a Gustavo. “Sa ou lagona le malupuipuia, ma sa ou iloa la te alolofa moni lava ia te a’u.”
E tuuto atu Ulisses i lona aiga. E ui i le pisi o lana galuega ma taimi e faimalaga ai i le aluga o tausaga, sa ia faia lava se taimi e fausia ai fegalegaleaiga ma lana fanau.
Ina ua lagolagoina Elder Soares i le Korama a Aposetolo e Toasefululua i le aso 31 o Mati, 2018, masalo e leai se tasi na sili ona te’i nai lo Gustavo ma ona tuafafine e toalua, o Lethicia Caravello ma Nathalia Soares Avila. Ae afai o le alofa, galue malosi, agaalofa, ma le lotumaualalo e agavaa ai se tagata mo le avea ma aposetolo, latou te fai mai, ua latou malamalama i le mafuaaga ua valaauina ai e le Alii lo latou tama.
“Ina ua valaauina e Iesu Ana Aposetolo, Na te lei pikiina ia tagata Faresaio sili ona atamamai, sa ia pikiina ia tagata faifaiva,” o le tala lea a Lethicia. “E faapena uma lava lo’u tama ma lo’u tina. La te faalagolago atoa atu i le Alii, ma e Na te faaaogaina i la’ua e faataunuu ai Ana galuega ona Na te silafiaina o i la’ua o ni tagata e le manatu faapito, naunau e galulue malosi, ma lava le lotomaualalo e talia ai ni faasa’oga.”
O le a fesoasoani le “tele o le loto” o le latou tama ao ia agai atu i luma e avea o se tasi o molimau faapitoa a le Faaola, na faaopoopo mai ai Nathalia. “Ua ia te ia le loto mo lena galuega,” o lana tala lea. “Na te lagonaina le faatosinaga faalelagi, ma e alofa o ia i tagata uma ma e manao e fai le mea sa’o.”
“O Le a Lelei Mea Uma”
Ao auauna atu Elder Soares o se peresitene o le Misiona a Potukale Porto mai le 2000 i le 2003, sa iloa o ia mo le faaaogaina o le faaupuga “Tudo vai dar certo”—o le a lelei mea uma.
“Sa ia aoaoina mai ia i matou,” na toe taua ai e Ty Bennet, o se tasi o ana faifeautalai. “E ola ai lona olaga i le faatuatua ma le manatu lelei faapea afai tatou te faia le mea o finagalo mai le Alii tatou te faia, o le a lelei mea uma.”
Na ia aoaoina foi ana faifeautalai ia aua nei faaaogaina upu o le faigata po o le le mafai, o le tala lea a Richard Shields, o se isi o ana faifeautalai. “Matou te faasino i mea o ni ‘luitau.’ Na fesoasoani lena fautuaga e mamanuina lo’u olaga ao ou tilotilo atu i mea o ni ‘luitau’ e foiaina nai lo o le avea o ni mea ‘faigata’ pe ‘le mafai.’”
O lea faatuatua ma le manatu lelei e lei sau mai se olaga faigofie. Na silafia lelei e Elder ma Sister Soares le le faanoanoa o le alu e aunoa ma, le ai vaivai mai le uumi o aso o galulue ma suesue ai, luitau o le le soifua maloloina, ma le lototiga ona o le pa’u o se pepe, fanau oti, ma le maliliu o tei ma matua.
Ae e ala atu i malaga o le olaga, sa la tuuina atu ai lo la faatuatua i upu o le mau e sili ona fiafia i ai Elder Soares: “Ia e lotomaualalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo.”4
“O luitau o se vaega o lo tatou alualu i luma,” na saunoa ai Elder Soares. “Ae pe a tatou onosai i mafatiaga, pe a tatou aoao e ola ai i luitau o le olaga, pe a tatou tumau faamaoni, o le tausia i tatou e le Alii i se tulaga maualuga ma faamanuia i tatou i faamanuiaga ua Ia folafola mai.”
Ma pe a tatou taofimau i le ai uamea, na ia toe faaopoopo mai, o le a le tulafoaia i tatou e le Alii.
“O le taofimau pea lava pea i poloaiga, i le talalelei, i tusitusiga paia, ma i le Alii o Iesu Keriso o le a fesoasoani ia i tatou e foia luitau o le olaga,” o le molimau mai lea a Elder Soares. “Pe a tatou tootutuli i lalo e tatalo, o le a Ia faatasi mai ia i tatou ma o le a Ia taitaia i tatou. O le a Ia uunaia i tatou i le mea e o i ai ma le mea e fai. Pe a tatou usiusitai ma faamaualalo i tatou lava, o le a taliina mai e le Alii a tatou tatalo.”
Soo Tuuto
O Ulisses Soares o se tamalii o le gafatia ma sauniuniga. O lana aoga, e aofia ai se faailoga o le matuaofaiva o pisinisi faalepulega, na sauniaina o ia e galue o se tausitusi ma se suetusi mo ni kamupani o malo e tele i Pasila. Na saunia e lena aafiaga o ia e faigaluega i le matagaluega o tupe a le Ekalesia, lea na sauniaina o ia i le 31 tausaga e avea ma se tasi o faatonusili sili ona laitiiti i le matagaluega o mea totino [a le ekalesia]. Na saunia lelei o ia e lena sauniuniga e avea o se peresitene misiona ma i lana valaauga o se Fitugafulu o le Pulega Aoao i le aso 2 o Aperila, 2005.
Ao lei valaauina o ia i le Au Peresitene o Fitugafulu i le aso 6 o Ianuari, 2013, sa auauna atu Elder Soares o se fesoasoani i lena taimi ma sa avea o se Peresitene o le Au Peresitene o le Eria a Pasila ma se fesoasoani i le Eria o Aferika i Sautesasae. O iina, na auauna atu o ia o se fesoasoani ia Elder Dale G. Renlund, ao avea i lena taimi o se Fitugafulu o le Pulega Aoao. O Elder Renlund, i le taimi nei ua avea ai o se uso o le Korama a Aposetolo e Toasefululua, e manatuaina pea ma le alofa le la taimi faatasi.
“O Elder Soares o se soo fiafia, talitonu, tuuto a Iesu Keriso,” na saunoa ai Elder Renlund. “Ou te le iloa se tasi e lagonaina le naunau o loo ia i ai i le feau a le Alii. Afai e talosagaina o ia e fai se mea, na te faia ma lona malosi atoa.”
Po o i ai faatasi ma le Au Paia i Peru (agavale), Kana (lalo), po o isi atunuu lea na ia auauna atu ai, e ‘faigofie ia ona alofa [Elder Soares] i tagata,” na saunoa ai Elder Claudio R. M. Costa.
Fai mai a ia na vave lava ona “faamemelo atu” Elder Soares ma le Au Paia i Aferika. O se tasi o ana tofiga i le eria o le pulefaamalumalu i konafesi o siteki i Kananga, Ripapelika o le Temokarasi o Congo. “Ina ua ia toe foi ma, sa le muta lona talanoa e uiga i le agalelei ma tuutoo o tagata sa ia feiloai i ai,” na saunoa ai Elder Renlund.
O Elder L. Whitney Clayton, lea na galulue faatasi ma Elder Soares mo le lima ma le afa tausaga i le Au Peresitene o Fitugafulu, na ta’ua Elder Soares o se tagata e fausia le lotogatasi. “Na te faalogo ma fuaina ona manatu. E faaeteete o ia i le auala na te faafoeina ai o ia lava i sauniga ina ia mafai ona tuufaatasia o tatou leo i se tali, nai lo le tautauva taitoatasi.”
O Elder Soares e tauagafau e uiga i lona tomai e fesootai atu ai i le faaPotukale, Igilisi, Sipaniolo, ma le faaFarani. Peitai o lena meaalofa, lea e manaomia ai le gauai atu pea i ai, o se faamanuiaga i le Ekalesia, o le saunoaga lea a Elder Clayton. E mafai e Elder Soares ona talanoa i le vaega toatele o le Ekalesia i lo latou lava gagana.
“Sa avea Ulisses o se taitai talu mai ao laitiiti,” na matauina e Elder Claudio Costa e uiga i lona uso faaletulafono. “E atamai tele o ia ma e magafagafa lelei, ma e na te lagona le tiutetauave o le tuuina atu o le mea sili na te mafaia. E faigofie lava ona ia alofa atu ia i latou o siomiaina o ia. Ua ia te ia le loto o se soo moni o le Faaola, ma ua ia te ia le molimau mautinoa o Iesu o le Keriso. Ou te alofa ia te ia ma ou te maua le agaga faafetai e lagolago ai o ia o se Aposetolo a le Alii.”
Ma sa faaopoopo mai Elder David A. Bednar, o le saunoa ai mo le Korama a Aposetolo e Toasefululua faapea, “O Elder Soares o se soo mama, le faaoleole, ma le sala a le Faaola. E ala atu i le malamalama o ona foliga, o lana ataata mafana, ma ona uiga agalelei, o le a uunaia ai le le mafaitaulia o tagata ma aiga i se manaoga sili atu e mulimuli i le Faaola ma ola i mataupu o Lana talalelei.”
Ata na pueina faatasi ma lona faletua, o Rosana, i luma o le Malumalu o Sate Leki e Kristin Murphy, Deseret News
I la tatou tisipenisione, na fetalai atu ai le Alii e uiga ia Eteuati Paterika, o “Lona loto i o’u luma, ona ua faapei o ia o Natanielu o anamua, o le ua leai se pepelo o i ai.”5 E uiga ia Ailama Samita, na fetalai mai ai le Alii, “o A’u, o le Alii, ua alofa ia te ia ona o le faamaoni o lona loto, ma ona e fiafia o ia i mea ua sa’o i o’u luma.”6
E uiga ia Ulisses Soares, o le a fetalai mai ai le Alii i lea lava faaupuga e tasi.