Pasi Atu o le Alofa o le Atua
E lei leva talu ai ona masii mai lo matou aiga i Kentucky. Sa ou matua le fiafia lava ona sa ou tuua uma a’u uo ma aiga lautele. Sa matua ese lava Kentucky ai le mea sa ou masani ai. O le taimi muamua sa matou o ai i le lotu, sa ou vaaia e le toatele ni tagata sa auai. Ina ua ou iloaina le laitiiti tele o le paranesi, sa tonu ia te au nai lo le mafaufau le fiafia i ai, o le a ou faia se mea i ai.
O le aso na sosoo ai na ma o ai ma lo’u tina i le faleoloa. Ae ma te lei tuua le fale, sa ou luluu maia se faaputuga kata e fepasiai. Ina ua ma taunuu i le faleoloa, sa ou aumaia se sukalati ma ou alu e totogi. Sa siaki e le kesia le sukalati, ona tuuina mai lea ia te au. Sa ou toe tuuina atu ia te ia. Sa ia tilotilo mai ua fememeai ma fai mai, “Lea faatoa uma ona e totogia, sena.”
Sa ou fai atu, “Ua ou iloa, ae ua ou tuuina atu ie te oe o se meaalofa.” Ona ou tuu atu lea i ai o se kata fepasiai faatasi ma le sukalati. Sa ataata o ia ma faafetai mai ia te au. Sa toe tilotilo o ia i le kata fepasiai, lea na ou tusia ai, “O tagata uma o se atalii po o se afafine o le Atua.” Sa ou savali ese ma le fiafia, ua iloa tusa lava pe le auai o ia i le Ekalesia, ae o la ua ou faia se mea lelei.
I se taimi mulimuli ane i lena aso, sa ou manatua ai sa ou tuua uma isi kata fepasiai i autafa o le masini talitupe! O le isi taimi na ma o ai i le faleoloa, sa ou fesili ai pe o i ai pea i o. Ona ou vaaia lea o se mea, ma ou te lei toe laa. Pe lima ia masini talitupe sa i ai kata fepasiai o loo fai mai, “O tagata uma o se atalii po ose afafine o le Atua.” Sa tufatufa e le kesia! Sa ou matuai lagona le fiafia ona o le mea sa ou faia.