Na o le Faatekinolosi

O Lesona e 4 mai le Aumaia i Luma e Iosefa Samita o le Tusi a Mamona

Saunia e Mckenna Clarke

Mekasini a le Ekalesia

I le na o le 24 tausaga o lona matua, sa feagai ai Iosefa Samita ma luitau ao ia galue e faataunuu ia poloaiga a le Atua. Ae na ia faatoilaloina faatasi ai ma le fesoasoani a le Atua, ma e mafai foi ona tatou faia.

I le avea ai o talavou matutua, atonu e talosagaina i tatou e faia ni mea e foliga mai e le mafai e aunoa ma le fesoasoani a le Atua. E faapena foi, sa feagai Iosefa Samita, i le na o le 24 ona tausaga le matua, ma luitau ma sa lagonaina lona le agavaa a o ia saili e faataunuu se poloaiga taua---o le lolomiina o le faaliliuga o le Tusi a Mamona. Ae faatasi ai ma le fesoasoani a le Atua, sa ia faamaeaina mea uma sa poloaiina ai o ia, ma o lana faataitaiga sa faaalia i le tele o ala e mafai ona tatou faia ia mafai mea e le mafai pe a i ai le Atua i la tatou itu.

1. E le faapea e tatau ona tatou maoae ina ia faatino ai e le Atua ni vavega e ala ia i tatou. Ina o sauniuni ia Iosefa e lolomi le Tusi a Mamona, o ia o se talavou matua e leai se tupe tele pe sa a’otauina aloaia---aemaise ai e leai se malamalama pe faapefea ona faaliliu ma lolomi sea ituaiga talafaamaumau taua. Ae, na sagai atu lava ma le faatuatua ma le meaalofa ma le mana o le Atua e faamaea le galuega sa poloaiina ai o ia e fai. Afai tatou te faalagolago i le Tama Faalelagi, e mafai e Ia ona faia ia tatou mafai ona fai Lana galuega.

2. A tuu mai e le Atua ia i tatou se galuega, o le a Ia saunia se ala e faamanuiaina ai. Ia Iosefa, o le lolomiina o le 5,000 kopi o se tusi e 590--itulau atonu na foliga mai e le mafai. Ae peitai, ina ua oo i le taimi e lolomi ai le tusi, sa musuia e le Alii ia Matini Harisi, e mokesi lana faatoaga sa manuia, e aumaia ai e $3,000 (pe tusa ma le $76,000 i le taimi nei). Pei ona sa aoao mai e Nifae, “o le a saunia [e le Alii} se ala mo i latou ia mafai ai ona faataunuu le mea, na ia poloaiina ai i latou” (1 Nifae 3:7). Sa tuuina e le Tama Faalelagi ia punaoa i le ala mo Iosefa e faamaea ai le galuega faatino. Ma o le a Ia faia foi le mea lava lena e tasi mo i tatou.

3. E tuuina mai e le Atua avanoa lona lua. Sa faia e Iosefa Samita ni mea sese sa oo ai ina leiloloa itulau e 116 o le tusiga o le Tusi a Mamona. Ona o le leiloloa o itulau e 116, sa aveesea ai foi mai ia Iosefa le tomai e faaliliu ai mo sina taimi. Ae talu ai sa filifili o ia e salamo, o lea sa iu ai ina faamagaloina ma toe avatu ai i ai se filifiliga lona lua e faataunuu lana misiona. Na fetalai le Alii: “Ae ia manatua, ua alofa mutimutivale le Atua; o lea, salamo i lena mea na e faia ua lē tusa ai ma le poloaiga na Ou tuu atu ia te oe, ma ua filifilia pea oe, ma ua toe valaaulia oe i le galuega” (MF&F 3:10). O le a tutumu o tatou olaga i mea sese i lenei olaga, ae a tatou salamo ma tuu o tatou loto i le nofoaga sa’o, o le a aumaia pea lava e le Alii ia i tatou se isi avanoa.

4. O le sagisagi atu i le olioli na folafola mai e mafai ai e i tatou ona foia luitau. E ui i luitau uma sa tatau ona feagai ma Iosefa, sa ia mauaina le tele o faamanuiaga ma iloa le olioli moni i lana galuega atoa o le aumaia i luma o le Tusi a Mamona. Ina ua uma ona lolomi le Tusi a Mamona, sa faatulagaina le Ekalesia ma sa papatisoina matua o Iosefa. I lena aso, sa alu ai Iosefa na o ia i le vao ma sa amata ona tagi ai ma le fiafia. Afai tatou te faaauau pea ona faafetaia’ia o tatou tofotofoga ma faaea i luga o tatou ulu, ma tuu atu le faatuatuaga atoa i le Atua, o le a mafai foi e i tatou ona maua le olioli ma le filemu.

Suesue Atili

Ina ia aoao atili e uiga i le lolomiina o le Tusi a Mamona ma le faatulagaga o le Ekalesia, faitau le “O Le Tulai Mai o le Ekalesia a Keriso” i le Liahonao Oketopa 2018.

Suesue atili e uiga i le vaitau lea o le talafaasolopito o le Ekalesia i le “Faautina o Faavae o le Ekalesia” i le O Lo Tatou Tupuaga: O Se Talafaasolopito Puupuu o le Ekalesia a Iesu Keriso o le Au Paia o Aso e Gata Ai.