Susulu Malamalama i Czeck Republic

Tuufaatasia e Sharon Goodrich, Mekasini a le Ekalesia

O i matou o tamaiti Peraimeri i Czeck Republic. O le ala lea matou te susulu malamalama ai i lo matou atunuu.

Sa i ai se taimi na leiloa ai la’u totinilima ou te fiafia lava i ai. Sa matuai ou faanoanoa lava. Sa ma tatalo ma lo’u tina, ae sa lei mauaina. Sa ou taumafai e faatuatua. I se vaiaso mulimuli ane, sa maua e lo’u uso laitiiti lo’u totinilima i le auala! E tali mai le Atua i a tatou tatalo. Ou te alofa ia te Ia ma ou te iloa o loo soifua o Ia!

Andre W., 9 tausaga

E i ai a’u uo i le aoga ae e le o ni tagata o Le Ekalesia ae latou te faaaloalogia lava o’u tulaga faatonuina. O le taimi lava ou te fai tau ai ua tatau ona matou tatalo, latou te malilie lava i ai! Sa ou fiafia lava.

Ivana A., 11 tausaga

Sa matou o ifo ma a’u uo i lalo. Ina ua matou taunuu i le lifi, sa ou maua se lagona le lelei ma sa ou talosagaina a’u uo e aua le faaaogaina. Sa filifili lava i latou e o ai. Sa ou savali ifo i faasitepu. Ina ua ou taunuu i lalo, sa le i i ai a’u uo. O le lifi na latou o ai sa utia! Sa fai si umi faatoa latou o mai i fafo. Sa ou fiafia ona e lei i ai se mea matuia na tupu. Sa ou lagonaina foi le fiafia ona sa ou mulimuli i le Agaga Paia.

Amalie N., 10 tausaga

I le matafaga, sa amata ona pogisa le lagi. Sa agi mai le matagi ma sa afua ai ni galu matautia! Sa papa faititili, emo uila, ma uato’a. Sa taufetuli tagata uma mo se lafitaga. E lei i ai se isi na lavea i le matagi. A o matou agai atu i le fale, sa matou vaaia ni nuanua se tolu. Ua matou iloa sa fesoasoani le Atua ma puipuia i matou.

Jkub B., 10 tausaga

I le aoga e i ai sa’u uo e leai se isi e fia uo i ai. Sa amata ona fai atu e isi tamaiti ni mea leaga ia te ia sa lagona ai e ia e auleaga. Sa ou ta’ua i lo’u faiaoga ma valaaulia la’u uo ma te taaalo. Sa fiafia ai la’u uo.

Ludmila V., 8 tausaga

Sa ou ita i lo’u tina ona sa ou lei fia alu e taele ma alu e moe. O le aso na sosoo ai sa ou faanoanoa ona o la’u filifiliga leaga. Sa fai mai lo’u tina e mafai ona ma tatalo ma ole atu i le Tama Faalelagi e faamagalo i ma’ua. Sa ma tootutuli ma tatalo. Sa ou lagona le fiafia. Sa ou aoaoina e mafai ona ou salamo, ma ona o Iesu Keriso, e mafai ona faamagaloina.

Samuel H., 5 tausaga

Sa tuu atu la’u molimau i le lotu. Sa manaomia ai le lototoa. Talu mai lena taimi, ua ou lagonaina lava le Agaga.

Eliska K, 11 tausaga

Ina ua ma’i la’u fagafao, sa ou tatalo mo ia. Ou te faafetai i le Tama Faalelagi mo le fesoasoani mai ia te i matou.

Aneta P., 10 tausaga