O Le Uluai Laasaga i le Salamo

Saunia e Aurilas Peterson

E alaala le tusitala i Ouest, Haiti.

Sa ou lagonaina ua pogisa lo’u olaga. Ona ou iloa ai lea e manaomia ona ou talanoa i lo’u epikopo.

Ou te manatua le faatulagaina ma faifeautalai o le aso o lo’u papatisoga. Sa ia fesili mai pe ua ou sauni e osifeagaiga ma lo’u Tama Faalelagi. E aunoa ma se mafaufau i ai ma se loto ua tumu i le olioli, sa ou fai tau, “Ioe!” Sa ou manao e talia le meaalofa faapitoa sa tuuina mai e lo’u Tama alofa ia te au, ma sa ou iloaina o le a ou le fiafia e aunoa ma le Faaola i lo’u olaga. Ae sa ou matuai le mautinoa lava le mea o i le lumanai mo au.

Mulimuli ane, ua oo mai le aso tele. Sa le mafai ona galo, ma sa ou matua fiafia lava.

O Aso Pogisa

Ina ua uma lo’u papatisoga ma le faamauga, sa faafuasei ona foliga pogisa aso. Sa ou feagai ma faafitauli faaleaiga, ma sa ou tauivi e usitai i tulafono uma a le Atua. Sa ou le iloa se mea e fai, ma sa ou manao e lafoai mea uma. Sa foliga mai e leai se tasi na malamalama ia te au.

Sa masani ona ou fiafia e faitau le Tusi a Mamona, ae o le taimi lena sa ou faataatia ese ai. I se tasi aso, a o ou i ai i le fale na o au, sa ou lagonaina le mafanafana o le uunaiga a le Agaga ia te au e faitau le Tusi a Mamona. Sa muamua ona ou tatalo, i le manao e maua se tali o le a mafai ona maua mai ai se filemu i lo’u mafatiaga. Sa ou susueina tonu i le Alema mataupu 5. Fuaiupu e 27 e faitauina: “Ua outou savavali ea, ma tausi outou lava i le lē pōnā i luma o le Atua? E mafai ea ona outou fai ifo, i totonu ia te outou lava, pe afai e valaaulia outou e feoti i le taimi nei, ua lava lo outou lotomaualalalo? Ua faamamaina o outou ofu ma ua faasinasinaina e ala i le toto o Keriso, o lē o le a afio mai e togiola ona tagata mai ia latou agasala?”

Na iu ina, sa ootia lava a’u i nei upu. Sa ou iloaina sa manaomia ona ou salamo, o lea sa ou faia ai se aso e vaai ai lo’u epikopo. Sa le mafaafitia lo’u fefe, ae sa ou faamalosia a’u lava ou te alu e talanoa ia te ia.

Malamalama i le Folafolaga a le Atua

Ina ua ou taunuu atu i le ofisa o epikopo, sa ou lagonaina lava lo’u tausalaina ma sa ou manao ai e toe foi mai. Ae sa ou tatalo ia ou maua le lototoa ou te tautala atu ai i mea uma sa manaomia ona ou ta’u atua. Sa faafeiloai au e le epikopo i lona ofisa, ona ia faia lea o se tatalo ia maua le fesoasoani mai le Atua. Sa ia tautala mai ia te au e pei o sona atalii ma sa faaalia lona alofa mo au e ala i ana upu. Sa ia tuuina mai se fautuaga ma fai mai ia te au e faia ni mea patino ina ia ou maua ai le faamagaloga a le Atua ona toe alu atu lea e vaai o ia.

Sa ou matua fiafia lava mo lenei avanoa Sa ou mulimuli i lana fautuga ma sa iu ina ou malamalama i le folafolaga a le Atua o le faamagaloga ia Alema: “Afai na te faaalia ana agasala i luma o oe ma a’u, ma ua salamo faamaoni lona loto, o ia lena e te faamagaloina, ou te faamagaloina foi o ia” (Mosaea 26:29). Ina ua uma ona ou salamo faamaoni, sa ou iloaina ua faamagalo au e le Atua. Sa iu ina mafai ona ou lagonaina le alofa o le Atua i lo’u loto, ma sa aveeseina atu le pogisa. Sa ou fiafia ma mitamita ia te a’u lava.

Ua I Ai Iina le Epikopo e Fesoasoani

O le epikopo o le sui o le Alii mo le uarota. Ia iloa o loo i ai o ia iina e fesoasoani ia te oe ia maua le fiafia moni o loo teuina e le Atua mo oe. Faalagolago ia te ia. Afai o i ai ni ou faafitauli pe manaomia ona salamo, alu e sue o ia. O le a Ia fesoasoani ia te oe.

Ou te iloa e le o se mea faigofie le alu e vaai o ia i nisi taimi. Ae sa faamalamalama mai e Peresitene Lorenzo Snow (1814--1901) e uiga i le fuafuaga e faavavau a le Tama Faalelagi: “Ou te talitonu i le lalolagi o agaga i le [muai olaga], ina ua faatu mai ia i tatou e … tatou te uia aafiaga ua tatou maua nei, sa lei logoleleia uma ma ioeina. … Ae sa manino faapea sa tatou vaai ma malamalama lelei iina e faapea, ina ia mafai ona ausia lo tatou faaeaga ma le mamalu, o se aafiaga lenei e tatau ai.” Na ia toe faapea mai, “Sa tatou loto e usitai i le finagalo o le Atua, ma o le taunuuga o lea ua tatou i ai iinei” (Aoaoga a Peresitene o le Ekalesia: Lorenzo Snow [2012], 300).

O le salamo o se vaega o le usiusitai i le finagalo o le Atua. O lea la, nai lo le fefe i le epikopo, ia fai o ia ma au uo. Sa filifilia o ia e le Atua, ma e mafai ona ia fesoasoani ia e salamo ma faamaloloina lou agaga e ala i le sau ia Iesu Keriso. E finagalo le Alii e fesoasoani ia i tatou, ae e tatau ona tatou faia le uluai la’a agai atu i le salamo. O iina e mafai ai ona tatou vaaia le folafolaga o i le Isaia 1:18 ua faataunuuina: “E ui lava ina pei o ofu mumu a outou agasala, e sisina ia e pei o le kiona.” Ma o le ala lena, ua i ai le epikopo iina e fesoasoani.

Ou te molimau atu o loo soifua le Atua ma o Iesu Keriso o lo tatou Faaola. E alolofa tele i la’ua ia i tatou!