2 Mga Taga-Corinto 11–12

Paglahutay sa Kalisdanan uban ang Hugot nga Pagtuo diha ni Kristo

Bisan ang labing matinud-anong mga disipulo ni Jesukristo maglahutay og kalisdanan sa ilang mga kinabuhi. Si Pablo mipakigbahin og pipila ka mga pag-antos nga iyang gilahutay ug giunsa niya pagpangita og kalipay niadtong mga kasinatian pinaagi sa panabang sa Manluluwas. Kini nga leksiyon makatabang nimo nga mosalig sa Ginoo diha sa imong pagpaningkamot sa paglahutay nga matinud-anon sa imong kaugalingong mga hagit.

Mga kalisdanan sa kinabuhi

• Unsa sa imong hunahuna ang katuyoan sa mga tunok sa usa ka bulak sa rosas?

Sa kinabuhi, kita adunay daghang maayo nga mga kasinatian nga mahimong itandi nganha sa usa ka rosas. Bisan pa niana, kita usab mag-atubang og mga kalisdanan ug mga hagit nga mahimong matandi sa mga tunok.

• Unsa ang pipila sa mga kalisdanan ug mga hagit nga mahimong masinati sa mga tawo niini nga kinabuhi?

• Unsa nga mga hunahuna ug mga pangutana ang lagmit ipangutana sa mga tawo mahitungod sa Dios samtang sila nagsinati og mga pagsulay? Unsa lagmit ang ilang ikatingala mahitungod sa ilang kaugalingon?

Sa imong pagtuon karon, pangita sa mga kamatuoran nga makatabang kanimo nga matinud-anong makalahutay sa mga kalisdanan nga ang Dios, diha sa Iyang gugma ug kaalam, mipili nga dili tangtangon. Pamalandongi kon nganong kinahanglan nimo ang panabang sa Dios diha sa imong paglahutay niini.

Mga kalisdanan ni Pablo

Basaha ang 2 Mga Taga-Corinto 11:24–28, nga mangita og pipila sa mga kalisdanan ni Pablo nga gilahutay panahon sa iyang pagpangalagad.

• Unsa pa ang ubang mga ehemplo nga imong mahunahunaan gikan sa mga kasulatan o gikan sa kasaysayan sa Simbahan nga nagpakita nga bisan ang mga matarong nag-antos og mga kalisdanan? Sa unsang paagi nga ang kinabuhi sa Manluluwas pruweba niini?

• Ngano sa imong hunahuna ang Langitnong Amahan nagtugot sa mga matinud-anong disipulo ni Jesukristo nga mag-antos og maayo?

Bisan tuod og ang Dios nagpanalangin kang Pablo og katingalahang mga pagpadayag, lakip na ang panan-awon sa celestial nga gingharian (tan-awa ang 2 Mga Taga-Corinto 12:1–4), si Pablo kinahanglan lang gihapon nga molahutay og mga kalisdanan ug mga pagsulay sa iyang hugot nga pagtuo. Basaha ang 2 Mga Taga-Corinto 12:7 aron makita unsa ang gitandi ni Pablo sa usa sa iyang nagpadayong mga kalisdanan.

• Sa unsang paagi nga ang “tunok sa unod” mahimong maayong paghulagway sa pipila ka personal nga mga kalisdanan?

• Unsa nga pagtandi ang lagmit imong gamiton aron paghulagway sa usa ka pihong kalisdanan nga giantos nimo o sa imong mga minahal sa kinabuhi? Ngano man?

Basaha ang 2 Mga Taga-Corinto 12:8–10 aron makita ang kasinatian ni Pablo nga nag-ampo alang sa iyang “tunok sa unod” aron matangtang. Sa imong pagbasa, hinumdomi nga ang pulong nga grasya nagpasabot og “diosnon nga panabang o kalig-on gihatag pinaagi sa kalooy ug gugma sa Dios” (Giya ngadto sa mga Kasulatan, “ Grasya,” scriptures.ChurchofJesusChrist.org; tan-awa usab sa Ether 12:27).

Usa ka kamatuoran nga atong makat-onan gikan sa kasinatian ni Pablo mao nga ang Ginoo dili kanunay motangtang sa atong mga hagit, apan kita mapalig-on pinaagi sa Iyang grasya samtang kita matinud-anong molahutay niini.

• Sa unsang paagi nga imong nakita kini nga kamatuoran sa kinabuhi sa Manluluwas? (tan-awa ang Lucas 22:41–44).

Pangita ug pagbasa og labing menos usa ka asoy sa kasulatan nga nagpakita unsaon sa Ginoo pagpanalangin niadtong naglahutay sa mga kalisdanan nga adunay hugot nga pagtuo ngadto Kaniya. (Ang mosunod mao ang mga sugyot sa mga asoy nga imong lagmit mapili.)

• Doktrina ug mga Pakigsaad 121:1–8; 122:7–9. (Si Joseph Smith nag-ampo samtang siya nag-antos sa Prisohan sa Liberty.)

• Mosiah 24:8–15. (Ang katawhan ni Alma nabihag sa mga Lamanite ug gidumala sa daotan nga pari nga si Amulon.)

1. Tubaga ang labing minus tulo sa mosunod nga mga pangutana diha sa imong journal sa pagtuon:

• Unsa ang imong nakat-onan mahitungod sa Ginoo ug unsa ang Iyang mahatag niadtong matinud-anong naglahutay og mga kalisdanan?

• Hain sa Iyang mga panalangin ang gikinahanglan kaayo nimo samtang ikaw naglahutay sa imong mga pagsulay? Ngano man?

• Kinsa ang imong nailhan sa personal nga matinud-anong milahutay sa usa ka hagit? Unsay ilang gihimo aron matinud-anong makalahutay? Sa unsang paagi nimo nakita ang grasya sa Ginoo nga nagtabang kanila?

• Unsa sa imong hunahuna ang buot ipabuhat sa Manluluwas kanimo aron matinud-anong makalahutay sa imong mga pagsulay?

Tan-awa ang bidyo nga “Bukid nga Katkaton [Mountains to Climb]” (5:05), anaa sa ChurchofJesusChrist.org, nga mangita sa unsay atong mahimo aron matinud-anong makalahutay sa mga pagsulay.

Mountains to Climb

Finding faith in the Lord Jesus Christ will help us have the power to endure and overcome even the hardest trials in life.

• Unsa ang imong nakat-onan mahitungod sa paglahutay sa mga kalisdanan nga may hugot nga pagtuo ni Jesukristo?

2. Kompletoha ang mosunod diha sa imong journal sa pagtuon:

Base sa unsa ang imong nakat-onan ug nabati sa imong pagtuon sa 2 Mga Taga-Corinto 12 karon, dugangi o isulat pagbalik ang mosunod nga pamahayag aron mahimo kining mas tukma.

“Kon kita mag-ampo nga adunay igong hugot nga pagtuo kang Jesukristo, ang Langitnong Amahan mowagtang sa bisan unsang pagsulay nga atong giagian.”

Opsiyonal: Gustong Makakat-on Pa og Dugang?

Sa unsang paagi nga ang Manluluwas usa ka ehemplo sa mga kamatuoran nga gitudlo niini nga leksiyon?

Si Presidente Dallin H. Oaks sa Unang Kapangulohan mipakigbahin sa mosunod kabahin sa Lucas 22:41–44:

Dinhi atong makita ang hingpit nga hugot nga pagtuo ug pagsalig sa Manluluwas diha sa Amahan. “Hinumdomi,” si Jesus miingon “Dili ang akong pagbuot maoy matuman kondili ang imo.” Ang tubag sa Langitnong Amahan mao ang pagbalibad sa pangamuyo sa iyang Bugtong nga Anak. Ang Pag-ula kinahanglang trabahoon pinaagi nianang kordero nga walay lama. Apan bisan kon ang hangyo sa Anak gibalibaran, ang iyang pag-ampo gitubag. Ang kasulatan nagrekord: “Ug dihay manulonda nga mitungha kaniya gikan sa langit, sa pagpalig-on kaniya” (HJS, Lucas 22:43).

(Dallin H. Oaks, “Faith in the Lord Jesus Christ [Hugot nga Pagtuo diha ni Jesukristo],” Ensign, Mayo 1994, 100)

Unsa ang gitanyag sa Manluluwas kanato panahon sa atong mga kalisdanan?

Si Presidente Dallin H. Oaks sa Unang Kapangulohan mipakigbahin:

Ang [makaayo nga gahom ni] Ginoong Jesukristo—mahimong [motangtang kini sa atong palas-anon] o mopalig-on kanato aron makalahutay ug [magpakabuhi uban niini] sama ni Apostol Pablo—anaa alang sa matag kalisdanan niining mortalidad.

(Dallin H. Oaks, “Iyang Papahulayon ang Nag-antos,” Liahona, Nob. 2006, 8)

Sa unsang paagi nga ang atong mga panlimbasog makatabang kanato nga mapanalanginan kadtong mga nagpalibot kanato?

Si Sister Reyna I. Aburto, Ikaduhang Magtatambag sa Kinatibuk-ang Kapangulohan sa Relief Society, nagtudlo:

Ang imong mga pakigbisog dili mohulagway kon unsa ka, apan kini mopalambo nimo. Tungod sa “tunok dinhi sa lawas,” ikaw [makabaton og abilidad] nga mobati og dugang nga kalooy [ngadto] sa uban.

(Reyna I. Aburto, “Sa Dag-om ug Kahayag, Ginoo, Ubani Ako!,” Liahona, Nob. 2019, 58)

Kadto bang mga naghupot sa pagkapari makaayo sa tanang kinsa adunay hugot nga pagtuo nga maayo?

Si Presidente Dallin H. Oaks sa Unang Kapangulohan mipasabot:

He Heals the Heavy Laden

The healing power of the Lord Jesus Christ … is available for every affliction in mortality.

Bisan ang Manluluwas makaayo sa tanan nga buot Niya nga ayohon, dili kini tinuod ngadto sa tanan nga naghupot sa Iyang awtoridad sa [pagkapari]. Ang paggamit sa tawo sa awtoridad nag-agad sa kabubut-on Kaniya nga tag-iya sa [pagkapari]. Sa ingon man, kita giingnan nga ang uban nga gipanalanginan sa mga elders wala mamaayo tungod kay sila “panahon na nga mamatay” [Doktrina ug mga Pakigsaad 42:48]. Sama usab, sa dihang si Apostol Pablo naninguha nga mamaayo gikan sa “sakit sa unod” nga naghasol kaniya (2 Mga Taga-Corinto 12:7), ang Ginoo nagdumili sa pag-ayo kaniya.

(Dallin H. Oaks, “Iyang Papahulayon ang Nag-antos,” Liahona, Nob. 2006, 7)