2 Mga Taga-Corinto 8–9

Pag-atiman sa mga Kabos

Si Jesukristo nagpakabana pag-ayo sa tanang anak sa Langitnong Amahan ug nagdapit kanato sa pagsalmot Kaniya sa paghatag alang sa mga kabos ug nanginahanglan. Gidapit ni Pablo ang mga Santos nga Taga-Corinto nga mosunod sa ehemplo sa Manluluwas pinaagi sa pagsakripisyo sa ilang mga kabtangan alang sa pag-atiman sa mga kabos. Kini nga leksiyon makatabang kanimo nga mosunod sa ehemplo ni Jesukristo pinaagi sa pagpaambit unsa ang anaa kanimo ngadto sa mga nagkinahanglan.

Usa ka dako nga hagit

Si Elder Jeffrey R. Holland sa Korum sa Napulog Duha ka Apostoles naghisgot kabahin sa usa ka dako nga hagit. Paghunahuna og pipila ka mga hagit nga mahimong tukma nga masulat sa blanko sa mosunod nga kinutlo.

Sa tibuok kasaysayan, angusa sa kinadak-an [ug kinalapdan nga mga] hagit sa tawhanong kaliwat. Tataw nga ang pag-antos kasagaran sa pisikal, apan ang espiritwal ug emosyonal nga kadaot nga dala niini tingali mas grabe pa.

(Jeffrey R. Holland, “Dili ba Kitang Tanan Makililimos?,” Liahona, Nob. 2014, 40)

Ang ehemplo ni Jesukristo

Si Pablo mipakigbahin sa ehemplo sa Manluluwas aron pagdasig kanato sa paghatag sa mga panginahanglan sa uban agi sa sinsero nga paghigugma.

Basaha ang 2 Mga Taga-Corinto 8:9, nga mangita sa ehemplo ni Jesukristo sa maloloy-ong paghatag alang kanato.

• Unsa sa imong hunahuna ang pasabot ni Pablo dihang iyang gisulat nga si Jesus nahimong kabos aron kita mahimong dato?

Usa ka kamatuoran nga atong makat-onan gikan sa sulat ni Pablo mao nga samtang makasabot kita sa tanan nga gibuhat sa Manluluwas alang kanato, mas andam kita nga mohatag ngadto sa uban.

Ang kaimportante sa pag-atiman sa mga nagkinahanglan gitudlo sa tibuok kasulatan, lakip na sa Basahon ni Mormon. Basaha ang mosunod nga mga pagtulon-an ni Pablo, kauban ang mga tudling sa Basahon ni Mormon, nga mangita unsa ang gitudlo niini nga mga tudling mahitungod sa pag-atiman sa uban. Ikonsiderar ang pagkonektar sa mga tudling.

• Tinguha sa paghatag: 2 Mga Taga-Corinto 8:12; Mosiah 4:24

• Unsa ka dako ang ihatag: 2 Mga Taga-Corinto 9:6; Alma 1:30

• Kinaiya sa paghatag: 2 Mga Taga-Corinto 9:7; Moroni 7:6–8

• Pagmapasalamaton sa Dios: 2 Mga Taga-Corinto 9:11–15; Mosiah 4:19–21

1. Tubaga ang mosunod nga pangutana diha sa imong journal sa pagtuon:

• Unsa sa imong hunahuna ang lagmit buot sa Ginoo nga atong buhaton karon aron mapuy-an ang gitudlo sa matag tudling niini nga mga tudling sa kasulatan?

Si Elder Dale G. Renlund sa Korum sa Napulog Duha ka Apostoles mipasabot giunsa nga ang pagkamanggihatagon sa Langitnong Amahan ug ni Jesukristo mahimong makapabag-o kanato.

Matag usa kanato nakadawat og mga gasa diin kita mismo dili makahatag, mga gasa nga gikan sa atong Langitnong Amahan ug sa Iyang Hinigugmang Anak, lakip ang pagtubos pinaagi sa maulaon nga pagsakripisyo ni Jesukristo. Nakadawat kita og kinabuhi niini nga kalibotan; makadawat kita og pisikal nga kinabuhi human dinhi, ug mahangtorong kaluwasan ug kahimayaan—kon kita mopili niini—tanan tungod sa Langitnong Amahan ug ni Jesukristo.

Sa matag higayon nga kita mogamit, makabenepisyo, o gani sa paghunahuna niini nga mga gasa, angay nga hunahunaon nato ang sakripisyo, kamanggihatagon, ug kamanggiloy-on sa mga tighatag. Ang pagtahod sa mga tighatag makahimo og daghan kay sa paghimo natong mapasalamaton. Ang pagpamalandong sa Ilang mga gasa makahimo ug kinahanglang makausab kanato.

(Dale G. Renlund, “Hunahunaa ang Pagkamaayo ug Pagkahalangdon sa Dios,” Liahona, Mayo 2020, 42)

• Sa unsang paagi nga ang pagpamalandong sa pagkamanggihatagon sa Langitnong Amahan ug ni Jesukristo makapabag-o kanato?

Pag-atiman alang sa kabos sa atong panahon

Si Presidente Russell M. Nelson naghulagway og duha sa daghang mga paagi nga ang Manluluwas migamit sa Iyang gipahiuli nga Simbahan aron pag-atiman alang sa mga kabos sa tibuok kalibotan sa atong panahon. Basaha ang mosunod nga pamahayag o mahimo nimong tan-awon ang “Ang Dako ug Ikaduhang Sugo” (time code 6:15 hangtod 8:51), anaa sa ChurchofJesusChrist.org.

Ang Daku ug Ikaduhang Sugo

Si Presidente Nelson mihatag og mga ehemplo kon sa unsang paagi ang Simbahan ug ang mga miyembro niini nagtuman sa daku ug ikaduhang sugo sa Ginoo sa paghigugma sa atong mga silingan pinaagi sa makatawhanong mga paningkamot.

Ang Latter-day Saint Charities nakahatag og kapin sa duha ka bilyon ka dolyar nga tabang para sa mga nanginahanglan sa tibuok kalibotan. Kini nga tabang gihalad ngadto sa mga nagkinahanglan bisan unsay ilang relihiyon, nasyonalidad, kaliwat, sekswal nga oryentasyon, kinatawhan [gender] o politikanhong opinyon.

Dili kay kana lang. Aron makatabang sa mga miyembro sa Simbahan sa Ginoo nga anaa sa kalisod, gihigugma nato ug gisunod ang karaang balaod sa pagpuasa [tan-awa ang Isaiah 58:3–12]. Nagpagutom kita aron makatabang sa uban nga gigutom. Usa ka adlaw matag bulan, dili kita mokaon ug idonar ang kantidad niana nga pagkaon (ug sobra pa) aron itabang sa nanginahanglan.

(Russell M. Nelson, “Ang Dako ug Ikaduhang Sugo,” Liahona, Nob. 2019, 98)

2. Tubaga ang mosunod nga mga pangutana diha sa imong journal sa pagtuon:

• Unsa ang labing mahinungdanon kaninyo gikan sa pamahayag ni Presidente Nelson?

• Unsaon nimo pagpasabot sa puasa ug mga halad sa puasa ngadto sa usa ka tawo nga wala masayod niini?

• Agig dugang sa paghatag og mga donasyon nga salapi ngadto sa Simbahan, unsa ang laing mga paagi nga kita mahimong makatabang sa Ginoo sa pag-atiman sa kadtong mga nanginahanglan? Kinsa ang maayong ehemplo kanimo niini nga baroganan?

Unsay buot ipabuhat sa Dios kanimo?

Si Elder Jeffrey R. Holland sa Korum sa Napulog Duha ka Apostoles mipasabot sa atong pagkinahanglan sa pagpangayo og giya sa Dios diha sa pagtabang niadtong nagpalibot kanato.

Wala gyod ko masayod unsaon sa matag usa ninyo ang pagtuman sa inyong obligasyon ngadto sa dili o wala makatabang kanunay sa ilang mga kaugalingon. Apan nasayod ko nga nahibalo ang Dios, ug Siya motabang ug mogiya kaninyo sa inyong manggiloy-ong mga buhat sa pagkadisipulo kon mahunahunaon ug mainampoon ug mangita kamo og paagi sa pagsunod sa sugo nga balik-balik Niyang gihatag kanato.

(Jeffrey R. Holland, “Dili ba Kitang Tanan Makililimos?,” Liahona, Nob. 2014, 41)

Paghimo og usa ka plano sa pagbuhat sa mga hunahuna ug mga pagbati nga nadawat nimo karon aron matabangan ang kadtong anaa sa imong palibot. Kon ikaw dili pa segurado kinsa ang gusto sa Langitnong Amahan nga tabangan nimo o unsaon sila pagtabang, pag-ampo alang sa giya ug pangita og mga kahigayonan aron mag-alagad sa kadtong nagpalibot nimo, lakip ang mga miyembro sa imong kaugalingong pamilya. Ang Dios motubag sa imong mga pag-ampo sa Iyang kaugalingong paagi ug panahon.

Opsiyonal: Gustong Makakat-on Pa og Dugang?

Sa unsang paagi nga ang mga donasyon sa Simbahan sa Manluluwas gigamit aron paghupay sa kakabos karon?

• Bisitaha ang website latterdaysaintcharities.org aron makat-on sa mga tubag niini nga pangutana ug uban pa.

• Tan-awa ang bidyo nga “Ang Unang Ginhawa sa Bata [A Child’s First Breath]” (3:13), anaa sa ChurchofJesusChrist.org.

  A Child's First Breath

  Neonatal resuscitation training is one of many humanitarian efforts that fall under the curtain of the Church welfare program.

• Tan-awa ang bidyo nga “Mga Batang Lalaki sa Panimalay [Boys’ Home]” (3:20), anaa sa ChurchofJesusChrist.org.

  Boys' Home

  LDS Charities partners with Food for the Poor to deliver food, clothing, and toys to children in the Dominican Republic.

• Tan-awa ang bidyo nga “ Usa ka Libo ka Adlaw [A Thousand Days] ” (4:32), anaa sa ChurchofJesusChrist.org.

  A Thousand Days

  By digging wells and boreholes in drought-stricken countries of Africa, The Church of Jesus Christ of Latter-day Saints helps provide health and happiness to entire villages.

Sa unsang paagi ako makatabang sa kadtong nagpalibot kanako sa mga paagi gawas sa paghatag og salapi?

Si Sister Bonnie L. Oscarson, kanhi Kinatibuk-ang Presidente sa Young Women, mipakigbahin og usa sa daghang mga ideya:

Akong batan-ong mga higala, makagarantiya ko nga sa kanunay adunay tawo sa kada miting sa Simbahan nga imong tambongan kinsa magul-anon, kinsa nagsagubang og mga hagit ug nagkinahanglan og usa ka higala, o kinsa mibati nga siya wala maapil. Aduna kay importanteng butang nga mahatag sa kada miting o kalihokan, ug ang Ginoo nagtinguha nga mangita ka diha sa inyong mga higala ug dayon mangalagad sama sa Iyang gibuhat.

(Bonnie L. Oscarson, “Ang mga Panginahanglan nga Atong Giatubang,” Liahona, Nob. 2017, 26)

Si Propeta Joseph Smith (1805–44) mipasabot:

Ang [usa ka miyembro sa Simbahan] magpakaon sa gigutom, mosinina sa hubo, mosangkap sa biyuda, mopahid sa luha sa ilo [walay ginikanan], mohupay sa masakiton, maanaa dinhi sa simbahan, o bisan asa, o bisan sa walay simbahan, bisan asa siya makakaplag kanila.

(Mga Pagtulon-an sa mga Presidente sa Simbahan: Joseph Smith [2007], 516)