Kini nga leksiyon gituyo sa pagtabang kanimo nga makatimbang-timbang sa mga tumong nga imong gitakda ug sa paglambo nga imong nasinati atol sa imong pagtuon sa Bag-ong Tugon.
Niini nga leksiyon aduna kay kahigayonan sa pagsukod sa imong nakat-onan ug giunsa nimo paggamit sa mga baroganan nga gitudlo diha sa 1 Mga Taga-Corinto 8–16 ug 2 Mga Taga-Corinto. Ang pagsukod sa imong nakat-onan mahimong makatabang kanimo sa pag-analisa kon giunsa pagtabang sa pagtuon sa mga kasulatan kanimo aron mahimong mas mahisama sa Manluluwas.
Timbang-timbanga ang imong mga tumong
Tag-ana pila ka giimprinta nga mga panid sa kasulatan ang anaa sa Bibliya, Basahon ni Mormon, Doktrina ug Mga Pakigsaad, ug Perlas nga Labing Bililhon kon hiusahon.
Ngano sa imong hunahuna ang Ginoo mihatag kanato og daghan kaayong mga panid sa kasulatan?
Sa unsang paagi nimo mapakita ang pasalamat sa Iyang mga pulong?
Si Elder D. Todd Christofferson sa Korum sa Napulog Duha ka Apostoles mipasabot nganong ang Ginoo naghatag og daghan kaayo sa Iyang mga pulong diha sa kasulatan. Basaha ang mosunod nga pamahayag o tan-awa sa “Ang mga Panalangin sa Kasulatan [The Blessings of Scripture]” (3:03), anaa sa ChurchofJesusChrist.org.
Imahe
Hulagway ni Elder D. Todd Christofferson. Gilitratohan niadtong Marso 2020.
Hunahunaa ang gidaghanon sa atong panalangin sa pagkaangkon sa … ingon ka buhong sa mga kasulatan. Ug dili lamang kana, apan ang matag lalaki, babaye, ug bata mahimong makaangkon ug magtuon sa iyang personal nga kopya niining sagrado nga mga teksto, labaw sa tanan diha sa iyang kaugalingong pinulongan. … Sa tinud-anay uban niini nga panalangin ang Ginoo nagsulti kanato nga ang atong panginahanglan alang sa makanunayon nga kapilian sa mga kasulatan mas labaw ka dako kay sa bisan kanus-a sa miaging panahon. Unta kita padayon nga magbusog sa mga pulong ni Kristo nga mosulti kanato sa tanang butang nga kinahanglan natong buhaton (tan-awa ang 2 Nephi 32:3).
1. Tubaga ang usa o duha sa mosunod nga mga pangutana diha sa imong journal sa pagtuon:
Ngano sa inyong hunahuna nga ang atong panginahanglan sa pagdangop “[sa] mga kasulatan mas labaw ka dako [karon] kay sa bisan kanus-a sa miaging panahon”?
Unsang personal nga mga panginahanglan ang nahatag sa mga kasulatan nimo sa imong kinabuhi, o unsa nga mga panginahanglanon ang ilang mahatag?
Paggahin og usa ka minuto sa pagpamalandong sa imong personal nga pagtuon sa kasulatan. Pakigtambag sa Langitnong Amahan kon giunsa sa imong pagtuon sa kasulatan paghatag sa imong mga panginahanglan ug kon ikaw kinahanglan nga mohimo og bisan unsang mga pagpahiangay. Lagmit nagkinahanglan kang mahimong mas makanunayon sa imong inadlaw nga pagtuon sa kasulatan o dugangan ang giladmon sa pagsabot nga imong nakuha gikan sa imong mga pagtuon. Isulat ang bisan unsang mga pagpahiangay nga sa imong pamati kinahanglan nimong buhaton. Ikonsiderar ang paghangyo sa imong pamilya, imong magtutudlo sa seminary, o usa ka lider sa Simbahan nga tabangan ka sa imong mga tumong sa pagtuon sa kasulatan.
Salig sa Manluluwas ug tinguhaa ang Iyang panabang
Imahe
Si Jesus nga mipasaylo ug miayo sa usa ka tawo.
Dihang si Pablo misulat ngadto sa mga Santos sa Corinto, siya mitutok sa mga paagi nga si Jesukristo nagpanalangin ug nagtabang kanato. Pipila sa mga ehemplo naglakip sa pagtabang kanato aron makalingkawas sa tintasyon (tan-awa ang 1 Mga Taga-Corinto 10:13), nagtabang kanato aron makapalambo sa gugmang putli (tan-awa ang 1 Mga Taga-Corinto 13), nagbanhaw kanato gikan sa kamatayon pinaagi sa Pagkabanhaw (tan-awa ang 1 Mga Taga-Corinto 15), nagdapit kanato aron makig-uli Kaniya (tan-awa ang 2 Mga Taga-Corinto 5:16–21; 7:1–10), ug nagpalig-on kanato aron matinud-anong molahutay sa mga hagit (tan-awa sa 2 Mga Taga-Corinto 11–12).
Paggahin og pipila ka higayon sa pagrebyo sa mga tudling sa kasulatan nga imong gimarkahan o mga mugbong sulat nga gihimo sa 1 Mga Taga-Corinto 8–16 ug 2 Mga Taga-Corinto nga nakatabang nimo nga makat-on o mosalig sa Manluluwas.
Pag-andam og 3 hangtod sa 5 ka minuto nga mensahe kon giunsa pagtabang ni Jesukristo kanimo. Ilakip ang mosunod:
usa ka pagpasabot sa unsa ang gitudlo sa maong mga tudling mahitungod sa giunsa sa Manluluwas pagtabang ug paglig-on kanimo
usa ka kasinatian gikan sa imong kinabuhi o usa ka pananglitan diha sa kasulatan nga si Jesukristo nagtabang sa paagi nga gitudlo niadto nga mga tudling
unsaon kaha nimo pagdapit sa uban aron modawat sa panabang ug paglig-on sa Manluluwas
2. Isulat ang imong mga mensahe diha sa imong journal sa pagtuon. Pangita og kahigayonan sa pagpaambit sa imong mensahe diha sa imong pamilya, sa imong klase sa seminary, o diha sa klase sa simbahan.
Buhat sa family history ug sa templo ug ang Pagkabanhaw
Pilia ang bisan asa sa kalihokan A o B.
Imahe
Templo ug Family History
Kalihokan A: Pag-apil sa buhat sa family history ug sa templo
Sa miagi, lagmit imong natun-an ang 1 Mga Taga-Corinto 15:29 . Paghunahuna kon unsa ang epekto sa Pagkabanhaw sa Manluluwas ngadto sa imong mga katigulangan. Tan-awa kini nga bidyo samtang ikaw mamalandong.
Sa imong pagtuon sa 1 Mga Taga-Corinto 15:29, tingali nakamugna ka og plano sa pagsalmot sa buhat sa family history ug sa templo. Kon nahimo nimo, paggahin og higayon sa pagrebyo sa imong plano ug pamalandongi ang imong mga gibuhat aron pagpatuman sa imong plano. Kon wala nimo nahimo, ikonsiderar ang paghimo og plano karon kon unsaon nimo pagtabang sa imong mga katigulangan nga makadawat sa tanang mga panalangin sa ebanghelyo ni Jesukristo.
3. Kon imong gipili kini nga kapilian, buhata ang mosunod sa imong journal sa pagtuon:
Ireport ang imong plano.
Kon nakahimo ka og plano, ipakigbahin unsa ang maayong nahitabo ug unsa ang mga babag nga imong giatubang. Aduna bay bisan unsang mga pagpahiangay nga imong nabati nga gusto sa Langitnong Amahan nga imong buhaton? Sa unsang paagi nga kadtong mga pagpahiangay makatabang kanimo?
Kon wala ka mihimo og plano, ipakigbahin unsa ang imong gustong buhaton ug ngano. Unsa kaha ang epekto sa imong plano nganha kanimo ug sa uban diha sa imong pagpatuman niini?
Tubaga ang usa sa mosunod nga mga pangutana:
Sa unsang paagi nga ang imong pagsalmot sa buhat sa family history ug sa templo magpakita sa imong paglaom sa Pagkabanhaw?
Sa unsang paagi nga ang pagsalmot sa buhat sa family history ug sa templo nakatabang nimo nga mobati nga mas maduol sa Langitnong Amahan ug mahimong mas sama ni Jesukristo?
Kalihokan B: Ipasabot ang doktrina sa Pag-ula sa Manluluwas
3. Kon pilion nimo kini nga opsiyon, tubaga ang duha sa mosunod nga mga pangutana diha sa imong journal sa pagtuon:
Nganong ang Pagkabanhaw sa Manluluwas nahimong mahinungdanong bahin sa Iyang Pag-ula?
