“Susiha ug Hukmi ang Inyong Kaugalingon, aron Pagtino kon Nagkinabuhi ba Kamo diha sa Pagtuo”
Imahe
Usa ka babaye nagbarog nagtan-aw sa iyang repleksiyon diha sa bintana sa bilding. Imong makita ang kadalanan sa siyudad diha sa palibot.
Ang mga lider sa gingharian sa Dios kasagaran maoy gipunting sa pagsaway. Panahon sa Bag-ong Tugon, pipila sa mga miyembro sa Simbahan sa Corinto nahimong kritikal kang Pablo. Siya mitubag pinaagi sa pagdapit kanila sa pagsusi sa ilang kaugalingong koneksiyon kang Kristo. Kini nga leksiyon makatabang kanimo sa pagbuntog sa tintasyon nga manaway sa uban, lakip sa mga lider sa Simbahan, pinaagi sa pagsusi sa imong pagkamatinud-anon ngadto sa Ginoo.
Matinuoron nga mga pangutana o pagpanaway?
Unsa ang pipila sa mga pananglitan kon sa unsang paagi nga ang mga tawo karon lagmit mahimong kritikal sa mga lider sa Simbahan?
Unsa ang kalahian taliwala sa pagkaadunay matinuorong mga pangutana o mga kabalaka mahitungod sa gitudlo o nasulti sa usa ka lider sa Simbahan ug sa pagsaway nianang tawhana?
Sa kinatibuk-an, ang pagpanaway sa usa ka tawo nagpasabot og paghukom kanila nga negatibo, gipunting ang ilang mga sayop o kasaypanan. Sa mga kasulatan, ang pagpanaway mahimong nagpasabot sa pagsulti og daotan o pagbagulbol batok sa usa ka tawo.
Mahimong moila sa mga sayop o mga kahuyang sa uban nga dili magmahinawayon. Kita mahinawayon kon kita magsulti o magsulat mahitungod sa uban sa mahukmanon o sa negatibo nga paagi.
Nganong importante man nga mabuntog ang tintasyon sa pagpanaway sa uban, lakip sa mga lider sa Simbahan?
Sa imong pagtuon sa 2 Mga Taga-Corinto 13, pangita unsaon nato paglikay sa pagkamahinawayon, ilabi na niadtong gitawag sa Ginoo aron mangulo sa Iyang Simbahan.
Basaha ang 2 Mga Taga-Corinto 13:3, nga mangita kon unsay gipangita nga pruweba sa mga miyembro sa Simbahan sa Corinto ngadto kang Pablo. Ang pagpamugos niining mga tawhana nga makakita sa pruweba nga si Pablo tinuod nga nagsulti alang kang Kristo mahimong dugang nga ebidensiya nga ang mga tawo dayag nga nagsaway kaniya. Basaha ang mosunod nga pamahayag ni Presidente Henry B. Eyring sa Unang Kapangulohan, nga mangita kon sa unsang paagi nga ang pagpanaway sa atong mga lider makaapekto kanato.
Imahe
Opisyal nga Litrato ni Presidente Henry B. Eyring nga gikuha niadtong Marso 2018.
Si Presidente George Q. Cannon mihatag og usa ka pasidaan nga akong ipasa kaninyo isip akong kaugalingon. Nagtuo ko nga nagsulti siya sa tinuod: “… Walay tawo … ang makasulti og daotan sa dinihogan sa Ginoo ug mangita og sayop sa awtoridad sa Dios dinhi sa yuta nga dili modapit sa Iyang kasuko. Ang Balaang Espiritu mopalayo sa ingon niana nga tawo, ug siya moadto sa kangitngit. Agig resulta niini, wala ba ninyo makita kon nganong importante nga kita kinahanglan mag-amping?”
Basaha ang 1 Nephi 2:12–13, 16, 19–21. Itandi ang pagbagulbol ni Laman ug Lemuel batok kang Lehi ug sa Ginoo ngadto sa matinud-anong mga buhat ni Nephi.
1. Tubaga ang mosunod nga mga pangutana diha sa imong journal sa pagtuon:
Unsa ang gitudlo niini nga asoy mahitungod sa kalahian tali sa pagkahinawayon itandi sa pagbansay sa hugot nga pagtuo ug mahitungod sa mga sangpotanan sa matag usa?
Ngano sa imong hunahuna ang Espiritu mobiya kon ang mga tawo “nagsulti og daotan” o “nangitag sayop” sa kadtong gitawag sa Ginoo nga mangulo sa Iyang Simbahan?
Unsa ang pipila sa mga paagi nga kita molihok inubanan sa hugot nga pagtuo kon kita anaay mga pangutana mahitungod sa unsa ang gitudlo sa usa ka lider sa Simbahan o wala mouyon sa usa ka butang nga gitudlo sa lider sa Simbahan?
Paglikay sa pagpanaway
Basaha ang 2 Mga Taga-Corinto 13:5–6, nga mangita sa tambag nga gihatag ni Pablo ngadto sa mga Santos nga taga-Corinto kinsa mikwestiyon kon ang Ginoo nagsulti ba pinaagi kaniya. Mahimong makatabang ang pagkahibalo nga ang napakyas mao ang usa ka tawo nga dili takos o wala nakapasar sa pasulit.
Base sa gitudlo ni Pablo, humana ang mosunod nga pamayahag: Kaysa manaway sa mga lider sa Simbahan, kita kinahanglan …
Imbis manaway sa mga lider sa Simbahan, kita kinahanglan magsusi sa atong pagkamatinud-anon ngadto sa Ginoo.
Si Presidente Eyring nagsulti sa mosunod mahitungod sa atong kinaiya ngadto sa kadtong gitawag sa Ginoo aron moalagad. Pangita giunsa sa iyang mga pulong pagpalig-on unsa ang gitudlo ni Pablo sa 2 Mga Taga-Corinto 13:3, 5:
Imahe
Opisyal nga Litrato ni Presidente Henry B. Eyring nga gikuha niadtong Marso 2018.
Gikinahanglan ang hugot nga pagtuo nga nakaila kaayo [si Jesukristo] sa mga tawo nga iyang gitawag, ang ilang mga kapasidad ug potensiyal, ug mao nga dili masayop ang Iyang mga pagtawag.
Kana makapayam-id o makapalingo-lingo sa pipila nga ania dinhi nga naminaw—nagtuo nga basin ang ilang kaugalingong tawag sa pagserbisyo sayop ingon man [niadtong naghunahuna sa uban nga ilang nailhan nga daw dili daw takos sa ilang] dapit sa gingharian sa Ginoo. Ang akong tambag ngadto sa duha ka grupo mao nga idilantar ang mga paghukom hangtod nga makita ninyo og mas maayo unsa ang nakita sa Ginoo. Ang paghukom nga kinahanglan ninyong himoon, mao nga kamo adunay kapasidad sa pagdawat og pagpadayag ug sa paglihok niini nga walay kahadlok.
2. Tubaga ang mosunod nga mga pangutana diha sa imong journal sa pagtuon:
Sa unsang paagi nga ang tambag ni Presidente Eyring makatabang kanato kon kita gitintal nga mohukom o mosaway sa napiling mga lider sa Ginoo?
Sa unsang paagi nga ang pagsusi sa atong pagkamatinud-anon kang Jesukristo makatabang kanato sa dili pagsulti og daotan o paghukom sa uban?
Susiha ang Imong Kaugalingon
Sa dihang kita giinterbiyo alang sa rekomend sa templo, kita gipangutana kon ato bang paluyohan ang mga lider sa Simbahan. Si Presidente Eyring nagsugyot og pipila ka mga pangutana nga mahimong makatabang kanato nga maandam sa pagtubag niini. Tinguhaa ang giya sa Balaang Espiritu samtang ikaw mamalandong niini nga mga pangutana.
Imahe
Opisyal nga Litrato ni Presidente Henry B. Eyring nga gikuha niadtong Marso 2018.
Mahimong gihangyo kamo, o hangyoon pa, kon kamo mopaluyo ba sa inyong bishop, presidente sa stake, sa Kinatibuk-ang mga Awtoridad, ug sa Kinatibuk-ang mga Opisyales sa Simbahan. …
… Mahimo kang maandam pinaagi sa pagpangutana sa inyong kaugalingon og sama sa mosunod:
Naghunahuna ba ako o namulong kabahin sa kahuyang nga naa sa mga tawo nga ako misaad sa pagpaluyo?
Nangita ba ko og ebidensya nga ang Ginoo migiya kanila?
Nagmakugihon ba ko ug nagmaunongon nga misunod sa ilang pagpangulo?
Namulong ba ko kabahin sa ebidensya nga akong makita nga sila mga sulugoon sa Dios?
Nag-ampo ba ko alang kanila sa regular nga paagi pinaagi sa ngalan ug uban sa pagbati og gugma?
Kadto nga mga pangutana, alang sa kadaghanan nato, mosangpot og mga kahasol ug panginahanglan sa paghinulsol.
Kon kining mga pangutana “nagdala kanato sa pipila ka pagkabalaka,” pag-ampo ug pagsulat mahitungod sa unsa ang imong mabuhat aron maghinulsol ug magbag-o.
Opsiyonal: Gustong Makakat-on Pa og Dugang?
Unsa ang peligro sa pagkahinawayon ngadto niadtong gitawag sa Ginoo?
Si Propeta Joseph Smith (1805–44) nagtudlo:
Imahe
Hulagway sa katunga sa barog ni Propeta Joseph Smith, Jr. Ang ulo ni Joseph naglingi og diyutay sa kilid, nanighawak sa tuo nga kamot ug ang iyang wala nga kamot naggunit og mga panid sa papel. Siya gipakita nga nagsul-ob og kapehon og kolor [dark brown] nga amerkana ug puti nga polo ug korbata.
[Kon ang usa ka tawo] mibarog aron manghimaraot sa uban, nangitag sayop diha sa Simbahan, moingon nga sila anaa sa wala masubay sa hustong dalan, samtang siya sa iyang kaugalingon maoy matarong, nan hibaloi pag-ayo, nga kanang tawhana nagpaingon sa dalan sa apostasiya; ug kon siya dili maghinulsol, mobiya sa kamatuoran, ingon nga ang Dios buhi.
(Mga Pagtulon-an sa mga Presidente sa Simbahan: Joseph Smith [2007], 384)
Husto ra ba nga adunay mga pangutana?
Si Presidente Dieter F. Uchtdorf, kanhi sa Unang Kapangulohan, mitudlo:
Imahe
Opisyal nga litrato ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga litrato niadtong 2008 nga gipuli sa litrato nga gikuha niadtong 2004.
Husto ra ba nga adunay mga pangutana mahitungod sa Simbahan o sa doktrina niini? Akong minahal nga batan-ong mga higala, kita usa ka tigpangutana nga mga katawhan … tungod kay nasayod kita nga ang pagpangutana modala ngadto sa kamatuoran …
… Ang uban tingali mobati og kaulaw o nga dili takos tungod kay aduna silay seryuso nga mga pangutana mahitungod sa ebanghelyo, apan dili sila kinahanglan nga mobati sa ingon. Ang pagpangutana dili timailhan sa kahuyang; usa kini ka pasiuna sa paglambo. …
Ayaw kahadlok; pangutana. Magkuryoso, apan ayaw pagduhaduha! Kanunay nga maghupot og maayo sa hugot nga pagtuo ug sa kahayag nga inyo nang nadawat. Tungod kay kita nakakita sa dili hingpit sa mortalidad. Dili tanan mahimong mahinungdanon sa pagkakaron.
(Dieter F. Uchtdorf, “The Reflection in the Water” [Church Educational System debosyonal alang sa mga young adult, Nob. 1, 2009], broadcasts.ChurchofJesusChrist.org)
Ang mga propeta ba dili masayop?
Si Sheri Dew, kanhi Magtatambag sa Kinatibuk-ang Kapangulohan sa Relief Society, miingon:
Imahe
Hulagway ni Sheri L. Dew, 2001.
Pipila sa mga tawo masangit sa pangutana: Apan, ang mga propeta, mga manalagna, ug mga tigpadayag dili ba masayop? Kana mao ang sayop nga pangutana. Ang mas maayo mao ang, Kinsa man gayod ang mga propeta? Sila ang gi-orden nga mga tighupot sa mga yawe sa pagkapari nga nagtugot sa gahom sa Ginoo nga maapod-apod sa tibuok kalibotan. Sila mahimong dili hingpit. Apan sila mao ang labing hingpit nga dinasig nga mga lider sa kalibotan, ug ilang bugtong nga motibo putli gayod kaayo—aron makatabang kanato nga makita ang atong dalan pauli pinaagi sa pagpunting kanato kang Jesukristo.
