កិច្ចការ ១០ ផ្នែកទី ១
« ព្រះមិនរើសមុខអ្នកណាទេ »
ពេលព្រះយេស៊ូវបានបង្ហាញព្រះកាយចំពោះសិស្សរបស់ទ្រង់បន្ទាប់ពីការមានព្រះជន្មរស់ឡើងវិញ ទ្រង់បានបញ្ជាឲ្យពួកគេឲ្យផ្សាយដំណឹងល្អដល់ពិភពលោកទាំងមូល ( សូមមើល ម៉ាថាយ ២៨:១៩–២០ ) ។ ពីមុនដំណឹងល្អត្រូវបានចែកចាយជាចម្បងជាមួយសាសន៍យូដា ហើយពេត្រុស និងសិស្សផ្សេងទៀតបានបន្តផ្តោតកិច្ចការផ្សព្វផ្សាយសាសនារបស់ពួកលោកចំពោះសាសន៍យូដា ។ កូនេលាស ជាសាសន៍ដទៃដែលស្រឡាញ់ព្រះ ហើយស្វែងរកសេចក្តីណែនាំពីទ្រង់ហើយត្រូវបានសារទូតនៅស្ថានសួគ៌ណែនាំឲ្យស្វែងរកសាវកពេត្រុស ។ នៅពេលជាមួយគ្នានោះ ពេត្រុសមានការនិមិត្តមួយ ដែលជួយលោកឲ្យយល់កាន់តែច្បាស់អំពីអារម្មណ៍របស់ព្រះវរបិតាសួគ៌ចំពោះបុត្រាបុត្រីទាំងអស់របស់ទ្រង់ ។ មេរៀននេះអាចជួយអ្នកឲ្យគិតចំពោះអ្នកដទៃឲ្យកាន់តែដូចព្រះវរបិតាសួគ៌ និងព្រះយេស៊ូវទតឃើញអំពីពួកគេដែរ ។
តើអ្នកមើលឃើញអ្វីខ្លះ ?
សូមក្រឡេកមើលពពក ( ទាំងខាងក្រៅ ឬក្នុងរូបភាពនេះ ) ហើយពិពណ៌នាអំពីអ្វីដែលអ្នកមើលឃើញ ។
-
ហេតុអ្វីបានជាមនុស្សពីរនាក់មើលពពកដូចគ្នា ប៉ុន្តែឃើញរូបរាងផ្សេងគ្នា ?
-
ហេតុអ្វីបានជាមនុស្សពីរនាក់មើលទៅមនុស្សម្នាក់ទៀត ប៉ុន្តែការយល់ឃើញពីមនុស្សនោះខុសគ្នា ?
-
តើអ្នកដឹងអ្វីខ្លះអំពីថាតើព្រះវរបិតាសួគ៌ និងព្រះយេស៊ូវគ្រីស្ទទតឃើញយើងម្នាក់ៗយ៉ាងដូចម្ដេច ?
នៅពេលអ្នកសិក្សា សូមចងចាំថា របៀបដែលអ្នកយល់ឃើញពីមនុស្សជួនកាលអាចខុសពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទទតឃើញពីពួកគេ ។ សូមអនុញ្ញាតឲ្យព្រះវិញ្ញាណបរិសុទ្ធដឹកនាំអ្នកនូវអ្វីដែលអ្នកត្រូវធ្វើដើម្បីបំភ្លឺការយល់ឃើញរបស់អ្នកឲ្យបានពេញលេញជាមួយនឹងការទតឃើញរបស់ព្រះវរបិតាសួគ៌ និងព្រះយេស៊ូវគ្រីស្ទ ។
ពេត្រុសបង្រៀនកូនេលាស ជាសាសន៍ដទៃ
រហូតមកដល់ត្រង់ចំណុចនេះ នៅក្នុងសម័យព្រះគម្ពីរសញ្ញាថ្មី ដំណឹងល្អបានប្រកាសដល់ពួកសាសន៍យូដាភាគច្រើន ដោយមានករណីលើកលែងពីរបី ដូចដែលបានណែនាំដោយព្រះអង្គសង្គ្រោះ ( សូមមើល ម៉ាថាយ ១០:៥–៦ ) ។ មានសមាជិកពីរបីនាក់នៃសាសនាចក្ររបស់ព្រះគ្រីស្ទ ដែលជាសាសន៍ដទៃ ( មិនមែនជាសាសន៍យូដា ) ពីកំណើត ប៉ុន្តែពួកគេបានប្រែចិត្តជឿលើសាសនាយូដារួចហើយមុននឹងដើរតាមព្រះគ្រីស្ទ ។ ទោះជាយ៉ាងណាក៏ដោយ ព្រះអង្គសង្គ្រោះបានមានព្រះបន្ទូលប្រាប់ពួកសិស្សរបស់ទ្រង់ថា បន្ទាប់ពីព្រះវិញ្ញាណបរិសុទ្ធបានមកសណ្ឋិតលើពួកលោក នោះពួកលោកនឹងផ្សព្វផ្សាយដំណឹងល្អ « រហូតដល់ចុងផែនដីបំផុត » ( កិច្ចការ ១:៨ ) ។ នៅក្នុង កិច្ចការ ១០ យើងអានអំពីការផ្លាស់ប្តូរដ៏សំខាន់មួយនៅក្នុងរបៀបដែលសាសនាចក្រដំណើរការ ដែលនឹងជួយសម្រួលដល់ការណ៍នេះបាន ។
សូមអាន កិច្ចការ ១០:១–៨ ដើម្បីរៀនអំពីកូនេលាស ។ សូមរកមើលការចង្អុលបង្ហាញអំពីរបៀបដែលព្រះវរបិតាសួគ៌បានទតឃើញពីគាត់ ។
-
តើអ្នកបានរៀនអ្វីខ្លះអំពីកូនេលាសពីខគម្ពីរទាំងនេះ ?
-
តើអ្នកបានរកឃើញអ្វីដែលបង្ហាញពីព្រះទ័យរបស់ព្រះវរបិតាសួគ៌ចំពោះកូនេលាស ?
នៅពេលគ្នីគ្នារបស់កូនេលាសកំពុងធ្វើដំណើរដើម្បីស្វែងរកសាវកពេត្រុស ព្រះអម្ចាស់កំពុងបង្រៀនពេត្រុសអំពីរបៀបដែលទ្រង់ទតឃើញចំពោះមនុស្សទាំងអស់ ។ សូមអាន កិច្ចការ ១០:៩–១៦ ហើយគូររូបភាពនៃអ្វីដែលអ្នកគិតថាការនិមិត្តរបស់ពេត្រុសប្រហែលជាមានរូបរាងដូច ។
-
ហេតុអ្វីពេត្រុសព្រួយបារម្ភអំពីអ្វីដែលលោកត្រូវបានណែនាំឲ្យធ្វើក្នុងការនិមិត្តនោះ ?
ពេត្រុសធំឡើងជាសាសន៍យូដាដោយធ្វើតាមបទបញ្ញត្តិ និងទំនៀមទម្លាប់នៃក្រឹត្យវិន័យរបស់លោកម៉ូសេ ។ ក្រឹត្យវិន័យនេះមានតម្រូវការតឹងរ៉ឹងលើអ្វីដែលមនុស្សអាចបរិភោគ និងមិនអាចបរិភោគ ( សូមមើលលេវីវិន័យ ១១ ) ។ សត្វដែលសាសន៍យូដាត្រូវបានអនុញ្ញាតឲ្យបរិភោគត្រូវបានចាត់ទុកថា « ស្អាត » រីឯសត្វដែលព្រះហាមឃាត់សាសន៍យូដាមិនឲ្យបរិភោគត្រូវបានចាត់ទុកថា « មិនស្អាត » ។
ពេត្រុសមិនបានយល់ពីអត្ថន័យពេញលេញនៃការនិមិត្តឡើយ ។ ពេលលោកសញ្ជឹងគិតពីរឿងនេះ គ្នីគ្នាដែលកូនេលាសបញ្ជូនមកបានមកដល់ ។ ព្រះវិញ្ញាណបានប្រាប់ពេត្រុសឲ្យទៅជាមួយបុរសទាំងនេះទៅកាន់ផ្ទះកូនេលាស ( សូមមើល កិច្ចការ ១០:១៧–២០ ) ។
សូមអាន កិច្ចការ ១០:២៥–២៩, ៣៤–៣៥ ដោយរកមើលអ្វីដែលពេត្រុសបានរៀនអំពីអត្ថន័យនៃការនិមិត្តដែលលោកបានទទួល ។ ឬអ្នកអាចមើលវីដេអូ « Peter’s Revelation to Take the Gospel to the Gentiles » (ដែលមាននៅលើគេហទំព័រ ChurchofJesusChrist.org ) ចាប់ពីនាទីទី ៣:២៩ ដល់នាទីទី ៥:២៩ ។
Peter's Revelation to Take the Gospel to the Gentiles
Peter follows the commandment of the Lord to take the gospel to the Gentiles. Acts 10:1–48; 11:1–18
នៅក្នុង ខទី ៣៤ សូមរកមើលសេចក្តីពិតដែលពេត្រុសបានរៀនអំពីរបៀបដែលព្រះវរបិតាសួគ៌ទតឃើញចំពោះបុត្រាបុត្រីទ្រង់ទាំងអស់ ។ សូមពិចារណាគូសចំណាំសេចក្ដីពិតដែលអ្នកបានរកឃើញ ។
១. សូមសរសេរក្នុងសៀវភៅកំណត់ហេតុការសិក្សារបស់អ្នកថាតើ « ព្រះមិនរើសមុខអ្នកណាទេ » មានន័យដូចម្តេចចំពោះអ្នក ។
-
តើអ្នកគិតថា វិវរណៈរបស់ព្រះវរបិតាសួគ៌បានផ្លាស់ប្តូរចិត្ត និងទស្សនៈរបស់ពេត្រុសយ៉ាងដូចម្ដេច ? តើការយល់ដឹងអំពីវិវរណៈនេះអាចផ្លាស់ប្តូរចិត្តមនុស្សសព្វថ្ងៃនេះដោយរបៀបណា ?
នៅពេលពេត្រុសបានយល់ថា ព្រះចង់ឲ្យដំណឹងល្អបង្រៀនដល់មនុស្សទាំងអស់ នោះលោកបានផ្សព្វផ្សាយសារលិខិតរបស់ព្រះយេស៊ូវគ្រីស្ទដល់កូនេលាស ក្រុមគ្រួសារ និងមិត្តភក្តិរបស់លោក ( សូមមើល កិច្ចការ ១០:៣៦–៤៣ ) ។
អ្នកប្រហែលជាចង់មើលវីដេអូ « Peter’s Revelation to Take the Gospel to the Gentiles ដែលមាននៅគេហទំព័រChurchofJesusChrist.org ចាប់ពីនាទីទី ៥:៣០ ដល់នាទីទី ៧:៤៤ ។
Peter's Revelation to Take the Gospel to the Gentiles
Peter follows the commandment of the Lord to take the gospel to the Gentiles. Acts 10:1–48; 11:1–18
២. សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកគិតថាព្រះជន្ម និងបេសកកម្មរបស់ព្រះយេស៊ូវគ្រីស្ទបង្ហាញពីសេចក្តីស្រឡាញ់របស់ព្រះចំពោះមនុស្សទាំងអស់ដោយរបៀបណា ?
-
តើការចងចាំពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទឲ្យតម្លៃមនុស្សទាំងអស់មានឥទ្ធិពលលើរបៀបដែលអ្នកយល់ឃើញ និងប្រព្រឹត្តចំពោះអ្នកដទៃដោយរបៀបណា ?
-
តើអ្នកអាចធ្វើអ្វីខ្លះដើម្បីស្វែងរកជំនួយពីព្រះវរបិតាសួគ៌ ដើម្បីមើលឃើញអ្នកដទៃដូចទ្រង់ទតឃើញ ?
នៅពេលពេត្រុសថ្លែងទីបន្ទាល់អំពីព្រះយេស៊ូវគ្រីស្ទ ព្រះវិញ្ញាណបរិសុទ្ធបានយាងមកសណ្ឋិតលើកូនេលាស និងគ្រួសាររបស់គាត់ ។ បន្ទាប់មក ពេត្រុសបានអញ្ជើញពួកគេឲ្យធ្វើបុណ្យជ្រមុជទឹក ( សូមមើល កិច្ចការ ១០:៤៤–៤៨ ) ។ វិវរណៈរបស់ព្រះចំពោះពេត្រុសបានផ្លាស់ប្ដូរការអនុវត្តរបស់សាសនាចក្រ ហើយដំណឹងល្អបានចាប់ផ្ដើមផ្សព្វផ្សាយដល់មនុស្សទាំងអស់ ។
២. សូមបំពេញឃ្លាខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
សូមគិតអំពីរបៀបដែលពិភពលោក ឬប្រទេសរបស់អ្នក អ្នកជិតខាង សាលារៀន ឬគ្រួសារនឹងមានភាពខុសគ្នា ប្រសិនបើបុត្រាបុត្រីទាំងអស់របស់ព្រះវរបិតាសួគ៌គិតពីគ្នាទៅវិញទៅមកតាមរបៀបដែលទ្រង់ទតឃើញយើងនោះ ។
សូមជ្រើសយកមួយក្នុងចំណោមបរិយាកាសទាំងនេះ ។ សូមពន្យល់ពីភាពខុសគ្នាដែលអ្នកអាចនឹងយល់ឃើញ ប្រសិនបើមនុស្សនៅក្នុងបរិយាកាសនេះបានយល់ឃើញពីអ្នកដទៃតាមរបៀបដែលព្រះវរបិតាសួគ៌ និងព្រះយេស៊ូវគ្រីស្ទទតឃើញពួកគេនោះ ។
ជម្រើស ៖ តើចង់រៀនសូត្របន្ថែមទៀតដែរឬទេ ?
តើនរណាខ្លះដែលព្រះយេស៊ូវគ្រីស្ទនឹងទទួលចូលក្នុងសាសនាចក្រ និងនគររបស់ទ្រង់ ?
ប្រធាន រ័សុល អិម ណិលសុន បានពន្យល់ថា ៖
ទុកឲ្យព្រះឈ្នះ
ប្រធាន ណិលសុន ពិពណ៌នាអំពីសេចក្តីសញ្ញាថ្ងៃចុងក្រោយអ៊ីស្រាអែលជាជនទាំងឡាយណាដែលទុកឲ្យព្រះឈ្នះលើជីវិតរបស់ពួកគេ ។ លោកបានអញ្ជើញយើងឲ្យទុកព្រះជាឥទ្ធិពលដ៏សំខាន់បំផុតនៅក្នុងជីវិតរបស់យើង ។
យើងម្នាក់ៗមានសក្តានុពលដ៏ទេវភាព ពីព្រោះយើងម្នាក់ៗគឺជាបុត្ររបស់ព្រះ ។ យើងម្នាក់ៗមានសិទ្ធិស្មើគ្នានៅក្នុងព្រះនេត្រទ្រង់ ។ ការបញ្ចូលសេចក្តីពិតនេះគឺមានអត្ថន័យជ្រាលជ្រៅណាស់ ។ បងប្អូនប្រុសស្រី សូមស្តាប់ដោយយកចិត្តទុកដាក់នូវអ្វីដែលខ្ញុំនឹងថ្លែងនៅពេលបន្តិចទៀតនេះ ។ ព្រះពុំបានសព្វព្រះទ័យពូជសាសន៍មួយ ជាងពូជសាសន៍មួយទៀតនោះទេ ។ គោលលទ្ធិរបស់ទ្រង់អំពីបញ្ហានេះគឺច្បាស់លាស់ណាស់ ។ ទ្រង់អញ្ជើញមនុស្ស ទាំងអស់ ឲ្យមករកទ្រង់ « ទាំងខ្មៅ និងស ទាំងបាវគេ និងសេរី ទាំងប្រុស និងស្រី » [ នីហ្វៃទី២ ២៦:៣៣ ] ។
ខ្ញុំសូមបញ្ជាក់ដល់អ្នកថា ជំហររបស់អ្នកចំពោះព្រះភក្រ្តព្រះគឺមិនត្រូវបានកំណត់ដោយពណ៌សម្បុររបស់អ្នកនោះឡើយ ។ ការសព្វព្រះទ័យ ឬមិនសព្វព្រះទ័យជាមួយព្រះគឺអាស្រ័យទៅលើការលះបង់របស់អ្នកចំពោះព្រះ និងបទបញ្ញត្តិរបស់ទ្រង់ ហើយមិនមែនដោយពណ៌សម្បុររបស់អ្នកនោះឡើយ ។
( រ័សុល អិម ណិលសុន « Let God Prevail » Liahona ខែ វិច្ឆិកា ឆ្នាំ ២០២០ ទំព័រ ៩៤ )
កិច្ចការ ១០:៤៥ ។ តើ « អំណោយទាននៃព្រះវិញ្ញាណបរិសុទ្ធ » មានអត្ថន័យដូចម្តេច ?
នៅក្នុង កិច្ចការ ១០:៤៥ ឃ្លា « អំណោយទាននៃព្រះវិញ្ញាណបរិសុទ្ធ » សំដៅទៅលើព្រះចេស្ដានៃព្រះវិញ្ញាណបរិសុទ្ធ ដែលបានកើតមានដល់ពួកសាសន៍ដទៃទាំងនេះ ។ វាខុសគ្នាពីអំណោយទាន នៃព្រះវិញ្ញាណបរិសុទ្ធ ដែលយើងទទួលតាមរយៈពិធីបរិសុទ្ធនៃពិធីបញ្ជាក់បន្ទាប់ពីពិធីបុណ្យជ្រមុជទឹក [ សូមមើល កិច្ចការ ៨:១៤–១៧ សូមមើលផងដែរនូវ Teachings of Presidents of the Church:Joseph Smith ឆ្នាំ [ ២០០៧ ] ទំព័រ ៩៧ ) ។
តើការនិមិត្តរបស់ពេត្រុសបានផ្លាស់ប្តូរការអនុវត្តរបស់សាសនាចក្រដោយរបៀបណា ?
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានពន្យល់ថា ៖
តាមរយៈបទពិសោធន៍ និងវិវរណៈនេះទៅកាន់ ពេត្រុស ព្រះអម្ចាស់បានកែការអនុវត្តរបស់សាសនាចក្រ ហើយបានបើកសម្ដែងឲ្យមានការយល់ ដឹងកាន់តែពេញលេញអំពីគោលលទ្ធិដល់ពួកសិស្សរបស់ទ្រង់ ។ ហើយដូច្នេះ ការផ្សាយដំណឹងល្អបានលាតសន្ធឹង ទៅដល់មនុស្ស ទាំងអស់ ។
( ឌី ថត គ្រីស្តូហ្វឺសិន « The Doctrine of Christ » Liahona ខែ ឧសភា ឆ្នាំ ២០១២ ទំព័រ ៨៨ )
តើការនិមិត្តរបស់ពេត្រុសមានភាពស្រដៀងគ្នាអ្វីខ្លះទៅនឹងវិវរណៈក្នុងការផ្តល់បព្វជិតភាពដល់សមាជិកសាសនាចក្រជាបុរស ដែលមានភាពស័ក្ដិសមទាំងអស់ ?
ធនធានខាងក្រោមនេះអាចមានសារៈប្រយោជន៍ ប្រសិនបើអ្នកចង់យល់បន្ថែមអំពីវិវរណៈឆ្នាំ ១៩៧៨ ដែលព្រះវរបិតាសួគ៌បានប្រទានការតែងតាំងបព្វជិតភាពដល់សមាជិកសាសនាចក្រជាបុរសដែលមានភាពស័ក្តិសមទាំងអស់ ៖
-
ដាល្លិន អេក អូក « សុន្ទរកថាបើក [ សុន្ទរកថាធ្វើឡើងនៅឯ « Be One—a Celebration of the Revelation on the Priesthood » ថ្ងៃទី ១ ខែ មិថុនា ឆ្នាំ ២០១៨ ] broadcasts.ChurchofJesusChrist.org ។
-
អេលីសាបិត ម៉ាគី « ‹ I Will Take It in Faith › ៖ ចច រិកហ្វដ និងការរឹតបព្វជិតភាព » ថ្ងៃទី ២០ ខែ មេសាឆ្នាំ ២០១៨ history.ChurchofJesusChrist.org