Galuega 3

O Le Faamalologa o le Tagata Pipili

Ua aapa atu le aao o Peteru i se tagata pipili ma poloaiina o ia e tulai ma savali.

O se alii sa le mafai ona savali i lona olaga atoa sa aveina atu i le malumalu i Ierusalema i aso taitasi ina ia mafai ona ia augani atu mo se tupe. Sa fetaui o ia ia Peteru ma Ioane, o e na tuuina atu ia te ia se meaalofa e sili atu nai lo le tupe sa ia talosagaina. O le faaaogaina o le pule o le perisitua ma i le suafa o Iesu Keriso, na faamalolo ai e Peteru le tagata. O lena aafiaga na tuuina atu ai ia Peteru ma isi Aposetolo le tele o avanoa e molimau atu ai ia Iesu Keriso. O lenei lesona ua faamoemoe e fesoasoani ai ia te oe e faamalosia ai lou faatuatua e faapea e mafai e le Tama Faalelagi ma Iesu Keriso ona fesoasoani ia te oe e faatoilalo luitau o loo feagai ma oe.

Mauaina o le mana faamalolo o le Atua

O a nisi o luitau faaletino, faaleagaga, pe faalelagona po o mafatiaga e oo i ai tagata i le olaga?

Manatunatu i se luitau po o se mafatiaga o loo feagai patino ma oe lea e te manao e saili le toomaga po o le malosi o le Tama Faalelagi ma Iesu Keriso e faatoilalo ai. Tusi i lalo i lau api talaaga mo suesuega, ma ia faaaofia ai foi au tali i fesili nei:

O a ni faatinoga ua e faia e maua ai le fesoasoani mo lenei luitau po o le mafatiaga?
O le a se mea ua uma ona e iloa e uiga i le Tama Faalelagi ma Iesu Keriso lea e tuuina atu ai ia te oe le mautinoa e faapea o le a La fesoasoani ia te oe?
O a ni fesili po o ni popolega o ia te oe e uiga i le faatoilaloina o lenei luitau po o le mafatiaga?

Ua faamalolo e Peteru ma Ioane se tagata pipili

I lenei lesona, o le a e maua ai le avanoa e aoao ai nisi o upumoni o le talalelei mai le tala o i le Galuega 3 o le faamaloloina e Peteru ma Ioane o se tagata pipili. A o e suesue, ia gauai atu i uunaiga faaleagaga e te mauaina. Saili e faamalosia lou faatuatua e faapea e mafai e Iesu Keriso ona fesoasoani ia te oe i luitau o loo feagai ma oe i le olaga nei.

Faitau le Galuega 3:1–3, ma vaavaai mo nisi o auiliiliga e uiga i lenei tagata, o le sa silia ma le 40 tausaga le matua (tagai Galuega 4:22). Atonu e fesoasoani le iloa o “mea alofa” o loo ta’ua i fuaiupu 2–3 o aitema na foai atu e tagata i e matitiva.

O a ni upu atonu e te faaaogaina e faamatala ai lenei tagata ma lona tulaga? Aisea?
O a ni ala masani atonu e tali atu ai tagata i se tasi o i ai i le tulaga o lea tagata?

Faitau le Galuega 3:4–8, ma vaavaai mo upumoni e mafai ona e aoaoina e uiga i le faatoilaloina o o tatou luitau po o mafatiaga mai lenei tala. E mafai foi ona e matamata i le “Peter and John Heal a Man Crippled since Birth” (3:21), o loo i le ChurchofJesusChrist.org.

Peter and John Heal a Man Crippled Since Birth
With authority from Jesus Christ, Peter and John heal a man crippled since birth. Acts 3:1–8

O le a se mea o tumatila mai ia te oe i lenei tala?
O le a se mea ua fesoasoani lenei aafiaga ia te oe e aoao ai pe lagona ai e uiga i le Tama Faalelagi ma Iesu Keriso?

Sa aoao atu e Peteru i latou o e sa molimauina le vavega e faapea, sa faia e ala i le faatuatua i le suafa o Iesu Keriso (tagai Galuega 3:16). O se upumoni e tasi e mafai ona tatou aoao mai i lenei tala e faapea, e ala i le faatuatua ia Iesu Keriso, e mafai ai ona faamaloloina i tatou.

O le a se mea e mafai ona e faasoaina mai nei fuaiupu e mafai ona fesoasoani i se tasi o loo feagai i le taimi nei ma se tasi o luitau po o mafatiaga faaletino, faaleagaga, pe faalelagona ina na e faailoaina i le amataga o le lesona?
O le a se mea e mafai ona tatou faia e maua ai le mana o le Tama Faalelagi ma le Faaola e fesoasoani ai ia i tatou i nei luitau?

Matamata le “The Wounded Shall be Healed” (5:45), o loo maua i le ChurchofJesusChrist.org. Faalogologo i le molimau a Elder NeilL. Andersen o le Korama a Aposetolo e Toasefululua, ma tusifaamaumau soo se upu po o fasifuaitau e tumatila ia te oe po o uunaiga e oo mai ia te oe a o e matamata i le vitio.

The Wounded Shall Be Healed
Our wounds in this life can come from any number of trials. Patiently move forward, and the Savior’s healing power will bring light, peace, and hope.

Na molimau mai Elder Neil L. Andersen o le Korama a Aposetolo e Toasefululua e uiga i le mana o le Faaola e faamalolo ai i tatou:

O’u uso ma tuafafine, o la’u folafolaga ia te outou o le faateleina o lo outou faatuatua i le Alii o Iesu Keriso o le a aumaia ai ia te oe le malosi faaopoopoina ma le faamoemoe sili atu. Mo outou, o ē amiotonu, o le Fomai o ō tatou agaga, i Lana lava taimi ma i Lana lava ala, o le a faamalolo i o outou manu’a uma. E leai se amioletonu, leai se sauaga, leai se tofotofoga, leai se faanoanoa, leai se lototiga, leai se mafatiaga, leai se manu’a—po o le a le loloto, po le a le lautele, po o le a le tiga—o le a taofia mai le faamafanafanaga, filemu, ma le faamoemoe tumau ia te Ia e ona aao mafola ma aao sa manu’a o le a faafeiloaia mai i tatou i Lona afioaga.

(Neil L. Andersen, “Manu‘a,” Liahona, Nov. 2018, 86)

O le a se mea sa tumatila ia te oe mai aoaoga a Elder Andersen?

O a ni aafiaga na oo ia te oe pe o e iloa e uiga i se mea na mafai e le Faaola ona tuuina mai le malosi po o le faamalologa?

Tusitusi i luga o se fasipepa i se peni po o se penitala.

Tuu i le faitalia: O e Manao e Aoao Atili?

Aisea e i ai taimi tatou te le maua ai le faamalologa a le Faaola i le taimi ma le ala tatou te mananao ai?

Na aoao mai Peresitene Russell M. Nelson:

Ua ou iloaina, e i ai nisi taimi, e foliga mai ai e le tali maia nisi o a tatou tatalo faatauanau. Tatou te mafaufau, “Aisea?” Ou te iloaina lena lagona! Ua ou iloaina ia popolega ma loimata o taimi faapena. Ae, ua ou iloaina foi o a tatou tatalo e leai se taimi ua le amanaiaina ai. E le faapea ua le talisapaiaina lo tatou faatuatua. Ua ou iloaina e sili atu le lautele o le silafaga a se Tama Faalelagi atamai nai lo tatou. E ui ua tatou iloa o tatou faafitauli ma tiga faaletino, ae ua Ia silafia lo tatou alualu i luma e le iu ma lo tatou malosiaga. Afai tatou te tatalo ia iloa Lona finagalo ma gauai atu o tatou tagata i ai, i le onosai ma le lototele, e mafai e le faamalologa faalelagi ona oo mai i Lana lava ala ma le taimi.

(Russell M. Nelson, “Iesu Keriso—o le Fomai o Fomai,” Liahona, Nov. 2005, 86)

Na a’oa’o mai Elder David A. Bednar o le Korama o Aposetolo e Toasefululua:

O le amiotonu ma le faatuatua ua mautinoa lava le aoga e fuliese ai mauga po o mea faalavefau—pe afai o le fulieseina o mauga e ausia ai faamoemoega o le Atua ma ua tusa ai ma Lona finagalo. O le mea lea, e oo foi i le faatuatua malosi, e tele mauga o le a le aveesea ai. Ma e le o ma’i uma ma lē atoatoa o le a faamaloloina. Afai e faatapulaaina mea faafeagai uma, afai e aveesea uma ia faafitauli, o lona uiga o le a le faataunuuina faamoemoega autu o fuafuaga a le Tama.

(David A. Bednar, “Taliaina o le Finagalo ma le Taimi a le Alii,” Liahona, Aok. 2016, 34)

E mafai faapefea ona ou maua le mana faamalolo o le Faaola pe a ou oo i mafatiaga faaleagaga?

Na aoao mai Peresitene Russell M. Nelson:

E mafai ona oo mai tiga mai mafuaaga faaleagaga pe faaletino foi. Na manatua e Alema le Itiiti o lana agasala ua matuai tiga lava, ma o lea na ia moomoo ai ina ia “fano [lona] agaga atoa ma le tino, ina ia le amia o [ia] e tu i luma o le … Atua ina ia faamasinoina o [ia] i [ana] galuega” [Alema 36:15]. I taimi faapea, e mafai faapefea ona Ia faamaloloina i tatou?

E mafai ona tatou salamo atoatoa! E mafai ona tatou matuai liua atoatoa! Ona mafai lea e le “Atalii o le Amiotonu” ona matuai faamanuiaina atoatoa i tatou e ala i Lona aao faamalolo.

… Faatuatua, salamo, papatisoga, ma se molimau, ma le tumau o le liuaina e tau atu ai i le mana faamalolo o le Alii.

(Russell M. Nelson, “Iesu Keriso—o le Fomai o Fomai,” Liahona, Nov. 2005, 86)