Atamai i Aoaoga Faavae Iloiloga 12

Su’e ma Faailoga: 1 Korinito 6:19–20 i le Faaaliga 20:12

O se tasi o faamoemoega o le atamai i aoaoga faavae o le fesoasoani lea ia te oe e su’e ma faailoga mau faasino ma fasifuaitau autu o mau o le atamai i aoaoga faavae. O lenei lesona o le a tuuina atu ai ia te oe avanoa e su’e ma faailoga ai fuaitau e 13 o mau o le atamai i aoaoga faavae o loo maua i le afa lona lua o le Feagaiga Fou.

O mau faasino ma fasifuaitau autu o mau

Mafaufau faapea ua vaai atu lau uo o e suesue ma faailoga au tusitusiga paia. Ina ua uma ona vaai i se itulau o i ai le tele o faailoga, ua ia fesili atu ia te oe pe aisea ua e faia ai ni faailoga i au tusitusiga paia.

• E faapefea ona e tali atu i lau uo?

O le faailogaina po o le vaseina o mau o se auala aoga lea e iloa ai fuaitau patino o mau mai isi, ma e mafai ai ona faigofie ona e mauaina na fuaitau o mau i le lumanai. I lenei lesona, o le a e maua ai se avanoa e su’e ma faailoga ai fuaitau e 13 o le atamai i aoaoga faavae o loo maua i le afa lona lua o le Feagaiga Fou. Ina ia fesoasoani ia te oe e faia lenei mea, mafaufau e kopi le siata lenei i lau api talaaga mo suesuega.

Atamai i Aoaoga Faavae mo le Feagaiga Fou: 1 Korinito–Faaaliga

1 Korinito 6:19–20	“O lo outou tino o le malumalu lea o le Agaga Paia.”
1 Korinito 11:11	“E leai se tane pe a le o i ai le fafine, e leai foi se fafine pe a le o i ai le tane, i le Alii”
1 Korinito 15:20-22	“Aua faapei ona oti uma ia Atamu, e faapea foi ona faaolaina uma ia Keriso.”
1 Korinito 15:40-42	I le Toetutu, e i ai tikeri e tolu o le mamalu.
Efeso 1:10	“Ina ia na faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi.”
Efeso 2:19–20	O le Ekalesia o loo ua “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.”
2 Tesalonia 2:1–3	“O le aso o Keriso … e le oo mai lena aso, seia muai ona taunuu o le tete’a ese.”
2 Timoteo 3:15–17	“O Tusi Paia … e mafaia ona faapoto ai ia te oe e iu ai i le ola i le faatuatua.”
Eperu 12:9	O lo tatou Tama Faalelagi o “le Tamā o tatou agaga.”
Iakopo 1:5–6	“A e afai ua leai se poto i so outou, ina ole atu ia i le Atua.”
Iakopo 2:17–18	“E faapea foi le faatuatua, pe afai e le i ai galuega, e mate lava ia ina ua na o ia.”
1 Peteru 4:6	“[Na] folafola atu ai le talalelei i e ua oti.”
Faaaliga 20:12	“Ona faamasinoina ai lea o e na oti … e tusa ma a latou amio.”

Toeiloilo fuaitau nei e 13 o mau o le atamai i aoaoga faavae ma fasifuaitau autu o mau, ma mafaufau e faailoga i latou i totonu o au tusitusiga paia.

1. Filifili ni fuaitau se tolu o nei mau o le atamai i aoaoga faavae ia e te lagona o le a fesoasoani e te latalata atili atu ai i le Tama Faalelagi ma Iesu Keriso. Faitau fuaitau, ma faamalamalama atu mea nei:

• O mea o loo aoao mai e le fuaitau e uiga i le Tama Faalelagi po o Iesu Keriso.

• O upumoni mai le fuaitau e te lagona o le a taua lou iloaina ma pe aisea.

I nai aso e sosoo ai, amata ona tauloto nisi o mau faasino ma fasifuaitau autu o mau mai le siata. Mafaufau pe mafai faapefea e le iloa o nei fuaiupu ona faamanuia ai lou olaga ma olaga o ē e te iloaina.