Zotërimi Doktrinor: 1 Korintasve 3:20–22

“Të Gjithë do të Ngjallen në Krishtin”

Në një mësim të mëparshëm, ti mësove që për shkak të Ringjalljes së Shpëtimtarit, të gjithë fëmijët e Atit Qiellor do të ringjallen (shih te 1 Korintasve 15:20–22). Ky mësim mund të të ndihmojë të mësosh përmendsh referencën e zotërimit doktrinor dhe frazën kyç të shkrimit të shenjtë për vargjet te 1 Korintasve 15:20–22, të shpjegosh doktrinën e Ringjalljes dhe t’i zbatosh parimet e marrjes së njohurisë shpirtërore në një situatë nga jeta reale.

Mëso përmendsh dhe shpjego

Presidenti Gordon B. Hinkli (1910–2008) dha mësim se “nga të gjitha ngjarjet e historisë njerëzore, asnjë nuk është aq e rëndësishme sa ringjallja e Birit të Perëndisë” (“The Empty Tomb Bore Testimony”, Ensign, maj 1988, f. 65).

1. Plotësoje sa vijon në ditarin tënd të studimit:

Përdor të vërtetat nga 1 Korintasve 15:20–22, të tillë si: për shkak të Ringjalljes së Jezu Krishtit, të gjithë do të ringjallen, për të shpjeguar se përse Ringjallja e Shpëtimtarit është ngjarja më e rëndësishme në historinë e njerëzimit. Përfshi arsyen se përse është e rëndësishme për ty personalisht.

Gjej një çast për të mësuar përmendsh referencën e shkrimit të shenjtë dhe frazën kyç të shkrimit të shenjtë për vargjet te 1 Korintasve 15:20–22. Hapat vijues japin një mënyrë për ta bërë këtë.

1. Në krye të një cope letre, shkruaj referencën e shkrimit të shenjtë dhe frazën kyç të shkrimit të shenjtë.

   1 Korintasve 15:20–22: “Ashtu sikur të gjithë vdesin në Adamin, kështu të gjithë do të ngjall[e]n në Krishtin”.

2. Palose pjesën e sipërme të fletës në mënyrë që të mos e shohësh dot atë që shkrove. Më pas shkruaj sa më shumë që arrin të mbash mend nga referenca e shkrimit të shenjtë dhe fraza kyç e shkrimit të shenjtë.

3. Hape pjesën e sipërme për të kontrolluar saktësinë tënde dhe për të korrigjuar ndonjë gabim.

4. Përsërite këtë proces derisa të jesh në gjendje ta shkruash referencën e shkrimit të shenjtë dhe frazën kyç të shkrimit të shenjtë në mënyrë të përsosur përmendsh.

Ushtroje vënien në zbatim

Për shkak të Rënies së Adamit dhe Evës, secili nga fëmijët e Atit Qiellor që e përjeton vdekshmërinë në tokë do të vdesë (shih te 1 Korintasve 15:21–22). Kur përjetojmë vdekjen e dikujt që është i afërt me ne, është e kuptueshme që ndiejmë pikëllim. Ndonëse këto përvoja janë të ndryshme për të gjithë, kuptueshmëria dhe zbatimi i të vërtetave të ungjillit të Jezu Krishtit mund të ndihmojnë në atë pikëllim.

Plaku S. Mark Palmer, i Të Shtatëdhjetëve, përshkroi përvojën e prindërve të tij në vdekjen e vajzës së tyre përpara se të mësonin për ungjillin e Jezu Krishtit.

Shiko “Pikëllimi Ynë Do të Kthehet në Gëzim”, në dispozicion te ChurchofJesusChrist.org, nga kodi kohor 3:27 deri në 4:26, ose lexo pohimin e mëposhtëm.

Pikëllimi Ynë Do të Kthehet në Gëzim

Plaku Palmer dëshmon për Ringjalljen dhe tregon se si u bashkuan me Kishën prindërit e tij.

“Im atë dhe nëna ime ishin fermerë delesh në Zelandën e Re. Atyre u pëlqente jeta që bënin. Kur ishin çift në moshë të re, u bekuan me tre vajza të vogla. Më e vogla nga këto quhej En. Një ditë kur ishin së bashku me pushime në një liqen, Eni, e cila ishte 17‑muajshe, u zvarrit këmbadoras. Pas minutash kërkimi me dëshpërim, atë e gjetën të pajetë në ujë.

Ky makth shkaktoi pikëllim të papërshkrueshëm. Babi shkroi vite më vonë se një pjesë e të qeshurave ishte zhdukur nga jeta e tyre përgjithmonë. Kjo solli edhe një dëshirë të zjarrtë për përgjigje mbi pyetjet më të rëndësishme të jetës: ‘Çfarë do të ndodhë me Enin tonë të çmuar? Vallë, a do ta shohim atë përsëri? Si mund të jetë sërish e lumtur familja jonë?’”

(S. Mark Palmer, “Pikëllimi Ynë Do të Kthehet në Gëzim”, Liahona, maj 2021, f. 88–89)

• Kur ke përjetuar ti ose dikush që ti njeh, ndjenja të ngjashme me ato të prindërve të Plakut Palmer pas humbjes së një njeriu të dashur?

• Si mund t’i bëjë këto situata edhe më sfiduese mosnjohja e planit të Atit Qiellor për shpëtimin?

Parimet e marrjes së njohurisë shpirtërore mund të na ndihmojnë t’i durojmë me besnikëri situatat e vështira si ajo që përjetoi familja e Palmerit. Përfytyro sikur je shok ose shoqe me një nga motrat më të mëdha të Enit, të cilën tani, pas humbjes së Enit, e mundojnë pyetje dhe sfida. Ti ndihesh i/e nxitur t’i shkruash asaj një letër inkurajimi dhe përkrahjeje. Si alternativë, shkruaj një letër dhe jepja atë dikujt që ti e njeh, i cili do të përfitonte prej saj.

Që të përgatitesh për ta shkruar këtë letër, lexo paragrafët 5–8, 11 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor (2022). Kërko dhe shenjo fjalë, fraza, shkrime të shenjta ose të vërteta që ti e ndien se do të ishin të dobishme për personin të cilit po i shkruan.

• Në ç’mënyrë mund ta ndryshosh atë që i shkruan personit, nëse këtë person do ta shohësh me syrin që e sheh Ati Qiellor?

2. Plotësoje sa vijon në ditarin tënd të studimit:

Shkruaji një letër motrës së Enit ose dikujt tjetër të zgjedhur nga ti. Përfshi ide nga tri parimet e marrjes së njohurisë shpirtërore.

Merri parasysh disa nga idetë vijuese ndërsa shkruan.

Vepro me besim

• Si mund të duket të vepruarit me besim te Jezu Krishti në situatën e tyre?

• Si mund të na ndihmojë të vepruarit me besim te Krishti që ta përballojmë humbjen?

• Cila është një përvojë që ti ose dikush që ti e njeh, ka pasur, ku të vepruarit me besim te Jezu Krishti e ndihmoi të përballonte një sfidë të ngjashme?

Shqyrtoji konceptet dhe pyetjet me një këndvështrim të përjetshëm

• Cilat të vërteta për Atin Qiellor dhe planin e Tij mund të jenë ngushëlluese në situatën e personit të cilit po i shkruan? Përse?

• Si mundet të pasurit e një këndvështrimi të përjetshëm ta ndihmojë atë të dijë se si të përgjigjet në situatën e tij ose të saj?

Kërko kuptueshmëri të mëtejshme nëpërmjet burimeve të caktuara në mënyrë hyjnore

• Cilat fraza nga 1 Korintasve 15:20–22 do të ishin të dobishme për të? Përse?

• Çfarë burimesh të tjera të caktuara në mënyrë hyjnore do ta ndihmonin atë të zhvillonte besimin te Jezu Krishti?

Merre parasysh ta përmbyllësh letrën duke dhënë dëshminë tënde.