Doktrinal nga Kahanas: Juan 3:16

Ang Pag-ula ni Jesukristo

Sa miaging leksiyon, nakakat-on ka mahitungod sa lawom nga gugma nga gipakita sa Langitnong Amahan kanato sa pagpadala sa Iyang Anak aron mahimong atong Manluluwas ug Manunubos. Kini nga leksiyon maghatag kanimo og oportunidad aron dugangan ang imong kahanas niini nga doktrina pinaagi sa pagmemorya sa pakisayran ug mahinungdanon nga hugpong sa mga pulong sa kasulatan, pagpasabot sa doktrina, ug paggamit sa mga baroganan sa pag-angkon og espirituhanong kahibalo diha sa sitwasyon sa tinuod nga kinabuhi.

Isag-ulo ug ipasabot

Ang mosunod usa ka gisagol-sagol nga bersiyon sa pakisayran sa kasulatan ug mahinungdanon nga hugpong sa mga pulong sa kasulatan alang sa Juan 3:16. Ihan-ay ang mga pulong pinaagi sa pagsulat sa eksakto nga pakisayran sa kasulatan ug mahinungdanon nga hugpong sa mga pulong sa kasulatan diha sa imong journal sa pagtuon.

Dios Anak gihatag gihigugma ang bugtong 16 Tungod niini niya iyang kalibotan pag-ayo 3

Kon mahuman nimo og han-ay ang hugpong sa mga pulong, paggahin og panahon sa pagmemorya sa pakisayran sa kasulatan ug mahinungdanon nga hugpong sa mga pulong sa kasulatan.

Hunahunaa kadali nga ikaw usa ka full-time nga misyonaryo. Gidapit ka ngadto sa usa ka balay sa mahigalaon nga magtiayon nga wala pa gayod makadungog mahitungod sa Pag-ula ni Jesukristo. Gikan sa imong nakat-onan sa miaging leksiyon mahitungod sa gugma sa Dios sa pagpadala sa Iyang Anak, unsa ang imong ipaambit niini nga magtiayon?

Idrama-drama ang mosunod nga sitwasyon kauban ang usa ka hamtong, o tubagon ang sitwasyon diha sa imong journal sa pagtuon.

Pagbansay sa paggamit

Paggahin og panahon sa pagrebyo sa mga baroganan sa pag-angkon og espirituhanong kahibalo sa mosunod nga kalihokan.

Sulati ang mga blangko alang sa kada usa sa mosunod nga mga hugpong sa mga pulong.

• Molihok inubanan sa hugot nga p____.

• Susihon ang mga konsepto ug mga p________ inubanan sa m______ p__________.

• Magtinguha og dugang nga panabot pinaagi sa b_______ g________________ nga mga tinubdan.

Ikonsiderar ang mosunod nga sitwasyon.

Pagkahuman sa ikaduhang higayon nga sunod-sunod nga nadugay og uli sa panimalay, naglisod si Sarai sa pagpakig-istorya sa iyang mga ginikanan. Nakahibalo siya nga lisod nang mosalig kaniya ang iyang mga ginikanan. Nakahibalo usab siya nga nagbuhat siya og mga pagpili nga, kon makahibalo niini ang iyang mga ginikanan, mas mominos pa gayod ang pagsalig sa iyang mga ginikanan kaniya. Mibati nga sad-an si Sarai, pero morag mas sayon karon nga bale-walaon kini nga mga problema. Dugang pa, mas naglisod siya sa pagbuhat ug pagbati sa espirituhanong mga butang, nga hinungdan nga naghunahuna siya nga dili tinuod ang Langitnong Amanahan o mitalikod Siya kaniya tungod sa iyang mga pagpili. Niini nga punto, wala nakahibalo si Sarai kon unsa ang buhaton o asa siya moduol.”

• Unsa ang hinungdan nga nahimong lisod kini nga sitwasyon para kang Sarai?

• Kon anaa ka sa posisyon ni Sarai, unsa ang pipila sa imong dagkong mga pangutana o mga kabalaka?

Ikonsiderar kon sa unsang paagi ang mga baroganan sa pag-angkon og espirituhanon nga kahibalo makatabang ni Sarai sa pagtubag sa iyang sitwasyon. Kon gikinahanglan, paggahin og higayon sa pagrebyo sa mga parapo 5–12 diha sa “Pag-angkon og Espirituhanon nga Kahibalo” nga seksiyon sa Mahinungdanon nga Dokumento sa Dokrinal nga Kahanas (2022) aron makakat-on og dugang mahitungod niining mga baroganan.

Lihok inubanan sa hugot nga pagtuo

1. Tubaga ang mosunod nga mga pangutana diha sa imong journal sa pagtuon:

• Unsa kaha ang angay buhaton ni Sarai aron makalihok siya inubanan sa hugot nga pagtuo niini nga sitwasyon?

• Unsay imong isulti aron matabangan siya kon mibati ba siya nga ang paglihok inubanan sa hugot nga pagtuo lisod kaayo?

Susiha ang mga konsepto ug mga pangutana nga adunay mahangtorong panglantaw

Gibati na ni Sarai nga adunay problema ang iyang mga relasyon sa iyang mga ginikanan ug sa Dios tungod sa mga pagpili nga iyang gibuhat. Ang pagkahimong dayag ngadto sa iyang mga ginikanan ug sa Dios ingon og makapahimo sa mga butang nga mograbe pa.

2. Tubaga ang mosunod nga mga pangutana diha sa imong journal sa pagtuon:

• Sa unsa nga mga paagi nga dili tukma o dili kompleto ang panglantaw ni Sarai?

• Unsa ang imong nahibaloan mahitungod sa Langitnong Amahan, ni Jesukristo, o sa plano sa kaluwasan nga makatabang aron makahinumdom si Sarai?

• Kon ikaw ang inahan o amahan ni Sarai, sa imong hunahuna unsa ang imong bation ngadto kaniya? Unsa ang gusto nimong masabtan sa imong nanglimbasog nga anak nga babaye mahitungod sa imong gibati?

Pagtinguha pa og dugang nga panabot pinaagi sa balaanong gitudlo nga mga tinubdan

Paggahin og pipila ka minuto sa pagpangita sa mga tudling sa kasulatan o mga pamahayag gikan sa mga lider sa Simbahan nga makatabang kang Sarai. Kon gikinahanglan, ikonsiderar ang paggamit sa mga tinubdan sama sa Giya ngadto sa mga Kasulatan o Gospel Topics sa pagtabang kanimo (tan-awa sa ChurchofJesusChrist.org). Mahimong makatabang usab ang paggamit sa pipila sa mga kasulatan nga imong gitun-an sa miaging leksiyon, sama sa Juan 3:14–17 o Doktrina ug mga Pakigsaad 18:10–11.

3. Tubaga ang mosunod nga mga pangutana diha sa imong journal sa pagtuon:

• Unsay imong nakat-onan mahitungod ni Jesukristo gikan sa imong pagtuon nga makatabang kang Sarai?

• Unsa ang dili mominos sa duha ka partikular nga hugpong sa mga pulong gikan sa imong pagtuon nga makatabang kang Sarai? Ngano man?