Juan 4, Bahin 1

Ang Babaye diha sa Atabay

Sa Iyang pagpadulong sa Galilea, gitudloan ni Jesus ang usa ka babayeng Samaryanhon diha sa atabay mahitungod sa “buhing tubig” nga Iyang gitanyag. Nailhan niya mismo nga si Jesus mao ang Kristo. Tinguha niini nga leksiyon nga tabangan ka sa pag-ila sa imong panginahanglan sa Manluluwas ug pagbati sa Iyang gugma para kanimo.

Pagkat-on mahitungod ni Jesukristo

Sa imong pagtuon sa mga kasulatan, lagmit nga imong natuki nga ang Manluluwas kanunayng nagtudlo sa espirituhanong mga kamatuoran gamit ang mga kasinatian ug mga butang nga pamilyar sa mga tawo. Susiha ang mosunod nga mga hulagway, ug ihulagway ang espirituhanong mga kamatuoran nga atong makat-onan mahitungod sa Manluluwas pinaagi sa pagkompara sa tubig ngadto Kaniya.

• Sa imong hunahuna, sa unsang mga paagi nga may kalabotan ang tubig ug matudloan ka mahitungod kang Jesukristo?

Pamalandongi ang mosunod nga mga pangutana aron mahunahuna ang imong panginahanglan kang Jesukristo.

• Mibati ba ka og pareho o dugang nga panginahanglan kang Jesukristo sama sa imong panginahanglan sa tubig sa imong kinabuhi? Ngano o nganong dili man?

Niini nga leksiyon, magtuon ka sa usa ka asoy diin gitabangan sa Manluluwas ang usa ka babaye nga masabtan nga ang iyang espirituhanong panginahanglan sa Manluluwas mas dako kay sa iyang pisikal nga panginahanglan og tubig nga iyang gikuha. Samtang nagtuon ka, paghatag og pagtagad sa mga pag-aghat sa Espiritu nga makatabang kanimo sa pag-ila sa imong panginahanglan sa Manluluwas ug sa Iyang tinguha nga madawat nimo ang mga panalangin nga Siya lamang ang makatanyag.

Ang babaye diha sa atabay

Samtang nagbiyahe gikan sa Judea padulong sa Galilea, si Jesus miagi sa Samaria (tan-awa ang Juan 4:3–4). Mahimong makatabang ang pag-ila niini nga mga lokasyon gamit ang mapa 1 sa Biblia, “Pisikal nga Mapa sa Balaan nga Yuta,” sa Mga Tabang sa Pagtuon diha sa Gospel Library.

Sa panahon sa Manluluwas, ang mga Judeo nga mibiyahe taliwala sa Judea ug Galilea kasagarang moagi sa mas taas nga rota aron malikayan ang pag-agi sa Samaria tungod sa kasilag taliwala sa mga Judeo ug mga Samaryanhon. Lagmit nga gikapoy ug giuhaw si Jesus gikan sa Iyang panaw sa dihang milingkod Siya diha sa atabay sa kainit sa adlaw (tan-awa sa Juan 4:6). Samtang Siya anaa didto, adunay miabot nga babayeng Samaryanhon aron magkuha og tubig.

Tun-i ang mga pagtulon-an ni Jesus ngadto sa babayeng Samaryanhon sa Juan 4:5–14, ug pangitaa kon unsa ang imong nakat-onan mahitungod sa Manluluwas.

• Unsaon nimo paghulagway ang reaksiyon sa babaye ngadto sa Manluluwas niini nga mga bersikulo? Sa imong hunahuna, nganong ingon niini man ang iyang reaksiyon?

• Unsa kaha ang gitudlo ni Jesus sa dihang miingon Siya nga makahatag Siya og buhing tubig niini nga babaye?

Basaha ang Juan 4:15–26, ug pangitaa ang gugma ug kalooy nga gipakita ni Jesus niini nga babaye samtang nagpadayon ang ilang interaksiyon. Hunahunaa kon sa unsang paagi nga may kalabotan kanimo ang mga pagtulon-an sa Manluluwas. Mahimo usab nimong tan-awon ang video nga “Jesus Teaches a Samaritan Woman” gikan sa code sa oras nga 2:02 hangtod sa 4:11 samtang nagsunod sa imong mga kasulatan.

• Sa imong hunahuna, sa unsang paagi nga gitabangan sa Manluluwas ang babaye sa pag-ila sa iyang panginahanglan sa buhing tubig nga Iyang gitanyag?

• Unsa ang imong makat-onan mahitungod sa tinguha sa Manluluwas nga tabangan kini nga babaye bisan pa sa iyang mga sala?

• Sa unsang paagi nga makatabang kanato kini nga asoy sa pagsabot kon unsa ang gibati sa Manluluwas mahitungod sa kada usa kanato—bisan pa sa atong kaugalingong mga sala?

Basaha ang Juan 4:28–30, ug pangitaa kon unsa ang reaksiyon sa babayeng samaryanhon pagkahuman sa pagsulti ni Jesus kaniya nga Siya ang Mesiyas.Ikompara ang imong bag-ohay lang nga nabasa ngadto sa unang reaksiyon sa babaye ngadto kang Jesus samtang nagsugod sila sa ilang pag-istoryahanay.

• Sa imong hunahuna, unsa ang anaa sa iyang interaksiyon kang Jesus nga hinungdan sa iyang kausaban?

• Giunsa pag-usab o pag-impluwensya ni Jesukristo ang imong panghunahuna?

• Unsa nga mga desisyon ang imong mabuhat karon aron matabangan ka nga mas maduol kang Jesukristo?

Si Elder Robert C. Gay sa Kapangulohan sa Seventy nagpakigbahin sa pipila sa mga kamatuoran nga atong makat-onan gikan niini nga asoy. Mahimo nimong tan-awon ang video nga “Taking upon Ourselves the Name of Jesus Christ” gikan sa code sa oras nga 7:41 hangtod sa 9:23. Kini nga video anaa sa ChurchofJesusChrist.org.

Opsiyonal: Gustong Makahibalo pa og Dugang?

Juan 4:4. Nganong makahuluganon man nga si Jesus mibiyahe latas sa Samaria?

Ang mga Judeo kasagarang mobiyahe libot sa Samaria kay sa moagi sulod niini tungod sa pagdumot taliwala sa mga Judeo ug mga Samaryanhon. Adunay nahitabong dakong pagdumot taliwala sa mga Judeo ug mga Samaryanhon “tungod kay ang mga Samaryanhon mibiya sa hingpit gikan sa relihiyon nga Israelita” (Giya ngadto sa mga Kasulatan “Samarianhon, Mga,” scriptures.ChurchofJesusChrist.org). Apan, gihatagan og gibug-aton ni Juan nga si Jesukristo “kinahanglang moagi sa Samaria” (Juan 4:4), nga klarong gituki ang intensyon sa Manluluwas para sa buluhaton nga Iyang buhaton didto.

Juan 4:24. Ang Dios ba usa ka espiritu?

Ang uban tingali naglibog sa pamahayag ni Jesus sa Juan 4:24 nga ang Dios usa ka espiritu. Ang Hubad ni Joseph Smith niini nga bersikulo naghatag og importante nga pagpatin-aw: “Kay ngadto sa mao [mga tinuod nga magtutuo] ang Dios misaad sa iyang Espiritu” (Hubad ni Joseph Smith, Juan 4:26 [sa Apendiks sa Hubad ni Joseph Smith  ]). Ang moderno nga pagpadayag nagtudlo usab kanato nga ang Dios adunay unod ug mga bukog (tan-awa sa Doktrina ug mga Pakigsaad 130:22–23; tan-awa usab sa Genesis 5:1–3; Mga Hebreohanon 1:1–3).

Sa unsang paagi nga ang iyang interaksiyon kang Jesukristo adunay epekto sa babaye diha sa atabay?

Si Presidente Bonnie H. Cordon, Kinatibuk-ang Presidente sa Young Women, mitudlo:

Si Kristo sa manggiloy-ong paagi nahibalo mahitungod [sa babaye sa atabay] ug sa iyang mga panginahanglan. Iyang nahimamat ang maong babaye ug misugod sa pag-istorya mahitungod sa usa ka butang nga pamilyar ug komon kaniya. Kon Siya mihunong sa diskusyon niana nga punto, tingali usa kaha unta kadto ka positibo nga paghimamat. Apan dili kadto moresulta sa iyang pag-adto sa siyudad sa pagpahayag, “Umari kamo, tan-awa, … : mao ba kaha kini ang Kristo?” [Juan 4:29]. Sa hinayhinay, pinaagi sa pag-istoryahanay, siya nakaila ni Jesukristo, ug bisan pa sa iyang kaagi, siya nahimong usa ka instrumento sa kahayag, midan-ag sa dalan alang sa uban aron sila makakita.

(Bonnie H. Cordon, “Aron Sila Makakita,” Liahona, Mayo 2020, 79)