Juan 3:14–17

“Kay Gihigugma Pag-ayo sa Dios ang Kalibotan”

Si Jesus mibalik ngadto sa tanaman pag-usab aron magpadayon sa pag-ampo ug nag-antos og dakong kasakit.

Sama sa girekord sa Juan 3, gitudloan ni Jesus si Nicodemo mahitungod sa Iyang maulaong sakripisyo sa dihang miingon Siya nga “ang Anak sa Tawo [kinahanglan] nga iisa: aron ang tanan nga motuo kaniya dili malaglag, kondili makabaton og kinabuhing dayon” (Juan 3:14–15). Gitudlo ni Presidente Russell M. Nelson, “Samtang kita mopundar og panahon sa pagkat-on mahitungod sa Manluluwas ug sa Iyang maulaong sakripisyo, maagni kita sa pag-apil sa [laing] importanting elemento sa pag-access sa Iyang gahom: mopili kita sa pagbaton og pagtuo diha Kaniya ug mosunod Kaniya” (“Pagdawat sa Gahom ni Jesukristo diha sa Atong Kinabuhi,” Liahona, May 2017, 40). Kini nga leksiyon maghatag kanimo og mga oportunidad aron mapalig-on ang imong pagtuo diha kang Jesukristo samtang nagkat-on ka og dugang mahitungod sa Iyang Pag-ula.

Unsa ang Pag-ula ni Jesukristo?

Jesukristo nag-ampo diha sa Tanaman sa Getsemani

Kristo nagbitay sa usa ka krus didto sa Kalbaryo

Tan-awa ang mga hulagway ni Jesus didto sa Getsemani ug didto sa krus ug hunahunaa kon unsa ang imong nahibaloan mahitungod sa Pag-ula ni Jesukristo.

Niini nga leksiyon, makakat-on ka og dugang mahitungod sa Pag-ula ni Jesukristo ug sa gugma nga gipakita sa Langitnong Amahan sa dihang Iyang gipadala ang Iyang Anak nganhi sa kalibotan. Samtang nagtuon ka, paghatag og pagtagad sa mga pag-aghat sa Espiritu Santo nga makatabang kanimo nga mas makadayeg sa sakripisyo ni Jesukristo para kanimo ug madugangan ang imong hugot nga pagtuo diha Kaniya.

Ang Pag-ula sa Manluluwas

Ang mosunod nga mga tudling sa kasulatan ug pamahayag nagtudlo mahitungod sa Pag-ula ni Jesukristo. Pagtagana og 10 hangtod sa 15 ka minuto sa pagbasa og tarong niini nga mga tinubdan (o uban pang mga tinubdan mahitungod sa Pag-ula sa Manluluwas nga interesado kang makakat-on o imong nakit-an sa wala pa kini nga leksiyon). Samtang nagbasa ka, hunahunaa kon sa unsang paagi ang kada usa niini nga mga tinubdan ang makatabang kanimo nga mas masabtan kon unsa ang gibuhat sa Langitnong Amahan ug ni Jesukristo para kanimo ug ngano.

Si Elder Tad R. Callister sa Seventy nagtudlo:

Kon mao unsa ang Pag-ula ni Jesukristo? Sa usa ka pagsabot, kini usa sa daghang balaan nga mga panghitabo nga nagsugod sa Tanaman sa Getsemani, nagpadayon sa krus, ug nahuman sa Pagkabanhaw sa Manluluwas gikan sa lubnganan. Kini nadasig sa usa ka dili matugkad nga gugma alang sa matag usa kanato. Nagkinahanglan kini og tawo nga walay sala; kinsa adunay walay kinutuban nga gahom sa mga elemento—bisan sa kamatayon; kinsa nakaangkon og walay utlanan nga kapasidad sa pag-antos sa atong tanang mga sala ug mga kasakit; ug gani nakasinati niining tanan [tan-awa sa Doktrina ug mga Pakigsaad 88:6]. Mao kini ang misyon ni Jesukristo—mao kini ang Iyang Pag-ula.

Nan unsa ang katuyoan niini? Aron mahimong posible alang nato nga makabalik ngadto sa presensiya sa Dios, mahimong mas sama Kaniya, ug makaangkon og kahingpitan sa himaya. Kini gihimo pinaagi sa pagbuntog sa upat ka babag:

Pisikal nga kamatayon

Ang espirituhanong kamatayon tungod ni Adan ug sa atong mga sala

Atong mga kasakit ug mga kahuyang

Ang atong mga kahuyang ug mga pagkadili hingpit

(Tad R. Callister, “Ang Pag-ula ni Jesukristo,” Liahona, Mayo 2019, 85)

Sa unsang paagi nga gipakita ang gugma sa Amahan sa pagpadala sa Iyang Anak?

Ang Juan 3:16 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Makakat-on ka og dugang pa mahitungod niini nga tudling sa doktrinal nga kahanas sa sunod nga leksiyon.

Usa sa mga kamatuoran nga gihatagan og gibug-aton sa Manluluwas samtang Iyang gitudloan si Nicodemo mahitungod sa Iyang Pag-ula (tan-awa sa Juan 3:14–17) mao nga ang Langitnong Amahan nahigugma og maayo sa Iyang mga anak nga Iyang gipadala ang Iyang Bugtong Anak aron mag-ula para kanato.

Si Presidente Dallin H. Oaks sa Unang Kapangulohan nagtudlo mahitungod kon sa unsang paagi nga gipakita ang gugma sa Langitnong Amahan pinaagi sa Pag-ula sa Manluluwas:

Walay mas labaw nga ebidensiya sa walay kinutoban nga gahom ug kahingpitan sa gugma sa Dios kay sa gisulti sa Apostol nga si Juan: “Kay gihigugma gayod sa Dios ang kalibotan, kay tungod niana gihatag niya ang iyang bugtong Anak” (Juan 3:16). Lain nga Apostol misulat nga ang Dios “wala magpahigawas sa iyang kaugalingong Anak, kondili mitugyan hinuon kaniya alang kanatong tanan” (Mga Taga-Roma 8:32). Hunahunaa kon unsa ang kaguol sa atong Langitnong Amahan sa pagpadala sa Iyang Anak sa pag-antos sa dili matugkad nga pag-antos alang sa atong mga sala. Kana mao ang labing dako nga ebidensiya sa Iyang gugma alang sa matag usa kanato!

(Dallin H. Oaks, “Gugma ug Balaod,” Liahona, Nob. 2009, 26)

Unsa man ang imong nakat-onan gikan niini nga pamahayag?

Tan-awa ang bidyo “For God So Loved the World [Kay Gihigugma Pag-ayo sa Dios ang Kalibotan]” (4:48), makita sa ChurchofJesusChrist.org, ug pangitaa kon sa unsang paagi gipakita ang gugma ni Jesukristo ug sa Langitnong Amahan.

For God So Loved the World
Give thanks for the Lord Jesus Christ: His life, His atoning sacrifice, and His Resurrection. John 3:16

Opsiyonal: Gustong Makakat-on pa og Dugang?

Unsaon nako paggamit ang gahom nga gihatag kanako ni Jesukristo pinaagi sa Iyang Pag-ula?

Gitudlo ni Presidente Russell M. Nelson ang mosunod mahitungod sa pagdapit sa gahom ni Jesukristo diha sa atong kinabuhi:

Isip mga Santos sa Ulahing mga Adlaw, gitawag nato ang Iyang misyon isip ang Pag-ula ni Jesukristo, diin ang pagkabanhaw nahimong reyalidad alang sa tanan ug ang kinabuhing dayon nahimong posible alang niadtong maghinulsol sa ilang mga sala ug modawat ug motuman sa mahinungdanong mga ordinansa ug [mga] pakigsaad. …

… Ang atong mga pakigsaad mobugkos kanato ngadto Kaniya ug mohatag kanato og diosnong gahom. Isip matinud-anong mga disipulo, maghinulsol kita ug magpabunyag sama Kaniya. Mosubay kita diha sa dalan sa pakigsaad aron modawat og ubang importanting mga ordinansa. …

Ang mga tawo nga nagsunod sa pakigsaad mangita og paagi nga magpabiling walay lama gikan sa kalibotan aron walay makababag sa ilang pag-access sa gahom sa Manluluwas.

(Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 40, 41)

Unsaon nako pagkahibalo kon naglihok sa akong kinabuhi si Jesukristo ug ang Iyang gahom?

Si Presidente Henry B. Eyring sa Unang Kapangulohan nagtudlo:

Kon inyong nabati ang impluwensiya sa Espiritu Santo karon, mahimo ninyong hunahunaon kini isip ebidensiya nga ang Pag-ula [ni Jesukristo] naglihok sa inyong kinabuhi. Tungod niana nga rason ug daghan pa, maayo kaayo nga inyong ibutang ang inyong kaugalingon sa mga dapit ug sa mga buluhaton nga magdapit sa mga pag-aghat sa Espiritu Santo.

(Henry B. Eyring, “Gifts of the Spirit for Hard Times,” Ensign, Hunyo 2007, 23)

Asa ako makakat-on pa og dugang mahitungod sa Pag-ula ni Jesukristo?

Ikonsiderar ang pagpalawom sa imong pagsabot sa Manluluwas ug sa Iyang Pag-ula pinaagi sa tabang sa pagtuon sa kasulatan sama sa Gospel topics entry nga “Pag-ula ni Jesukristo” (ChurchofJesusChrist.org) o pagpangita sa “ Pag-ula, Pag-ula sa Dugo ” diha sa Giya ngadto sa mga Kasulatan (scriptures.ChurchofJesusChrist.org). Kini nga mga tabang sa pagtuon sa kasulatan naglangkob og bililhon nga mga panabot, mga kasulatan, mga pakigpulong, mga bidyo, ug ubang mga kapanguhaan nga nagtudlo mahitungod sa Pag-ula sa Manluluwas.