Juan 14:15–31; 15:10–14

“Kon Nahigugma Kamo Kanako, Tumana Ninyo ang Akong mga Sugo”

Sa dihang ang Manluluwas ug ang Iyang Apostoles nagsaulog sa Pagpalabay [Passover] didto sa lawak sa itaas, ang Manluluwas mitudlo sa Iyang Apostoles og importanteng mga kamatuoran. Sa nagsingabot pa ang Iyang pag-antos sa Getsemani ug sa Kalbaryo, gitudloan ni Jesus kini nga mga tawo kinsa Iya kaayong gihigugma, “Kon nahigugma kamo kanako, tumana ninyo ang akong mga sugo” (Juan 14:15). Kini nga leksiyon makatabang nimo nga makapakita sa imong gugma ngadto sa Langitnong Amahan ug kang Jesukristo pinaagi sa pagsunod sa Ilang mga sugo.

Sa unsang paagi makapakita ka og gugma?

Unsaon nimo sa pagkahibalo kon ang usa ka tawo nahigugma kanimo? Unsa nga mga pulong, mga buhat, o mga kinaiya ang nagpaila sa ilang gugma?
Sa unsang paagi nga ikaw makapakita sa imong gugma alang sa uban?
Unsa kaha kon ikaw nahigugma sa usa ka tawo, apan ang imong kinaiya o mga buhat wala sa kanunay magpakita og gugma? Unsa kaha ang imong mahimo?

Samtang ang Manluluwas nagpadayon sa pagtudlo sa Iyang Apostoles panahon sa Kataposang Panihapon, Iyang gitudlo ang Iyang gugma alang kanato ug gitudlo unsaon nato pagpakita sa atong gugma alang Kaniya.

Tun-i ang Juan 14:15, 21, 23–24 ug ang Juan 15:10–14, nga mangita sa unsay gisulti sa Manluluwas nga atong mahimo aron makapakita sa atong gugma alang Kaniya ug sa Langitnong Amahan.

Unsa ang gipasabot og maayo sa Manluluwas dinhi niini nga mga tudling mahitungod kon unsaon nato pagpakita og gugma alang Kaniya?

Unsa ang gitudlo niini nga mga bersikulo mahitungod sa gugma sa Manluluwas alang kanimo?
Unsa ang pipila ka sitwasyon diin ang mga kamatuoran nga gitudlo sa Manluluwas niini nga mga bersikulo makatabang?

Si Sister Carole M. Stephens, kanhi Kinatibuk-ang Presidente sa Relief Society, nagtudlo mahitungod sa motibo sa Dios sa paghatag kanato og mga sugo ug sa atong motibo sa pagsunod niini.

Tan-awa ang bidyo nga “Going to Grandma’s [Moadto kang Lola]” (4:02), anaa sa ChurchofJesusChrist.org.

Going to Grandma's
A grandmother plans to spend the day with her granddaughter, but can't get her to stay buckled in her car seat so they can leave.

Kita mobati usahay nga ang mga balaod sa [Dios] nagpugong sa atong personal nga kagawasan, nagkuha gikan kanato sa atong kabubut-on, ug naglimit sa atong pagtubo. Apan samtang kita naninguha og mas dakong pagsabot, samtang kita nagtugot sa atong Amahan sa pagtudlo kanato, magsugod kita sa pagkahibalo nga ang Iyang mga balaod mga timaan sa Iyang gugma alang kanato ug ang pagkamasulundon ngadto sa Iyang mga balaod maoy usa ka pahayag sa atong gugma alang Kaniya.

(Carole M. Stephens, “Kon Nahigugma Kamo Kanako, Inyong Pagatumanon ang Akong mga Sugo,” Liahona, Nob. 2015, 119)

Paglista og pipila ka balaod ug mga sugo nga gibati ninyo nga nakapakita sa gugma sa Langitnong Amahan alang kanimo. Aron matabangan ka sa paghunahuna og pipila ka sugo, mahimo nimong rebyohon ang Napulo ka Sugo (tan-awa sa Exodo 20:3–17) o sa Alang sa Kalig-on sa mga Kabatan-onan [booklet, 2011].

Sa unsang paagi ang mga sugo nga imong nalista usa ka “pagpadayag sa gugma sa [Dios] alang kanato”?
Sa unsang paagi ang imong kamasulundon niini nga mga sugo mahimo nga usa ka “pagpahayag sa [imong] gugma alang Kaniya”?

Pagpili og usa sa mga sugo gikan sa imong lista. Posible nga usa kini ka butang nga imong gipaningkamotan o usa ka butang diin ikaw gitintal aron masupak apan gipili ang pagsunod.

Ang mosunod nga mga pangutana makatabang nimo sa pagtimbang-timbang sa imong mga tinguha sa pagtuman sa mga sugo sa Dios. Samtang maghunahuna ka mahitungod sa imong mga tubag, importante nga mahibaloan nga tingali ikaw adunay lainlaing mga rason sa pagtuman sa mga sugo. Bisan unsa pay imong kasamtangan nga mga tinguha, ipadayon ang pagkamasulundon, ug sa igong panahon ang imong pagpaninguha sa pagsunod tungod sa paghigugma molambo.

Ang ehemplo sa atong Manluluwas bahin sa gugma

Si Jesukristo naghatag kanato og hingpit nga ehemplo kon unsaon pagsunod ang mga balaod ug mga sugo sa Dios tungod sa tiunay nga gugma. Human sa Kataposang Panihapon, miingon Siya, “Apan kinahanglan nga mahibalo ang kalibotan nga nahigugma ako sa Amahan. Busa gibuhat ko ang tanan nga iyang gisugo kanako” (Juan 14:31). Dayon si Jesus miadto aron mag-antos alang sa atong mga sala ug sa atong “mga sakit ug mga kasakit ug mga pagtintal sa matag matang” (Alma 7:11) didto sa Tanaman sa Getsemani ug usab sa krus.

Nganong ang Manluluwas andam man nga mosunod sa Langitnong Amahan? (Tan-awa sa Juan 15:13; Mga Hebreo 12:2.)

Si Elder D.Todd Christofferson sa Korum sa Napulog Duha ka Apostoles midapit kanato sa mainampingong paghunahuna unsa ang idasig sa gugma ni Jesukristo ngari kanato nga buhaton. Mahimong ganahan nimong tan-awon ang bidyo nga “Magpabilin Kamo sa Akong Gugma,” anaa sa ChurchofJesusChrist.org, gikan sa code sa oras nga 14:27 hangtod sa 14:50, o basaha ang mosunod nga pamahayag:

“Abide in My Love”
Elder Christofferson explains that God’s love is infinite and eternal but His greater blessings are conditioned on obedience.

Dili ba ninyo higugmaon Siya nga unang nahigugma kaninyo? [Tan-awa sa 1 Juan 4:19]. Dayon tumana ang Iyang mga sugo [tan-awa sa Juan 14:15]. Dili ba ninyo higalaon Siya nga mitugyan sa Iyang kinabuhi para sa Iyang mga higala? [tan-awa sa Juan 15:13]. Dayon tumana ang Iyang mga sugo [tan-awa sa Juan 15:14]. Dili ba kamo magpabilin diha sa Iyang gugma ug modawat sa tanan nga mabination Niyang gitanyag kaninyo? Dayon tumana ang Iyang mga sugo [tan-awa sa Juan 15:10].

(D. Todd Christofferson, “Magpabilin Kamo sa Akong Gugma,” Liahona, Nob. 2016, 51)

Samtang maningkamot ka sa pagtuman sa mga sugo tungod sa gugma alang sa Langitnong Amahan ug kang Jesukristo, mobati ka og dugang sa Ilang gugma diha sa imong kinabuhi (tan-awa sa Juan 14:21). Kon naglisod ka sa pagkahimong masulundon, o bisan sa pagtinguha nga magmasulundon, ang Langitnong Amahan makatabang kanimo kon ikaw mapaubsanong mohangyo Kaniya og kabag-ohan sa kasingkasing. Hinumdomi, usab, nga usa sa mga sugo mao ang paghinulsol, ug kita makatuman niini nga sugo samtang anaa sa paningkamot sa pagbuntog sa atong mga kahuyang.

Opsiyonal: Gustong Makakat-on pa og Dugang?

Nganong ang Ginoo nagkinahanglan sa atong pagkamasulundon sa Iyang mga sugo?

Si Presidente Dallin H. Oaks sa Unang Kapangulohan nagtudlo:

Gikinahanglan sa Dios kanato ang pagtuman sa Iyang mga sugo tungod kay pinaagi lamang nianang pagkamasulundon, lakip sa paghinulsol, kita makabalik sa pagpuyo diha sa Iyang presensiya ug mahimong hingpit sama Kaniya.

(Dallin H. Oaks, “Duha ka Dagkong mga Sugo,” Liahona, Nob. 2019, 74)

Importante ba kon nganong ako misunod sa mga sugo?

Ang matag usa kanato kinahanglan mangutana sa atong mga kaugalingon ngano nga kita mosunod sa mga kasugoan sa Dios. Kini tungod ba kay nahadlok kita og silot? Kini tungod ba kay nagtinguha kita og mga ganti alang sa pagpuyo og usa ka maayo nga kinabuhi? Kini tungod ba kay gihigugma nato ang Dios ug si Jesukristo ug buot moserbisyo Kanila?

Mas maayo nga mosunod sa mga kasugoan tungod kay nahadlok kita og silot kay sa dili gayod mosunod niini. Apan kita mas labaw nga malipayon kon kita mosunod sa Dios tungod kay kita nahigugma Kaniya ug buot mosunod Kaniya. Kon kita mosunod Kaniya sa kinabubut-on, Siya makapanalangin kanato sa walay pagpugong. Siya miingon, “Ako, ang Ginoo, … nahimuot sa pagpasidungog ngadto kinsa nag-alagad kanako sa pagkamatarong ug diha sa kamatuoran ngadto sa kataposan” [Doktrina ug Mga Pakigsaad 76:5]. Ang pagkamasulundon nagtabang usab kanato sa pag-uswag ug paghimo nga mas mahisama sa atong Langitnong Amahan. Apan kadto nga walay gibuhat hangtod nga sila gimandoan ug dayon mituman sa mga kasugoan sa dili andam nga paagi mawagtangan sa ilang ganti [tan-awa sa Doktrina ug mga Pakigsaad 58:26–29].

(Mga Baroganan sa Ebanghelyo [2009], 250)