Doktrinal nga Kahanas—Juan 17:3

Pagkaila sa Langitnong Amahan ug kang Jesukristo

Sa miaging leksiyon, “Juan 17,” inyong nakat-onan nga kita mouswag paingon sa kinabuhing dayon pinaagi sa pagkaila sa Langitnong Amahan ug kang Jesukristo. Kini nga leksiyon makatabang nimo sa pagmemorya sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa Juan 17:3, pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.

Isag-ulo ug ipasabot

I-recite og kusog sa daghang higayon ang pakisayran sa doktrinal nga kahanas sa Juan 17:3 ug ang mahinungdanon nga hugpong sa mga pulong sa kasulatan niini: “Ug kini mao ang kinabuhing dayon, nga ang mga tawo moila kanimo nga mao ang bugtong matuod nga Dios ug kang Jesukristo.” Diha sa laing nga panid sa papel, isulat ang pakisayran nga Juan 17:3 ug ang una nga mga letra sa matag pulong diha sa bersikulo: U k m a k d n a m t m k n m a b m n D u k J. Gamit lamang ang una nga mga letra sa bersikulo, sulayi sa pag-recite ang pakisayran ug mahinungdanon nga hugpong sa mga pulong sa kasulatan. Samtang nagkahimo ka nang mas masaligon, sulayi sa pag-recite ang pakisayran ug ang hugpong sa mga pulong gikan sa panumdoman.

1. Kompletoha ang mosunod diha sa imong journal sa pagtuon:

Aron matabangan ka nga mas makasabot sa kahulogan niini nga kasulatan, ipasabot ang mga kamatuoran nga gitudlo sa Juan 17:3 sa kaugalingon nimong mga pulong. Ilakip ang mosunod:

1. Ang kahulogan sa hugpong sa mga pulong nga “kinabuhing dayon.”

2. Ubang mga paagi nga kita “makaila” sa Langitnong Amahan ug kang Jesukristo.

Pagbansay sa paggamit

Rebyoha ang mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Hunahunaa kon unsaon kaha nimo sa pagpasabot kini nga mga baroganan ngadto sa tawo nga wala pa sukad makadungog niini.

Basaha ang mosunod nga sitwasyon:

Human sa miting sa puasa ug pagpamatuod, imong namatikdan nga ang imong higala nga si Julia morag naguol. Sa inyong paglakaw pauli kauban niya, miingon siya nga atol sa miting karon iyang naamgohan nga wala diay kaayo siya makaila sa Langitnong Amahan ug kang Jesukristo segun sa iyang gusto. Iyang gihulagway ang pagbati sa kaguol ug kahidlaw alang sa matang sa relasyon uban Kanila nga iyang namatikdan didto sa pipila niadtong mipaambit sa ilang mga pagpamatuod. Mihukom ka nga maghunahuna gayod ug mag-ampo sa mosunod nga mga adlaw kon unsaon sa pagtabang kang Julia.

Gamita ang mga baroganan sa pag-angkon og espirituhanong kahibalo ug ang mosunod nga mga pangutana ug mga kalihokan aron matabangan ka sa pagkonsiderar kon unsa ang imong isulti ug buhaton aron matabangan si Julia. Basin gusto sab nimong isulat ang imong nakat-onan ug ang bisan unsang impresyon nga imong nadawat samtang ikaw nag-andam.

Susiha ang mga konsepto ug mga pangutana nga adunay mahangtorong panglantaw

• Ngano kaha nga ang Langitnong Amahan gusto nga kita makaila Kaniya ug sa Iyang Anak, si Jesukristo?

• Nganong gusto man nimo nga makaila gayod Sila kutob sa imong mahimo niining kinabuhia?

Pagtinguha pa og dugang nga panabot pinaagi sa balaanong gitudlo nga mga tinubdan

• Sa unsang paagi ang pagtuon sa pag-ampo sa Manluluwas diha sa Juan 17:3 makatabang kang Julia sa iyang mga tinguha?

Paglista og pipila ka maayong mga kapanguhaan nga tingali makatabang kang Julia aron makaila sa Langitnong Amahan ug kang Jesukristo.

• Unsaon ni Julia paggamit sa mga anaa nga mga kapanguhaan aron siya matabangan nga mas makaila sa Langitnong Amahan ug kang Jesukristo? (Sama pananglit, unsa nga importante nga mga pulong ang iyang masiksik sa Giya ngadto sa mga Kasulatan, diha sa Topical Guide, sa ChurchofJesusChrist.org, o Gospel Library nga app?)

Paggahin og pipila ka minutos sa pagtuon sa balaanong gitudlo nga mga tinubdan aron makat-on ug dugang mahitungod sa Langitnong Amahan ug kang Jesukristo ug unsaon nga mas makaila pa Kanila.

Lihok inubanan sa hugot nga pagtuo

• Sa unsang paagi nga ang pagpaningkamot nga makaila sa Langitnong Amahan ug ni Jesukristo usa ka lihok sa hugot nga pagtuo?

• Unsa ang nabuhat nimo o sa tawo nga imong kaila aron mas makaila sa Langitnong Amahan ug ni Jesukristo nga inyong ikasugyot ngadto ni Julia?

• Unsa nga mga hugpong sa pulong ang imong makita diha sa mga parapo 5–7 sa “Pag-angkon og Espirituhanong Kahibalo nga seksiyon sa Mahinungdanong Dokumento sa Doktrinal nga Kahanas (2022) nga makatabang sa usa ka tawo kinsa nagbuhat sa husto nga mga butang apan wala gihapon mobati nga ingon ka duol sa Dios sama sa ilang ganahan?

2. Irekord sa imong journal sa pagtuon kon unsa ang imong ikapakigbahin aron matabangan ang imong higala nga si Julia.

Opsiyonal: Gustong Makakat-on pa og Dugang?

Unsa ang kinabuhing dayon?

Ang kinabuhing dayon mao ang hugpong sa pulong nga gigamit sa kasulatan sa pagpasabot sa kalidad sa kinabuhi nga gipuy-an sa atong Mahangtoron nga Amahan. … Ang kinabuhing dayon, o kahimayaan, mao ang pagpuyo sa presensiya sa Dios ug pagpadayon isip mga pamilya (tan-awa sa Doktrina ug Mga Pakigsaad 131:1–4).

(Gospel Topics,“Eternal Life,” topics.ChurchofJesusChrist.org)

Unsaon nato nga makaila kita mismo sa Amahan ug sa Anak?

Si Elder Robert D. Hales (1932–2017) sa Korum sa Napulog Duha ka Apostoles mitubag niini nga pangutana.

Pinaagi sa personal nga pagpadayag. Ang personal nga pagpadayag maoy paagi sa Langitnong Amahan sa pagtabang kanato nga makaila Kaniya ug sa Iyang Anak, makat-on ug mosunod sa ebanghelyo, molahutay hangtod sa kataposan diha sa pagkamatarong, ug magpakatakos alang sa kinabuhing dayon—aron makabalik ngadto sa Ilang presensiya.

(Robert D. Hales, “Personal nga Pagpadayag: Ang mga Panudlo ug mga Ehemplo sa mga Propeta,” Liahona, Nob. 2007, 87)

Unsa ang akong kinahanglan buhaton kon ako wala makasiguro kon ako mituo gani sa Dios?

Si Elder Robert D. Hales (1932–2017) sa Korum sa Napulog Duha ka Apostoles miingon:

Kon dili kamo makahinumdom nga nagtuo sa Dios o kon kamo mihunong sa pagtuo o kon kamo mituo apan walay tinuod nga ikapakita nga kamatuoran, dapiton ko kamo sa pagtinguha og usa ka pagpamatuod karon sa Dios. …

… Uban sa inyong kaugalingong pagpamatuod sa Dios, makapanalangin kamo sa inyong pamilya, sa inyong mga kaliwatan, sa inyong mga higala, sa inyong kaugalingon nga kinabuhi—sa tanan nga inyong gimahal. Ang inyong personal nga kahibalo sa Dios dili lamang kay mao ang pinakadako nga gasa nga inyong ikahatag sukad, apan makadala kini kaninyo sa pinakadako nga kalipay nga sukad inyong maangkon.

Ako mosaad nga kon kamo ug ang inyong mga gihigugma mangita Kaniya sa tanang pagpaubos, sa kinasingkasing, ug sa kakugi, kamo masayod uban sa kasigurohan usab. Ang inyong pagsaksi moabot.

(Robert D. Hales, “Nagpangita aron Makaila sa Dios, Atong Langitnong Amahan, ug sa Iyang Anak, si Jesukristo,” Liahona, Nob. 2009, 32)