“Nag-ampo Ako alang Kanimo, Aron Dili Mabuntog ang Imong Pagtuo”
Imahe
Jesus ug si Pedro naglakaw ug nag-istoryahanay
Si Jesukristo bag-o lang mipaila-ila sa sakramento ngadto sa Iyang mga tinun-an diha sa misugod sila og hisgot mahitungod sa kon kinsa ang magbudhi sa Agalon ug sa unsang paagi ang pag-alagad sa uban mas labaw kay sa alagaran. Taliwala niini nga mga panaghisgotan diha sa lawak sa itaas diin si Jesus ug ang Apostoles nangaon sa Kataposang Panihapon, si Jesus mitabang ni Pedro nga makasabot sa oposisyon nga iyang masinati sa tibuok niyang kinabuhi. Ang Manluluwas mitudlo ni Pedro nga siya makatabang sa uban human lamang niya malig-on ang iyang kaugalingong hugot nga pagtuo kang Jesukristo. Kini nga leksiyon gituyo aron sa pagtabang nimo nga makaila sa imong panginahanglan sa pagsalig kang Jesukristo ug magpadayon sa paglig-on sa imong hugot nga pagtuo ngadto Kaniya.
Lig-ona ang imong abilidad
Paglista og mga kahanas o mga abilidad nga mahimong mawala sa usa ka tawo kon dili nila kini padayon nga gamiton o lig-onon kadto nga mga abilidad (pananglitan, atletiko nga mga kahanas o mga kahanas sa pagsulat).
Sa unsang paagi kaha kini magamit sa imong abilidad sa pagbaton og hugot nga pagtuo kang Jesukristo?
Sa leksiyon karon, makat-onan nimo ang mahitungod kon sa unsang paagi gusto ni Jesukrsito nga imong mapalig-on ang imong abilidad nga makabaton og hugot nga pagtuo Kaniya.
Paggahin og mubo nga panahon aron makapamalandong kon unsa ang imong gibuhat sa kasamtangan o gustong buhaton aron mapalambo ang imong hugot nga pagtuo kang Jesukristo. Mahimo nimong isulat sa imong journal sa pagtuon ang mahitungod sa unsay imong gibuhat kada adlaw, kada semana, o gani kada bulan. Kini nga mga buhat tingali makalangkob og bisan unsa nga mga tumong nga imong kasamtangan nga gipaningkamotan.
Sa imong pagtuon karon, pangita og mga kabag-ohan o mga pagpalambo nga imong mahimo aron mapalig-on ang imong hugot nga pagtuo kang Jesukristo aron ikaw makasalig Kaniya bisan pa sa mga kahimtang nga imong giatubang sa kinabuhi.
Si Jesukristo nakasabot sa atong mga panginahanglan ug motabang kanato
Si Jesukristo misulti sa Iyang mga disipulo bahin sa umaabot nga gingharian nga nagahulat kanila tungod kay sila matinud-anong nagpadayon sa pag-unong Kaniya (tan-awa sa Lucas 22:28–30). Apan, ang Ginoo mitabang usab ni Simon Pedro sa pagpangandam alang sa mahagiton nga espirituhanong pagpanaw nga iyang atubangon sa dili madugay.
Basaha ang Lucas 22:31–34, nga mangita sa unsay gusto sa Ginoo nga itabang nga masabtan ni Pedro.
Aron mas masabtan ang kahulogan sa tinguha ni Satanas nga, “[p]aglain ni [Pedro] gikan sa uhot” (bersikulo 31), basaha ang pagpasabot nga anaa sa “Opsiyonal: Gustong Makakat-on pa ug Dugang?” nga seksiyon dapit sa kataposan sa leksiyon.
Unsa ang imong namatikdan mahitungod sa panabot sa Manluluwas bahin kang Pedro? Unsay kalainan niini gikan sa unsay pagtan-aw ni Pedro sa iyang kaugalingon?
Sa unsang paagi kaha nga ang imong nakat-onan mahitungod sa relasyon ni Pedro kang Jesukristo may kalabotan sa imong relasyon sa Manluluwas?
Human gipamahayag ni Pedro ang iyang hugot nga pagtuo ug pag-unong kang Jesukristo, unsa ang gipadayag sa Manluluwas nga buhaton ni Pedro?
Imahe
Pedro milimod ni Jesukristo
Pagkagabii niana, dihang si Jesukristo gidakop ug gidala ngadto sa balay sa pangulong pari aron husgahan, si Pedro misunod gikan sa layo (tan-awa sa Lucas 22:54).
Basaha ang Lucas 22:55–62 aron makat-on giunsa sa pagkatuman ang panagna ni Jesus mahitungod kang Pedro.
Unsay imong nakat-onan mahitungod sa Manluluwas gikan sa Iyang inter-aksiyon ni Pedro nga magtugot kanimo nga makabaton og hugot nga pagtuo diha kang Jesukristo?
Pagpalig-on sa atong hugot nga pagtuo diha kang Jesukristo
Sama sa pagtabang sa Manluluwas kang Pedro nga makasabot sa mga tinguha ni Satanas (tan-awa sa Lucas 22:31), si Presidente Russell M. Nelson nagpasidaan kanato nga “ang kaaway paspas kaayong mipalapad sa iyang pag-atake sa hugot nga pagtuo ug ngari kanato ug sa atong mga pamilya” (Russell M. Nelson, “Pasiuna nga Pakigpulong,” Liahona, Nob. 2018, 7). Siya mitudlo usab nga “ang kaaway mipakusog pag-ayo sa iyang mga paningkamot aron sa pagbalda sa mga pagpamatuod ug pagbabag sa buhat sa Ginoo” (Russell M. Nelson, “Kita Makabuhat og Mas Maayo pa ug Mahimong Mas Maayo,” Liahona, Mayo 2019, 68).
Unsa ang pipila ka paagi diin si Satanas nagtinguha sa pagguba sa atong hugot nga pagtuo diha kang Jesukristo karon?
Unsay nakatabang nimo sa pagpalig-on sa imong hugot nga pagtuo diha kang Jesukristo?
Si Elder Neil L. Andersen sa Korum sa Napulog Duha ka Apostoles mipaambit og pipila ka paagi diin kita makapalig-on sa atong hugot nga pagtuo diha kang Jesukristo.
Imahe
Elder Neil L. Andersen
Ang inyong [hugot nga] pagtuo molambo dili pinaagi sa sulagma, apan pinaagi sa pagpili.
Ang paagi sa atong pagpakabuhi makapalig-on o makapahuyang sa atong pagtuo. Ang pag-ampo, kamasulundon, kamatinuoron, kaputli sa hunahuna ug binuhatan, ug pagkadili hakog mopalambo sa pagtuo. Kon wala kini, mohuyang ang pagtuo. Nganong ang Manunubos miingon man ngadto ni Pedro, “Nangamuyo ako alang kanimo, nga unta dili makabsan ang imong pagsalig [pagtuo]”? (Lucas 22:32). Tungod kay dunay kaaway nga maoy kalipay ang pagguba sa atong pagtuo! Buhata ang kutob sa inyong mahimo sa pagpanalipod sa inyong [hugot nga] pagtuo.
(Neil L. Andersen, “Ang Pagtuo Dili pinaagi sa Sulagma, apan pinaagi sa Pagpili,” Liahona, Nob. 2015, 66)
1. Tubaga ang mosunod nga mga pangutana diha sa imong journal sa pagtuon:
Unsa ang imong nakat-onan karon mahitungod sa unsa ang gusto ni Jesukristo gikan kaninyo?
Unsay usa ka butang nga imong sugdan o ipadayon sa pagbuhat aron malig-on ang imong hugot nga pagtuo kang Jesukristo?
Sa unsang paagi kaha ang mas lig-on nga hugot nga pagtuo kang Jesukristo mopanalangin kanimo?
Opsiyonal: Gustong Makakat-on pa og Dugang?
Lucas 22:31. Unsa ang gipasabot sa Manluluwas diha sa Iyang pagsulti kang Pedro nga si Satanas gustong “[mo]lain [kaniya] isip trigo”?
Aron sa paglain sa trigo, ang bililhong mga lugas gilain gikan sa wala magamit nga mga bahin sa tanom. Gigamit ni Jesus ang maong analohiya aron matabangan si Pedro (ug ang matag usa kanato) nga makaila sa mga paningkamot ni Satanas sa pagguba sa atong hugot nga pagtuo ug pagpugong kanato nga mahimong usa ka importanteng bahin sa gingharian sa Dios.
Unsa ang makapalig-on sa akong hugot nga pagtuo kang Jesukristo?
Si Elder Neil L. Andersen sa Korum sa Napulog Duha ka Apostoles mitudlo:
Imahe
Elder Neil L. Andersen
Ang atong hugot nga pagtuo nakasentro sa Dios, atong Amahan ug sa Iyang Anak, si Jesukristo, nga atong Manluluwas ug Manunubos. Gilig-on kini sa atong kahibalo nga ang kahingpitan sa ebanghelyo gipahiuli na sa yuta, nga ang Basahon ni Mormon pulong sa Dios, ug nga ang mga propeta ug mga apostoles karon naghupot sa mga yawe sa [pagkapari]. Atong gimanggad ang atong hugot nga pagtuo, naningkamot nga malig-on [atong hugot nga pagtuo], nag-ampo og dugang pang hugot nga pagtuo, ug mobuhat kutob sa [atong gahom] sa pagpanalipod [sa atong hugot nga pagtuo]. …
… Isubsob ninyo ang inyong kaugalingon sa [mismong] mga butang nga nakatabang sa paglig-on sa [inyong hugot nga] pagtuo: ipakita ninyo ang inyong hugot nga pagtuo kang Kristo, mag-ampo kamo, mamalandong sa kasulatan, maghinulsol, magsunod sa mga sugo, ug moserbisyo sa uban.
(Neil L. Andersen, “Pagsulay sa Inyong Hugot nga Pagtuo,” Liahona, Nob. 2012, 39–40)
Unsa ang makaguba sa akong hugot nga pagtuo kang Jesukristo?
Si Ahmad S. Corbitt, Unang Magtatambag sa Kinatibuk-ang Kapangulohan sa Young Men, nagtudlo:
Imahe
Ahmad S. Corbitt
Akong mga higala, ang tinuyo nga paghunahuna o pagtan-aw sa mga butang nga sukwahi kon si kinsa gayod kamo, ilabi na sa pornograpiya, makapahuyang sa inyong pagtuo kang Kristo ug, kon walay paghinulsol, makagun-ob niini.
Lucas 22:32. Unsa man ang atong makat-onan mahitungod sa pagkakabig gikan sa pagsabot sa pamahayag sa Manluluwas nga nagsugyot nga si Pedro wala pa hingpit nga nakabig?
Si Elder David A. Bednar sa Korum sa Napulog Duha ka Apostoles nagtudlo:
Imahe
Elder David A. Bednar
Kining bantogan nga Apostol nakig-istorya ug nakauban og lakaw sa Manluluwas, nakasaksi og daghang milagro, ug may lig-ong pagpamatuod sa kabalaan sa Manluluwas. Bisan si Pedro kinahanglan og dugang nga panudlo ni Jesus bahin sa makakabig ug makabalaan nga gahom sa Espiritu Santo ug sa iyang obligasyon nga matinud-anong moserbisyo.
Ang kahulogan sa ebanghelyo ni Jesukristo naglangkob og importante ug permanenting kausaban sa atong kinaiya nga nahimong posible pinaagi sa Pag-ula sa Manluluwas. [Ang] tinuod nga pagkakabig nagdala og kausaban sa gituohan, kasingkasing, ug kinabuhi sa tawo, sa pagdawat ug pagsunod sa kabubut-on sa Dios (tan-awa sa Mga Buhat 3:19; 3 Nephi 9:20) ug naglakip sa pasalig nga mahimong disipulo ni Kristo.
(David A. Bednar, “Nakabig ngadto sa Ginoo,” Liahona, Nob. 2012, 106–7)