Lucas 22:47–71; Juan 18:1–27

“Nagtuo Ka ba nga Dili Ko Imnon ang Kopa sa Pag-antos nga Gihatag Kanako sa Akong Amahan?”

Si Jesukristo hingpit nga mapasaligon sa pagbuhat sa unsay pagbuot sa Langitnong Amahan. Kini makita ilabi na sa Iyang pag-antos didto sa Tanaman sa Getsemani, sa misunod nga pagdakop Kaniya, ug sa mga hitabo nga misangpot ngadto sa ug sa panahon sa Paglansang Kaniya sa Krus. Kini nga leksiyon makatabang nimo nga mosunod sa buhat ni Jesukristo pinaagi sa pagpili nga mobuhat sa kabubut-on sa Langitnong Amahan sa imong kinabuhi.

Pagbutang sa kabubut-on sa Langitnong Amahan labaw kay sa atong kaugalingon

Hunahunaa nga nagtindog ka atobangan sa duha ka pultahan. Pinaagi sa pagpili nga mosulod sa unang pultahan, imong gisunod ang pagbuot sa Langitnong Amahan, apan mag-atobang ka sa lisod nga pagsulay. Kon imong pilion ang pagsulod sa ikaduhang pultahan, makalingkawas ka sa pagsulay, apan dili nimo mabuhat ang gusto sa Langitnong Amahan alang kanimo.

Ngano kaha nga aduna may mopili sa unang pultahan? sa ikaduhang pultahan?
Unsa ang imong nahibaw-an mahitungod sa Langitnong Amahan nga makatabang nimo sa pagpili sa pagsulod sa unang pultahan?

Paggahin og panahon sa pagpamalandong sa kinabuhi ni Jesukristo ug sa unsang paagi ang pagpili sa unang pultahan maparehas sa giunsa Niya pagpili ang pagpakabuhi. Niini nga leksiyon karon, aduna kay kahigayonan nga mobasa mahitungod sa mga kapilian nga nabuhat sa Manluluwas ngadto sa kataposan sa Iyang mortal nga kinabuhi. Sa inyong pagtuon, pangitaa unsay nakapadasig nimo mahitungod sa mga gibuhat ni Jesukristo.

Jesukristo gibudhian ug gidakop didto sa Getsemani

Didto sa Tanaman sa Getsemani, mihangyo si Jesukristo sa Iyang Amahan nga “kuhaa kining kupa gikan kanako,” apan Iyang giklaro nga Siya mapasaligon nga mobuhat sa kabubut-on sa Amahan diha nga miingon siya, “Apan dili ang akong pagbuot ang matuman, kon dili, ang imo maoy matuman” (Lucas 22:42). Ang kopa nga gihisgotan ni Jesus nagpasabot sa Iyang pag-antos ug sa kamatayon.

Basaha ang Juan 18:1–4, nga mangita giunsa sa Manluluwas pagpadayon nga gipakita ang Iyang pasalig sa pagbuhat sa kabubut-on sa Langitnong Amahan.

Paglista og pipila sa mga lisod nga butang nga nahibaloan ni Jesus nga “mahitabo Kaniya” sa pag-abot sa oras apan Iyang gidawat kini (bersikulo 4).

Basaha ang Juan 18:5–11, nga mangita giunsa pagtubag sa Manluluwas ang armadong panon nga miadto sa pagkuha Kaniya.

Alang sa dugang nga mga detalye nga wala marekord ni Juan nga nagpakita sa makahingangha nga gugma ug determinasyon ni Jesus, basaha ang Mateo 26:52–54 ug Lucas 22:50–51. Mahimo usab nimong tan-awon ang “The Savior Suffers in Gethsemane [Ang Manluluwas Nag-antus didto sa Getsemani]” gikan sa time code 5:55 hangtod sa 8:30, anaa sa ChurchofJesusChrist.org.

The Savior Suffers in Gethsemane
Jesus, Peter, James, and John retire to the Garden of Gethsemane. Jesus submits to the Father's will and begins to suffer for the sins and afflictions of mankind. He is then betrayed and arrested. Matthew 26:36–57

Unsa ang imong nagustohan mahitungod sa panagtagbo ni Jesus ug sa armadong panon?
Unsa ang natabang sa ehemplo ni Jesukristo aron imong masabtan ang mahitungod sa pag-atobang og oposisyon?
Ngano kaha ang Manluluwas nakahimo sa pagdumala niining mga kahimtang sa paagi nga Iyang gibuhat? Unsa ang gitudlo niini kanimo mahitungod Kaniya?

Jesukristo gidala aron husgahan

Human sa pagdakop ni Jesus, siya gidala ngadto sa atobangan sa kadagkoan sa mga pari, kang Caifas, ug sa lain pang mga punoan sa mga Judio. Basaha ang Lucas 22:63–65 aron masuta ang mahitungod sa pipila ka dili makiangayon nga pagtratar nga nadawat ni Jesus gikan kanila. Mahimo usab nimong tan-awon ang bidyo nga “Jesus Is Tried by Caiaphas, Peter Denies Knowing Him [Si Jesus Gitaral ni Caiaphas, Si Pedro Milimod nga Nakaila Kaniya]” gikan sa time code 0:00 hangtod sa 1:39, anaa sa ChurchofJesusChrist.org.

Jesus Is Tried by Caiaphas, Peter Denies Knowing Him
Jesus is tried before Caiaphas and the chief priests. Peter denies knowing Him and weeps bitterly.

Ngano kaha ang Manluluwas andam nga molahutay sa susamang mapintas ug dili makiangayon nga pagtratar?

Sa Basahon ni Mormon, gitudlo ni Nephi ug Abinadi ang mahitungod sa kon nganong ang Manluluwas andam nga mipaubos sa maong pagtratar. Basaha ang 1 Nephi 19:8–9 ug Mosiah 15:5–7 aron masuta kon unsa ang mga rason nga ilang gilista.

Sa imong journal sa pagtuon, isulat ang mga leksiyon nga imong nakat-onan mahitungod o gikan kang Jesukristo gikan niining mga tudling.

Mahimo kang mosulat og pipila ka mga hinungdan nganong ang pagsabot niining mga leksiyon bililhon o personal nga mahinungdanon nganha kanimo.

Usa ka leksiyon nga importanteng masabtan gikan niining mga tudling mao nga si Jesukristo mitugyan ngadto sa kabubut-on sa Iyang Amahan sa tanan nga butang.

Unsa kaha ang nasabtan ni Jesus mahitungod sa Langitnong Amahan nga nakapahimo Niya sa hingpit nga pagtugyan ngadto sa Iyang kabubut-on?

Paghunahuna og panahon dihang ikaw mipili nga mosunod sa unsay gusto sa Langitnong Amahan imbis sa personal nga gusto.

Unsa may nakalisod mahitungod sa pagpili sa mga tinguha sa Dios imbis sa unsay imong gusto?

Unsa nga mga panalangin ang imong nadawat pinaagi sa pagpili nga mosunod sa kabubut-on sa Langitnong Amahan bisan pa og lisod kini?

Si Presidente Russell M. Nelson nangutana og sunod-sunod nga mga pangutana mahitungod sa atong kaandam sa pagtugyan ngadto sa kabubut-on sa Dios. Paggahin og panahon aron mamalandong unsaon nimo sa pagtubag kining mga pangutana sa matinuoron nga paagi. Paghunahuna kon unsa kaha ang imong gikinahanglan aron makatubag og oo sa matag pangutana.

Andam ka ba nga ipatigbabaw ang Dios labaw sa tanan diha sa imong kinabuhi? Andam ka ba nga tugotan ang Dios nga maoy mahimong labing importante nga impluwensiya sa imong kinabuhi? Tugotan ba nimo ang Iyang mga pulong, Iyang mga sugo, ug Iyang mga pakigsaad nga moimpluwensiya sa imong buhaton sa matag adlaw? Tugotan ba nimo ang Iyang tingog nga maoy prayoridad kay sa bisan unsa pang uban? Ikaw ba andam nga himoon ang bisan unsa nga Iyang ipabuhat kanimo nga mas importante kay sa bisan unsang ambisyon? Ikaw ba andam nga ipatuhop ang imong kabubut-on ngadto sa Iyang kabubut-on?

(Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 94)

Ipatigbabaw ang Dios Labaw sa Tanan
President Nelson describes latter-day covenant Israel as those who let God prevail in their lives. He invites us to make God our life’s most important influence.

Opsiyonal: Gustong Makakat-on pa og Dugang?

Unsa ang atong makat-onan mahitungod sa Manluluwas gikan sa Iyang pagkaandam nga motugyan ngadto sa Langitnong Amahan?

Si Elder David A. Bednar sa Korum sa Napulog Duha ka Apostoles nagtudlo nga ang kaaghop sa Manluluwas mao ang mahinungdanon nga kinaiya nga nagtugot Kaniya sa pagtugyan sa Iyang kabubut-on ngadto sa kabubut-on sa Langitnong Amahan.

Ang pagkamakanunayon sa pagkaandam nga modawat sa Ginoo ug lig-on nga pagpugong sa kaugalingon parehong makapadasig ug mapuslanon alang kanatong tanan. Dihang ang usa ka grupo sa mga guwardiya sa templo ug kasundalohan nga Romano miabot sa Getsemani aron pagsakmit ug pagdakop ni Jesus, si Pedro milanit sa iyang espada ug mitigbas sa tuo nga dunggan sa sulugoon sa labawng sacerdote [tan-awa sa Juan 18:10]. Ang Manluluwas dayon mihikap sa dunggan sa sulugoon ug miayo kaniya [tan-awa sa Lucas 22:51]. Palihog timan-i nga Siya mitabang ug mipanalangin sa hayan modakop Kaniya gamit ang samang langitnong gahom nga makapugong unta sa pagdakop ug paglansang Kaniya sa krus.

… Ang kaaghop sa Manluluwas gipakita sa Iyang disiplinado nga pagtubag, lig-on nga pagpugong sa kaugalingon, ug dili buot mogamit sa Iyang walay kinutubang gahom alang sa personal nga kaayohan.

(David A. Bednar, “Maaghop ug Mapaubsanon sa Kasingkasing,” Liahona, Mayo 2018, 33)

Nganong gusto man nako nga motugyan sa akong kabubut-on ngadto sa Dios?

Elder Neal A. Maxwell (1926–2004) sa Korum sa Napulog Duha ka Apostoles nagtudlo:

Daghan kaayo kanato … ang sayop sa paghunahuna nga, sa pagtugot nga ang atong kabubut-on ituhop ngadto sa kabubut-on sa Dios, mawad-an kita sa atong pagkatawo (tan-awa sa Mosiah 15:7). Ang atoa gayod nga gikabalak-an, siyempre, dili ang pag-hatag sa kaugalingon, apan ang hinakog nga mga butang—sama sa atong mga tahas, sa atong panahon, sa atong pagkalabaw sa uban, ug atong mga gipanag-iya. Dili ikatingala nga gisugo kita sa Manluluwas nga wad-on ang atong kaugalingon tungod kaniya (tan-awa sa Lucas 9:24). Siya naghangyo lang kanato sa pagwagtang sa atong daan nga kaugalingon aron makaplagan ang bag-ong kaugalingon. Dili kini kabahin sa pagkawala sa pagkatawo apan sa pagpangita sa iyang tinuod nga pagkatawo! …

… Ang pagtugyan sa kabubut-on mao lang gayod ang talagsaong personal nga butang nga mahalad nato diha sa altar sa Dios. Ang daghan pang mga butang nga atong “ihatag,” mga kaigsoonan, sa tinud-anay mao ang mga butang nga Iya nang gihatag o gipahulam kanato. Hinoon, kon ikaw ug ako sa kataposan motugyan sa atong kaugalingon, pinaagi sa pagpaubos sa atong indibidwal nga kabubut-on ngadto sa kabubut-on sa Dios, niana naghatag gayod kita og makahuluganong butang ngadto Kaniya! Kini lang ang bugtong gipanag-iya nga tinud-anay natong mahatag!

(Neal A. Maxwell, “Swallowed Up in the Will of the Father,” Ensign, Nob. 1995, 23, 24)