Juan 14:1–6; 15:1–11

“Ako ang Dalan, ang Kamatuoran, ug ang Kinabuhi”

Panahon sa Iyang kataposang gabii uban ang Iyang mga disipulo, si Jesukristo mitudlo kanila mahitungod sa Iyang kinaiyahan ug misyon. Iyang gitudlo nga Siya ang dalan pabalik sa Langitnong Amahan, ug Iyang gitandi ang Iyang relasyon ngadto sa Iyang mga disipulo ngadto sa mga sanga sa punoan sa ubas. Kini nga leksiyon makatabang nimo sa pagpamalandong sa imong relasyon kang Jesukristo ug kon unsaon nimo sa pagsunod Kaniya ug pagdawat sa Iyang kalig-on ug suporta.

Ang pipila ka kataposang pagtulon-an sa Manluluwas ngadto sa Iyang mga disipulo gituyo aron makatabang nila nga makasabot sa ilang relasyon ug pagpanginahanglan Kaniya. Ang Manluluwas mitandi sa Iyang Kaugalingon ngadto sa usa ka agianan, ingon man ngadto sa usa ka punoan sa ubas o kahoy nga adunay mga sanga. Paggahin og higayon sa paghunahuna mahitungod sa mga dapit sa inyong kinabuhi diin kamo nanginahanglan og tabang. Tingali mibati kamong nagkinahanglan og tabang samtang kamo naningkamot nga makabalik sa Langitnong Amahan. Lagmit mibati ka nga nagkinahanglan og tabang alang sa mas dugang pa nga kalig-on sa pag-atobang og mga hagit sa imong kinabuhi. Sa imong pagtuon sa mga pagtulon-an sa Manluluwas, pangita og unsay imong makat-onan mahitungod Kaniya ug unsaon Niya pagtabang kanimo.

Tun-i ang usa o ang duha sa mosunod nga mga seksiyon. Hinumdomi ang pagpamalandong kon sa unsang paagi ang Manluluwas makatabang kanimo sa inyong inadlaw-adlaw nga kinabuhi.

Si Jesukristo mao “ang dalan, ang kamatuoran, ug ang kinabuhi” (Juan 14:6)

Basaha ang Juan 14:1–6, nga mangita kon sa unsang paagi ang Manluluwas misaad sa pagtabang niadtong mga mosunod Kaniya.

Unsa nga mga kamatuoran ang gitudlo sa Manluluwas niini nga mga bersikulo?
Unsay gitawag sa Manluluwas sa Iyang Kaugalingon diha sa bersikulo bersikulo 6?
Unsa ang gitudlo sa matag usa niining mga ulohan diha kanimo mahitungod ni Jesukristo ug sa imong relasyon Kaniya?

Kon naghimo ka og lista sa daghang ulohan ug mga tahas ni Jesukristo sa miagi nga leksiyon, mahimo nimo kining dugangan sa unsay imong nadiskobrehan sa Juan 14.

Ang Basahon ni Mormon makadugang sa imong pagsabot sa unsay imong gitun-an sa Bag-ong Tugon. Basaha ang Mosiah 3:17, ug hunahunaa kon sa unsang paagi kini nga bersikulo makatabang nato nga mas makasabot sa Juan 14:6.

Si Presidente Dieter F. Uchtdorf, kanhi sa Unang Kapangulohan, nagtudlo:

Gusto sa Dios nga makatultol ka og balik ngadto Kaniya, ug ang Manluluwas mao ang dalan [tan-awa sa Juan 14:6]. Gusto sa Dios nga makakat-on ka sa Iyang Anak, si Jesukristo, ug makasinati sa dako nga kalinaw ug kalipay nga moabot gikan sa pagsubay sa dalan sa balaan nga pagkadisipulo.

(Dieter F. Uchtdorf, “Pagdawat og usa ka Pagpamatuod sa Kahayag ug Kamatuoran,” Liahona, Nob. 2014, 21)

Kanus-a ka o uban nga imong nailhan nakasinati og halawom nga kalinaw ug kalipay nga miabot gumikan sa pagsunod kang Jesukristo?

Aron makita ang usa ka ehemplo sa usa ka tawo kinsa nakakaplag sa Manluluwas ug napanalanginan pinaagi sa pagsunod Kaniya, kon mahimo, tan-awa ang bidyo nga “Jesus Christ Is the Way” (5:02), nga anaa sa ChurchofJesusChrist.org.

Jesus Christ Is the Way
Our Heavenly Father sent His Son, Jesus Christ, to be our Savior and show us the way to live according to God's plan.

Unsa ang pipila sa paagi nga kita makasunod sa Manluluwas balik ngadto sa Langitnong Amahan?
Unsaon nato pagkahibalo kon kita anaa sa hustong dalan?

Si Jesukristo mao “ang punoan” (Juan 15:5)

ubas nga himoonon og bino diha sa punoan

Si Jesukristo migamit og usa ka pagkompara aron sa pagtudlo sa Iyang mga disipulo mahitungod sa ilang relasyon ngadto Kaniya. Basaha ang Juan 15:1–11, nga mangita niini nga pagkompara.

Kon naghimo ka og lista sa daghang ulohan ug mga tahas ni Jesukristo sa miagi nga leksiyon, mahimo nimo kining dugangan sa unsay imong nadiskobrehan sa Juan 15.

Unsa sa imong hunahuna ang gitudlo ni Jesukristo dinhi niini nga pagkompara?
Unsa nga mga kamatuoran ang imong nakat-onan gikan niini nga pagkompara mahitungod sa atong relasyon kang Jesukristo?

Si Elder Jeffrey R. Holland sa Korum sa Napulog Duha ka Apostoles mipasabot nga ang pagdapit sa Manluluwas nga mosunod Kaniya mao ang pagdapit kanato “sa pagpabilin … mopuyo sa kahangtoran” (“Pabilin Kanako,” Liahona, Mayo 2004, 32). Si Elder Holland mipasabot nganong importante kaayo alang kanato ang pagdawat sa pagdapit sa Manluluwas nga magpabilin diha Kaniya. Mahimo nimong tan-awon ang bidyo “Abide in Me” gikan sa time code 13:26 hangtod sa 14:23, o basaha ang mosunod nga pamahayag.

"Abide in Me"
For the fruit of the gospel to blossom and bless our lives, we must be firmly attached to Him, the Savior of us all.

Si Jesus miingon, “Kon wala ako, wala kamoy mahimo” [Juan 15:5]. Ako mopamatuod nga mao kana ang kamatuoran sa Dios. Si Kristo mao ang tanan kanato ug kita gayod “magpabilin” diha Kaniya sa kanunay, dili matarog, makanunayon, sa kahangtoran. Kay aron ang bunga sa ebanghelyo mamulak ug mopanalangin sa atong mga kinabuhi, kita kinahanglan gayod nga lig-ong magkupot Kaniya, ang Manluluwas kanatong tanan, ug niining Iyang Simbahan, diin nagdala sa Iyang balaang ngalan. Siya ang tinuod nga parras nga mao ang atong tinuod nga tinubdan sa kalig-on ug ang mao lamang nga tinubdan sa kinabuhing dayon. Diha Kaniya dili lamang kita makalahotay apan kita usab mopatigbabaw ug magmadaugon niining balaanong kawsa nga dili gayod mopakyas kanato.

(Jeffrey R. Holland, “Abide in Me,” Liahona, Mayo 2004, 32)

Ang Basahon ni Mormon makatabang nimo nga madugangan ang imong pagsabot sa unsay imong gitun-an sa Bag-ong Tugon. Basaha ang Alma 26:12, ug hunahunaa kon sa unsang paagi kini may kalabotan ngadto sa Juan 15:1–11.

Unsa ang pipila sa mga bunga (mga resulta o mga panalangin) nga imong nakita sa imong kinabuhi dihang naningkamot ka sa pagpabilin diha kang Jesukristo?
Unsa ang pipila ka mga aksiyon nga imong mabuhat aron matabangan ka nga magpabilin diha kang Jesukristo?

Opsiyonal: Gustong Makakat-on pa og Dugang?

Unsa ang ipasabot nga adunay daghang lawak sa balay sa Langitnong Amahan?

Si Propeta Joseph Smith (1805–44) mitudlo:

[Ang pamahayag] nga “Sa balay sa akong Amahan adunay daghang mga lawak” [Juan 14:2] … ingon unta niini—“Sa gingharian sa akong Amahan adunay daghan nga mga gingharian,” aron kamo mahimong manununod sa Dios ug isigka-manununod kanako. … Adunay mga mansyon alang niadtong nagtuman sa celestial nga balaod, ug adunay lain nga mga mansyon alang niadtong wala makatuman sa balaod, ang matag tawo mahiadto asa siya angay.

(Mga Pagtulon-an sa mga Presidente sa Simbahan: Joseph Smith [2007], 57)