Matio 23

Manameloka ny fihatsarambelatsihy ny Mpamonjy

Nandritra ny herinandro farany tamin’ny asa fanompoana izay nataony teto an-tany dia nanameloka ny fihatsarambelatsihin’ireo mpanora-dalàna sy ireo Fariseo ny Mpamonjy. Ity lesona ity dia afaka manampy anao hisoroka ny fihatsarambelatsihy sy ho mpanara-dia feno fanetren-tena an’i Jesoa Kristy.

Inona no atao hoe fihatsarambelatsihy?

Alaivo sary an-tsaina hoe misy kaopy telo azonao isafidianana izay hisotroanao zava-pisotro. Maloto ny ivelan’ny kaopy voalohany, maloto ny anatin’ny kaopy faharoa, ary ilay kaopy fahatelo kosa madio tsy misy pentina.

• Amin’ny fomba ahoana no anehoan’ireo kaopy maloto ny mpihatsaravelatsihy?

Ny teny hoe mpihatsaravelatsihy dia nadika avy tamin’ny teny Grika izay midika hoe “mpilalao sary mihetsika na tantara” ary anehoana ny olona anankiray izay mody misary, na mampitombo zavatra, na mamitaka ka tsy manao zavatra araka ny fihetsika izay asehony. Amin’ny “ankapobeny dia entina milaza olona anankiray izay milaza ny tenany ho mpivavaka kanefa tsy izany akory” (Bible Dictionary, “ Mpihatsaravelatsihy ”). Izy io dia afaka ilazana ihany koa olona anankiray izay milaza ho tsy mpivavaka kanefa izy dia tena mpivavaka be mihitsy.

Rehefa mianatra ny Matio 23 , dia tadiavo ny fahamarinana izay afaka hanampy anao hisoroka ny fihatsarambelatsihy ary mba hahatonga anao ho lasa tahaka an’i Jesoa Kristy bebe kokoa.

Tamin’ny ampahan’ny hafatra ampahibemaso farany izay nomen’ny Mpamonjy nandritra ny herinandro farany tamin’ny asa fanompoana izay nataony teto an-tany, dia nanameloka ny fihatsarambelatsihin’ireo mpanora-dalàna sy ireo Fariseo Izy. Nasongadiny fa ny mpanora-dalàna sy ny Fariseo dia “[nipetraka] eo amin’ny fipetrahan’i Mosesy” ( Matio 23:2), izay midika fa nitana ny toeran’ny manam-pahefana hampianatra ny fotopampianarana sy handika ary hitantana ny lalàna izy ireo. Nihevitra ny tenany ho mendrika kokoa noho ny olon-drehetra tao amin’ny synagoga izy ireo.

Vakio ny Matio 23:3–7 , ka tadiavo ny zavatra izay nolazain’ny Mpamonjy momba ireo fomba izay naha-mpihatsaravelatsihy an’ireo mpanora-dalàna sy ireo Fariseo. Mialohan’ny hamakianao azy, dia mety hanampy anao ny fahalalana ny atao hoe “fylakitera” ( andininy faha 5) dia boaty hoditra kely misy tady ahafahana mamatotra azy eo amin’iny andrina na amin’ny sandry havia izay nampiasain’ireo Jiosy fahiny. Nisy horonan-taratasy kely izay nahitana andinin-tsoratra masina manokana avy ao amin’ny Testamenta Taloha tao anatin’ireo fylakitera. Ny Jiosy dia nanisy an’ireny fylakitera ireny mba hanampy azy ireo hahatsiaro hitandrina hatrany ny didin’ Andriamanitra.

Rehefa avy mamaky ianao, dia mety te hijery ihany koa ny horonan-tsary “Phylacteries” (1:06), izay hita ao amin’ny ChurchofJesusChrist.org.

• Araka ny andininy faha 5 , dia nahoana no nampitomboan’ireo mpanora-dalàna sy ireo Fariseo ny fylakiteran’izy ireo sy ny “somotraviaviny”?

Tsy nanameloka ireo izay nanao fylakitera ny Tompo fa kosa nanameloka ireo izay nampiasa izany tamim-pihatsarambelatsihy na nampitombo ny haben’izany mba ho tsikaritry ny hafa rehefa anaovan’izy ireo izany.

1. Valio ao anatin’ny diary fandalinanao soratra masina ireto fanontaniana manaraka ireto:

• Inona avy ireo loza sasantsasany ateraky ny fanompoana an’ Andriamanitra amin’ny fanasongadinana asa ety ivelany mba ho voamariky ny hafa?

• Nahoana araka ny eritreritrao no tian’ Andriamanitra hanompo Azy amim-pahatsorana sy amim-pahamarinana ianao?

Ankoatra ny fampitandremana ny olona mba tsy hanaraka ny fihetsika izay nasehon’ireo mpanora-dalàna sy ireo Fariseo, dia niresaka mivantana tamin’ireo mpanora-dalàna sy ireo Fariseo ihany koa ny Mpamonjy. Nilaza loza maromaro izay hanjo azy ireo Izy noho ny fihatsarambelatsihin’izy ireo (jereo ny Matio 23:13–33). Loza dia midika ho fahantrana, fahoriana ary alahelo.

Vakio ny Matio 23:23–28 , ary tadiavo ny zavatra izay nolazain’ny Mpamonjy tamin’ireo mpanora-dalàna sy ireo Fariseo.

2. Valio ao anatin’ny diary fandalinanao soratra masina ireto fanontaniana manaraka ireto:

• Amin’ny fomba ahoana no anampian’ireo andininy ireo ny fahatakaranao ny fihatsarambelatsihy?

• Inona no zavatra mety holazainao amin’ny olona iray zay manahy ny ho lasa mpihatsaravelatsihy rehefa manao fahadisoana nefa izy mba miezaka ihany hiaina ny filazantsara?

Ahoana no fomba ahafahantsika misoroka sy mandresy ny fihatsarambelatsihy

Tsy toa ireo mpanora-dalàna sy ireo Fariseo, tsy mba nihatsaravelatsihy mihintsy ny Mpamonjy. Nampianatra ny olona mba tsy hihevitra ny tenany ho tsara noho ny hafa Izy, satria samy zanak’ Andriamanitra avokoa izy ireo, ary mitovy tanteraka eo imasony. Nijoro ho vavolombelona Izy fa ny Ray any An-danitra no Mpahary antsika ary Izy, Kristy dia nirahin’ny Ray ary Izy no tena Tompontsika izay manome fiainana (jereo ny dikantenin’i Joseph Smith, Matio 23:6 [ao aminny Matio 23:9 , fanamarihana ambany pejy’ a]; Matio 23:8–10).

Vakio ny Matio 23:11–12 , ary mitadiava fampianarana izay afaka hanampy antsika handresena sy hisorohana ny fihatsarambelatsihy. Ao amin’ny andininy 12 , ny teny hoe manandratra dia midika ho mampiakatra, ary ny manetry dia midika ho mampidina, afabaraka na tsy mihaja.

• Inona araka ny hevitrao no fitsipika izay ampianarin’i Jesoa Kristy antsika ao amin’ireo andinin-tsoratra masina ireo?

Nampianatra ny Mpamonjy fa raha manetry tena sy manompo ny hafa isika, dia hanandratra antsika indray ny Tompo. Hanampy antsika mba ho tonga tahaka Azy kokoa Izy, ary amin’ny alalan’ny fankatoavana ny didiny sy ny fibebahana marina no hanandratan’ Andriamanitra antsika any amin’ny fanjakana seletialy.

3. Valio ao anatin’ny diary fandalinanao soratra masina ireto fanontaniana manaraka ireto:

• Ahoana no fomba ahafahana milaza fa i Jesoa Kristy dia ohatra amin’ny fanetren-tena sy ny fanompoana ny hafa, ary ny fisorohana ny fihatsarambelatsihy?

• Ahoana no fomba ahafahan’ny fanetren-tena sy ny fanompoana ny hafa hanampy anao hiala amin’ny fihatsarambelatsihy sy mba ho tonga tahaka ny Mpamonjy kokoa?

Vakio ary diniho ireto teny manaraka ireto. Fantaro ny iray na roa amin’ireo teny izay fahitanao matetika.

• Miseho ho olona tsy izaho akory aho.

• Manao ny tsara aho mba hohitan’ny hafa.

• Matetika aho no mieritreritra fa tsara noho ny hafa.

• Na dia manao fahadisoana aza aho dia miezaka amim-pahatsorana hiaina ny filazantsara hatrany.

• Miezaka ny manompo ny hafa aho ary tsy miandry fankasitrahana.

• Miezaka ny manetry tena aho ary tsy mieritreritra ny tenako ho tsara noho ny hafa.

Mangataha fitarihan’ny Fanahy Masina rehefa mahita zavatra izay azonao hatsaraina . Tadidio fa tia anao ny Ray any An-danitra sy i Jesoa Kristy ary mahita ireo ezaka ataonao amin’ny fiainana ny filazantsara. Rehefa mangataka fanampiana avy amin’ny Ray any An-danitra ianao, dia hanampy anao handresy zay mety ho fahalemena na fihatsarambelatsihy Izy.

Tsy voatery atao: Te hianatra misimisy kokoa ve ianao?

Ahoana no fomba nijeren’ny Mpamonjy ireo mpanora-dalàna sy ireo Fariseo mpihatsaravelatsihy?

Tao amin’ny lahateniny “Ny Feo Fampitandremana,” izay nataon’ny Loholona D. Todd Christofferson ao amin’ny Kôlejin’ny Apôstôly Roambinifolo dia nampianatra momba ny fomba nanamelohan’i Jesoa ny fihatsarambelatsihy izay nataon’ireo mpanora-dalàna sy ireo Fariseo ( Liahona, mey 2017, 108–11).

Ny feo fampitandremana

Mangataka ny Loholona Christofferson mba hampitandremantsika ny hafa amin’ny alalan’ny fizarana ireo fitsipiky ny filazantsara mba hahafahan’izy ireo ihany koa mianatra ireo fitahiana avy amin’ny drafitra lehiben’ny fahasambarana.

Mihatsaravelatsihy ve aho raha manao fahadisoana rehefa miezakamiaina ny filazantsara?

Nampianatra ny Loholona Jeffrey R. Holland ao amin’ny Kôlejin’ny Apôstôly Roambinifolo hoe:

Ry rahalahy sy anabavy, maniry ny hanana fiainana tahaka ny an’i Kristy kokoa isika tsirairay avy nefa matetika tsy vitantsika ny miaina an’izany. Raha miaiky izany amin-kitsimpo isika ary miezaka ny hivoatra dia tsy ho mpihatsaravelatsihy intsony isika, fa olombelona.

(Jeffrey R. Holland, “Aoka ho tanteraka ianareo—amin’ny farany,” Ensign na Liahona, nôv. 2017, 42)