Mga Taga-Roma 4–5

Hugot nga Pagtuo, Mga Buhat, ug Grasya

Sa iyang sulat ngadto sa mga Taga-Roma, si Pablo nagtinguha nga tabangan ang Romanhong mga Santos nga makasabot sa grasya ni Kristo pinaagi sa pagtudlo mahitungod sa koneksiyon niini sa hugot nga pagtuo ug mga buhat. Ang mga panudlo ni Pablo makatabang kanato nga mapalawman ang atong pagsabot mahitungod sa atong panginahanglan sa pagpasaylo ug kaluwasan pinaagi sa grasya ni Jesukristo. Kini nga leksiyon makatabang kanimo nga madugangan ang imong pagsabot ug pagpasalamat sa grasya ni Jesukristo.

Unsay makaluwas nimo?

Hunahunaa nga kamatyonon na ka sa kauhaw diha sa usa ka desiyerto ug nga adunay usa ka botelya sa tubig ibabaw sa duol nga bungtod. Unsa ka importante ang matag usa sa mosunod alang sa imong kaluwasan?

1. Isulat ang mosunod nga teksto ug pagdrowing og usa ka hulagway susama niini diha sa imong journal sa pagtuon.

1. Ang imong pagtuo nga ang tubig makaluwas ninyo

2. Ang imong paningkamot aron makaadto sa tubig

3. Ang tubig mismo

• Ngano nga ang tubig mismo mao ang bugtong butang nga makapugong kanimo nga mamatay sa kauhaw?

• Ngano nga ang pagtuo sa tubig ug ang paningkamot nga makaadto sa tubig dili paigo?

• Sa unsang paagi nga ang imong pagtuo, ang imong paningkamot, ug ang tubig tanan magtinabangay?

Kini nga senaryo makatabang nimo nga masabtan ang mga pagtulon-an ni Pablo kon sa unsang paagi nga ang hugot nga pagtuo, ang mga buhat, ug ang grasya may kalabotan sa kapaangayan.

• Unsaon nimo paghatag og kahulogan sa mga pulong nga hugot nga pagtuo, mga buhat, ug grasya?

Mahimong makatabang ang pagrebyo sa mga kahulogan niini nga mga pulong diha sa leksiyon sa Mga Taga-Roma 2–3 o diha sa Giya ngadto sa mga Kasulatan (scriptures.ChurchofJesusChrist.org).

Sa panahon ni Pablo, pipila ka Judio nga mga Kristiyanos ang nagtuo nga sila naluwas pinaagi sa ilang mga buhat sa pagtuman sa balaod ni Moises. Gisulayan pagtul-id ni Pablo kining sayop nga pagtuo. Basaha ang Hubad ni Joseph Smith sa Mga Taga-Roma 4:16.

• Unsa ang gitudlo niini nga bersikulo mahitungod sa giunsa kita pagkatarong, o gipasaylo sa atong mga sala?

Niini nga bersikulo, si Pablo nagtudlo nga kita gihatagan og kaangayan sa hugot nga pagtuo ug mga buhat pinaagi sa grasya ni Jesukristo.

2. Butangi og timaan ang hulagway nga imong gidrowing sa mosunod nga paagi ug isulat ang mga tubag sa duha ka pangutana sa ubos sa hulagway:

Isulat ang mga pulong nga hugot nga pagtuo, mga buhat, ug grasya tapad sa hugpong sa mga pulong sa imong hulagway nga motakdo sa matag pulong.

• Unsa may makat-onan nimo gikan niini nga pagtandi kabahin sa hugot nga pagtuo ug mga buhat?

• Unsa ang imong makat-onan gikan sa pagtandi mahitungod sa grasya sa Manluluwas?

Dugang nga pagsabot mahitungod sa grasya ni Jesukristo

Ang grasya ni Jesukristo naghatag kanato og kaangayan, o nagpasaylo sa atong mga sala, ug kini nagpanalangin usab kanato sa lain pang mga paagi. Si Jesukristo wala lamang naghatag og tubig nga makaluwas sa kinabuhi, apan Siya usab nagpalig-on sa atong hugot nga pagtuo ug mga paningkamot aron kita makakuha sa maong tubig. Kita mapanalanginan sa Iyang grasya sa wala pa, atol sa, ug human sa atong paggamit sa hugot nga pagtuo diha Kaniya ug paghimo og maayong mga buhat.

Si Presidente Dieter F. Uchtdorf, kanhi sa Unang Kapangulohan, mitudlo:

Sa atong tibuok nga kinabuhi, ang grasya sa Ginoo naghatag og temporal nga mga panalangin ug espiritwal nga mga gasa nga mopalambo sa atong mga abilidad ug mopabuhong sa atong kinabuhi. Ang Iyang grasya makahashas kanato. Ang Iyang grasya motabang kanato nga mahimong labing maayo.

(Dieter F. Uchtdorf, “Ang Gasa sa Grasya,” Liahona, Mayo 2015, 108)

• Sa unsang paagi nga ang grasya sa Manluluwas makatabang kanimo aron mahimong imong labing maayong kaugalingon?

Basaha ang mosunod nga mga tudling sa kasulatan ug pangita og lain pang mga panalangin nga may kalabotan sa grasya sa Manluluwas.

• Mga Taga-Roma 5:1–2, 21

• Ether 12:27

• Moroni 10:32–33

• Unsa nga dugang nga mga panalangin ang moabot gikan kang Jesukristo pinaagi sa Iyang grasya?

• Kanus-a nimo nasinati ang grasya sa Manluluwas sa imong kinabuhi?

• Sa unsang paagi nga kini nakaimpluwensiya sa imong mga pagbati kabahin sa Manluluwas?

Pagdapit sa grasya sa Manluluwas nganha sa imong kinabuhi

Si Presidente Uchtdorf mihatag niini nga panabot mahitungod kon unsaon ninyo nga mahimong mas hingpit nga modawat sa grasya ni Jesukristo:

Ang grasya usa ka gasa sa Dios, ug ang atong tinguha nga magmasulundon sa matag sugo sa Dios mao ang paghatag sa atong mortal nga kamot sa pagdawat niining sagradong gasa gikan sa atong Langitnong Amahan.

(Dieter F. Uchtdorf, “Ang Gasa sa Grasya,” Liahona, Mayo 2015, 110)

3. Tubaga ang mosunod nga mga pangutana diha sa imong journal sa pagtuon:

• Unsa nga mga hunahuna ug mga pagbati ang moabot kanimo kon kamo maghunahuna mahitungod sa mga epekto sa grasya ni Jesukristo sa imong kinabuhi?

• Unsa man ang imong mabuhat aron mas hingpit nga madapit ang grasya ni Jesukristo diha sa imong kinabuhi?

Opsiyonal: Gustong Makakat-on Pa og Dugang?

Unsaon man nato pag-ila sa atong panginahanglan sa grasya?

Si Presidente Dieter F. Uchtdorf, kanhi sa Unang Kapangulohan, nangutana sa mosunod nga mga pangutana mahitungod sa atong panginahanglan sa grasya:

Kita ba nakasabot sa atong pagka-utangan ngadto sa atong Langitnong Amahan ug nangamuyo sa tibuok natong mga kalag alang sa grasya sa Dios?

Kon kita moluhod sa pag-ampo, kini mao ba ang paghinumdom sa labing nindot sa atong kaugalingong pagkamatarong, o pagkumpisal ba kini sa atong mga sayop, pagpangamuyo ba kini para sa kalooy sa Dios, ug paghilak ba sa pagpasalamat alang sa nindot nga plano sa katubsanan?

(Dieter F. Uchtdorf, “Ang Gasa sa Grasya,” Liahona, Mayo 2015, 109)

Unsa ang usa ka pananglitan sa grasya nga naglihok sa kinabuhi sa usa ka tawo?

Ang bidyo nga “Faith Journey: When Parents Get Divorced [Panaw sa Hugot nga Pagtuo: Kon Madiborsiyo ang mga Ginikanan]” (3:05), anaa sa ChurchofJesusChrist.org, naghulagway sa kasinatian sa usa ka babaye kinsa nakakaplag nga ang grasya ni Jesukristo nakatabang kaniya sa pagtubag sa diborsiyo sa iyang mga ginikanan.

Faith Journey: When Parents Get Divorced

When Natalie’s parents were married, everything made sense. They were going to live together forever as a family. And then her parents got divorced, and Natalie’s testimony crumbled. She questioned everything about her religion.

Mga Taga-Roma 4:16. Nganong si Abraham gigamit isip usa ka panig-ingnan sa pagkadawat og kaangayan?

Alang sa pagtul-id sa ideya nga kadto lamang mga natuli ug nagtuman sa balaod ni Moises ang maluwas, si Pablo nagtudlo nga si Abraham nakadawat og mga panalangin sa wala pa siya matuli ug sa mga siglo sa wala pa gihatag ang balaod ni Moises. Si Abraham dayon nagpadayon sa pagkamatinud-anon human makigsaad sa Dios ug nagpatuli. Busa, si Pablo nakapakita nga ang mga indibidwal wala nakadawat og kaangayan pinaagi sa pagsunod sa balaod ni Moises apan diha sa hugot nga pagtuo ug mga buhat pinaagi sa grasya ni Jesukristo.

Sa unsang paagi nga ang grasya sa Dios may kalabotan sa Pagkapukan ni Adan?

Sa Mga Taga-Roma 5:12–21 si Pablo nagtudlo nga si Jesukristo nagtabang kanato nga mabuntog ang mga epekto sa Pagkapukan. Tungod sa paglapas ni Adan, ang sala ug kamatayon misulod sa kalibotan. Hinuon, tungod sa “gasa sa grasya, pinaagi sa usa ka tawo nga mao si Jesukristo” (Mga Taga-Roma 5:15), ang tanan makabuntog sa mga epekto sa sala ug kamatayon ug makadawat sa kinabuhing dayon. Ang pakisayran ni Pablo sa Pagkapukan nagtabang kanato nga makasabot sa halayo og nalukopan nga gahom sa grasya sa Manluluwas nga makabuntog sa tanang butang.