Kapaangayan pinaagi sa Hugot nga Pagtuo kang Jesukristo
Imahe
Screenshot gikan sa 2019 nga ComeUntoChrist.org nga Bidyo.
Gihigugma ni Pablo ang mga Santos sa Roma ug gusto silang tabangan nga mahiusa pinaagi sa ilang hugot nga pagtuo kang Jesukristo. Ang parehong Judio ug Hentil nga mga kinabig nagkinahanglan og tabang pagsabot sa ilang pagsalig kang Jesukristo ug kon sa unsang paagi makadawat og mga panalangin sa Iyang Pag-ula. Kini nga leksiyon mahimong makatabang nimo aron mas masabtan ang panginahanglan natong tanan nga mapasaylo sa atong mga sala, o mahatagan og kaangayan, pinaagi kang Jesukristo.
Ang tanan nagkinahanglan kang Jesukristo
Ikonsiderar ang pagdrowing og usa ka paghulagway sa mosunod nga senaryo sa imong journal sa pagtuon:
Hunahunaa nga anaa ikaw sa dalan padulong sa usa ka nindot kaayo nga destinasyon. Apan, samtang naglakaw ka sa dalan nakakita ka og usa ka babag o bungbong nga nagbabag sa agianan. Ang babag nakapaundang sa bisan unsa nga pag-uswag ug imposible nga makalatas niini sa imong kaugalingong paningkamot.
Butangi og timaan ang destinasyon nga presensiya sa Dios.
Ngano nga ang pagbalik ngadto sa presensiya sa Dios usa man ka butang nga imong gitunguha?
Ang mga miyembro sa Simbahan sa adlaw ni Pablo naggikan sa lainlaing mga kultura ug mga kagikan. Apan, usa ka butang nga managsama silang tanan, mao nga sila nakasala ug busa dili takos mosulod sa presensiya sa Dios. Diha sa imong pagtuon sa Mga Taga-Roma 2–3, tinguhaa nga makasabot kon unsa ang nahimo sa Langitnong Amahan ug sa Iyang Pinalanggang Anak aron ang tanang tawo makabuntog sa babag nga nagpugong kanila sa pagbalik ngadto sa presensiya sa Dios.
Aron mas masabtan ang mga pagtulon-an ni Pablo ngadto sa mga Taga-Roma, ang mosunod nga mga kahulogan mahimong makatabang:
Kapaangayan, paghatag og kaangayan, nahatagan og kaangayan: “Mapasaylo gikan sa silot sa sala ug ipahayag nga walay sala. Ang usa ka tawo kahatagan og kaangayan pinaagi sa grasya sa Manluluwas pinaagi sa hugot nga pagtuo diha Kaniya. Kini nga hugot nga pagtuo gipakita pinaagi sa paghinulsol ug pagsunod sa mga balaod ug mga ordinansa sa ebanghelyo. Ang Pag-ula ni Jesukristo nakahimo sa katawhan sa paghinulsol ug mahatagan og kaangayan o pasayloon gikan sa silot nga ila unta nga madawat” (Giya ngadto sa mga Kasulatan, “ Kapaangayan, Paghatag og Kaangayan,” scriptures.ChurchofJesusChrist.org).
Hugot nga Pagtuo: “Pagsalig ug pagpiyal diha ni Jesukristo nga mogiya sa usa ka tawo sa pagsunod kaniya” (Giya ngadto sa mga Kasulatan, “ Hugot nga Pagtuo,” scriptures.ChurchofJesusChrist.org).
Ang balaod: Kini nga pulong nagpasabot sa balaod ni Moises ug ang kauban nga mga panggawas nga mga aksiyon niini, o “mga buhat” (tan-awa sa “Agosto 7–13. Mga Taga-Roma 1–6: ‘Ang Gahom sa Dios alang sa Kaluwasan,’” sa Dali Sunod Kanako—Alang sa mga Indibidwal ug mga Pamilya: Bag-ong Tugon 2023; tan-awa usab sa Giya ngadto sa mga Kasulatan, “ Balaod ni Moises,” scriptures.ChurchofJesusChrist.org).
Grasya: Ang gahom gikan sa Dios nga nagtugot sa mga lalaki ug sa mga babaye sa pagbaton og mga panalangin niini nga kinabuhi ug sa pag-angkon sa kinabuhi nga dayon ug kahimayaan human sila makapakita og hugot nga pagtuo, makahinulsol, ug makahatag sa ilang labing maayo nga panglimbasug sa paghupot sa mga sugo. (tan-awa sa Giya ngadto sa mga Kasulatan, “ Grasya ”).
Basaha ang Mga Taga-Roma 3:10–12, 20–23, ug pangita kon giunsa ni Pablo paghulagway ang babag taliwala kanato ug sa Dios.
Unsa nga mga hugpong sa mga pulong gikan sa mga pagtulon-an ni Pablo ang makatabang kanato nga makasabot kon unsa ang babag?
Isulat kini nga mga hugpong sa mga pulong sa babag diha sa imong gidrowing. Basaha ang mosunod nga pamahayag ni Presidente Dieter F. Uchtdorf, kanhi sa Unang Kapangulohan, ug pangita og dugang nga panabot kon unsa ang girepresentar sa babag:
Imahe
Opisyal nga hulagway ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga hulagway niadtong 2008 nga gipuli sa litrato nga gikuha niadtong 2004.
Sanglit kitang tanan “nakasala, ug nakabsan sa himaya sa Dios,” [Romans 3:23] ug tungod “walay butang nga mahugaw nga makasulod sa gingharian sa Dios,” [1 Nephi 15:34], kitang tanan dili takos sa pagbalik ngadto sa presensya sa Dios.
Bisan kon kita moalagad sa Dios uban sa tibuok natong mga kalag, kini dili igo, tungod kay kita sa gihapon “dili mapuslanon nga mga sulugoon” [Mosiah 2:21]. Dili kita makaangkon sa atong agianan ngadto sa langit; ang gipangayo sa hustisya nagbarog isip babag, diin kita walay gahom sa pagbuntog sa atong kaugalingon.
Paghunahuna mahitungod sa mga dapit diin ikaw napakyas o sa mga sala nga imong gipaningkamotan nga mabuntog.
Basaha ang Mga Taga-Roma 3:24–28, ug pangitaa unsa ang gitudlo ni Pablo mahitungod sa bugtong paagi nga kita matagaan og kaangayan, o mapasaylo sa atong mga sala.
Usa ka kamatuoran nga imong makat-onan gikan niini nga mga bersikulo mao nga pinaagi sa matinud-anong pagdawat kang Jesukristo, ang tanang katawhan mahimong mahatagan og kaangayan pinaagi sa Iyang grasya.
Unsa nga mga hunahuna o mga pagbati ang anaa kanimo sa dihang ikaw mamalandong niini nga kamatuoran?
Si Elder Dieter F. Uchtdorf sa Korum sa Napulog Duha ka Apostoles nagtudlo giunsa sa Pag-ula ni Jesukristo pagbag-o sa atong panglantaw sa atong mga sala ug mga pagka-dili hingpit:
Imahe
Opisyal nga hulagway ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga hulagway niadtong 2008 nga gipuli sa litrato nga gikuha niadtong 2004.
Ang walay kinutoban nga Pag-ula sa Manluluwas hingpit nga miusab sa paagi sa atong pagtan-aw sa atong mga kalapasan ug mga diperensya. Imbes nga magsige og hunahuna niini ug mobati nga wala nay katubsanan o wala nay paglaom, makakat-on kita gikan niini ug mobati nga malaomon. Ang makalimpyo nga gasa sa paghinulsol nakatugot kanato nga makabiya sa atong mga sala ug motumaw nga bag-o nga binuhat.
Tungod ni Jesukristo, ang atong mga kapakyasan dili kinahanglan nga maoy modeterminar kanato. Kini makapahimo nato nga mas maayo.
Sa unsang paagi nga ang imong panglantaw sa imong kaugalingong mga sayop ug mga pagka-dili hingpit matandi sa unsa ang gihulagway ni Elder Uchtdorf?
Pagdugang sa imong gidrowing pinaagi sa paghulagway giunsa ni Jesukristo pagtabang kanato aron mabuntog ang babag.
1. Tubaga ang mosunod nga mga pangutana diha sa imong journal sa pagtuon:
Sa unsang paagi nga ang pagsabot nga kitang tanan makasala ug mapakyas sa kaluwasan makausab sa paagi nga atong gilantaw si Jesukristo?
Unsa nga mga panabot, mga pagbati, o mga impresyon ang anaa kanimo tungod sa unsay imong nakat-onan niini nga leksiyon?
Opsiyonal: Gustong Makakat-on Pa og Dugang?
Unsaon nako nga mas masabtan ang kapaangayan?
Si Elder D.Todd Christofferson sa Korum sa Napulog Duha ka Apostoles mitudlo sa mosunod mahitungod sa kahulogan sa kapaangayan:
Imahe
Hulagway ni Elder D. Todd Christofferson. Gilitratohan niadtong Marso 2020.
Tungod “sa walay kinutuban nga mithi sa Iyang talagsaon nga maulaong sakripisyo,” si Jesukristo makatagbaw o “makatubag sa katuyoan sa balaod” alang sa atong kaayohan. Ang pagpasaylo moabot pinaagi sa Iyang grasya kinsa nakatagbaw sa mga gipangayo sa kaangayan [justice] pinaagi sa Iyang kaugalingon nga pag-antos. … Iyang gitangtang ang pagpanghimaraot kanato sa walay pagtangtang sa balaod. Kita napasaylo ug gibutang sa usa ka kondisyon sa pagkamatarong uban Kaniya. Mamahimo kitang, sama Kaniya, walay sala. Gipatunhay kita ug gipanalipdan pinaagi sa balaod, pinaagi sa kaangayan. Kita, maingon nga, nahatagan og kaangayan.
Sa ingon, kita mahimong tukma nga mamulong sa usa kinsa nahatagan og kaangayan nga napasaylo, walay sala, o walay pagbati nga sad-an.
(D. Todd Christofferson, “Justification and Sanctification,” Ensign, Hunyo 2001, 20)
Nganong ang kalibotan nagkinahanglan man kang Jesukristo?
Tan-awa ang bidyo nga “Why We Need a Savior [Nganong Nagkinahanglan Kita og Manluluwas]” (2:15), anaa sa ChurchofJesusChrist.org.
Ang sala nakabalda ba sa plano sa Langitnong Amahan?
Si Presidente Dieter F. Uchtdorf, kanhi sa Unang Kapangulohan, mitudlo:
Imahe
Opisyal nga hulagway ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga hulagway niadtong 2008 nga gipuli sa litrato nga gikuha niadtong 2004.
Ang atong Langitnong Amahan nahibalo daan sa wala pa kita moanhi niining mortal nga kinabuhi nga daotang mga pwersa motintal kanato nga mapalayo sa atong tumong aron malayo gikan sa atong agianan, “kay nakasala ang tanan, ug nahilayo sa Dios” [Mga Taga-Roma 3:23]. Mao nga Siya nag-andam og paagi alang kanato sa pagbuhat og mga pag-usab. Pinaagi sa maluluy-on nga pamaagi sa tinuod nga paghinulsol ug sa Pag-ula ni Jesukristo, ang atong mga sala mahimong mapasaylo ug kita “dili mamatay, kondili makabaton og kinabuhing dayon” [Juan 3:16].
Unsa ang gipasabot ni Pablo dihang miingon siya nga ang “Mga Hentil … magabuhat sa gimbut-an sa kasugoan”? (Mga Taga-Roma 2:14)
“Giila ni Pablo nga ang pipila ka mga Hentil kinaiyanhon nagpuyo sa moral nga kinabuhi. … Kini nga mga Hentil nagsunod sa Kahayag ni Kristo, nga ‘usa ka impluwensiya alang sa maayo diha sa mga kinabuhi sa tanan nga mga katawhan (Juan 1:9; D&C 84:46–47)’ [Giya ngadto sa mga Kasulatan, “Kahayag, Kahayag ni Kristo,” scriptures.ChurchofJesusChrist.org]. Bisan og wala silay balaod ni Moises, si Pablo miingon nga anaa kanila ‘ang buhat sa balaod nga nahisulat sa ilang mga kasingkasing’ (Mga Taga-Roma 2:15)” (“Mga Taga-Roma 1–3,” sa Manwal sa Estudyante sa Bag-ong Tugon [2018], 337).