Natintal na ba ka sa paghunahuna sa panahon nga makapahigawad, dili makiangayon, o lisod nga mga sitwasyon kon ang Dios nagpakabana kanimo? Ang sulat ni Pablo ngadto sa mga Santos sa Roma, ang pipila kinsa nag-antos sa makalilisang nga mga pagsulay, naglakip og makapahupay nga mensahe alang ni bisan kinsa nga nag-antos. Kini nga leksiyon makatabang kanimo nga mobati og paglaom ug kahupayan pinaagi sa gugma sa Langitnong Amahan ug ni Jesukristo samtang nag-atubang kamo sa mga pagsulay ug walay kasegurohan.
Unsa ang imong ipabuhat?
Paghunahuna mahitungod sa unsay isugyot sa usa ka doktor aron makatabang sa mosunod nga mga kondisyon:
Sakit sa tiyan
Nabali nga tudlo sa tiil
Labad sa ulo tungod sa migraine
Sip-on
Tubaga ang mosunod nga mga pangutana:
Unsang piho nga tambag ang lagmit mahatag alang sa matag usa niadtong mga kondisyon?
Unsa ang kinatibuk-ang tambag ang lagmit makatabang sa pagtambal sa tanan niadtong mga kondisyon?
Siyempre, dili tanang mga pagsulay pisikal ang kinaiya. Daghang mga tawo ang nag-antos sa mental, emosyonal, ug espiritwal nga mga hagit. Ang atong Manluluwas nasayod unsaon sa pagtabang ug paglig-on ang matag usa kanato, bisan unsa pa ang atong gipanlimbasogan. Samtang ang mga pagsulay sa matag tawo talagsaon, ang Dios nagtudlo kanato og mahangtoronnga mga kamatuoran nga makatabang ug makahupay kanato sa bisan unsang malisod nga sitwasyon. Sa imong journal sa pagtuon, paghimo og mubo nga listahan sa mga pagsulay nga gusto nimo o imong mga minahal nga tabangan.
Unsa ang nahibaloan na nimo mahitungod sa Langitnong Amahan, ni Jesukristo, ug sa plano sa kaluwasan nga nakatabang ninyo niining mga pagsulay? Sa unsang paagi kana nga kahibalo nakatabang kanimo?
Samtang ang imong pagpamatuod dili makapamenos sa katinuod, kasakit, o kalisod sa mga pagsulay nga nasinati ninyo ug sa imong mga minahal, kini makahatag og paglaom, kahupayan, ug usa ka mahangtorong panglantaw atol niadtong mga pagsulay.
Pipila lang ka tuig human mipadala si Pablo sa iyang epistola [sulat] ngadto sa mga taga Roma, ang mga Santos sa Roma nag-antos og makalilisang nga mga pagpanggukod. Basaha ang Mga Taga-Roma 8:18, 24–25, 28, 31–39, ug markahi ang kada hugpong sa pulong nga sa imong pagtuo makatabang o makahupay sa usa ka tawo, dili igsapayan sa ilang piho nga mga kalisdanan.
1. Kompletoha ang mosunod diha sa imong journal sa pagtuon:
Pagrekord og usa ka hugpong sa pulong gikan niini nga mga bersikulo nga nakapadayeg nimo. Nganong gipili nimo kana nga hugpong sa pulong?
Irekord kon sa unsang paagi nga ang pagkasayod sa mga kamatuoran nga gitudlo nianang hugpong sa mga pulong makatabang kanimo ug sa imong minahal sa pipila sa imong piho nga mga kalisdanan.
Ikonsiderar ang pagmemorya sa hugpong sa mga pulong nga imong gipili. Mahimo usab kang magmugna og inadlaw nga pahinumdom niining hugpong sa mga pulong diha sa elektronik nga aparato o isulat kini ug ibutang kini diin imong makita adlaw-adlaw alang sa sunod nga pipila ka mga adlaw.
Ang gugma sa Langitnong Amahan ug ni Jesukristo
Usa sa mga hugpong sa mga pulong nga lagmit imong namarkahan niining mga bersikulo nagtudlo sa kamatuoran nga “[walay maka]pahimulag kanato gikan sa gugma sa Dios” (Mga Taga-Roma 8:39).
Ang Langitnong Amahan ug si Jesukristo gusto nga kamo mahibalo nga Sila nahigugma kanimo. Sila nagpakita nianang maong gugma pinaagi sa mga buhat ug mga pulong.
Sumala sa Mga Taga-Roma 8:32, unsa ang gibuhat sa Langitnong Amahan aron mapakita nga Siya nahigugma kanimo?
Basaha ang tudling sa doktrinal nga kahanas nga makita sa Juan 3:16, ug matikdi unsa ang gitudlo sa Manluluwas mahitungod sa rason sa pagpadala sa Langitnong Amahan sa Iyang Anak dinhi sa yuta. Mahimo ka nga mo-cross reference o mo-link niini nga tudling ngadto sa Mga Taga-Roma 8:32.
Kanus-a ninyo nabati ang gugma sa Langitnong Amahan ug ni Jesukristo diha sa imong kinabuhi? Sa unsang paagi ang Ilang gugma nakatabang kanimo sa imong mga kalisdanan?
Sa imong journal sa pagtuon, irekord unsa ang imong nakat-onan karon mahitungod sa Langitnong Amahan ug kang Jesukristo nga gusto nimo mahinumdoman. Mahimo usab nimong ikonsiderar ang pagsulat og usa ka mubo nga sulat ug ihatag kini ngadto sa usa ka sakop sa pamilya o higala kinsa makabenepisyo gikan sa usa ka butang nga imong nakat-onan o nabati karon.
Opsiyonal: Gustong Makakat-on Pa og Dugang?
Unsa ang buot ipasabot nga ang pag-antos nga atong giagian sa yuta “dili takos nga itandi sa himaya nga ipadayag ra unya kanato”? (Mga Taga-Roma 8:18)
Si Sister Linda S. Reeves, kanhi Ikaduhang Magtatambag sa Kinatibuk-ang Kapangulohan sa Relief Society, mitudlo:
Imahe
Opisyal nga hulagway ni Linda S. Reeves, gipaluyohan sa Abril 2012 nga kinatibuk-ang komperensiya isip ikaduhang magtatambag sa kinatibuk-ang kapangulohan sa Relief Society niadtong, Oktubre 2012. Gi-release sa Abril 2017 nga Kinatibuk-ang Komperensya.
Wala ko masayod nganong daghan kita og mga pagsulay, apan kini ang akong personal nga gibati nga ang ganti dako kaayo, hilabihan ka mahangtoron ug walay kataposan, hilabihan ka malipayon ug lapas pa sa atong panabot nga nianang adlaw sa pagganti, atong bation nga moingon ngadto sa atong maloloy-on, mahigugmaong Amahan, “Kadto lang ba ang tanan nga gikinahanglan?” Ako nagtuo nga kon kada adlaw mahinumdom ug maila nato ang kadako sa gugma sa atong Langitnong Amahan ug sa atong Manluluwas alang kanato, andam kitang mobuhat sa bisan unsa aron mahibalik og usab sa Ilang presensya, gilibotan sa Ilang gugma sa kahangtoran. Unsay kapuslanan … sa atong giantos dinhi kon, sa katapusan, kadtong mga pagsulay mao gayod ang mga butang nga mopasarang kanato alang sa kinabuhing dayon ug kahimayaan didto sa gingharian sa Dios uban sa atong Amahan ug Manluluwas?
Sa unsang paagi nga ang atong mga pagsulay “alang sa [atong] kaayohan”? (Mga Taga-Roma 8:28)
Si Elder James B. Martino sa Seventy miingon:
Imahe
Opisyal nga Hulagway ni Elder James B. Martino. Gilitratohan niadtong Marso 2017.
Ang atong Langitnong Amahan, nga nagmahal kanato sa hilabihan ug sa hingpit, nagtugot kanato nga makabaton og mga kasinatian nga makapahimo kanato sa pagpalambo sa mga kinaiya ug mga hiyas nga atong gikinahanglan aron mahimong mas mahisama ni Kristo. Ang atong mga pagsulay moabut sa daghang mga matang, apan ang matag usa magtugot kanato nga mas mahisama sa Manluluwas samtang nagkat-on kita sa pag-ila sa maayo nga nagagikan sa matag kasinatian. Sa atong pagsabot niini nga doktrina, atong nabatonan ang mas dako nga kasigurohan sa gugma sa atong Amahan. Mahimong dili kita masayod niining kinabuhia nganong nag-atubang kita sa unsay atong gisagubang, apan atong bation ang kamasaligon nga kita motubo gikan sa kasinatian.
Unsa ang buot ipasabot nga walay “makapahimulag kanato gikan sa gugma sa Dios”? (Mga Taga Roma 8:39)
Si Presidente Thomas S. Monson (1927–2018) miingon:
Imahe
Opisyal nga hulagway ni Presidente Thomas S. Monson, 2008.
Ang inyong Langitnong Amahan nahigugma kanimo—matag usa ninyo. Kana nga gugma dili gayod mausab. Dili kini maimpluwensyahan sa imong panagway, mga kabtangan, o kantidad sa kwarta nga anaa sa imong bank account. Dili kini mausab sa imong mga talento ug mga abilidad. Anaa ra kini. Anaa kini alang kanimo kon kamo naguol o malipayon, nawad-an sa paglaom o malaomon. Ang gugma sa Dios anaa alang kanimo dili igsapayan kon mobati man kamo nga angayan o dili sa gugma. Anaa ra kini kanunay.
Tungod kay ang Dios mahigugmaon kaayo, Iya bang luwason ang tanan bisan pa sa ilang mga pagpili?
Si Elder D. Todd Christofferson sa Korum sa Napulog Duha ka Apostoles mitudlo sa mosunod mahitungod sa gugma sa Dios:
Imahe
Hulagway ni Elder D. Todd Christofferson. Gilitratohan niadtong Marso 2020.
Ang gugma sa [Dios] gihulagway sa kasulatan isip “dako nga katingalahan nga gugma,” “hingpit nga gugma,” “matubsanon nga gugma,” ug “gugma nga walay kataposan.” Mas maayo kini nga mga termino tungod kay ang pulong nga walay kondisyon maghatod og sayop nga mga impresyon mahitungod sa balaang gugma, sama sa, mouyon ra ang Dios sa tanang butang ug dili ra kita hukman kay ang Iyang gugma walay kondisyon, o ang Dios walay pangayoon gikan kanato tungod kay ang Iyang gugma walay kondisyon, o ang tanan luwas na sa langitnong gingharian sa Dios tungod kay ang Iyang gugma walay kondisyon. Ang gugma sa Dios walay sukod ug kini mohangtod, apan kon unsay kahulogan niini sa matag usa kanato mag-agad kon unsaon nato sa pagsanong ang Iyang gugma.
