Mga batan-ong lalaki ug mga batan-ong babaye naglakaw sa Crystal Gardens sa Navy Pier sa Chicago. Adunay mga palmera ug ubang mga tanom diha sa background.
Nakasinati ka na ba sukad nga mibati nga naglisod sa pakighiusa sa ubang miyembro sa Simbahan? Ang mga Santos sa Roma kinsa nagpuyo sa panahon ni Pablo nagagikan sa nagkalainlaing mga kagikan ug mga kultura. Usahay sila adunay mga dili pagsinabtanay ug mga tensiyon sa usag usa. Agig tubag, si Pablo miawhag kanila nga “[ma]nagkaangay kamo sa inyong panghunahuna, ang usa ngadto sa usa” (Mga Taga-Roma 12:16). Kini nga leksiyon makatabang nimo aron makakita og mga paagi aron mahimong mas mahiusa sa ubang mga miyembro sa Simbahan sa Manluluwas.
Kitang tanan mahimong magkahiusa
Si Micah ug iyang pamilya nabunyagan tulo ka tuig ang milabay. Nagkinahanglan og pipila ka panahon aron mapahiangay ang pamilya ni Micah sa bag-ong paagi sa kinabuhi isip mga miyembro sa Simbahan, apan sila nakadawat og lig-ong sosyal nga suporta ug pagdawat gikan sa mga miyembro sa ilang branch. Bag-ohay lang, ang amahan ni Micah nakadawat og bag-ong trabaho, ug ang iyang pamilya mibalhin sa lain nga lugar. Si Micah nagtambong og mga kalihokan sa simbahan ug kabatan-onan sa iyang bag-o nga ward sulod sa pipila ka semana, apan naglisod siya sa pagbati nga gidawat didto. Ang mga batan-on daw buotan, apan ang kadaghanan kanila ingon og dugay nang mga miyembro sa Simbahan, ug si Micah naghunahuna kon ila ba siyang hukman tungod sa iyang mga pagkadili hingpit ug kawalay kasinatian sa Simbahan.
Unsa nga tambag ang imong ihatag kang Micah aron matabangan siya niini nga sitwasyon?
Unsa nga tambag ang imong ihatag sa kabatan-onan sa bag-ong ward ni Micah?
Si Pablo nagsulat sa iyang epistola ngadto sa mga Taga-Roma sa dihang ang mga miyembro sa Simbahan gikan sa lainlaing mga relihiyon ug kultural nga mga kagikan nagsugod pagsimba nga magkauban. Adunay mga panahon diin kining mga Santos wala magkauyon sa usag usa o dili patas nga gihukman ang ubang mga miyembro sa Simbahan kansang mga gipili lahi sa ilaha. Usa sa mga leksiyon nga atong makat-onan gikan sa mga pagtulon-an ni Pablo sa Mga Taga-Roma 12–15 mao nga bisan tuod kitang tanan adunay mga kalainan, ang mga miyembro sa Simbahan makapaningkamot nga magkahiusa pinaagi sa mga pagtulon-an ni Jesukristo.
Unsa ang makapalisod sa pagbati nga mahiusa sa ubang mga miyembro sa Simbahan?
Nganong sa imong hunahuna nga importante sa Ginoo nga ang mga miyembro sa Iyang Simbahan mahiusa?
Paghunahuna kon unsa ka kakonektado nga mibati sa mga tawo sa imong ward o branch, sa imong mga klasmeyt sa seminary, o sa laing mga miyembro sa Simbahan. Atol niini nga leksiyon, paghunahuna mahitungod kon unsaon nimo pagkahimong mas mahiusa sa ubang mga miyembro sa Simbahan sa Manluluwas.
Mga pagtulon-an ni Pablo mahitungod sa paghiusa
Tun-i ang mga pagtulon-an ni Pablo mahitungod sa paghiusa gikan sa labing menos duha sa mosunod nga mga hugpong sa mga bersikulo. Sa imong pagtuon, pangita og mga pagtulon-an nga makatabang nimo nga mas makasabot ug makasuporta sa laing mga miyembro sa Simbahan. Mahimo usab nga makatabang ang pagmugna og usa ka biswal nga representasyon sa usa o daghan pang mga pagtulon-an ni Pablo sa mga bersikulo nga imong gitun-an.
Unsa ang imong nakat-onan gikan sa mga bersikulo nga imong gitun-an nga makatabang kanimo aron mas mahimong mahiusa sa uban?
Sa unsang paagi nga ang pagpaningkamot nga mahiusa sa uban makatabang kanato nga mahimong mas sama ni Jesukristo?
Unsa nga mga kasinatian gikan sa imong kinabuhi o sa kinabuhi sa uban ang nagpakita kanimo sa importansya sa pagkahiusa sa ubang mga miyembro sa Simbahan?
Ikonsiderar ang pagtan-aw sa bidyo nga “A Friend to All [Usa ka Higala ngadto sa Tanan]” (4:01), anaa sa ChurchofJesusChrist.org. Niini nga bidyo, si Elder Ulisses Soares sa Korum sa Napulog Duha ka Apostoles mihulagway og pipila ka kasinatian sa iyang pamilya sa dihang sila bag-o nga mga miyembro sa Simbahan. Samtang ikaw magtan-aw, paghunahuna mahitungod unsaon nimo nga mas makasuporta ug makighigala sa isigka miyembro sa Simbahan.
Unsa ang labing mahinungdanon kanimo gikan sa mensahe ni Elder Soares? Ngano man?
Paggamit sa imong nakat-onan
1. Kompletoha ang mosunod nga kalihokan:
Paghunahuna kon unsa ang imong nakat-onan o gibati mahitungod sa panaghiusa diha sa imong pagtuon karon. Paggahin og higayon sa paghimo og usa ka plano kon unsaon nimo paglakip niining mga pagtulon-an nganha sa imong kinabuhi. Pagsulat og usa ka tumong kon unsaon nimo sa pagpaningkamot alang sa panaghiusa sa usa o daghan pa sa mosunod nga mga kahimtang:
Uban sa mga sakop sa imong klase sa Young Women o korum sa pagkapari
Uban sa mga sakop sa imong klase sa seminary
Uban sa lain pang mga miyembro sa inyong ward o branch
Mahimo usab nga makatabang ang pagsulat og bisan unsang mga babag nga imong giatubang sa pagkab-ot sa imong tumong. Unsaon nimo sa pagbuntog niadtong mga babag? Sa unsa nga paagi ang Ginoo makatabang?
Opsiyonal: Gustong Makakat-on Pa og Dugang?
Unsa ang atong makat-onan gikan sa mga hagit nga giatubang sa Simbahan sa Roma atol sa panahon ni Pablo?
Si Elder Quentin L. Cook sa Korum sa Napulog Duha ka Apostoles mipasabot:
Imahe
Opisyal nga hulagway ni Elder Quentin L. Cook. Gitawag ngadto sa Korum sa Napulog Duha ka Apostoles niadtong 6 sa Oktubre 2007.
Ang atong kultura sa Simbahan nagagikan sa ebanghelyo ni Jesukristo. Ang Sulat ni Apostol Pablo ngadto sa mga Taga-Roma makahuluganon. …
… Nagpahimangno si Pablo sa mga Judeo ug sa mga Hentil sa pagsunod sa mga sugo ug paghigugma sa usag usa ug nagmatuod nga ang pagkamatarong mosangpot sa kaluwasan.
Ang kultura sa ebanghelyo ni Jesukristo dili usa ka Hentil nga kultura o Judaic nga kultura. Wala kini gitino pinaagi sa kolor sa panit sa usa ka tawo o kon asa ang usa ka tawo nagpuyo. Samtang nagmaya kita sa managlahi nga mga kultura, kinahanglan nga biyaan nato ang mga aspeto niadto nga mga kultura nga nagsumpaki sa ebanghelyo ni Jesukristo.
Unsa ang mahitabo samtang kita mohimo og mga paningkamot aron mahimong nahiusa nga mga miyembro sa Simbahan sa Manluluwas?
Si Elder Jorge T. Becerra sa Seventy mitudlo:
Imahe
Elder Jorge T. Becerra, opisyal nga hulagway sa Unang Korum sa Seventy.
Sa matag ward ug branch nagkinahanglan kita sa usag usa—kadtong kinsa tingali malig-on ug kadtong kinsa tingali nanglimbasog. Ang tanan gikinahanglan ug mga mahinungdanon sa pagpalig-on sa tibuok “lawas ni Kristo.” Kanunay nakong gihunahuna kon kinsa ang wala sa atong mga kongregasyon nga makapalig-on kanato ug makakompleto nato.
Si Sister Sharon Eubank sa Kinatibuk-ang Kapangulohan sa Relief Society mipakigbahin sa mosunod nga asoy:
Imahe
Opisyal nga Hulagway ni Sister Sharon Eubank. Gilitratohan niadtong 2017.
Niadtong 1842, ang mga Santos naningkamot pag-ayo sa pagtukod sa Templo sa Nauvoo. Human matukod ang Relief Society pagka-Marso, si Propeta Joseph Smith kanunay nga moapil sa ilang mga miting aron sa pag-andam nila alang sa sagrado, makahiusang mga pakigsaad nga sa dili madugay ilang himoon diha sa templo.
Pagka-Hunyo 9, ang Propeta “misulti nga mosangyaw siya mahitungod sa kalooy[.] Pananglit nga si Jesukristo ug [ang] balaang mga anghel mosaway kanato tungod sa walay hinungdang mga butang, unsa ang mahitabo kanato? Kita kinahanglang magmaloloy-on ug pasagdan ang walay hinungdang mga butang.” Si Presidente Smith mipadayon, “Nakapasubo kanako nga walay hingpit nga panaghiusa sa pagbati—kon ang usa ka miyembro nag-antos ang tanan mobati niini—pinaagi sa panaghiusa sa pagbati kita makaangkon og gahom sa Dios” [“Minutes and Discourse, 9 Hunyo 1842,” 61, Joseph Smith Papers].
Kanang gamay nga kapahayag adunay dakong epekto kanako. Pinaagi sa panaghiusa sa pagbati kita makaangkon og gahom sa Dios. Dili nako gusto nga ingon niini ang kalibotan. Dunay daghang butang nga gusto nakong maimpluwensyahan ug mahimong mas maayo. Ug sa prangkang pagkasulti, dunay daghang oposisyon sa unsay akong gilaoman, ug usahay daw wala akoy mahimo. Bag-o lang, akong gipangutana ang akong kaugalingon og laglom nga mga pangutana: Unsaon nako nga mas maayong makasabot sa mga tawo sa akong palibot? Unsaon nako pagmugna nianang “panaghiusa sa pagbati” kon lahi kaayo ang tanan? Unsa nga gahom gikan sa Dios ang mahimo nakong magamit kon mas nahiusa lang ko og gamay ngadto sa uban?
Mga bidyo mahitungod sa importansiya sa panaghiusa
“To Love Them All [Sa Paghigugma Kanilang Tanan]” (3:22), anaa sa ChurchofJesusChrist.org. Si Elder Patrcik Kearon sa Kapangulohan sa Seventy namulong mahitungod sa paglakip ug panaghigalaay diha sa Simbahan.
“Till We All Come in the Unity of the Faith [Hangtod Makakab-ot Kitang Tanan sa Pagkahiniusa sa Hugot nga Pagtuo]” (2:21), anaa sa ChurchofJesusChrist.org. Si Brother Ahmad S. Corbitt sa Kinatibuk-ang Kapangulohan sa Young Men namulong mahitungod sa nagkadako nga pagkadaiya nga anaa sa Simbahan.
