Mga Taga-Roma 7–12

“Ang Manluluwas … Pagahinginlan Niya ang Pagkadili-diosnon”

Usahay sa atong panaw sa kinabuhi, kita lagmit mobati og pagkawala sa kadasig o pagkahigawad kon kita mapakyas kon kinsa gayod kita. Uban sa maong mga pagbati sa kahigawad, si Apostol Pablo misinggit, “Alaot ako nga tawo!” (Mga Taga-Roma 7:24). Bisan pa sa mga kahuyang nga atong nasinati sa mortalidad, kita makasinati og paglaom ug kalinaw samtang atong ibutang ang atong pagsalig kang Jesukristo. Kini nga leksiyon makatabang kanimo nga mapakita ang mas dako nga hugot nga pagtuo kang Jesukristo aron mabuntog ang imong mga kahuyang. 

Pag-atubang sa mga kahuyang sa mortalidad

Si Trey usa ka miyembro sa Ang Simbahan ni Jesukristo sa mga Santos sa Ulahing mga Adlaw. Gusto siya nga mosunod kang Jesukristo apan mibati nga siya wala makabuhat og ingon kamaayo kaysa sa iyang kinahanglan nga mabuhat sa kasagaran. Kanunay siyang mobati nga sad-an tungod sa iyang mga kahuyang ug nabalaka nga siya lagmit dili igo ang kamaayo.

Hunahunaa kon sa unsang paagi kamo usahay mobati nga susama kang Trey.

• Sa unsang paagi nga kining mga pagbati makaimpluwensiya sa imong relasyon sa Langitnong Amahan ug kang Jesukristo, ingon man usab sa laing mga tawo?

• Nganong importante man ang pagpangita og panabang gikan sa Langitnong Amahan ug kang Jesukristo aron mabuntog ang imong mga kahuyang ug mga pagkadili hingpit?

Si Presidente Russell M. Nelson mitudlo nga “ang Ginoo mosabot sa atong mortal nga kahuyang. Kitang tanan usahay masayop. Apan nahibalo usab Siya sa atong talagsaon nga potensyal” (“Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, May 2021, 102). Samtang magtuon kamo niini nga leksiyon, hinumdomi unsa ang gitudlo ni Presidente Nelson ug pangitaa ang mga kamatuoran nga makatabang kanimo dihang imong mailhan ang mortal nga mga kahuyang. Pamalandongi kon sa unsang paagi kini nga mga kamatuoran makadugang sa imong hugot nga pagtuo nga si Jesukristo makatabang kanimo.

Si Apostol Pablo nakasinati usab og mga pagbati sa kahuyang ug sa pagpakigbisog tali sa “unod” (Mga Taga-Roma 7:18), o pisikal nga mga gana, ug “ang sulod nga tawo” (bersikulo 22), o pagka-espirituhanon.

Basaha ang Mga Taga-Roma 7:14, 18–19, 24–25 ug ang Hubad ni Joseph Smith alang niini nga mga bersikulo nga anaa sa Hubad ni Joseph Smith diha sa Mga Tabang sa Pagtuon. Pangita og mga pulong ug mga hugpong sa mga pulong nga naghulagway sa mga hunahuna ug mga pagbati ni Pablo. Ikonsiderar ang pagmarka sa unsay imong makit-an. Timan-i nga diha sa bersikulo 24 “kining kamatayon” nagtumong sa espirituhanong kamatayon, o pagkabulag gikan sa Dios, nga nagagikan sa sala.

• Sa unsang paagi nga ang mga hunahuna ug mga pagbati ni Pablo susama niadtong tingali anaa kanimo?

• Unsa nga mga kamatuoran ang gitudlo ni Pablo?

Usa ka kamatuoran nga tingali imong mailhan gikan niining mga bersikulo mao nga si Jesukristo makaluwas kanato gikan sa pagkabihag sa sala. Mahimo nimong isulat kini nga kamatuoran duol sa Mga Taga-Roma 7:24–25.

• Sama sa nahimo niini kang Pablo, ngano kaha nga ang paghinumdom niini nga kamatuoran sa dihang kamo nakigbisog sa imong kaugalingong mga kahuyang makatabang kanimo nga mobati og dugang pa nga paglaom?

Ang Basahon ni Mormon mao ang usa ka gamhanang himan nga atong magamit sa pagpalig-on sa atong pagsabot sa mga kamatuoran nga gitudlo sa Biblia (tan-awa sa 1 Nephi 13:40; 2 Nephi 3:12).

Pananglitan, sa 2 Nephi 4, si Nephi mipakigbahin sa mga pagtulon-an nga susama sa mga nag-una nga imong natun-an gikan kang Pablo diha sa Mga Taga-Roma 7. Bantayi nga ang mga footnote sa Mga Taga-Roma 7 naglangkob og mga cross-reference ngadto sa 2 Nephi 4. Ang paggamit sa mga footnote mahimong usa ka makatabang nga paagi sa pagpangita og mga tudling sa Basahon ni Mormon nga may kalabotan sa unsay imong gitun-an diha sa Biblia.

Basaha ang 2 Nephi 4:17–20, 26–32, nga mangita kon giunsa ni Nephi pagpahayag og mga pagbati nga susama sa kang Pablo.

1. Tubaga ang mosunod nga mga pangutana diha sa imong journal sa pagtuon:

• Hain sa mga pulong o mga hugpong sa mga pulong ni Nephi ang labing mahinungdanon alang kanimo? Ngano man?

• Sa unsang paagi nga ang mga pagtulon-an ni Nephi lagmit makatabang kanimo nga mapaduol sa Langitnong Amahan ug kang Jesukristo diha sa imong pagpakigbisog sa kahuyang o pagduhaduha sa kaugalingon?

Paggamit sa Basahon ni Mormon aron mas makasabot sa kamatuoran

Sama nga ang 2 Nephi 4 nagpalambo sa imong pagtuon sa mga pagtulon-an ni Pablo diha sa Mga Taga-Roma 7, daghang laing mga tudling sa Basahon ni Mormon ang makatabang ninyo aron mas makasabot ug makadayeg sa mga pagtulon-an ni Pablo.

Praktisa ang paggamit sa Basahon ni Mormon aron mapalambo ang imong pagsabot sa mga pagtulon-an ni Pablo pinaagi sa pagpili og duha o daghan pa sa mosunod nga mga tudling gikan sa Mga Taga-Roma aron basahon. Dayon itandi kini diha sa kaubang mga tudling sa Basahon ni Mormon (o pangita og imong kaugalingong mga tudling nga may kalabotan sa Basahon ni Mormon gamit ang Giya ngadto sa mga Kasulatan). Pangitaa kon giunsa sa mga tudling sa Basahon ni Mormon pagkonpirmar o pagpatin-aw sa mga kamatuoran nga gitudlo sa Mga Taga-Roma.

Mga Taga-Roma	Basahon ni Mormon
Mga Taga-Roma Mga Taga-Roma 8:5–7	Basahon ni Mormon 2 Nephi 9:39; Mosiah 3:19
Mga Taga-Roma Mga Taga-Roma 8:28	Basahon ni Mormon Alma 36:3
Mga Taga-Roma Mga Taga-Roma 11:26	Basahon ni Mormon 2 Nephi 9:19–21
Mga Taga-Roma Mga Taga-Roma 12:1	Basahon ni Mormon Omni 1:26
Mga Taga-Roma Mga Taga-Roma 12:2	Basahon ni Mormon Alma 5:57
Mga Taga-Roma Mga Taga-Roma 12:21	Basahon ni Mormon Alma 37:33–35

2. Tubaga ang mosunod nga pangutana diha sa imong journal sa pagtuon:

• Sa unsang paagi nga ang mga tudling gikan sa Basahon ni Mormon makapalig-on sa imong pagsabot sa mga pagtulon-an ni Pablo diha sa Mga Taga-Roma?

Pamalandongi ang imong kasinatian sa pagkakita kon giunsa sa Basahon ni Mormon pagtabang kanimo sa imong pagtuon sa Biblia. Tinguhaa ang paggamit sa Basahon ni Mormon aron matabangan kamo sa imong pagpadayon sa pagtuon sa Bag-ong Tugon.

Opsiyonal: Gustong Makakat-on Pa og Dugang?

Unsaon man ni Jesukristo pagtabang kanako aron mabuntog ang akong mga kahuyang sa mortalidad?

Samtang nagserbisyo sa Unang Kapangulohan, si Presidente Dieter F. Utchdorf mitudlo:

The Gift of Grace

Dieter F. Uchtdorf teaches that God’s grace is available to all whose hearts are broken and whose spirits are contrite.

Daghang tawo ang mawad-an og kadasig tungod kay sila kanunay wala makabuhat. Nasayod sila sa sinugdan nga “ang espiritu matinguhaon apan maluya ang lawas” [Mateo 26:41]. Misinggit sila uban kang Nephi sa pagpamahayag, “Ang akong kalag nagmagul-anon tungod sa akong kadaotan” [2 Nephi 4:17]. …

Kon ako maghunahuna sa unsay nabuhat sa Manluluwas alang kanato kabahin nianang unang Dominggo sa Pasko sa Pagkabanhaw, buot kong mopataas sa akong tingog ug mosinggit og mga pagdayeg ngadto sa Labing Halangdong Dios ug sa Iyang anak, si Jesukristo!

Ang mga ganghaan sa langit naablihan!

Ang tamboanan sa langit nabuksan!

Karon ug sa kanunay ang grasya sa Dios anaa alang sa tanan kansang mga kasingkasing mapainubsanon ug kansang mga espiritu mahinulsolon [tan-awa sa 3 Nephi 9:19–20]. Gihawanan ni Jesukristo ang dalan alang kanato sa pagsaka ngadto sa mga kinatas-an nga dili masabtan sa mortal nga mga hunahuna [tan-awa sa 1 Mga Taga-Corinto 2:9].

(Dieter F. Uchtdorf, “Ang Gasa sa Grasya,” Liahona, Mayo 2015, 110)

Kristiyano ba kita kon mogamit kita og laing mga basahon gawas sa Biblia?

Sa bidyo nga “Are We Christians [Kita Ba Mga Kristiyano]?” (time code 0:00 hangtod sa 2:15), si Elder Gary J. Coleman, samtang nagserbisyo isip usa ka miyembro sa Seventy, mihulagway kon sa unsang paagi ang Basahon ni Mormon mitabang kaniya nga mas makasabot sa kamatuoran ug momatuod sa iyang Pagkakristiyano. Kini nga bidyo anaa sa ChurchofJesusChrist.org.

Are We Christians?

Elder Gary J. Coleman speaks of his conversion, understanding of the true nature of the Godhead, access to additional scripture and revelation, and partaking of the blessings of priesthood authority.

Sa unsang paagi nga ang Biblia ug ang Basahon ni Mormon nagtinabangay ug nagpakita sa gugma sa Dios alang kanato?

Si Presidente Harold B. Lee (1899–1973) mipasabot:

Ang atong mahangtorong Langitnong Amahan, kinsa kanunay nabalaka mahitungod sa espirituhanong kaayohan sa Iyang mga anak, naghatag kanato og kauban nga basahon sa mga kasulatan, nga giila isip ang Basahon ni Mormon, isip usa ka depensa sa mga kamatuoran sa Biblia nga gisulat ug gipamulong pinaagi sa mga propeta sumala sa gisugo sa Dios. …

… Pinaagi niining ikaduha nga saksi kita mas sigurado nga makahibalo sa kahulugan sa mga pagtulon-an sa daang mga propeta ug, sa pagkatinuod, sa Agalon ug sa Iyang mga disipulo samtang sila nagpakabuhi ug nagtudlo sa mga tawo. Kini kinahanglang modasig sa tanan kinsa mahimong matinud-anong nagtinguha sa kamatuoran sa paghiusa niining duha ka sagradong mga kasulatan ug sa pagtuon niini isip usa ka basahon, pagsabot, sama sa atong gibuhat, sa ilang tinuod nga relasyon.

(Harold B. Lee, Ye Are the Light of the World [1974], 89, 91)

Nganong si Pablo miingon nga kita kinahanglan lamang mangumpisal sa ngalan ni Jesus aron maluwas?

Ang Mga Taga-Roma 10:1–13 kanunay nga gikutlo aron pagpanalipod sa posisyon nga kita kinahanglan lamang mangumpisal sa ngalan ni Jesukristo aron maluwas. Apan, ang Manluluwas piho nga namulong batok niini nga doktrina sa dihang Siya miingon, “Dili ang tanang magaingon kanako, Ginoo, Ginoo, makasulod sa gingharian sa langit, kondili ang nagatuman sa kabubut-on sa akong Amahan nga anaa sa langit” (Mateo 7:21).

Dugang pa, si Pablo mihatag og gibug-aton sa kaimportante sa ordinansa sa bunyag sa sayo pa sa iyang sulat ngadto sa mga Taga-Roma (tan-awa sa Mga Taga-Roma 6:1–6) ug nagtudlo usab sa kaimportante sa maayong mga buhat ug sa usa ka nausab nga kasingkasing (tan-awa sa Mga Taga-Roma 2:1, 3, 6–13, 25–29).

Usab, ang pulong nga “kumpisal” sa Mga Taga-Roma 10:9 mahimong mahubad isip “pakigsaad,” ug ang pulong nga “magsangpit” sa Mga Taga-Roma 10:13 mahimong mahubad isip “pagbutang og ngalan” (tan-awa sa James Strong, The New Strong’s Exhaustive Concordance of the Bible, nga makita sa http://lexiconcordance.com/greek/3670.html; http://lexiconcordance.com/greek/1941.html). Kini nga mga pulong mahimong nagpasabot sa pagsulod ngadto sa mga pakigsaad ug pagdala diha sa atong kaugalingon sa ngalan ni Kristo, nga haom sa ubang mga pagtulon-an ni Pablo (tan-awa sa Mga Taga-Galacia 3:27; Mga Taga-Roma 6:14–22) ingon man usab sa may kalabotang mga tudling diha sa Basahon ni Mormon, sama sa Mosiah 5:1–9.