1 Korinito 10

Solaese Ai Nai Faaosoosoga

E te moomoo ea e mafai ona e solaese mai faaosoosoga o feagai ma oe? O le Aposetolo o Paulo sa aoaoina mai se mataupu faavae taua e mafai ona fesoasoani ia i tatou pe a feagai ma faaosoosoga. O lenei lesona e faamoemoe e fesoasoani e te faalagolago ai ia Iesu Keriso e faatoilalo faaosoosoga.

Faitauina o fuaitau mai tusitusiga paia. E i ai ni auala eseese e faitau ai fuaitau o tusitusiga paia i totonu o le vasega, e aofia ai le faitau faatasi o le vasega atoa, faitau i vaega toalaiti, po o le faitau taitoatasi. Ia utagia manaoga ma le gafatia o tagata aoga faatasi ai ma mea e faaaoga mo le aoaoina atu pe a filifili metotia mo le faitauina o fuaitau.

Sauniuniga a le tagata aoga: Valaaulia tagata aoga e suesue le “1 Korinito 10:1-13: E Saunia e Le Alii le Auala E Solaese ai Mai Faaosoosoga” i le Sau, Mulimuli Mai ia te Au-Tagata Taitoatasi ma Aiga: Feagaiga Fou 2023. A o latou suesue, e mafai ona latou mafaufau i le fesili lenei: “O a ituaiga auala o solaaga mai i faaosoosoga na saunia e le Tama Faalelagi mo oe?”

Gaoioiga E Ono Mafai Ona Aoao Mai Ai

Faaosoosoga

Aumai se maneta ma se meafaitino uamea i le vasega ma valaaulia tagata aoga e faaaoga ia mea e faamatala ai le manatu o le tetee atu i faaosoosoga. Mo se faataitaiga, e mafai ona latou faamamafa le taua o le tu mamao ese mai faaosoosoga ma le matautia o le tulalata atu i ai.

Faitau i le saunoaga lenei a Elder Ulisses Soares o le Korama a Aposetolo e Toasefululua pe matamata i le vitio “Saili Atu ia Keriso i Mafaufauga Uma” mai le faailotaimi 2:44 i le 3:23, e maua i le ChurchofJesusChrist.org.

I le vaogagana faatusatusa, o le gauai atu i faaosoosoga ua faapei o le faalatalata atu i se maneta ma se meafaitino uamea. O le malosiaga le vaaia o le maneta na te faatosina maia le meafaitino uamea ma uumauina. E aluese le malosiaga o le maneta pe afai e tuumamao ese le meafaitino uamea mai le maneta. O le mea lea, e faapei ona le mafai e le maneta ona faaaoga lona malosiaga i se meafaitino uamea o tuumamao, pe afai tatou te teena faaosoosoga, e mou ese atu ma leai sona malosiaga i o tatou mafaufau ma loto ma, e oo lava foi, i a tatou faatinoga.

(Ulisses Soares, “Saili Atu ia Keriso i Mafaufauga Uma,” Ensign po o le Liahona, Nov. 2020, 83)

Ao e suesue i le 1 Korinito 10, faalogo mo musumusuga mai le Agaga Paia o le a fesoasoani ia oe e iloa ai le mea e fai e tetee atu ai i faaosoosoga o feagai ma oe.

O se tasi o faamoemoega o tusitusiga paia o le fesoasoani lea tatou te aoao ai mai soifuaga ma tauiviga o i latou sa muamua atu (tagai i le 1 Korinito 10:6, 11 ; Mamona 9:31). E pei ona tusia i le 1 Korinito 10, sa faaaoga e Paulo le faataitaiga o le sopoia e Isaraelu o le Sami Ulaula ma la latou malaga i le vao ao ia faamanatu i tagata o Korinito auala eseese sa faatasi ai le Alii ma tagata Isaraelu i le latou malaga (tagai i le 1 Korinito 10:1–4).

Matau mea na fai e le Alii mo tagata Isaraelu ma le igoa sa faaigoaina ai o Ia i le fuaiupu 4 .

• O le a se mea ua e aoaoina e uiga i le Faaola e ala i le suafa sa faaaoga e Paulo i le fuaiupu 4 ?

E ui i auala faavavega na lagolagoina ai e le Alii tagata Isaraelu, sa i ai taimi na o latou gauai atu ai i faaosoosoga. Faitau le 1 Korinito 10:5-11, ma maitau faaosoosoga sa gauai tagata Isaraelu e liliu ese ai mai i lo latou “Papa faaleagaga,” o Iesu Keriso.

• O a auala e te manatu e tutusa ai tulaga o tatou olaga ma tulaga sa i ai tagata Isaraelu?

• O a faaosoosoga masani e feagai ma tupulaga talavou e ono liliuese ai mai le Faaola?

Mafaufau i faaosoosoga o loo feagai nei ma oe ma e i ai le gafatia e mafai ona latou faaliliueseina oe mai le “Papa,” o Iesu Keriso. Toe mafaufau pe faapefea ona aafia lou olaga pe a mafai ona e faatoilaloina nei faaosoosoga.

E fesoasoani mai le Faaola ia i tatou e faatoilaloina faaosoosoga

Manatua o le faaosoosoina o oe e le o se agasala ao le gauai i le faaosoosoga o le agasala lea. Faitau i le 1 Korinito 10:12-14, ma maitau mataupu faavae e mafai ona fesoasoani atu ia te oe e manumalo ai mai faaosoosoga.

• O a mea e folafola mai e le Atua o le a Ia faia e fesoasoani ai ia oe e faatoilalo ai faaosoosoga?

• O a upu ma fasifuaitau i nei fuaiupu e faamatala mai ai mea ua faamoemoe le Atua tatou te faia pe a feagai ma faaosoosoga?

• O a mataupu faavae na e maua?

E ono faailoa mai e tagata aoga ni mataupu faavae eseese. Faaalu se taimi e talanoaina ai nei mataupu faavae ma taulai i mea e taua i tagata aoga. Mafaufau e fai ni fesili tuliloa e pei o le “O a upu ma fasifuaitau sa fesoasoani e te maitauina ai lena mataupu faavae?” ma le “E faapefea ona fesoasoani lena mataupu faavae ia te oe?”

Atonu na e maitauina se mataupu faavae e pei o le E tuuina mai e le Atua le auala tatou te sosolaese ai mai faaosoosoga, ae peitai e tatau ona tatou filifili e tuuese i tatou mai faaosoosoga.

Mafaufau e faasoa ni faamatalaga faaopoopo faaperofeta i le vaega o “Manatu ma Talaaga o Faamatalaga” o le lesona. Ina ia fesoasoani i tagata aoga e vaai i se faataitaiga i tusitusiga paia o le solaese mai faaosoosoga, mafaufau e faitau ma talanoaina le Kenese 39:1-12 po o le Mataio 4:1-10 .

I tusitusiga paia ma ala mai i Ana perofeta o aso nei, sa aoao mai e le Faaola le ala tatou te manumalo ai mai faaosoosoga. Faitau i mau ma faamatalaga faaperofeta nei, ma vaai po o a mea e mafai ona e fai e liliu atu ai i le Faaola ma solaese mai faaosoosoga. Atonu e te manao e faafesootai atu i latou i le 1 Korinito 10:12-14 .

• Alema 13:28–29

• 3 Nifae 18:15, 18–20

• Eperu 4:15-16 (Manatua: o le faitaulaga sili o lo o faasino i ai nei fuaiupu o Iesu Keriso)

• Peresitene Henry B. Eyring o le Au Peresitene Sili:

O lo tatou faatuatua ia Iesu Keriso e aumaia i tatou i le salamo ma le tausiga o Ana poloaiga. Tatou te usiusitai ma tetee atu i faaosoosoga e ala i le mulimuli i uunaiga a le Agaga Paia. E oo mai le taimi e suia ai o tatou uiga. O le a avea i tatou e faapei o se tamaitiiti, e usitai i le Atua ma atili ai ona alofa. O lena suiga, afai tatou te faia mea uma e tatau ona tatou faia ina ia tausisia ai, o le a faaagavaaina i tatou ia sapi ai i meaalofa ia e auala mai i le Agaga Paia. Ona tatou saogalemu ai lea i luga o le papa mautinoa e tasi.

(Henry B. Eyring, “E Faapei o se Tamaitiiti,” Ensign po o le Liahona, Me 2006, 16)

• O a mea na e aoaoina mai nei mau ma le faamatalaga lenei e faaosofia ai oe e liliu atu i le Faaola ina ia solaese ai mai faaosoosoga?

• O a nisi o auala e tuuina mai ai e le Atua le ala e solaese ai mai faaosoosoga?

• O a mea e tatou te faia ina ia maitauina ma faaaogaina ai auala o solaaga ua tuuina mai e le Atua?

Ona o le natura maaleale o nisi o faaosoosoga, ia faataga tagata aoga e faatino taitoatasi gaoioiga nei. A maea a latou galuega, e mafai ona latou fefaasoaai faalauaitele mea sa latou faia. E le tatau ona faasoa e tagata aoga i le vasega ni faaosoosoga o loo latou taumafai pea i le taimi nei e faatoilaloina.

Tali se lua pe sili atu o fesili o loo mulimuli mai:

Faailoa atu e faapea o le faaaogaina o o tatou lava igoa ma aafiaga i totonu o tusitusiga paia e mafai ona fesoasoani tatou te faaaogaina ai tusitusiga paia i o tatou olaga. Uunaia tagata aoga e faataitai lenei tomai i a latou suesuega o tusitusiga paia faaletagata lava ia.

• Toe tusi le 1 Korinito 10:14, ma tusi ai lou igoa pe a uma le “la’u pelē,” ma sui i se faaosoosoga o loo e feagai ai mo le “ifo i tupua.”

• Tusi se aafiaga na fesoasoani ai le Faaola ia te oe e solaese mai se faaosoosoga. E faapefea ona fesoasoani lenei aafiaga ia te oe e solaese ai mai faaosoosoga o loo tutupu i le taimi nei?

• Tusi laasaga patino o le a e faia ina ia faalagolago ai ia Iesu Keriso ma tetee atu ai i se faaosoosoga ua oo atu ia te oe.

• O a ni mea na e aoaoina po o ni ou lagona e uiga i le Faaola ao e suesue i le 1 Korinito 10 ?

• E mafai faapefea e lenei tala ona fesoasoani ia te oe e solaese ai mai faaosoosoga e te oo i ai?

Manatu ma Talaaga o Faamatalaga

E mafai faapefea ona fesoasoani mai Iesu Keriso ma le Agaga Paia ia te au e faatoilaloina faaosoosoga?

Na aoao mai Elder Ulisses Soares o le Korama a Aposetolo e Toasefululua:

O le tetee faasaga atu i faaosoosoga e manaomia ai se olaga o le maelega ma le faamaoni. Ae faamolemole ia silafia ua saunia le Alii e fesoasoani mai ia i tatou i a tatou taumafaiga patino ma ua folafola mai faamanuiaga ofoofogia pe afai tatou tumau e oo i le iuga. …

O’u uso e ma tuafafine pele, ou te molimau atu a tatou faalagolago i le papa o le faaolataga, o le Faaola lea o o tatou agaga, … o le a matuai faateleina lo tatou gafatia e pulea ai o tatou mafaufauga. E mafai ona ou faamautinoa atu ia te outou o le a tuputupu ae lo tatou matutua faaleagaga i se saoasaoa faateleina, e suia ai o tatou loto, ma avea atili ai i tatou e faapei o Iesu Keriso. E le gata i lea, o le a faamalosia atili ai aafiaga o le Agaga Paia ma faaauau ai pea i o tatou olaga. Ona taitasitasi ai lea ona leai o se mana o faaosoosoga a le fili ia i tatou, ma taunuu ai i se olaga e sili ona fiafia, mama ma le faapaiaina.

Mo i latou o e, po o le a lava le mafuaaga, ua pauu atu i faaosoosoga ma ua ola ai i faatinoga amioletonu, ou te faamautinoa atu ia te outou e i ai se auala e toe foi ai, o loo i ai le faamoemoe ia Keriso.

(Ulisses Soares, “Saili Atu ia Keriso i Mafaufauga Uma,” Ensign po o le Liahona, Nov. 2020, 83-84)

Na aoao mai Elder Quentin L. Cook o le Korama a Aposetolo e Toasefululua:

O se mataupu faavae o le alualu i luma e faavavau, o le faaaogaina lea o le amio pulea ma le ola amiotonu e faamalolosia ai lo tatou gafatia e tetee atu i faaosoosoga. E moni lenei mataupu i le siomaga faaleagaga ma mataupu faaletino. …

I le avea ai o se vaega o le fuafuaga paia a le Atua, ua faamanuiaina i tatou i le meaalofa o le Agaga Paia. … O Ia foi o se siufofoga o lapataiga faasaga i le leaga ma o se siufofoga o le puipuiga faasaga i mea matautia. A o tatou tauasaina vasa o le olaga, e taua le mulimuli i uunaiga a le Agaga Paia. O le a fesoasoani le Agaga Paia ia i tatou e aloese ai mai faaosoosoga ma mea matautia, ma faatoamalie ma taitai i tatou i le saogalemu mai o tatou i luitau.

(Quentin L. Cook, “To’a le Tai ma Sitaili Faa-Bristol: Ia Agavaa mo le Malumalu—i Taimi Lelei ma Taimi Leaga,” Ensign po o le Liahona, Nov. 2015, 41-42)

E faapefea ona ou sauni mamao e solaese mai faaosoosoga?

Na aoao mai Peresitene Spencer W. Kimball (1895–1985):

O faaiuga tonu e matua faigofie ona faia, pe a tatou faia ae le’i taitai ona o’o mai, i le i ai o faamoemoega i le mafaufau; o lenei mea e faasaoina ai le tele o le atuatuvale [i le taimi e filifili ai], i le taimi ua tatou vaivai ai ma matua faaosoosoina. …

Atiina ae le pulea o lou lava tagata ina ia, atili ai, ona e le tau filifili ma toe filifili i le mea o le a e faia pe a e fetaiai ma le faaosoosoga lava lea e tasi i lea taimi ma lea taimi. E na ona manaomia ona e filifili nisi o mea tau lava o le faa-tasi! …

O le taimi e faamuta ai ala leaga o le taimi a o lei amataina. O le mealilo o le olaga manuia o le puipui ma le tetee. O i latou o e faamatuu atu i le leaga e masani lava o i latou ia e tuuina i latou lava i se tulaga faataumaoi.

(Aoaoga a Peresitene o le Ekalesia: Spencer W. Kimball [2006], 108-9)

Galuega Faatino Faaopoopo e Aoao Mai Ai

O lau tusi metotia e solaese ai mai faaosoosoga

Valaaulia tagata aoga e talanoaina le taua o se tusi metotia mo au taaalo. Fesili i tagata aoga e mafaufau i faaosoosoga e latou te oo atu i ai ao latou matamata i le “Your Priesthood Playbook” mai le faailotaimi 3:50 i le 5:59, e maua i le ChurchofJesusChrist.org. I lenei vitio, ua faamatala ai e Elder Gary E. Stevenson o le Korama a Aposetolo e Toasefululua auala e mafai ai ona tatou teena faaosoosoga.

A uma le vitio, e mafai ona tuu atu sina taimi mo tagata aoga e tusi o latou lava tusi metotia ma se fuafuaga mo le tetee atu i faaosoosoga.

Vitio - “Leave the Party”

Atonu e aoga mo tagata aoga e matamata i le vitio “Leave the Party” ma talanoaina pe faapefea e mataupu faavae o loo taua i le lesona ona faaalia mai le vitio.

New Era—“Line upon Line”

Mafaufau e faaali atu i tagata aoga le “Line upon Line: 1 Corinthians 10:13” i le itulau 40 o le New Era o Fepuari 2017. E mafai ona suesue e tagata aoga lenei itulau ma toe tusi ni a latou lava itulau “Line upon Line” e fua i mea ua latou aoaoina mai le 1 Korinito 10 .