1 Korinito 13

“E Le Uma Le Alofa”

Sa faalia e Iesu Keriso le alofa tele i aso uma o Lona soifuaga faaletino. Sa iu ina Ia faaalia Lona alofa atoatoa e ala i le taulagaina ma le loto i ai o Lona soifua mo i tatou. Sa tusi auiliili le Aposetolo o Paulo e uiga i le alofa faaKeriso, po o le alofa mama, atoa ma le mafuaaga e tatau ai ona tatou mananao ina ia o tatou mauaina. O lenei lesona ua faamoemoeina e fesoasoani ia e lagona ai le alofa mama o Iesu Keriso mo oe ma ia fesoasoani ia te oe e saili atu le meaalofa o le alofa mama e lagonaina ai lena alofa mo isi.

Talitonuina o tagata aoga taitoatasi. O se tasi auala e faaali atu ai le alofa mo tagata aoga taitoatasi o le faailoa atu ma talitonu i lo latou faasinomaga paia ma faamoemoega. Tatalo ia mafai ona e vaai atu i tagata aoga e pei ona silasila mai i ai le Alii.

Tapenaga a le tagata aoga: Valaaulia tagata aoga e mafaufau i se isi mai lona aiga, se uo, po o se isi lava tagata e fia faaleleia atili le la sootaga. Fesili atu i tagata aoga e mafaufau i aafiaga o le mafutaga pe a faaalia le alofa sili i lenei tagata.

Gaoioiga E Ono Mafai Ona Aoao Mai Ai

O o tatou sootaga ma isi

Valaaulia tagata aoga e tomanatu ma le filemu i a latou sauniuniga mo le vasega ma fesili nei.

Mafaufau i se tasi e te manao e faaleleia atili la oulua sootaga.

• Aisea ua e manao e faaleleia atili ai lenei sootaga?

• O le a le mea na e faia e fesoasoani ai i le sootaga? O le a le mea na aoga? O le a le mea e le’i aoga?

• O a aafiaga e te manatu e oo i le sootaga mai le faaalia o le alofa sili?

Ao e suesue i le 1 Korinito 13, saili i ni auala e mafai ai ona e alofa atu i isi e pei ona faia e le Faaola. Saili le musumusuga a le Agaga Paia e faailoa mai ai mea e mafai ona e faia e faaaoga i ai mea ua e aoaoina i tulaga o loo e i ai nei.

O le alofa mama o Iesu Keriso

Ina ua maea ona ia aoao atu i tagata o le Ekalesia i Korinito e tusa ma meaalofa faaleagaga, sa saunoa le Aposetolo o Paulo na te faailoa ia i latou se “ala e silisili lava” latou te ola ai ( 1 Korinito 12:31). Faitau le 1 Korinito 13:1-3, ma vaavaai mo le ala lea e silisili ona lelei.

• O a mea e te iloa e uiga i le alofa mama e fesoasoani ia e malamalama ai i le mafuaaga o lona taua tele?

E mafai e le Tusi a Mamona ona fesoasoani tatou te malamalama atili ai i le taua o le alofa mama. I le tau faaiuiu o lenei faamaumauga mai anamua, sa faaaofia ai e Moronae nisi o upu a Mamona lona tama. Sa faataatia mai ai e Mamona elemene o le alofa mama ma faamatala lona uiga (tagai Moronae 7:43-48).

Faitau le Moronae 7:46-47, ma vaai po o a ni mea e mafai ona e aoaoina mai ai e uiga i le alofa mama.

Valaaulia tagata aoga e faailoga upu po o fasifuaitau e mafai ona fesoasoani ia i latou ia malamalama ai i le uiga o le alofa mama.

• O a upumoni e te aoaoina e uiga i le alofa mama mai nei fuaiupu?

Mafaufau e valaaulia tagata aoga e tusi i luga o le laupapa upumoni sa latou mauaina mai le faitau ai e uiga i le alofa mama. O se tasi o upu moni e mafai ona latou faailoa mai e faapea o le alofa mama o le alofa le pona lea o Keriso, e tumau e oo i le faavavau. Fesoasoani i tagata aoga ia latou malamalama i le mafuaaga e tatau ai ona maua le alofa mama. Mafaufau e faaaogaina le faamatalaga o loo sosoo ma le gaoioiga faatino e faamatala ai lea tulaga i tagata aoga.

Sa aoao mai Peresitene Dallin H. Oaks o le Au Peresitene Sili:

Alofa mama, “o le alofa mama o Keriso” [ Moronae 7:47 ], e le o se faatinoga ae o se tulaga po o le aafiaga o i ai le tagata. E mauaina le alofa mama e ala i se tuufaasologa o faatinoga lea e taunuu atu ai i se liua. O le alofa mama o se mea e mafai ona avea ai o se tasi.

(Dallin H. Oaks, “The Challenge to Become,” Ensign, Nov. 2000, 34) 

• E faapefea e le faamatalaga a Peresitene Oaks ona faaopoopo i lou malamalamaaga o le alofa mama?

O Paulo, i le Feagaiga Fou, ma Mamona, i le Tusi a Mamona, sa la faaogaina upu ma fasifuaitau foliga tutusa e faamatala ai le alofa mama. Mai i le malamalama ai ia la upu, e mafai ai ona tatou iloa mea e tatau ona fai ma auala e atili avea ai i tatou e faapei o Iesu Keriso.

O le gaoioiga faatino e sosoo ai e mafai ona fai faatasi o se vasega po o le faaali atu mo tagata aoga e faamaeaina e i latou lava. Afai e fai taitoatasi le galuega faatino lea, mafaufau e faataitai le laasaga i e ala i le filifilia o se tasi o faamatalaga e toe tusi faatasi o se vasega.

a. Faitau le 1 Korinito 13:4-7 po o le Moronae 7:45, ma vaai pe faapefea ona faamatalaina le alofa mama.

Mafaufau e tuuina atu i tagata aoga le faamatalaga a Elder Marvin J. Ashton o loo maua i le vaega o “Manatu ma Talaaga o Faamatalaga” e faitau faaopoopo i fuaitau i le tusitusiga paia.

e. Filifili ni upu se lua pe tolu po o fasifuaitau e faamatala ai le alofa mama, ma tusi i totonu o lau api faamaumau mo suesuega.

i. I tala ane o faamatalaga taitasi, tusi le uiga o le alofa mama i ni au lava upu. E mafai ona e faaogaina soo se meafaigaluega mo suesuega o loo avanoa ia te oe. O se tasi faataitaiga, e mafai ona e faaaogaina se lomifefiloi e sue ai uiga o upu e pei o le talitiga po o le faamaualuga. Ia tusia foi pe faapefea e lenei uiga ona fesoasoani ia atili ai ona e faapei o le Faaola.

• O le a se mea ua e aoaoina e uiga i le Faaola mai faamatalaga eseese sa e suesueina?

O le faataitaiga atoatoa

O Iesu Keriso o le faataitaiga atoatoa mai faamatalaga uma o le alofa mama. I le faaaogaina o mea sa e tusitusia e uiga i le alofa mama i lau api faamaumau mo suesuega, mafaufau i ni faataitaiga mai tusitusiga paia i taimi sa faaali mai ai e Iesu Keriso Lona alofa mama i lea auala. O ata o loo mulimuli mai e mafai ona fesoasoani e te faafesootaia ai le Faaola i fuaitau sa e suesueina.

Mafaufau e faaali ata eseese a Keriso i le potu aoga. Valaaulia tagata aoga e mafaufau po o le fea o faamatalaga o le alofa mama e faafesootai ma ata taitasi ma pe aisea foi.

• Sa faapefea ona faaali e le Faaola le alofa mama i nei tulaga taitasi?

• E faapefea ona e molimauina patino le alofa o le Faaola mo oe ma isi?

• E faapefea ona aafia ou lagona mo le Faaola pe a e mafaufau i Lona alofa mo oe?

Ola i se olaga o le alofa mama

Sa faaiu aoaoga a le perofeta o Mamona i le alofa mama i lana valaaulia faanatinati ina ia tatou faatino loa. Faitau le Moronae 7:48, ma vaai mo lenei valaaulia.

• O a upu ma fasifuaitau e fesoasoani ia te oe e malamalama ai i le taliaina o le meaalofa o le alofa mama?

I Lona soifuaga atoa, sa faaalia e Iesu Keriso e mafai ona i ai le alofa mama i soo se tulaga. Taumafai e tomanatu po o le a se aafiaga i lou olaga pe ana e faataitai i le faataitaiga a le Faaola o le alofa mama i tulaga uma. Mafaufau i le mafutaga faapitoa sa e mafaufau i ai i le amataga o le lesona. Mafaufau pe faapefea e se faasiliga o le alofa mama ona faamanuiaina lena sootaga.

A o taliina e tagata aoga fesili o loo sosoo ai, faamalosi ia i latou ina ia tulitatao filifiliga latou te faia.

• O le a se mea e mafai ona e faia e atili faaalia ai le alofa mama?

• O a ni mea e ao ona e faia e faaali atu ai i le Tama Faalelagi o loo e manaomia Lana fesoasoani?

Molimau atu o loo finagalo le Tama Faalelagi e faamanuia i tatou i le meaalofa o le alofa mama ina ia fesoasoani ia avea atili ai i tatou e faapei o Ia ma Lona Alo. O le a fesoasoani mai le Tama Faalelagi tatou te atiina ae le alofa mama pe a tatou liliu atu ia te Ia.

Manatu ma Talaaga Faamatalaga

E mafai faapefea ona tatou faaali atu le alofa mama mo isi?

Na aoao mai Elder Marvin J. Ashton (1915-94) o le Korama a Aposetolo e Toasefululua:

O le a maua le alofa mama pe a tatou agalelei o le tasi i le isi, pe a tatou le faamasino atu pe faatusatusa se isi tagata, pe a tatou taumafai e mafaufau i mea sili e uiga i le tasi ma le isi, pe aua foi le faia se tala. O le alofa mama o le talia lea o uiga e ese o se tasi, vaivaiga, ma faaletonu; ma onosai i le isi tagata ua ia tuu i tatou i lalo; pe o le tetee atu foi i le lagona o le faaonoono pe a le taulimaina e le isi tagata se mea i se ala atonu sa tatou faamoemoe i ai. O le alofa mama o le musu lea e faaaoga vaivaiga o le isi tagata mo so tatou lelei, ma naunau e faamagalo atu i se tasi ua faatiga mai ia i tatou. O le alofa mama o le faamoemoe lea i mea sili ona lelei mai le tasi i le isi.

(Marvin J. Ashton, “The Tongue Can Be a Sharp Sword,” Ensign, Me 1992, 19)

O Peresitene Thomas S. Monson (1927-2018) sa aoao mai e uiga i le alofa mama i lana savali o le konafesi aoao E le Uma le Alofa” (Ensign po o le Liahona, Nov. 2010, 122-25). Atonu e te manao e matamata le vitio o lenei savali, e maua i le ChurchofJesusChrist.org, mai le faailotaimi 15:05 i le 17:22.

Aisea e le uma ai le alofa mama, o Iesu Keriso?

Na aoao mai Elder Jeffrey R. Holland o le Korama a Aposetolo e Toasefululua:

O le alofa mama moni … e faaalia atoatoa ma mama aiai i le alofa e le uma, faatumutumu, ma le togiola a Keriso mo i tatou. … O le alofa moni lena—lona alofa mama mo i tatou—a aunoa ma lena ua na o ni meanoa i tatou, leai se faamoemoe, ma avea o ni alii ma tamaitai o le a sili le faanoanoa nai lo isi tagata. E moni lava, o i latou e maua ai ua faatumuina i faamanuiaga o lona alofa i le aso mulimuli—o le Togiola, o le Toetu, ola e faavavau, folafolaga faavavau—e mautinoa lava o le a lelei ia i latou. …

O le olaga e i ai lana faalumaga o le fefe ma le toilalo. E i ai taimi e le atoatoa ai. O nisi taimi ua faatoilaloina i tatou e tagata, po o le tamaoaiga po o pisinisi po o faigamalo e faatoilaloina i tatou. Ae peitai e tasi le mea i le taimi nei po o le faavavau e le faatoilaloina i tatou—o le alofa mama o Keriso.

(Jeffrey R. Holland, Christ and the New Covenant [1997], 336-37)

Galuega Faatino Faaopoopo e Aoao Mai Ai

O le a se mea e faaosofia ai au ia faatino?

O se isi auala e mafai ona amata ai le lesona, mafaufau e valaaulia nisi o tagata aoga e faatino ni ata faataitai eseese lea e mafai ai e le tagata faatino ona i ai ni faamoemoega eseese. Valaaulia le vasega e mate faatinoga ma aumai ni mafuaaga mo le filifiliina e le tagata o lea faatinoga. O nisi o ata faataitai e mafai ona aofia ai mea nei:

• Ua tuu atu e se tamaitai talavou se teutusi o le sefuluai i le epikopo.

• Ua foai atu e se alii talavou ni meaai i se aiga e leai se fale.

Ona mafai lea ona talanoaina e tagata aoga pe aisea e taua ai faamoemoega i tua atu o a tatou amioga. E mafai e tagata aoga ona matamata i le vitio “Charity: An Example of the Believers” (4:50) e vaai ai i se faataitaiga o tamaitai talavou o faaosofia e le alofa mama.

Vitio o loo faaalia ai Paulo o loo aoao atu

A latalata atu i le faaiuga o le lesona, mafaufau e faaali le vitio “Charity Never Faileth” (3:32), e maua i le ChurchofJesusChrist.org. E faamanatu mai e le vitio aoaoga uma a Paulo i le 1 Korinito 13 ma e mafai ona fesoasoani e saunia ai tagata aoga e tali atu i fesili mulimuli e lua o le lesona.

Lafoaiina ese o mea faatamaitiiti

Valaaulia tagata aoga e talanoa i gaoioiga eseese sa latou fiafia i ai ao laiti ae e le o toe fiafia i ai i le taimi nei. Faaaoga upu a Paulo i le 1 Korinito 13:11 e fesoasoani ai i tagata aoga ia iloa a o tatou “tuputupu ae i le Alii” ( Helamana 3:21), e mafai ona tatou suia uiga tuai i filifiliga e faavae i le alofa mama, le alofa mama o Keriso (tagai Moronae 7:47).

O faamatalaga e mafai ona fesoasoani i lenei autu e mafai ona maua i le savali a Sister Anne C. Pingree “Ia Tuputupu Ae i La Le Atua” (Ensign po o le Liahona, Me 2006, 74-76).