Atamai i Aoaoga Faavae: 1 Korinito 11:11

E Taua uma Tane ma Fafine i le Fuafuaga a le Tama Faalelagi

O le ulugalii talavou e tutu i fafo o le Malumalu o Ogden Iuta. O loo la vaavaai atu i le malumalu i tua atu ma le Agelu o Moronae ua toetoe lava i le ogatotonu pito i luga o le ata. O loo ia ofuina se suti lanumoana pogisa ma se ofutino kola paepae. O loo i ai o ia i se ofu paepae. O le leva o le aoauli/afiafi po.

I lau suesuega o le 1 Korinito 11, sa e aoaoina ai le ala e silasila ai le Atua i matafaioi tulagaese ma paia a fafine ma tane. O le faamoemoe o lenei lesona e fesoasoani e faalautele lou atamai i nei aoaoga a o e taulotoina mau faasino ma fasifuaitau autu o le mau mo le 1 Korinito 11:11, faamatala le aoaoga faavae, ma faaaoga mataupu faavae o le mauaina o le malamalamaaga faaleagaga i se tulaga moni o le olaga.

Sauniuniga a le tagata aoga: Valaaulia tagata aoga e faitau le vaega 3 o le tusiga “Men and Women in the Work of the Lord” na saunia e Peresitene M. Russell Ballard o le Korama a Aposetolo e Toasefululua (New EraAperila 2014, 2-5), vaavaai mo upumoni e manaomia ona tatou malamalama ai e uiga i aoaoga faavae a le Atua e faatatau i tane ma fafine.

O Gaoioiga E Ono Mafai Ona Aoao Ai

O lenei lesona o le atamai i aoaoga faavae ua fuafuaina ia aoaoina pe a maea ona fai le lesona o le “1 Korinito 11,” o le lesona faatatau mo le fuaitau o le atamai i aoaoga faavae o le 1 Korinito 11:11 . Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Faamatala ma tauloto

O se vaaiga mataitu lenei e faatatau i lima sa siiina mai i le lauga a Linda K. Burton “O Le A Tatou O Ae Faatasi i Luga” (Ensign po o le Liahona, Me 2015, 29-32).

Vaai i ou lima. Mataitu pe faapefea ona tutusa ma le tasi ma le isi ma pe faapefea ona eseese.

Afai e mafai e lima taitasi ona galue taitoatasi, aisea e te manatu ai i le mafuaaga na fuafua ai e le Tama Faalelagi lima e lua i Lana fanau?
E faapefea e le eseesega i ou lima ona fesoasoani e te faia ai galuega pe faaaoga i au taleni?
E faapefea e le maitauina o nei mea e uiga i ou lima ona fesootai i le 1 Korinito 11:11 ?

Tuu le avanoa i tagata aoga e tauloto ai le mau faasino ma le fasifuaitau autu o le mau mo le 1 Korinito 11:11 . O se tasi lenei o gaoioiga ao tauloto e ono mafai ona fai. Pe a talafeagai, faamalosiau i tagata aoga e faaaoga le polokalama faatekinolosi (app) mo le Atamai i Aoaoga Faavae e toefaamanatu ma ao tauloto ai lenei fuaitau.

O le gaoioiga faatino e soosoo ai lenei e mafai ona fesoasoani ia te oe e ao tauloto ai le mau faasino o le Atamai i Aoaoga Faavae 1 Korinito 11:11 ma fasifuaitau autu ole mau, “E leai se tane pe a le o i ai le fafine, e leai foi se fafine pe a le o i ai le tane, i le Alii.”

Tusi i lalo le fasifuaitau autu o le mau ma le mau faasino. Faitau ma tauloto faatele le fasifuaitau ma le mau faasino, tape ese upu taitasi i taimi taitasi. Faaauau sei iloga ua e mautinoa le fai ma toe fai o le fasifuaitau autu o le mau ma le mau faasino e aunoa ma le vaai i ai.

Faataitai le faaaogaina

I lau api faamaumau mo suesuega, faamaumau mataupu faavae nei o le mauaina o le malamalama faaleagaga:

Faatino i le faatuatua
Iloilo manatu ma fesili i se vaaiga e faavavau
Saili le malamalama atili e ala i punavai paia ua atofaina

Faamatala mataupu faavae taitasi i ni fuaiupu se lua pe tolu. E mafai ona e faasino i palakalafa 5-12 i le Pepa Autu o le Atamai i Aoaoga Faavae (2022) e siaki ai lou malamalama ma faaopoopo nisi faamatalaga taua sa misi ia te oe muamua.

Uunai tagata aoga e mafaufau i mea na latou aoaoina i a latou sauniuniga. A o talanoaina e tagata aoga le fesili lenei, mafaufau e tusi (pe tusi foi e tagata aoga) a latou tali i luga o le laupapa. O le faamaumauina o o latou manatu o le a fesoasoani i tagata aoga e fesootai ai ma mea o loo latou aoaoina.

I le 1 Korinito 11:11, sa e aoaoina ai e faapea i le fuafuaga a le Tama Faalelagi, e taua uma fafine ma tane.

E faapefea ona faauiga sese pe le amanaia lenei upumoni e tagata?
O a ni tulaga i lou olaga sa i ai se avanoa e te ono aoao atu ai pe puipuia lenei upu moni?

Filifili se tasi o ata faataitai nei, ma mafaufau pe faapefea e le faaaoga o mataupu faavae o le mauaina o le malamalama faaleagaga ona fesoasoani i se tasi ia malamalama i le upu moni mai le 1 Korinito 11:11 e uiga i matafaioi a alii ma tamaitai i le fuafuaga a le Tama Faalelagi.

Sa faalogo Ele o le uso laitiiti o Kale i ni tama i le aoga o faapea mai e sili atu le taua o alii nai lo tamaitai. Sa fesili Ele ia Kale, “Pe le tutusa le telē o lo’u taua e pei foi o tama?”
O loo popole Reid aua sa faalogo i isi uso o le korama o talanoa lē faaaloalo e faatatau i tamaitai.
Ina ua uma ona matamata i se ata tifaga lauiloa, sa faia ni ulaga a nisi o uo i taga faavalevalea o le tagata sa faatamā i le ata. O nisi o i latou sa ioe sa lei manaomia le tamā, ma o se tasi o uo ua faapea mai, “O le mafuaaga lea e te le manaomia ai se tane e tausia se aiga fiafia.”
O loo sauniuni Esteban ma Clara e faaipoipo i le malumalu. Sa fautua i ai o la matua e tatau ona la talanoa pe faapefea ona la faataunuuina matafaioi ma tiute eseese i totonu o le la aiga i le lumanai.

Faatino i le faatuatua

O a auala e mafai ai e oe po o se tagata i ata faataitai nei ona faatino i le faatuatua i le tali atu i faafitauli ua lagā?
E faapefea e le faatauaina o tiute ma matafaioi patino a tamaitai ma alii ona fesoasoani ia te oe e mulimuli atu ai ia Iesu Keriso?

Iloilo manatu ma fesili i se vaaiga e faavavau

O le a se mea e te iloa e uiga i le Tama Faalelagi ma Lana fuafuaga e mafai ona fesoasoani pe a e feagai ma se tulaga faapea?
O a nisi o matafaioi a alii ma tamaitai i le fuafuaga a le Tama Faalelagi?

Saili nisi faamatalaga e ala i punavai paia ua atofaina

E faapefea ona fesoasoani lou malamalama ma le molimau i upu moni sa aoao mai i le 1 Korinito 11:11 e te tali atu ai i lenei tulaga?

Atonu o se avanoa lenei e faasoa mai ai tagata aoga i mea sa latou aoaoina ia latou sauniuniga mo lenei vasega.

O a nisi aoaoga musuia mai tusitusiga paia po o taitai a le Ekalesia e mafai ona fesoasoani ia te oe e tali atu ai ma le faatuatua?

Faamanatu o le atamai i aoaoga faavae

Faaaoga le gaoioiga toe faamanatu lenei i se lesona e tatau ona aoao atu i se taimi lata mai.

Tusi le fasifuaitau autu o le mau mo le 1 Korinito 11:11 i luga o le laupapa, ia suia upu autu i ni avanoa ia faatumuina. Valaaulia tagata aoga e tusi i lalo pe tauloto fuaitau autu o le mau ma le mau faasino, ma faatumu sao avanoa. Valaaulia le vasega e toe fai faafia le mau faasino ma le fasifuaitau autu o le mau.

Galuega Faatino Faaopoopo e Aoao Mai Ai

Punavai tofia faalelagi

Mafaufau e fautuaina atu punavai tofia faalelagi nei po o isi foi ao tali mai tagata aoga i ata faataitai:

M. Russell Ballard, “Alii ma Tamaitai i le Galuega a le Alii,” New Era, Aperila 2014, 2–5Linda K. Burton, “O Le A Tatou O Ae Faatasi i Luga,” Ensign po o le Liahona, Me 2015, 29–32Jean B. Bingham, “Lotogatasi i le Faataunuuina o le Galuega a le Atua,” Ensign po o le Liahona, Me 2020, 60–63

O le tala ia Monika

I se tasi o aoaoga faasalalau mo Seminare ma Inisititute o le Ekalesia, sa saunoa faapea Brother Chad H Webb i le ala e mafai ai e mataupu faavae o le mauaina o le malamalama faaleagaga ona faaaogaina i se ata faataitai e faatatau i se tamaitai talavou e igoa ia Monika. Ina ua faapea atu se tasi e le faatauaina e le Ekalesia tamaitai, ua le mautinoa e Monika pe faapefea ona ia tali atu.

Atonu e fesoasoani pe a faaaoga e tagata aoga le tala a Monika e talanoaina ai upumoni sa aoaoina i le 1 Korinito 11:11-12 ma faataitai ona faatino mataupu faavae o le mauaina o le malamalama faaleagaga. Mafaufau e faaavanoa ni vaega o le saunoaga a Brother Webb o se punaoa mo tagata aoga.

Vaai i le Chad H Webb, “Doctrinal Mastery” (saunoaga na tuuina atu i le aoaoga faasalalau faaletausaga a Seminare ma Inisititute o le Ekalesia, Iuni 14, 2016), broadcasts.ChurchofJesusChrist.org.

Talanoaina o faaipoipoga o itupa tutusa

A o talanoaina e tagata aoga tulaga ia e manaomia ai ona aoaoina pe puipuia upumoni o le 1 Korinito 11:11 atonu latou te mananao e talanoaina le autu o le faaipoipoga o itupa tutusa. Ia mautinoa ia talanoaina lenei mataupu ma le faaeteete, agalelei, ma le alofa. Mafaufau e faasino atu i le “Same-Sex Marriage” i topics.ChurchofJesusChrist.org. E aofia ai le 1 Korinito 11:8-9, 12 ma palakalafa 2 ma le 7 o le “O Le Aiga: O Se Folafolaga i le Lalolagi” (ChurchofJesusChrist.org) e mafai foi ona fesoasoani i le mataupu.

Manatua o le faamoemoega o nei gaoioiga e le mo le faiaoga e tuuina atu tali uma ae e mo tagata aoga e faataitai ai ona faaaoga mataupu faavae o le mauaina o le malamalama faaleagaga. Saili le taitaiga o le Agaga a o e faalogo i tagata aoga ma musuiaina e fai atu fesili e fesoasoani ai ia latou taulima o latou atugaluga.

E mafai ona faaaoga le ata faataitai lea e sui ai le ata faataitai i le lesona:

E i ai nisi o uo a Olivia latou te lagonaina le tosina atu i le itupa tutusa. Ua ia fai mai, “E faigata ia te au ona malamalama pe aisea e faaauau ai pea e le Ekalesia ona aoao faapea o le faaipoipoga a itupa tutusa e sese. Aisea e teena ai le fiafia o tagata lea e mafai ona maua i le faia o sootaga o itupa tutusa?”