1 Korintasve 11
Rolet e Pashoqe dhe Hyjnore të Burrave dhe Grave
Duke e vazhduar udhëzimin dhe inkurajimin e tij ndaj shenjtorëve korintas, Pali dha mësim se burrat dhe gratë janë paracaktuar që të punojnë së bashku dhe ta përkrahin njëri-tjetrin teksa e ndjekin Zotin. Qëllimi i këtij mësimi është të të ndihmojë ta kuptosh më mirë arsyen përse burrat dhe gratë kanë nevojë për njëri-tjetrin në mënyrë që të marrin bekimet më të larta të planit të Atit Qiellor.
Përgatitja e nxënësve: Ftojini nxënësit të kujtojnë kur i kanë parë burrat dhe gratë të punojnë së bashku dhe ta përkrahin njëri-tjetrin. Nxitini ata të mendojnë për mënyrën se si këndvështrimet, aftësitë dhe pikat e forta të ndryshme të burrave dhe grave ndikojnë pozitivisht në marrëdhëniet martesore, familjare, komunitare dhe kishtare.
Veprimtari të Mundshme të të Mësuarit
Rolet e grave dhe të burrave
Si një mënyrë alternative për të filluar, merreni parasysh të tregoni një pjesë të fjalimit të Presidentes Xhin B. Bingham “Të Bashkuar në Përmbushjen e Punës së Perëndisë” nga kodet kohore 09:45–10:54.
Merri parasysh pyetjet në vijim ndërsa e vështron këtë fotografi të një ekipi me biçikletë dyshe.
-
Çfarë zotësish apo aftësish nevojiten për ta ndihmuar këtë ekip të arrijë suksesin?
-
Si mund ta forcojnë dallimet ndërmjet individëve bashkëpjesëmarrjen e tyre dhe t’i ndihmojnë ata të bëhen më të bashkuar?
Ndërsa studion kapitullin te 1 Korintasve 11 , përsiat se si burrat dhe gratë mund të punojnë me drejtësi së bashku si partnerë të barabartë për t’i përmbushur rolet e tyre të caktuara në mënyrë hyjnore dhe për t’u kualifikuar për jetën e përjetshme.
Ndihmojini nxënësit të kuptojnë se disa nga mësimet e Palit në lidhje me standardet kulturore të veçanta për atë kohë mund të jenë të vështira për t’u kuptuar. Kujtojuni nxënësve të jenë të kujdesshëm të mos i gjykojnë shkrimet e Palit dhe të njerëzve të asaj kohe sipas standardeve të zbuluara nga Zoti sot.
Te 1 Korintasve 11:1–16 , Pali trajtoi zakonet shoqërore mes korintasve të kohës së tij që nuk ishin në përputhje me pikëpamjen e Zotit për rolet hyjnore të burrave dhe grave. Është e rëndësishme të mos i ngatërrosh këto zakone me të vërtetat që Pali po jepte mësim.
Zoti, nëpërmjet Apostullit Pal, zbuloi të vërteta të pandryshueshme për rolet hyjnore të burrave dhe grave te 1 Korintasve 11:11–12 .
Lexo te 1 Korintasve 11:11–12 , duke kërkuar të vërtetat që i mëson rreth Perëndisë, burrave dhe grave.
Gratë dhe burrat në bashkëpjesëmarrje të plotë me Zotin
Te 1 Korintasve 11:11 ne mësojmë se në planin e Atit Qiellor, si burrat, ashtu edhe gratë janë domosdoshëm.
Merreni parasysh t’i paraqitni thëniet vijuese dhe t’i ftoni nxënësit të lexojnë dhe diskutojnë në dyshe ose në grupe të vogla pyetjet në vijim. Nëse dëshirojnë, ata mund t’i tregojnë klasës shembuj të burrave dhe grave që punojnë së bashku.
Lexoji thëniet vijuese nga proklamata mbi familjen dhe nga anëtarët e Kuorumit të Dymbëdhjetë Apostujve, duke kërkuar mënyrat se si burrat dhe gratë janë të domosdoshëm në planin e Atit Qiellor.
Nga proklamata mbi familjen lexojmë:
“Lumturia në jetën familjare është e mundur të arrihet më mirë kur bazohet në mësimet e Zotit Jezu Krisht. Martesat dhe familjet e suksesshme ngrihen dhe ruhen me parimet e besimit, lutjes, pendimit, faljes, respektit, dashurisë, dhembshurisë, punës dhe aktiviteteve të shëndosha argëtuese. Nëpërmjet planit hyjnor, etërit duhet të kryesojnë familjet e tyre me dashuri e drejtësi dhe janë përgjegjës për të siguruar gjërat e nevojshme për jetën dhe mbrojtjen për familjet e tyre. Nënat janë kryesisht përgjegjëse për edukimin e fëmijëve të tyre. Në këto përgjegjësi të shenjta, etërit dhe nënat kanë detyrim të ndihmojnë njëri-tjetrin si partnerë të barabartë.”
(“ Familja: Një Proklamatë drejtuar Botës ”, ChurchofJesusChrist.org)
Presidenti M. Rasëll Ballard, i Kuorumit të Dymbëdhjetë Apostujve, dha mësim:
“Në planin e mrekullueshëm të Atit tonë Qiellor që u jep burrave fuqinë e priftërisë, burrat kanë përgjegjësinë e vetme për të administruar priftërinë, por ata nuk janë priftëria. Burrat dhe gratë kanë role të ndryshme por njësoj të vlerësuara. Ashtu si një grua nuk mund të krijojë një fëmijë pa një burrë, edhe një burrë nuk mund ta ushtrojë plotësisht fuqinë e priftërisë për të krijuar një familje të përjetshme pa një grua. … Në këndvështrimin e përjetësisë, si fuqia krijuese edhe fuqia e priftërisë janë të përbashkëta për një bashkëshort dhe një bashkëshorte.”
(M. Rasëll Ballard, “Kjo Është Vepra Ime dhe Lavdia Ime”, Ensign ose Liahona, maj 2013, f. 19)
Plaku Dejvid A. Bednar, i Kuorumit të Dymbëdhjetë Apostujve, dha mësim:
“Qe e nevojshme ndërthurja e pashoqe e aftësive shpirtërore, fizike, mendore dhe emocionale si të meshkujve dhe femrave për ta realizuar planin e lumturisë. ‘Në Zotin as burri s’është pa gruan, as gruaja pa burrin’ ( 1 Korintasve 11:11). Burri dhe gruaja janë paracaktuar të mësojnë nga njëri‑tjetri, ta forcojnë, ta bekojnë, ta plotësojnë … njëri‑tjetrin.”
(Dejvid A. Bednar, “Ne Besojmë në Qenien të Dëlirë”, Ensign ose Liahona, maj 2013, f. 41–42)
Jepuni nxënësve kohë të mjaftueshme për të diskutuar atë që gjejnë dhe çdo pyetje që mund të kenë. Për t’i ndihmuar nxënësit ta thellojnë të kuptuarit që kanë, dëgjojini me kujdes ndërsa përgjigjen dhe merreni parasysh të bëni pyetje për ndjekjen e ecurisë si këto: Si mendoni, përse është e rëndësishme që ta kuptoni këtë mësim? Çfarë mësojmë rreth pikëpamjes së Atit Qiellor për burrat dhe gratë? Ku ndryshon kjo pikëpamje nga mënyra se si bota flet për burrat dhe gratë? Si mund të ndikojë ajo e vërtetë në qëndrimet dhe sjelljet tuaja?
-
Si mendon, përse në planin e Atit Qiellor bijtë e Tij dhe bijat e Tij e arrijnë jetën e përjetshme së bashku?
-
Si e tregon kjo dashurinë dhe respektin e Atit Qiellor si për gratë edhe për burrat?
-
Si mund të të ndihmojë të kuptuarit e këtyre të vërtetave kur përballesh me pikëpamje të kundërta për rolet dhe përgjegjësitë e burrave dhe grave?
-
Si mund t’i zbatosh këto të vërteta për gratë dhe burrat në jetën tënde (për shembull, në shtëpi, në kishë me të rinj ose të reja të tjera dhe ndërsa përgatitesh për jetën tënde familjare të ardhshme)?
Në varësi të kohës që keni në dispozicion në mësim, nxënësit mund të kenë dobi nga vazhdimi i studimit të kapitullit te 1 Korintasve 11 dhe diskutimi i sakramentit. Kërkoni te pjesa “Veprimtari Plotësuese të të Mësuarit” një mënyrë se si nxënësit mund ta studiojnë sakramentin.
Komente dhe Informacion për Rrethanat
Po sikur njerëzit që dua, të mos martohen apo të mos bëhen me fëmijë?
Disa mund të shqetësohen ose pyetin veten për mënyrën se si plani i Atit Qiellor si për gratë edhe për burrat mund të përmbushet për ata që nuk martohen apo nuk bëhen me fëmijë. Me dhembshuri të madhe, Presidenti Bojd K. Paker (1924–2015), i Kuorumit të Dymbëdhjetë Apostujve, tha këto fjalë ngushëlluese:
“Ata që nuk martohen ose ata që nuk mund të kenë fëmijë, nuk janë të përjashtuar nga bekimet e përjetshme që ata kërkojnë, por të cilat, për momentin, mbeten përtej mundësive të tyre. …
Dëshirat tuaja të zjarrta e të fshehta dhe përgjërimet me lot do ta prekin zemrën edhe të Atit edhe të Birit. Do t’ju jepet një siguri vetjake prej Tyre se jeta juaj do të jetë e plotë dhe se asnjë bekim që është thelbësor, nuk do të humbasë për ju.
Si një shërbëtor i Zotit, duke vepruar në detyrën ku jam shuguruar, u bëj një premtim atyre që janë në rrethana të tilla, se nuk do të ketë asgjë thelbësore për shpëtimin dhe ekzaltimin tuaj që nuk do të prehet mbi ju kur të vijë koha.”
(Bojd K. Paker, “Dëshmia”, Ensign ose Liahona, maj 2014, f. 95)
Përse Satani do që ne si burra dhe gra të jemi të përçarë?
Presidentja Xhin B. Bingham, ish-Presidente e Përgjithshme e Shoqatës së Ndihmës, dha mësim:
“Kundërshtari ka qenë mjaft i suksesshëm në synimin e vet për t’i përçarë burrat e gratë, në orvatjet e tij për t’i mposhtur shpirtrat tanë. Luciferi e di që, po qe se mund ta dëmtojë unitetin që ndiejnë burrat e gratë, po qe se ai mund të na pështjellojë rreth vlerës sonë hyjnore dhe përgjegjësive të besëlidhjeve tona, ai do të arrijë t’i shkatërrojë familjet, të cilat janë njësitë themelore të përjetësisë.
Satani e stimulon përdorimin e krahasimit si një mjet për të krijuar ndjenja të të qenit më lart ose më poshtë, duke e fshehur të vërtetën e përjetshme se dallimet që nga lindja të burrave dhe grave janë dhënë nga Perëndia dhe vlerësohen njëlloj nga Ai. Ai është orvatur t’i zhvlerësojë kontributet e grave si në familje ashtu edhe në shoqërinë civile, duke zvogëluar në këtë mënyrë ndikimin e tyre lartësues për mirë. Synimi i tij ka qenë të inkurajojë një luftë për pushtet në vend që të kremtohet për kontributet e pashoqe të burrave dhe grave që e plotësojnë njëri‑tjetrin dhe kontribuojnë në unitet.”
(Xhin B. Bingham, “Të Bashkuar në Përmbushjen e Punës së Perëndisë”, Ensign ose Liahona, maj 2020, f. 60–61)
Veprimtari Plotësuese të të Mësuarit
Role plotësuese në martesë
Merreni parasysh të shfaqni materialin filmik “Renaissance of Marriage” [“Rilindja e Martesës”] (02:36), në dispozicion në ChurchofJesusChrist.org, ku Presidenti Henri B. Ajring foli në një simpozium ndërkombëtar për martesën. Ai tregoi se si rolet plotësuese të bashkëshortit dhe bashkëshortes mund të krijojnë lumturi për ata vetë dhe familjet e tyre në këtë jetë dhe në përjetësi.
Si i trajtoi Shpëtimtari gratë dhe burrat
Për t’i ndihmuar nxënësit të mendojnë për mënyrën se si Jezu Krishti ndërveproi dhe i vlerësoi si gratë, ashtu edhe burrat, merreni parasysh të paraqitni figura të ndryshme nga jeta e Tij. Këto mund të përfshijnë ringjalljen e Llazarit, gruan te pusi, gruan e kapur në shkelje kurore, pasanikun e ri, Jairin dhe vajzën e tij, gruan me sëmundjen e gjakut dhe të tjerë. Ftojini nxënësit të reflektojnë se si shembulli i Shpëtimtarit tregon se si ata duhet t’i vlerësojnë dhe respektojnë si gratë edhe burrat në jetën e tyre.
Ne duhet ta shqyrtojmë jetën tonë ndërkohë që marrim sakramentin
Nxënësit mund të përfitojnë nga studimi i vargjeve te 1 Korintasve 11:23–32 dhe përcaktimi i së vërtetës të renditur më lart (shih vagun 28). Mund të jetë e dobishme të shpjegoni që Pali u kujtoi korintasve Darkën e Fundit kur Jezu Krishti krijoi sakrametin në kujtim të flijimit të Tij (shih vargjet 23–27). Pasi nxënësit ta përcaktojnë të vërtetën nga vargu 28 , merreni parasysh ta shpërndani këtë thënie nga Presidenti Hauard W. Hanter (1907–1995):
“I bëra vetes këtë pyetje: ‘A e vendos Perëndinë mbi të gjitha gjërat e tjera dhe a i zbatoj të gjitha urdhërimet e Tij?’ Atëherë erdhën reflektimi dhe vendosmëria. Bërja e një besëlidhjeje me Zotin për t’i zbatuar gjithmonë urdhërimet e Tij është një detyrim serioz dhe ripërtëritja e asaj besëlidhjeje me anë të marrjes së sakramentit është po aq serioze. Çastet solemne të të menduarit, ndërkohë që po shërbehet sakramenti, kanë domethënie të madhe. Ato janë çaste të shqyrtimit të vetvetes, të shqyrtimit të brendshëm, të dallimit të vetvetes – një kohë për të reflektuar dhe për të treguar vendosmëri.”
(Howard W. Hunter, “Thoughts on the Sacrament”, Ensign, maj 1977, f. 25)
Më pas nxënësit mund të marrin parasysh se për cilat pyetje mund të përsiatin javën e ardhshme gjatë sakramentit për të shqyrtuar jetën e tyre. Këto pyetje mund të jenë të renditura në tabelë.