1 Peteru 1–5

“Silisili Ona Aoga i le Auro”

Atonu e te manatua lou aoao ai e uiga i le faatuatua ma le filiga o le Aposetolo o Peteru a o e suesueina le afa muamua o le Feagaiga Fou. O le tusi muamua a Peteru sa tusia agai atu i le faaiuga o le soifuaga o Peteru, i le tele o tausaga talu ona ia savali ma talanoa ma Iesu Keriso i le taimi o le galuega a le Faaola i le lalolagi. I lana tusi muamua, sa taulai atu ai Peteru, o le Aposetolo sinia, i auala e mafai ona faamalosia ai le Au Paia a o feagai ma tofotofoga maoae i lima o tagata Roma. O lenei lesona e mafai ona fesoasoani ia e malamalama atili ai i faamoemoega a le Atua e oo mai ai ia te oe tofotofoga ma faamalosia ai lau taulaigamau e onosaia ma le faamaoni ia tofotofoga.

O le taulimaina o manaoga patino o tagata aoga. Mafaufau i manaoga eseese o le aoaoina o tagata aoga. Faaaoga gaoioiga e mafai ona aoao ai o loo fautuaina atu i lenei lesona e fai ma taiala, ae le o se faamatalaga ia taulotoina, ma ia fetuunai gaoioiga e fesoasoani ai i tagata aoga. O fetuunaiga e ono aofia ai le faaaogaina o metotia eseese e faitau ai fuaiupu o tusitusiga paia po o le faia o gaoioiga eseese e malamalama ai i mataupu faavae po o aoaoga faavae. Aua le fefe e fatufatu manatu ma faataitai ni faiga fou.

Sauniuniga a le tagata aoga: Valaaulia tagata aoga e mafaufau pe faapefea ona latou tali atu i le fesili lenei: Aisea tatou te feagai ai ma tofotofoga, faigata, ma le faaitu’au i le olaga?

Gaoioiga E Ono Mafai Ona Aoao Ai

Aisea tatou te feagai ai ma faigata i le olaga?

Sa faamalamalama mai e Elder Dale G. Renlund o le Korama a Aposetolo e Toasefululua le auala o le a oo ai ia i tatou uma o aafiaga e foliga mai e faaitu’au. Matamata i le vitio “Faaitu’au Faaosolilivau,” o loo maua i le ChurchofJesusChrist.org, mai le faailotaimi 3:19 i le 4:12, pe faitau le faamatalaga nei:

Infuriating Unfairness

O ni isi faaitu’au e le mafai ona faamatalaina, o faaitu’au e aunoa ma ni mafuaaga e faaosolilivau. O le faaitu’au e mafua i le ola faatasi ma tino e le atoatoa, faamanu’alia, pe faama’ia. O le natura lava o le olaga faitino e oo mai ai le faaitu’au. E i ai ni isi tagata e fananau mai i le tele o le tamaoaiga; o isi e leai. O ni isi e i ai matua alolofa; o isi e leai. O ni isi e tele tausaga e ola ai; o isi e laiti. Ma faapena ai pea lava pea lava pea. O ni isi tagata e faia ni measese faataumaoi, tusa lava foi pe a latou taumafai e fai mea lelei. O ni isi e filifili e ’aua nei faaitiitia le faaitu’au pe a latou mafaia. Ma le faaonoono lava, o ni isi ua faaaogaina lo latou faitalia na tuuina mai e le Atua e faatiga ai i isi e ui lava ina sa matua le tatau ona latou faia.

(Dale G. Renlund, “Faapito’au Faaosolilivau,” Liahona, Me 2021, 42)

• Aisea e te manatu na faaaoga ai e Elder Renlund le upu “faaosolilivau” e faamatala ai ni isi o mea faaitu’au tatou te feagai i le olaga?

• O ai e te iloa o loo feagai pe sa feagai ma se tofotofoga e faafoliga e logo faaitu’au faaosolilivau? Aisea e te manatu ai ua faatagaina e le Alii lenei mea e tupu?

I le TA 64, sa faatamaia ai e le afi vaega tetele o le aai o Roma. Sa tuuaia e tagata lauiloa o Roma ia tagata o le Ekalesia i le amataina o le afi, lea na iu atu ai i sauaga tetele o tagata Kerisiano i le Malo atoa o Roma. E foliga mai na tusia e Peteru lana tusi muamua i se taimi ina ua mavae lenei mea e faamalosia ai le faatuatua o le Au Paia ma faamanatu atu ai ia i latou lo latou taui e faavavau mo le onosaia ma le faamaoni o tofotofoga. A o e suesue, ia gauai atu i uunaiga a le Agaga Paia lea e mafai ona fesoasoani ia te oe e malamalama ai i ni isi o mafuaaga mo ou lava tofotofoga ma le ala e mafai ai ona e faalagolago ia Iesu Keriso e fesoasoani ia te oe e onosaia ma le faamaoni na tofotofoga.

O le afi a le tunu auro

Faitau le 1 Peteru 1:3–9 , ma vaavaai mo mea na aoao mai e le Aposetolo o Peteru e uiga i faamanuiaga o loo faatalitali mai mo i latou o e onosaia ma le faamaoni o latou tofotofoga. O le upu tofotofoga i le fuaiupu 6 e faatatau i luitau ma puapuaga (tagai 1 Peteru 1:6 , vaefaamatalaga e).

• O a upu po o fasifuaitau mai nei fuaiupu e te manatu e ono fesoasoani e manatua pe a feagai oe po o isi ma tofotofoga? Aisea?

• Aisea e te manatu na faatusa ai e Peteru le tofotofoina o le faatuatua o le Au Paia i auro lea e faamamaina i le afi?

Mafaufau e faaali atu i le vasega se ata po o se ata tusi o se faatanoa e faausi ai uamea, e pei o lea.

O se ata lenei o se faatanoa e faausi ai uamea. O se faatanoa o se koneteina lea e faausi ai uamea e pei o le auro. A faamamaina uamea, e faavevelaina ma faausiina e aveese ai otaota ma faaleleia ai le oloa faaiu.

• O a ni auala e avea ai le faatuatua ua suesueina, pe tofotofoina e “silisili ona aoga i le … auro”? ( 1 Peteru 1:7).

O se tasi upumoni e mafai ona faailoa mai fuaiupu na faatoa e suesueina e faapea a o tatou onosaia ma le faamaoni ia tofotofoga, o le a faamamaina ma faamalosia lo tatou faatuatua ia Iesu Keriso. Mafaufau e tusifaamaumau lenei upumoni i au tusitusiga paia po o lau api faamaumau mo suesuega.

• O le a le mea e uiga i le feagai ai ma tofotofoga faigata e mafai ona faamalosia ai lo tatou faatuatua ia Iesu Keriso?

Mafaufau e faitau faatasi le Alema 62:41 o se vasega a o lei faasoaina atu le faamalamalamaga ma le fesili lenei.

E ui o le feagai ai ma faigata e mafai ona faamamaina faaleagaga mo le toatele o tagata, ae e i ai isi ua faaoonaina pe faamaaaina o latou loto pe a mavae se tofotofoga faigata (tagai i le Alema 62:41).

• O le a sou manatu o le a se mea e mafai ona fesoasoani ia i tatou e liliu atu ai o tatou tofotofoga i ni faamanuiaga nai lo aafiaga e faaitiitia ai lo tatou faatuatua?

• O a ni aafiaga na e oo i ai, po o a ni aafiaga ua e iloa, ina ua faamalosia ai lou faatuatua po o le faatuatua o se isi tagata e ala i le onosaia ma le faamaoni o tofotofoga faigata?

• O a ni mea o aoao atu ia te oe e nei aafiaga e uiga i le Alii?

Matamata le vitio “The Refiner’s Fire” (5:02), o loo maua i le ChurchofJesusChrist.org, e vaai ai i se tasi o faataitaiga o se tagata sa faamalosia e le Faaola a o ia onosaia ma le faamaoni ona tofotofoga.

The Refiner's Fire

Ua fautuaina e Peteru le Au Paia

O se autu o loo maua i le tusi muamua atoa a Peteru o loo faatatau i le ala e mafai ai e soo o Iesu Keriso ona onosaia ma le faamaoni puapuaga ma sauaga. O le fautuaga a Peteru e mafai ona maua ai le faamoemoe, faamalosiauga, ma le malosi i soo se tasi o loo feagai ma se tofotofoga o le olaga faitino.

Tusi se ata faigofie o se faatanoa e faausi ai uamea, e pei o le ata na e vaai muamua i ai i le lesona. I totonu o le faatanoa e faausi ai uamea, lisi ai ni isi o tofotofoga ma puapuaga na feagai ma oe pe o loo feagai nei ma oe.

A o e suesue atili i upu a Peteru, vaavaai mo aoaoga e mafai ona fesoasoani ia te oe i tofotofoga na e lisiina i lau ata. Tusi nei aoaoga i fafo ane o lau ata o se faatanoa e faausi ai uamea.

Mafaufau e tusi mau faasino o tusitusiga paia ma o latou aotelega nei i luga o le laupapa. Fuafua le auala sili mo tagata aoga e suesue ai nei fuaiupu. O se tasi o filifiliga o le vaevae lea o le vasega i ni vaega, ma mo vaega taitasi ia atofa i ai se seti se tasi o fuaiupu e suesue i ai. A uma ua lava se taimi, ona mafai lea e tagata aoga ona lipoti mai mea na latou aoaoina mai a latou suesuega i le vaega atoa o le vasega. Ona mafai lea ona valaaulia tagata aoga e faaopoopo ni malamalamaaga i a latou ata e faavae i mea na tuuina atu e tagata o la latou vasega.

O se isi filifiliga e mafaufau i ai o le valaaulia lea o tagata aoga e suesue faatasi ma se paga ia seti taitasi o fuaiupu. A uma ona suesue ma talanoaina e tagata aoga ia fuaiupu ma a latou paga, e mafai ona tofia tagata aoga e faataamilo ina ia tofu le tagata ma se paga fou. E mafai ona toe fai fai pea lenei faagasologa ina ia mafai ai e tagata aoga taitoatasi ona suesue i seti uma e tolu o fuaiupu ma paga eseese.

1 Peteru 2:20–25 —O le faataitaiga a Iesu Keriso i le onosaia o tofotofoga

1 Peteru 4:12–19 —Mafuaaga e olioli ai i o tatou tofotofoga

1 Peteru 5:6–11 —Mauaina o le malosi o le Alii e onosaia ai o tatou tofotofoga

A uma ua lava se taimi o le vasega e suesue ai, ona valaaulia lea o ni volenitia e faasoa mai o latou malamalamaaga. Mafaufau e valaaulia tagata aoga e faasoa mai ni fuaiupu faapitoa na latou maua e sili ona anoa ma faamalamalama mai pe aisea. Uunaia i latou e mafaufau pe mafai faapefea e mea na latou aoaoina i le aso ona fesoasoani ia i latou i o latou tulaga o i ai nei ma tusifaamaumau o latou manatu ma uunaiga i a latou api faamaumau mo suesuega.

Tala Auiliili ma Faamatalaga o Talaaga

1 Peteru 2:20 . Aisea na aoao mai ai Peteru e tatau ona tatou puapuagatia ma le onosai o tatou tofotofoga?

Na aoao mai Elder Neal A. Maxwell (1926–2004) o le Korama a Aposetolo e Toasefululua le mea lenei:

O le onosai e fesootai vavalalata lava i le faatuatua i lo tatou Tama Faalelagi. O le mea moni, pe a tatou soona le onosai ua tatou faapea ane lea ua tatou iloa le mea e sili ona lelei—e sili atu nai lo o le Atua. Pe ua tatou tautino atu o lo tatou taimi faatulagaina e sili atu nai lo Lona taimi. … O le mea lea, e pei ona faailoa mai, o le onosai o se uiga mama taua faaleolaga nei e fua i lo tatou faatuatua, lo tatou faitalia saoloto, o o tatou uiga faaalia i le olaga, o lo tatou lotomaualalo, ma o tatou mafatiaga. … E leai lava se isi auala faigofie e maua ai le tuputupu ae moni.

(Neal A. Maxwell, “Patience” [faigalotu a le Iunivesite o Polika Iaga, Nov. 27, 1979], 1, 4, speeches.byu.edu)

E mafai faapefea ona ou faatoilaloina tofotofoga o loo ou feagai ai?

Ua aoao mai Elder Neil L. Andersen o le Korama a Aposetolo e Toasefululua:

I totonu o le faatanoa o faigata o tofotofoga faalelalolagi, ia agai pea i luma ma le onosai, ma o le a aumaia ia te oe e le mana faamalolo o le Faaola le malamalama, mafaufau manino, filemu, ma le faamoemoe. Tatalo ma lou loto atoa. Faamalosia lou faatuatua ia Iesu Keriso, i Lona moni a’ia’i, i Lona alofa tunoa. … Vaai i luma. O o outou mafatiaga ma faanoanoaga e moni lava, ae o le a lē tumau e faavavau. O le a mou atu lou po pogisa, ona [sa toetu mai] le Atalii … ma le faamalologa i ona apaau.

(Neil L. Andersen, “Manu’a,” Ensign po o le Liahona, Nov. 2018, 85)

E mafai faapefea ona ou maua le fiafia a o ou puapuagatia ai i tofotofoga?

Na saunoa Elder Joseph B. Wirthlin (1917–2008) o le Korama a Aposetolo e Toasefululua e uiga i le mauaina o le fiafia i taimi o faigata ma le manatuaina o le fautuaga a lona tina e faapea atu, “Ia tuu po o le a lava se mea e tupu, ma fiafia i ai.”

E mafai faapefea ona tatou fiafia i aso ua faatumulia i le faanoanoa? E le mafai—i le taimi nei, i se ta’u itiitiga. Ou te le manatu na fautua mai lo’u tina matou te taofia le lotovaivai pe faafitia le moni o le tiga. Ou te le manatu sa ia fautua mai ia matou ufiufi upumoni faalemanuia i lalo o se ofutalaloa o le fiafia taufaaoleole. Ae ou te talitonu o le ala tatou te tali atu ai i faigata e mafai ona avea o se vaega taua tele i le auala e mafai ai ona tatou fiafia ma faamanuiaina i le olaga. Afai tatou te taulimaina ma le atamai ia puapuaga, o o tatou taimi sili ona faigata e mafai ona avea ma taimi o le tuputupu ae silisili, lea e mafai ona oo atu ai i taimi o le fiafiaga silisili. …

A o tatou vaavaai mo tala malie, saili mo le vaaiga e faavavau, malamalama i le mataupu faavae o le toe tauia, ma faalatalata atu i lo tatou Tama Faalelagi, e mafai ai ona tatou onosaia faigata ma tofotofoga. E mafai ona tatou faapea atu, e pei ona faia e lo’u tina, “Ia tuu po o le a lava se mea e tupu, ma fiafia i ai.”

(Joseph B. Wirthlin, “Ia Tuu Po o le A Lava se Mea e Tupu, Ia Fiafia Pea,” Ensign po o le Liahona, Nov. 2008, 26–28)

Gaoioiga Faaopoopo e Aoao Ai

1 Peteru 5:1–5 . “Leoleo i le lafu mamoe a le Atua”

Mafaufau e faitau faatasi ma le vasega le 1 Peteru 5:1–5 , ma ta’u i ai o nei fuaiupu na aoao atu ai e Peteru ia toeaina o le Ekalesia e uiga i o latou tiutetauave o ni taitai i le malo o le Atua. Fesoasoani i tagata aoga e faailoa le upumoni lenei: Ua i ai i taitai o le Ekalesia le tiutetauave o le tausia ma le vaaia o le lafu mamoe a le Atua i le alofa ma i faataitaiga. E mafai ona valaaulia tagata aoga e talanoaina faataitaiga o auala na auauna atu ai o latou taitai ia i latou ma o latou aiga i le alofa. Mafaufau foi e fesoasoani ia malamalama le vasega e mafai ona avea i latou ma faataitaiga i a latou korama ma tagata o le vasega e ala i le mulimuli i le faataitaiga a “le Leoleo Mamoe silisili” ( 1 Peteru 5:4).