1 Peteru 3:18–22; 4:1–6

O Le Galuega o le Faaolataga mo E Ua Maliliu

O le a le mea o le a tupu i le faitau piliona o fanau a le Tama Faalelagi o e sa ola ma maliliu e aunoa ma le avanoa e faalogo ai ia Iesu Keriso pe taliaina sauniga faatagaina i Lona suafa? Na aoao mai e le Aposetolo o Peteru e faapea, sa folafola atu e Iesu Keriso le talalelei i le lalolagi o agaga ina ua mavae Lona maliu, ma mafai ai ona avanoa faamanuiaga o le talalelei i fanau uma a le Tama Faalelagi. O lenei lesona o le a fesoasoani ia te oe e saili ai auala e fesoasoani ai i le Faaola i Lana galuega o le faaolaina o e ua maliliu.

O le muai matamataina o punaoa. Pe a sauniuni mo le vasega, ia mautinoa e muai matamata faasalalauga uma ma faamasani i uepisaite, lesona faatino, po o isi anomea o le a faaaogaina i le vasega. O le faia o lena mea o le a faateleina ai le mautinoa i le aoao atu ma maua ai le avanoa e taulai atili atu ai i manaoga o tagata aoga.

Sauniuniga a le tagata aoga: Ina ia mafai ona oo atu i nisi o vaega faatonutonu o le FamilySearch.org po o le polokalama o le FamilySearch Family Tree, e ao i tagata aoga ona saini i luga i a latou Faitotoa o le Ekalesia i o latou igoa faaaoga ma uputatala o loo fesootai ma numera o o latou pepa faamaumau. Afai e le o i ai pe le iloa foi e tagata aoga o latou igoa faaaoga ma uputatala, valaaulia i latou e fatu pe toe saili mai ia mea i le account.ChurchofJesusChrist.org pe amata fai se faitotoa i le FamilySearch.org. Fesili atu i se tagata tomai faapitoa mo talafaasolopito o aiga a le uarota po o le paranesi po o se taitai faamaopoopo o Seminare ma Inisitituti o Mataupu Faalelotu mo se fesoasoani pe a manaomia.

Gaoioiga e ono Mafai Ona Aoao Ai

O se fesili faafaigata

Mafaufau e faaali atu le faamatalaga lenei i se nofoaga e mafai ai e tagata aoga ona faitau i ai a o latou ulufale atu i le potuaoga.

Na saunoa Elder D. Todd Christofferson o le Korama a Aposetolo e Toasefululua:

Ua leva ona tauivi le au failotu Kerisiano [tagata atamamai] ma le fesili, O le a le taunuuga o le anoano o piliona o tagata o e na ola ma maliliu e aunoa ma se malamalama e uiga ia Iesu?

(D. Todd Christofferson, “The Redemption of the Dead and the Testimony of Jesus,” Ensign, Nov. 2000, 9)

• E faapefea ona e tali atu pe afai e fesili atu se isi ia te oe i le fesili lenei?

Afai e faigata i tagata aoga ona tali le fesili talu ai, mafaufau e faaali atu ia i latou ni faaiteitega e pei o se ata o se malumalu po o se siata o le faasologa o le gafa o se aiga.

Afai na faigofie ona tali mai tagata aoga i le fesili, mafaufau e fesili atu ia i latou pe na faapefea ona latou iloa le tali i se mea ua le mautonu ai le toatele o tagata mo le tele o seneturi.

Sa faaauau le saunoaga a Elder Christofferson:

Faatasi ai ma le Toefuataiga o le talalelei a Iesu Keriso, na oo mai ai le malamalama i le faaolaina o i latou ua maliliu ae lei papatisoina ma le avea ai o le Atua ma “se Atua ua atoatoa, faamasinotonu, ma o se Atua alofa mutimutivale foi” [ Alema 42:15].

(D. Todd Christofferson, “The Redemption of the Dead and the Testimony of Jesus,” 9)

O le Faaola i le lalolagi o agaga

E ui ina toefuatai mai le malamalama o le faaolataga mo e ua maliliu e ala mai i le Perofeta o Iosefa Samita, ae o loo i ai i le Tusi Paia ia fuaitau o loo faaali mai ai ia i tatou o na upumoni sa malamalama i ai ma aoaoina e Aposetolo anamua. Mo se faataitaiga, na aoao mai le Aposetolo o Peteru e uiga i le mea na faia e Iesu Keriso mo i latou o e na maliliu e aunoa ma se malamalama i le talalelei.

Faitau le 1 Peteru 3:18–20 ; 4:6 e vaai po o le a le mea na aoao mai e Peteru e uiga i le ala na faaauau ai e Iesu Keriso Lana galuega e laveai fanau a lo tatou Tama Faalelagi, e oo lava ina ua mavae Lona maliu. Maitau le eseesega o nei fuaiupu i le Faaliliuga a Iosefa Samita (tagai 1 Peteru 3:20 , vaefaamatalaga a, ma le 1 Peteru 4:6 , vaefaamatalaga a).

1 Peteru 4:6O le

o se fuaitau o le atamai i aoaoga faavae. Mafaufau e maka fuaitau o le atamai i aoaoga faavae i se ala iloga ina ia mafai ai ona e maua gofie.

• O a ni mea o aoao mai e nei fuaiupu ia te oe e uiga i le galuega a le Faaola i le lalolagi o agaga?

• E tusa ai ma le 1 Peteru 4:6, aisea e tala’i atu ai le talalelei ia i latou o e ua maliliu?

Atonu e fesoasoani le faamalamalama atu e faapea, o le faia ai o lenei mea, ua o le amiotonu lava o le Atua. E finagalo o Ia ia faamasinoina ma le amiotonu tagata uma. O lea la nai lo le tausalaina o i latou o e e lei faalogo i le talalelei, ua Ia faia ia mafai e i latou ona talia ma maua le talalelei. O se tasi upumoni e mafai ona aoaoina e tagata aoga mai i lenei fuaiupu o le e talaiina atu le talalelei ia i latou o e ua maliliu ina ia latou maua ia avanoa tutusa e pei o i latou o e ua faalogo i le talalelei i le olaga nei.

• E faapefea ona avea le aoaoga faavae o le faaolataga mo e ua maliliu, o se faataitaiga o le agaalofa ma le alofa mutimutivale o le Atua mo Lana fanau?

Faaaliga i ona po nei e uiga i le lalolagi o agaga

O faaaliga i ona po nei e mafai ona fesoasoani ia i tatou e aoao atili ai e uiga i mea na faia e le Faaola a o i ai o Ia i le lalolagi o agaga.

A o faitau ma mafaufau loloto Peresitene Iosefa F. Samita (1838–1918) i nei lava fuaiupu i le 1 Peteru, sa ia maua se faaaliga o le galuega a le Faaola i e ua maliliu. O lenei faaaliga o loo tusia i le Mataupu Faavae ma Feagaiga 138 ma o loo aofia ai faamatalaga auiliili sa lei iloaina muamua e tagata o le Ekalesia. Mafaufau e tusi se mau fesootai po o se sootaga a le 1 Peteru 4:6 i le Mataupu Faavae ma Feagaiga 138 i au tusitusiga paia.

A o lei suesueina fuaiupu mai le Mataupu Faavae ma Feagaiga 138 , atonu e fesoasoani le valaaulia o tagata aoga e faasoa mai mea ua uma ona latou iloa e uiga i lenei faaaliga vaaia. E mafai foi ona valaaulia tagata aoga e suesue atoa le Mataupu Faavae ma Feagaiga 138 e i latou lava ma faailoa mai fuaiupu e faalolotoina ai lo latou malamalama i upumoni e uiga i le lalolagi o agaga o loo aoaoina i le 1 Peteru.

Faitau le Mataupu Faavae ma Feagaiga 138:29–34, 57–58 , ma vaavaai mo ni malamalamaaga faaopoopo e uiga i le galuega a le Faaola i le lalolagi o agaga.

• O le a se mea na e aoaoina mai lau suesuega o le Mataupu Faavae ma Feagaiga 138 na e lagonaina sa matua taua lava? Aisea?

• E mafai faapefea e le malamalama i mea e tutupu i le lalolagi o agaga ona aafia ai ou aafiaga i le faia o galuega faalemalumalu ma talafaasolopito o aiga?

• O le a se faamaoniga o le agaalofa ma le alofa mutimutivale o Iesu Keriso o e vaaia i nei fuaiupu?

O lo tatou tiutetauave

Na saunoa Elder Dale G. Renlund o le Korama a Aposetolo e Toasefululua e uiga i le tiutetauave ua ia i tatou e fesoasoani ai i le Faaola i Lana galuega o le faaolaina o e ua maliliu. Atonu e te manao e matamata le vitio “Galuega o Talafaasolopito o Aiga ma le Malumalu: Faamauga ma le Faamalologa,” o loo maua i luga o le ChurchofJesusChrist.org, mai le faailotaimi 3:01 i le 3:47, pe faitau le faamatalaga lenei:

I le avea ai ma tagata o le Ekalesia, ua i ai ia i tatou se tiutetauave paia e saili o tatou tuaa ma tuufaatasi talafaasolopito o aiga. E sili mamao atu lenei nai lo o se mausa faaosofia, ona o sauniga o le faaolataga e tatau mo fanau uma a le Atua. E ao ona tatou faailoaina o tatou lava tuaa o e na maliliu e aunoa ma le mauaina o sauniga o le faaolataga. E mafai ona tatou faia ia sauniga e fai ma sui i totonu o malumalu, ma e ono mafai ona filifili o tatou tuaa e talia ia sauniga. Ua uunaia foi i tatou ia fesoasoani atu i tagata o le uarota ma le siteki i o latou igoa faaleaiga. E maofa ma ofoofogia e faapea, e ala atu i talafaasolopito o aiga ma galuega o le malumalu, e mafai ai ona tatou fesoasoani e togiola e ua maliliu.

(Dale G. Renlund, “Galuega o Talafaasolopito o Aiga ma le Malumalu: Faamauga ma le Faamalologa,” Ensign po o le Liahona, Me 2018, 46–47)

• Na faapefea e le auai i talafaasolopito o aiga ma galuega faalemalumalu ona aafia ai lou olaga po o olaga o isi? Afai e te lei auai lava i ai, o le a sou manatu e faapefea ona ono aafia ai lou olaga?

I le taimi o totoe o le vasega, fesoasoani i tagata aoga e amata ona auai i le galuega o le faaolataga mo e ua maliliu. Mafaufau i se tasi pe sili atu o manatu nei.

• Asiasi i le FamilySearch.org pe faaaoga le polokalama o le FamilySearch Family Tree. Vaai pe mafai ona e mauaina igoa o tuaa o loo manaomia pea ona faia a latou sauniga o le perisitua. A le o le faaleoleo o nei igoa ma ave e oe lava ia i le malumalu pe auina atu igoa i le malumalu ina ia mafai ai e se isi tagata ona faia sauniga mo i latou. E mafai ona faaaoga le vaega o Sauniga ua Saunia e fesoasoani ia te oe e iloa vave ai tuaa o e manaomia sauniga o le perisitua. (Mo faatonuga o le auala e faaaoga ai lenei vaega, tagai i le “Family Tree App: Sauniga ua Saunia,” New Era, Ian. 2019, 45.)

• Asiasi i le vaega “Talafaasolopito o Aiga” i Autu o le Talalelei (topics.ChurchofJesusChrist.org) e sue ai faamatalaga, tusitusiga paia, savali o konafesi aoao, ma vitio e uiga i talafaasolopito o aiga.

• Asiasi i vitio ua tuufaatasia o le “Talafaasolopito o Aiga” i le Potutusi o Ala o Faasalalauga (videos.ChurchofJesusChrist.org) e sue ai vitio musuia e uiga i le auai i galuega o malumalu ma talafaasolopito o aiga.

• Fai se lisi o fesili e uiga i ou tuaa e mafai ona e fesili atu ai i ou matua po o isi tagata o lou aiga. I se taimi talafeagai, fai atu au fesili ma talanoaina pe mafai faapefea e lou aiga ona auai faatasi i le galuega o le malumalu ma talafaasolopito o aiga.

Tala Auiliili ma Faamatalaga o Talaaga

O le a lo’u tiutetauave i o’u tuaa ua maliliu?

Na aoao mai Elder Quentin L. Cook o le Korama a Aposetolo e Toasefululua:

O le aoaoga faavae o le aiga e faatatau i talafaasolopito o aiga ma galuega o le malumalu ua manino. Na faatatau le Alii i uluai faatonuga faafaaaliga i le “papatisoga mo o outou tagata maliliu” [ Mataupu Faavae ma Feagaiga127:5 ; ua faaopoopoina le faamamafa]. O la tatou matafaioi faaleaoaoga faavae ua faatatau lea i o tatou lava tuaa. E mafua lenei mea ona o le faatulagaga faaselesitila o le lagi e faavae lea i aiga. Ua uunaia e le Au Peresitene Sili le au paia, aemaise lava le autalavou ma talavou nofofua matutua, ia faamamafa galuega o talafaasolopito o aiga ma sauniga mo igoa o o latou lava aiga po o igoa o tuaa o tagata o a latou uarota ma siteki. E manaomia ona tatou fesootai atu i o tatou aa ma lala uma.

(Quentin L. Cook, “O Aa ma Lala,” Ensign po o le Liahona, Me 2014, 45)

Na aoao mai e Peresitene Thomas S. Monson (1927–2018):

E lei ta’uina mai lava e le Alii, i lo’u malamalama, e faapea o Lana galuega e gata i le olaga faaletino. Peitai, o Lana galuega e aofia ai le faavavau. Ou te talitonu o loo Ia faanatinatiina Lana galuega i le lalolagi o agaga. Ou te talitonu foi o le Alii, e ala i Ana auauna iina, o loo sauniaina le tele o agaga e talia le talalelei. O la tatou galuega o le sailia lea o o tatou tagata ua maliliu ona o’o atu lea i le malumalu ma faatino ia sauniga paia o le a tuuina atu ai ia i latou o i tua atu o le veli ia avanoa lava e tasi o loo tatou maua. …

Ou uso e ma tuafafine, ou te molimau atu o le a faamanuiaina i tatou e le Alii ao tatou taliaina ma tali atu i lenei luitau.

(Thomas S. Monson, “Hastening the Work,” Ensign, Iuni 2014, 4–5)

E mafai faapefea ona ou auai i galuega faalemalumalu ma talafaasolopito o aiga?

Ina ia vaai i mea ua aoao mai e Elder David A. Bednar o le Korama a Aposetolo e Toasefululua e uiga i lenei galuega taua, matamata i le “The Time Is Now” (3:19), o loo maua i le ChurchofJesusChrist.org.

Na folafola mai e Peresitene Russell M. Nelson:

Soo se taimi e te faia ai soo se mea e fesoasoani ai i soo se tasi—po o le fea lava le itu o le veli—ia laa agai i luma i le osia o feagaiga ma le Atua ma mauaina o latou sauniga e tatau ai o le papatisoga ma le malumalu, ua e fesoasoani lea e faapotopoto Isaraelu. E faapena lona faigofie.

(Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi aoao, 3 Iuni, 2018], faaopoopoga i le New Era ma le Ensign, 15, ChurchofJesusChrist.org)

E mafai faapefea e galuega o le malumalu ma talafaasolopito o aiga ona faamanuiaina ai a‘u?

I lana savali o le konafesi aoao ia Aperila 2018, sa lisi mai ai e Elder Dale G. Renlund o le Korama a Aposetolo e Toasefululua le tele o faamanuiaga e mafai ona tatou maua mai le auai i galuega o le malumalu ma talafaasolopito o aiga. Matamata i le fuaitau lenei pe faitau le savali atoa (Dale G. Renlund, “Galuega o Talafaasolopito o Aiga ma le Malumalu: Faamauga ma le Faamalologa,” Ensign po o le Liahona, Me 2018, 46–49).

Matamata i le “Faaolaina o E Ua Maliliu ua Togiolaina A‘u” (4:57), o loo maua i le ChurchofJesusChrist.org, e vaai ai pe na faapefea ona faamanuiaina se tagata e toatasi e ala i le auai i lenei galuega.

Galuega Faatino Faaopoopo e Aoao Mai Ai

Tusi se lauga po o se lesona

Ina ia fesoasoani i le vasega e aotele mea sa latou aoaoina e uiga i le galuega o le faaolataga mo e ua maliliu, e mafai ona valaaulia i latou e tusi se lauga puupuu po o se lesona e faaaoga ai upumoni mai le 1 Peteru 3:18 ; 4:6 ; ma le Mataupu Faavae ma Feagaiga 138. E ono mafai foi ona latou faasoa mai ni aafiaga e faatatau i lo latou auai ai i lenei galuega ma le auala na fesoasoani ai ia i latou e latalata atili atu ai i le Alii.

O Tauaiga o Siomia A’u

O se tasi o vaega faatonutonu manaia i le polokalama o le FamilySearch Family Tree e ta‘ua o le “Relatives Around Me.” Afai e tele ni masini o loo matala ai lenei vaega faatonutonu, e mafai e le polokalama ona maua tuaa tutusa i tagata o loo faaaogaina masini. Valaaulia tagata aoga e sue ma tatala “Relatives Around Me” e vaai po o ai i le vasega e fesootai i ai. Atonu e maua ane e tagata aoga e sili atu lo latou vavalalata i o latou sootaga tauaiga nai lo le mea sa latou mafaufauina muamua. Valaaulia tagata aoga e fai paga ma aoao atili e uiga i nisi o o latou tuaa tutusa. Afai e i ai ni tuaa e manaomia ona faatinoina sauniga o le papatisoga ma le faamauga, valaaulia tagata aoga e faaleoleo na igoa ma ave i latou i le malumalu.